Kon Nan A Orientá den un Laman Inmenso

E ISLANAN Marshall ta konsistí di mas ku 1.200 isla grandi i chikitu, i mayoria di nan no ta mas haltu ku algun meter riba nivel di laman. Djis despues ku bo alehá un tiki for di nan riba laman ganchu, bo no ta mira nan mas. Anto tòg e antiguo nabegantenan di Marshall den nan kanoanan por a nabegá di un isla chikitu pa otro, hañando nan kaminda den un área di mas o ménos dos mion kilometer kuadrá di Oséano Pasífiko. Kon nan a hasi esei? Nan tabata usa “mapanan” simpel pero remarkablemente efektivo komo guia, e asina yamá mapanan di palitu.

Eksperensia a siña e nabegantenan di Marshall ku presensia di tera firme ta krea sierto patronchinan di ola ku ta revelá ku asta 30 kilometer mas aleu por tin un isla. Nan tabatin ku siña hopi patronchi di ola i e mapanan di palitu a yuda nan kòrda esakinan. Kon e mapanan di palitu tabata? Manera bo por mira riba e plachi, palitunan trahá di rais di palma di pandano òf di blachi di pal’i koko tabata wòrdu mará huntu den forma di trali pa representá patronchi di ola. Nan tabata pega kokolishi pa marka e posishonnan relativo di e islanan.

Pa hopi aña e nabegantenan di Marshall a tene nabegashon ku uso di mapa di palitu un sekreto, i nan tabata revel’é na sierto hende so. Kon un nabegante yòn tabata siña usa un mapa di palitu? Solamente pa medio di entrenamentu i práktika. Un nabegante ku eksperensia tabata siña un hóben personalmente, kisas dor di bai kuné na e islanan den serkania. Segun ku e nabegante hóben tabata siña rekonosé e vários patronchinan di ola, e tabata haña mas konfiansa den uso di su mapa di palitu. Ku tempu e por a nabegá su so riba laman ganchu.

Den e mesun manera, Beibel, e Palabra di Dios, por guia nos rumbo den bida. Na prinsipio, kisas un persona ta yuda nos haña un komprondementu básiko di e Skritura. Anto, segun ku nos ta sigui studia e Palabra di Dios i pone su prinsipionan na práktika, nos ta haña mas konfiansa den loke e ta bisa. Dios a bisa Josué, lider di e israelitanan, pa sigui lesa e Palabra di Dios pa e por a “perkurá di hasi konforme tur loke ta pará skirbí den dje.” Anto el a agregá: “E ora ei lo bo hasi bo kaminda prosperá, i e ora ei lo bo tin éksito.” (Josué 1:8) Sí, Beibel por yuda nos plania un kaminda sigur i eksitoso den bida.

[Plachi na página 32]

© Greg Vaughn