Beibel Tin Muchu Restrikshon?

“KOMO mucha, nan no a siña mi ningun norma di Beibel. Nunka nos no tabata papia mes over di Dios,” un yònkuman di Finlandia a konta. E tipo di kriansa ei no ta algu straño awe. Hopi hende, foral hóbennan, ta haña ku Beibel ta sumamente antikuá i ku su konseho ta muchu restriktivo. Den nan bista, personanan ku kier biba segun Beibel ta hende oprimí ku ta hiba un bida kargá ku restrikshon i mandamentu pa kumpli kuné. Pues, hopi ta haña ku ta mihó laga Beibel keda riba rèki i buska guia otro kaminda.

E punto di bista ei tokante Beibel ta debí prinsipalmente na e historia largu di opreshon di parti di religionnan di kristiandat. Por ehèmpel, den e periodo ku algun historiadó a yama e Époka di Skuridat, Iglesia Katóliko na Europa a dominá práktikamente tur aspekto di bida di hende. Ken ku a tribi di bai kontra iglesia a kore e peliger di ser torturá i asta ehekutá. E iglesianan protestant ku a lanta despues tambe a restringí libertat personal. Awe, pa hende ku konosé e religionnan ei, nòmbernan manera “kalvinista” òf “puritano” ta pone nan kòrda no solamente e siguidónan di sierto kreensianan sino tambe e disiplina severo asosiá ku e gruponan ei. Konsekuentemente, pa motibu ku e religionnan tabata opresivo, hende ta konkluí eróneamente ku e siñansanan di Beibel lo mester ta opresivo.

Den siglonan resien, iglesia a pèrdè gran parti di su gara riba bida di hende, por lo ménos den algun pais. Komo konsekuensia di e rechaso di kreensianan religioso tradishonal, a desaroyá e noshon ku hende tin e derecho di disidí pa nan mes loke ta bon i loke ta malu. Ku ki resultado? Ahti Laitinen, un profesor di kriminologia i sosiologia hudisial, ta splika: “Rèspèt pa outoridat a mengua, i hende su komprondementu di loke ta aseptabel i loke no ta aseptabel ta birando mas vago.” Pa straño ku por parse, asta lidernan di iglesia a adoptá e forma di pensa aki. Un obispu luterano prominente a deklará: “Mi tin e tendensia di rechasá e idea di ku pa resolvé kuestionnan moral mester habri Beibel òf akudí na un ke otro outoridat religioso.”

Libertat sin Límite Ta Deseabel?

E idea di por gosa di libertat sin límite por parse algu deseabel, foral pa hóbennan. Ta ken gusta pa ser tratá komo inferior òf biba segun un lista largu di regla tokante kiko mag i kiko no mag? Pero esei ta nifiká ku tur hende mester ta liber pa hasi loke nan ke? Pa kontestá e pregunta aki, pensa riba lo siguiente. Imaginá bo un stat kaminda no tin regla di tráfiko. No tin mester di reibeweis ni pasa eksamen pa kore outo. Hende por kore manera  nan ke, asta ora nan ta burachi, sin tin nodi preokupá ku velosidat máksimo, bòrchi di stòp, lus di tráfiko, kaya di un solo direkshon òf ‘zebrapad.’ Tal “libertat” lo ta deseabel? Klaru ku nò! Esei lo hiba na káos, konfushon i desaster. Ounke reglanan di tráfiko ta restringí hende su libertat, nos ta komprondé ku nan t’ei pa protehá tantu shofùr komo hende na pia.

Asina tambe, Yehova ta duna guia riba kon nos mester biba, i esei ta pa nos benefisio. Sin e guia ei, nos lo tin ku siña dor di purba esaki i purba esaya, i den e proseso ei, nos por hasi daño na nos mes i na otro hende. Tal ambiente di anarkia moral lo ta mesun indeseabel i peligroso ku kore outo den un stat sin regla di tráfiko. Echo ta ku nos mester di regla i lei; esei ta algu ku mayoria hende ta rekonosé mesora.

“Mi Karga Ta Lihé”

Leinan di tráfiko por enserá un lista largu i detayá di regla—den algun stat e kantidat di regla pa parker so kaba ta asombroso. Na kontraste, Beibel no ta stipulá un lista largu di regla. Mas bien, e ta establesé prinsipionan básiko, i esakinan no ta pisá ni opresivo. Hesukristu a ekstendé un invitashon atraktivo na su kontemporáneonan: “Bin serka mi tur ku ta kansá i kargá, i lo mi duna boso sosiegu. Pasobra mi yugo ta suave i mi karga ta lihé.” (Mateo 11:28, 30) Den un karta dirigí na e kongregashon kristian na Korinto, apòstel Pablo a skirbi: “Kaminda e spiritu di SEÑOR ta, ei tin libertat.”—2 Korintionan 3:17.

Sin embargo, e libertat ei no ta sin límite. Hesus a mustra bon kla ku e rekisitonan di Dios ta enserá algun mandamentu simpel. Por ehèmpel, Hesus a bisa su disipelnan: “Esaki ta mi mandamentu, ku boso stima otro meskos ku ami a stima boso.” (Juan 15:12) Imaginá kon bida lo ta si tur hende ta kumpli ku e mandamentu ei! Pues, e libertat ku kristiannan ta disfrutá di dje no ta sin límite. Apòstel Pedro a skirbi: “Aktua komo hende liber, i no usa boso libertat komo un kapa pa maldat, ma us’é komo esklabonan di Dios.”—1 Pedro 2:16.

Pues, maske kristiannan no ta mará na un lista largu di lei, nan no ta aktua a base di nan mes ideanan di loke ta bon i malu. Hende mester di e guia ku Dios so por duna. Beibel ta bisa bon kla: “E kaminda di hende no ta di dje mes; tampoko no ta keda na hende pa dirigí su pasonan.” (Jeremias 10:23) Si nos sigui e guia di Dios, esei lo benefisiá nos hopi.—Salmo 19:11.

Un di e benefisionan ei ta felisidat. Por ehèmpel, e yònkuman menshoná na prinsipio tabata un ladron i un gañadó. Ademas, e tabata hiba un bida parotin. Ora el a siña e normanan haltu di Beibel, el a kambia su estilo di bida i a kuminsá biba segun esakinan.  El a bisa: “Ounke mi no por a kumpli ku tur e normanan di Beibel mesora, mi a mira nan balor sí. E manera ku mi tabata biba ántes no a duna mi e felisidat ku mi tin aworakí. Biba segun normanan di Beibel ta simplifiká bo bida. Bo sa den ki direkshon bo ta bayendo i kiko ta bon i kiko ta malu.”

Miónes di hende tabatin e mesun eksperensia. Un di e benefisionan ta ku e guia ku nan a haña den Beibel a yuda nan disfrutá di mihó relashonnan humano, kultivá un punto di bista balansá di trabou, apstené di kustumbernan ku ta perhudisial i asina hiba un bida mas felis. Markus, * un yònkuman ku un tempu no tabata sigui e normanan di Beibel, a bisa di su bida: “Dor di biba segun Beibel, mi a haña mas rèspèt propio.” *

Kiko Abo Lo Skohe?

Pues Beibel ta pone restrikshon? E kontesta ta sí; esei ta pa benefisio di nos tur. Pero, e ta pone muchu restrikshon? E kontesta ta nò. Libertat sin límite ta hiba solamente na difikultat. E normanan di Beibel ta balansá, i nan ta promové nos bienestar i felisidat. Markus a bisa: “Tempu a demostrá mi ku ta sabí bèrdat pa biba segun e Palabra di Dios. Ounke den hopi sentido mi bida ta diferente for di hende en general, mi no ta pensa ningun momento so ku mi a pèrdè algu ku ta bale la pena den bida.”

Ora bo kuminsá risibí e bendishonnan di biba segun e normanan di Beibel, bo apresio pa e Palabra di Dios lo oumentá. Esaki lo hiba na un bendishon mas grandi ainda; lo bo bin stima Beibel su Fuente Divino, Yehova Dios. “Esaki ta e amor di Dios, ku nos ta warda su mandamentunan; i su mandamentunan no ta pisá.”—1 Juan 5:3.

Yehova ta nos Kreadó i nos Tata selestial. E sa kiko ta mihó pa nos. En bes di restringí nos, e ta duna nos guia amoroso pa nos mes bon. Usando palabranan poétiko, Yehova ta urgi nos: “Mara bo a pone atenshon na mi mandamentunan! E ora ei bo pas lo tabata manera un riu, i bo hustisia manera ola di laman.”—Isaias 48:18.

[Nota]

[Plachi na página 9]

Hesus a bisa ku e rekisitonan di Dios lo ta refreskante

[Plachi na página 10]

Ora hende ta sigui e guia di Dios, nan ta haña felisidat i rèspèt propio