Spera den Yehova i Tene Kurashi

“Spera den Yehova; tene kurashi i laga bo kurason sea fuerte. Sí, spera den Yehova.”—SALMO 27:14, NW.

1. Kon importante speransa ta, i kon e ekspreshon aki ta ser usá den e Skritura?

BERDADERO speransa ta manera un lus briante. E ta yuda nos mira mas ayá di nos difikultatnan aktual i enfrentá futuro ku kurashi i goso. Ta Yehova so por duna nos un speransa sigur, i e ta hasié tambe mediante su Palabra inspirá. (2 Timoteo 3:16) De echo, e palabranan “spera” i “speransa” ta aparesé hopi biaha den Beibel i ta referí na e ekspektativa sigur i ku anhelo di un kos bon. Tambe e ta referí na e kos riba kua bo ekspektativa ta basá. * E tipo di speransa ei ta hopi mas ku simplemente un deseo ku nos ta ekspresá ku kisas no tin ningun base ni e posibilidat di kumpli.

2. Kon speransa a influensiá Hesus su bida?

² Ora ku Hesus tabata konfrontá prueba i difikultat, el a wak mas ayá di e sufrimentu di e momento ei i a pone su speransa den Yehova. “Pa motibu di e goso poní su dilanti, [el] a soportá e sufrimentu di [“un staka di tormento,” NW] sin hasi kaso di bèrgwensa, i a sinta na man drechi di e trono di Dios.” (Hebreonan 12:2) Komo ku Hesus a enfoká kompletamente riba e prospekto di vindiká Yehova su soberania i santifiká Dios su nòmber, e no a desviá ningun momento for di su kaminda di obedensia na Dios, sin importá ki konsekuensianan esei tabatin p’e.

3. Ki papel speransa ta hunga den bida di sirbidónan di Dios?

³ Rei David a menshoná e konekshon entre speransa i kurashi, bisando: “Spera den Yehova; tene kurashi i laga bo kurason sea fuerte. Sí, spera den Yehova.” (Salmo 27:14, NW) Si nos kier pa nos kurason ta fuerte, nunka nos no mester laga nos speransa bira wazig, mas bien semper nos mester ten’é bon kla den nos mente i pegá na nos kurason. Hasiendo esei lo yuda nos imitá Hesus i manifestá kurashi i selo segun ku nos ta partisipá den e trabou ku el a enkargá na su disipelnan. (Mateo 24:14;  28:19, 20) De echo, den Beibel speransa ta ser menshoná huntu ku fe i amor komo un kualidat masha importante i duradero ku ta karakterisá e bida di sirbidónan di Dios.—1 Korintionan 13:13.

Bo Ta “Abundá den Speransa”?

4. Kiko kristiannan ungí i nan kompañeronan, e “otro karnénan,” ta spera ansiosamente?

⁴ E pueblo di Dios tin un futuro maravioso nan dilanti. Kristiannan ungí ta spera ansiosamente di sirbi huntu ku Kristu den shelu, miéntras ku e “otro karnénan” tin e speransa di “wòrdu librá for di . . . sklabitut na korupshon pa drenta den e libertat glorioso di e yunan [terenal] di Dios.” (Juan 10:16; Romanonan 8:19-21; Filipensenan 3:20) E “libertat glorioso” ei ta enserá ser librá for di piká i su konsekuensianan horibel. Bon mirá, Yehova—e Dunadó di “tur bon regalo i tur don perfekto”—lo no duna nada ménos ku lo mihó na su sirbidónan leal.—Santiago 1:17; Isaias 25:8.

5. Kon nos ta logra “abundá den speransa”?

⁵ Kon grandi e papel di speransa kristian mester ta den nos bida? Na Romanonan 15:13 nos ta lesa: “Ku e Dios di speransa yena boso ku tur goso i pas den kerementu, pa boso por abundá den speransa pa medio di e poder di spiritu santu.” Sí, nos por kompará speransa, no ku un bela den skuridat, sino ku e rayonan briante di solo di mainta. E ta yena nos bida ku pas, felisidat, propósito i kurashi. Tuma nota ku nos ta “abundá den speransa” ora ku nos ta kere Dios su Palabra skirbí i ta haña su spiritu santu. Romanonan 15:4 ta bisa: “Tur loke a wòrdu skirbí promé ayá a wòrdu skirbí pa nos instrukshon, pa dor di perseveransia i e enkurashamentu di Skrituranan nos por tin speransa.” Pues puntra bo mes: ‘Mi ta tene mi speransa bibu dor di ser un bon studiante di Beibel, lesand’e tur dia? Mi ta pidi Dios regularmente pa duna mi su spiritu?’—Lukas 11:3.

6. Pa mantené nos speransa bibu, kiko nos tin ku tene kuidou kuné?

⁶ Hesus, nos Gran Ehèmpel, a saka hopi fortalesa for di e Palabra di Dios. Ora nos ta meditá riba Hesus ku sumo kuidou i atenshon, nos ta evitá ku nos ta “kansa i pèrdè ánimo.” (Hebreonan 12:3) Ta lógiko ku si e speransa ku Dios a duna nos mester bira skur den nos mente i kurason òf si nos bai enfoká riba otro kos—podisé riba kosnan material òf metanan di mundu—den poko tempu nos lo kansa den sentido spiritual. