En Buska di Bida Eterno

FOR di un prinsipio humanidat a soña ku e idea di biba pa semper. Pero e soño ei no a bira realidat ainda pasobra ningun hende no a haña un manera pa vense morto. Pero resientemente, estudionan médiko a rebibá e speransa ku ta bien posibel pa alargá bida humano notablemente. Laga nos wak kiko ta tumando lugá riba vários tereno di investigashon sientífiko.

Biólogonan ta eksperimentando ku e enzima telomerase den un intento pa ekstendé e kantidat di biaha ku sèlnan ta reprodusí nan mes. Sientífikonan sa ku e kurpa ta eliminá sèl bieu ku ta deteriorando i remplasá esakinan ku sèl nobo. De echo, gran parti di e kurpa ta ser renobá vários biaha durante un hende su bida. Sientífikonan ta pensa ku si nan por ekstendé e proseso di renobamentu, “e kurpa humano lo por renobá su mes pa un tempu hopi largu—asta pa semper.”

Teorétikamente, klonashon terapéutiko via kua ta optené stamcel di un èmbrio—un ramo kontroversial di investigashon sientífiko—lo por sòru pa pashèntnan haña higra, nir òf kurason nobo i perfektamente kompatibel pa un transplante. Dòkternan lo usa stamcel di e pashènt mes pa traha réplika di e órganonan ei.

Spesialistanan den nanoteknologia—e arte di traha ekipo mikroskópiko sumamente chikitu—ta premirá e tempu ora ku dòkternan lo por hinka robòt tamaño di sèl den e sirkulashon di sanger di un pashènt pa lokalisá i destruí sèlnan kanseroso i bakteria dañino. Algun hende ta pensa ku e ramo di siensia aki, huntu ku terapia di gene, ku tempu lo permití e kurpa humano sostené su mes pa tempu indefiní.

Esnan ku ta na fabor di kriogenisashon ta fris kurpa di hende ku a muri. E idea ta pa konserbá esakinan te ora avansenan den siensia médiko permití dòkternan kura enfermedat, eliminá e efektonan di behes i restorá tantu bida komo salú di e mortonan. E revista American Journal of Geriatric Psychiatry ta yama e konsepto aki “un método moderno ku ta korespondé ku e práktika di e egipsionan di antigwedat di balsamá morto.”

Hende su esfuersonan persistente pa alkansá inmortalidat ta mustra kon difísil ta p’e aseptá e realidat ku un dia lo e muri. Ta realmente posibel pa humanidat alkansá bida eterno? Kiko Beibel ta bisa riba e tópiko aki? E siguiente artíkulo lo kontestá e preguntanan aki.