Kurashi Fortifiká pa Amor

“Dios no a duna nos un spiritu di temor, sino di poder i di amor i di sano huisio.”—2 TIMOTEO 1:7.

1, 2. (a) Amor por motivá un persona pa hasi kiko? (b) Dikon Hesus su kurashi tabata eksepshonal?

UN PAREHA resien kasá tabata dùik serka di un pueblito na kosta oriental di Oustralia. Nan tabata a punto di bin ariba ora ku diripiente un tribon blanku grandi a bin riba e muhé. Den un akto heroiko, e hòmber a pusha su kasá un banda i laga e tribon ataká é. “El a entregá su bida pa mi,” e biuda a bisa na su entiero.

² Sí, amor por motivá hende pa demostrá kurashi ekstraordinario. Hesukristu mes a deklará: “Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:13) Ménos ku 24 ora despues ku Hesus a bisa e palabranan aki, el a duna su propio bida, no pa ún hende so, sino pa henter humanidat. (Mateo 20:28) Ademas, Hesus no a entregá su bida komo un akto impulsivo di balentia. E tabata sa di antemano ku lo e ser ridikulisá i maltratá, sentensiá inhustamente i matá riba un staka di tormento. El a asta prepará su disipelnan pa e resultado aki, bisando: “Mira, nos ta bai Yerusalèm, i e Yu di hende lo wòrdu entregá na e saserdotenan prinsipal i eskribanan; i nan lo konden’é na morto, i lo entreg’é na e paganonan. I nan lo hasi bofon di dje i skupi riba dje i sut’é i mat’é.”—Marko 10:33, 34.

3. Kiko a kontribuí na Hesus su gran kurashi?

³ Kiko a kontribuí na Hesus su kurashi ekstraordinario? Fe i temor di Dios a hunga un papel grandi. (Hebreonan 5:7, NW; 12:2) Pero mas ku tur kos, Hesus su kurashi a originá di su amor, tantu pa Dios komo pa su próhimo. (1 Juan 3:16) Si nos kultivá tal amor banda di nos fe i temor di Dios, nos tambe lo por desplegá mesun tipo di kurashi ku Kristu a desplegá. (Efesionan 5:2) Kon nos por desaroyá e klase di amor ei? Nos tin ku rekonosé e Fuente di e amor ei.

“Amor Ta Bin di Dios”

4. Dikon nos por bisa ku ta Yehova ta e Fuente di amor?

⁴ Yehova ta e personifikashon di amor i a la bes e Fuente di amor. Apòstel Juan a skirbi: “Stimánan, laga nos stima otro, pasobra amor ta bin di Dios; i tur ku ta stima ta nasí di Dios i konosé Dios. Esun ku no ta stima no konosé Dios, pasobra Dios ta amor.” (1 Juan 4:7, 8) Pues anto, un persona por kultivá amor manera esun di Dios solamente si e hala serka Yehova mediante konosementu eksakto i aktua a base di e konosementu ei den obedensia sinsero.—Filipensenan 1:9; Santiago 4:8; 1 Juan 5:3.

5, 6. Kiko a yuda Hesus su siguidónan di promé desaroyá e tipo di amor manera esun di Kristu?

⁵ Den Hesus su último orashon ku su 11 apòstelnan fiel, el a mustra e konekshon  entre konosé Dios i krese den amor, bisando: “Mi a hasi bo nòmber konosí na nan i lo mi hasié konosí, pa e amor ku kual bo a stima mi por ta den nan i ami den nan.” (Juan 17:26) Hesus a yuda su disipelnan desaroyá e klase di amor ku tabata eksistí entre é ku su Tata. Mediante Hesus su ehèmpel i su palabranan el a revelá loke e nòmber di Dios ta representá, esta, Dios su kualidatnan maravioso. P’esei Hesus por a bisa: “Esun ku a mira mi a mira e Tata.”—Juan 14:9, 10; 17:8.

⁶ E tipo di amor ei manera esun di Kristu ta un produkto di Dios su spiritu santu. (Galationan 5:22) Ora ku na Pentekòste di aña 33 e kristiannan di promé a risibí e spiritu santu primintí, nan no solamente a kòrda e tantísimo kosnan ku Hesus a siña nan, sino tambe a komprondé mas plenamente e nifikashon di e Skritura. E komprondementu mas profundo aki evidentemente a fortifiká nan amor pa Dios. (Juan 14:26; 15:26) Ku ki resultado? Ku kurashi i entusiasmo nan a prediká e bon nobo, riskando asta nan bida.—Echonan 5:28, 29.

Kurashi i Amor den Akshon

7. Kiko Pablo ku Barnabas tabatin ku soportá durante nan gira komo misionero?

⁷ Apòstel Pablo a skirbi: “Dios no a duna nos un spiritu di temor [“di kobardia,” NW], sino di poder i di amor i di sano huisio.” (2 Timoteo 1:7) Pablo tabata papia di eksperensia personal. Konsiderá loke e ku Barnabas a pasa aden durante e gira ku nan a hasi huntu komo misionero. Nan a prediká den hopi stat, inkluso Antiokia, Ikonio i Listra. Den kada stat, algun hende a bira kreyente, pero otronan a resultá di ta opositornan agresivo. (Echonan 13:2, 14, 45, 50; 14:1, 5) Na Listra, un multitut furioso asta a piedra Pablo, i a bai lag’é pensando ku el a muri! “Ma ora ku e disipelnan a bin para rònt di dje, el a lanta i a bai den stat. I e dia siguiente el a bai Derbe ku Barnabas.”—Echonan 14:6, 19, 20.

8. Kon e kurashi ku Pablo ku Barnabas a demostrá ta reflehá nan amor profundo pa hende?

⁸ Akaso e atentado aki kontra Pablo su bida a spanta e ku Barnabas i pone nan stòp di prediká? Al kontrario! Despues di ‘a hasi hopi hende disipel’ na Derbe, e dos hòmbernan “a bolbe bai Listra i Ikonio i Antiokia.” Pakiko? Afin di enkurashá e kristiannan nobo pa permanesé firme den fe. Pablo ku Barnabas a bisa: “Dor di hopi tribulashon nos mester drenta e reino di Dios.” Ta bisto ku nan kurashi a bin di nan amor profundo pa e “lamchinan” di Kristu. (Echonan 14:21-23; Juan 21:15-17) Despues di a nombra ansianonan den kada un di e kongregashonnan resien formá, e dos rumannan a hasi orashon i ‘a enkomendá nan na Yehova, den kende nan a kere.’

9. Den ki manera e ansianonan di Efeso a reakshoná riba Pablo su amor pa nan?

⁹ Pablo tabata un persona asina amoroso i ku kurashi ku hopi di e kristiannan di promé a haña un amor profundo p’e. Kòrda kiko a tuma lugá na un reunion ku Pablo a tene ku e ansianonan ku a bin di Efeso, kaminda el a pasa tres aña i a eksperensiá hopi oposishon. (Echonan 20:17-31) Despues di a animá nan pa pastoriá e tou ku Dios a konfia na nan, Pablo a hinka rudia i a hasi orashon huntu ku nan. Anto, “nan a kuminsá yora duru i a brasa Pablo i a sunch’é bes tras bes, masha tristu, spesialmente pa e palabra ku el a papia, ku nan lo no mira su kara mas.” Esta un gran amor e rumannan aki tabatin pa Pablo! De echo, ora ku a yega momento pa bai, Pablo ku su kompañeronan di biahe tabatin ku ‘ranka nan mes for di nan,’ [NW] pasobra e ansianonan lokal no kier a laga nan bai.—Echonan 20:36–21:1.

10. Kon Yehova su Testigunan di e tempu aki ku kurashi a desplegá amor pa otro?

¹⁰ Awe, superintendentenan biahero, ansianonan di kongregashon i hopi otro ruman ta ser stimá masha hopi pa e kurashi ku nan ta mustra na fabor di Yehova su karnénan. Por ehèmpel, den paisnan asotá pa guera sivil òf kaminda e trabou di prediká ta prohibí, superintendentenan  biahero i nan esposa a yega di riska nan bida i nan libertat pa por a bishitá e kongregashonnan. Di igual manera, hopi Testigu a sufri na man di gobernantenan agresivo i nan kompinchinan pasobra nan no a traishoná nan rumannan Testigu ni a revelá di unda nan tabata haña kuminda spiritual. Míles di otro kristian a ser persiguí, torturá i asta matá pasobra nan no kier a stòp di prediká e bon nobo òf stòp di asosiá ku nan rumannan den fe na reunionnan kristian. (Echonan 5:28, 29; Hebreonan 10:24, 25) Laga nos imitá e fe i amor di e rumannan hòmber i muhé balente ei!—1 Tesalonisensenan 1:6.

No Laga Bo Amor Fria

11. Den ki maneranan Satanas ta hiba un guera spiritual kontra e sirbidónan di Yehova, i kiko esaki ta rekerí di nan?

¹¹ Ora ku Satanas a ser tirá abou na tera, e tabata determiná pa baha su rabia riba e sirbidónan di Yehova pasobra nan “ta warda e mandamentunan di Dios i [ta duna] e testimonio di Hesukristu.” (Revelashon 12:9, 17) Un di e táktikanan di Diabel ta persekushon. Sin embargo, hopi biaha e strategia aki ta logra nèt lo kontrario di loke Satanas ta deseá pasobra e ta hala Dios su pueblo mas serka di otro den e banchi di amor kristian i ta motivá hopi di nan pa demostrá mas selo. Un otro táktika di Satanas ta pa stimulá nos inklinashonnan humano pekaminoso. Pa resistí e táktika aki nos tin mester di un otro tipo di kurashi pasobra e lucha ku nos tin ta unu interno, kontra mal deseonan ku ta den nos kurason ‘traishonero i korupto.’—Jeremias 17:9; Santiago 1:14, 15.

