Pregunta di Lektor

Dikon e Tradukshon di Mundu Nobo ta bisa na Deuteronomio 31:2 ku Moisés ‘no tabatin mag di sali i drenta mas’ komo lider di Israel, miéntras ku otro tradukshonnan di Beibel ta indiká ku e no tabata por, esta, e no tabata kapas, pa hasi esei?

Ounke por tradusí e palabra hebreo en kuestion na ámbos manera, e tradukshon den algun Beibel ta duna e idea ku na fin di su bida, Moisés tabata suak, físikamente inkapas pa kumpli ku su responsabilidatnan komo lider. Por ehèmpel, Beibel na papiamentu koriente ta sita Moisés su palabranan asin’aki: “Aworakí mi tin 120 aña i apénas mi ta den kondishon pa hasi algu.”

Sin embargo, Deuteronomio 34:7 ta mustra ku maske Moisés tabata di edat avansá, e no tabata físikamente suak. E versíkulo ta bisa: “Moisés tabatin shentibinti aña dia ku el a muri. Su wowonan nunka no a bira skur, ni e no a pèrdè su vigor.” Pues, Moisés tabata físikamente kapas pa guia e nashon, pero no tabata Yehova su boluntat p’e sigui hasi esei. Esaki ta bisto for di loke Moisés a sigui bisa: “Yehova a bisa mi: ‘Lo bo no krusa e Hordan aki.’” Aparentemente, Yehova a ripití loke el a dekretá na e awanan di Meribá.—Numbernan 20:9-12.

Moisés tabatin un bida largu i remarkabel ku nos por parti den tres periodo. Pa 40 aña el a biba na Egipto, kaminda el a wòrdu “eduká den tur e siñansa di e egipsionan, i e tabata un hòmber di poder den palabra i echo.” (Echonan 7:20-22) El a biba un 40 aña na Madian. Einan el a kultivá e kualidatnan spiritual nesesario pa guia Yehova su pueblo. Por último, pa 40 aña Moisés a guia i goberná e israelitanan. Pero awor Yehova a disidí ku ta Josué, no Moisés, lo a guia e nashon pa krusa Riu Hordan i drenta e Tera Primintí.—Deuteronomio 31:3.

Pues, e Tradukshon di Mundu Nobo ta ekspresá e nifikashon korekto di Deuteronomio 31:2. Moisés lo no a sigui komo lider di Israel mas, no pasobra e tabata físikamente suak, sino pasobra Yehova no a permitié hasi esei.