12. Kon Satanas ta usa “e spiritu di mundu” den su intento pa debilitá nos amor pa Dios?

¹² Den Satanas su arsenal tin un otro arma potente: “e spiritu di mundu.” Esei ta mundu su inklinashon òf motivashon dominante ku ta direktamente kontra di Dios su spiritu santu. (1 Korintionan 2:12) E spiritu di mundu ta fomentá golosidat i materialismo, esta, “deseo di wowo.” (1 Juan 2:16; 1 Timoteo 6:9, 10) Maske kosnan material i plaka riba nan mes no ta hasi daño, si nos amor pa nan mester surpasá nos amor pa Dios, e ora ei Satanas a haña un viktoria. E poder di e spiritu di mundu ta sinta den e echo ku e ta stimulá e karni pekaminoso, e ta sutil, astuto i implakabel, anto meskos ku aire, e ta tur kaminda. No laga e spiritu di mundu kontaminá bo kurason!—Efesionan 2:2, 3; Proverbionan 4:23.

13. Kon nos kurashi pa mantené nos puresa moral por ser poné na prueba?

¹³ Sin embargo, pa nos resistí i rechasá e spiritu malisioso di mundu, nos mester tin kurashi pa mantené nos puresa moral. Por ehèmpel, nos mester tin kurashi pa lanta para i sali for di un teater òf pa paga e kòmpiuter òf  televishon ora imágennan indesente aparesé. Nos mester tin kurashi pa rechasá preshon negativo di nos pareunan i pa kibra ku mal asosiashon. Di igual manera, nos mester tin kurashi pa sostené Dios su lei- i prinsipionan apesar di bofon, sea bofon di kompañeronan di skol, di koleganan di trabou òf di bisiña i famia.—1 Korintionan 15:33; 1 Juan 5:19.

14. Kiko nos mester hasi si e spiritu di mundu a kontaminá nos?

¹⁴ Pues, ta masha importante anto pa nos fortifiká nos amor pa Dios i pa nos rumannan spiritual! Tuma tempu pa saminá bo metanan i bo estilo di bida pa wak si e spiritu di mundu a kontaminá bo den kualke manera. Si esei a sosodé—maske ta un krenchi asina—e ora ei hasi orashon na Yehova i pidié duna bo e kurashi pa saka e spiritu di mundu afó i ten’é afó. Yehova lo no keda sin skucha e petishonnan sinsero ei. (Salmo 51:17) Ademas, su spiritu ta hopi mas poderoso ku esun di mundu.—1 Juan 4:4.

Enfrentá Pruebanan Personal ku Kurashi

15, 16. Kon amor manera esun di Kristu por yuda nos enfrentá pruebanan personal? Duna un ehèmpel.

¹⁵ Otro retonan ku e sirbidónan di Yehova tin ku lucha kuné ta entre otro e efektonan di imperfekshon i behes, ku hopi biaha ta hiba na malesa, desabilidat, depreshon i tantísimo otro problema. (Romanonan 8:22) Amor manera esun di Kristu por yuda nos enfrentá e pruebanan aki ku éksito. Konsiderá e ehèmpel di Namangolwa, kende a lanta den un famia kristian na Zambia. Ora ku Namangolwa tabatin dos aña di edat, el a bira desabilitá. El a konta: “Mi tabata sinti mi masha inkómodo debí na esaki, pensando ku mi aparensia lo spanta hende. Pero mi rumannan spiritual a yuda mi mira e situashon diferente. Komo resultado, mi a superá mi bèrgwensa i ku tempu mi a batisá.”

¹⁶ Ounke Namangolwa tin un ròlstul, hopi biaha e tin ku gatia riba su man i rudia ora ku e ta riba kaminda di tera. Sin embargo, por lo ménos dos biaha pa aña e ta partisipá den e ministerio komo pionero ousiliar. Un doño di kas a yora ora ku Namangolwa a prediká na dje. Dikon? Pasobra el a sintié profundamente konmoví pa nos ruman muhé su fe i kurashi. Prueba di Yehova su bendishon riku ta e echo ku sinku studiante di Beibel di Namangolwa a batisá i ún ta sirbi komo ansiano di kongregashon.  Namangolwa a bisa: “Hopi biaha mi tin masha hopi doló di pia, pero mi no ta laga esei stòp mi.” E ruman muhé aki ta djis ún di e tantísimo Testigunan ku tin rònt mundu kendenan ta físikamente suak pero poderoso den spiritu debí na nan amor pa Dios i pa próhimo. Esta presioso tur e personanan ei ta den bista di Yehova!—Hageo 2:7.

17, 18. Kiko ta yuda hopi ruman soportá malesa i otro pruebanan? Duna algun ehèmpel lokal.

¹⁷ Malesa króniko tambe por desanimá nos, asta hasi nos deprimí. Un ansiano di kongregashon a konta: “Den e grupo di estudio di buki kaminda mi ta asistí tin un ruman muhé ta sufri di diabétis i ta pashènt di nir, unu tin kanser, dos tin artrítis severo i unu tin lúpus plùs fibromialgia [un forma di reumatismo]. Tin biaha nan ta sinti nan desanimá. Sin embargo, nan ta pèrdè reunion solamente ora nan ta hopi malu òf den hospital. Nan tur ta regular den sirbishi di vèlt. Nan ta laga mi kòrda riba Pablo, kende a bisa: ‘Ora mi ta débil, e ora ei mi ta fuerte.’ Mi ta atmirá nan amor i nan kurashi. Podisé nan situashon ta duna nan un bista mas kla riba bida i riba loke ta realmente importante.”—2 Korintionan 12:10.

¹⁸ Si bo ta lucha kontra debilidat físiko, malesa òf kualke otro problema, “hasi orashon sin stòp,” pidiendo Dios su yudansa ya bo no ta bira víktima di desanimashon. (1 Tesalonisensenan 5:14, 17) Naturalmente, lo bo tin bo ‘ups and downs’ den sentido emoshonal, pero purba enfoká riba kosnan spiritual i positivo, spesialmente riba nos presioso speransa di Reino. Un ruman muhé a bisa: “Pa mi, sirbishi di vèlt ta mi terapia.” Kompartiendo e bon nobo ku otro hende ta yud’é mantené un punto di bista positivo.

Amor Ta Yuda Esnan Ku A Hasi Malu pa Bolbe Serka Yehova

19, 20. (a) Kiko lo por yuda personanan ku a kai den piká pa haña e kurashi pa bolbe serka Yehova? (b) Kiko nos lo konsiderá den e siguiente artíkulo?

¹⁹ Pa hopi persona ku a bira suak spiritualmente òf ku a kometé piká no ta fásil pa nan bolbe serka Yehova. Pero nan lo haña e kurashi nesesario si nan repentí di kurason i rebibá nan amor pa Dios. Tuma e kaso di Mario, * kende ta biba na Merka. Mario a bandoná e kongregashon kristian, bira un alkohóliko i drogadikto i, despues di 20 aña, a kai será. Mario a konta: “Mi a kuminsá pensa profundamente riba mi futuro i a bolbe kuminsá lesa Beibel. Ku tempu, mi a bin apresiá Yehova su kualidatnan, spesialmente su miserikòrdia, lokual mi a pidié hopi biaha den orashon. Despues ku mi a sali for di prizon, mi a keda leu for di mi amistatnan bieu, mi a bai e reunionnan kristian i ku tempu a ser restorá. Físikamente, mi ta kosechando loke mi a sembra, pero awor por lo ménos mi tin un speransa maravioso. Mi no tin boka pa gradisí Yehova pa su kompashon i pordon.”—Salmo 103:9-13; 130:3, 4; Galationan 6:7, 8.

²⁰ Un kos ta sigur, personanan den situashonnan similar na esun di Mario tin ku traha duru pa bolbe serka Yehova. Pero e amor ku nan a rebibá—mediante estudio di Beibel, orashon i meditashon—lo duna nan e kurashi i determinashon nesesario. Mario a ser fortifiká tambe dor di e speransa di Reino. Sí, huntu ku amor, fe i temor di Dios, speransa por ta un forsa poderoso ku ta benefisiá nos bida. Den e siguiente artíkulo, nos lo analisá e presioso don spiritual aki mas djaserka.

[Nota]

Bo Por Kontestá Esaki?

• Kon amor a kontribuí na Hesus su kurashi ekstraordinario?

• Kon amor pa e rumannan a duna Pablo ku Barnabas un kurashi eksepshonal?

• Mediante kiko Satanas ta purba kaba ku amor kristian?

• Amor pa Yehova por duna nos e kurashi pa soportá ki tipo di pruebanan?

[Preguntanan di Estudio]

[Plachi na página 23]

Pablo su amor pa hende a dun’é e kurashi pa perseverá

[Plachi na página 24]

Nos tin mester di kurashi pa sostené Dios su normanan

[Plachi na página 24]

Namangolwa Sututu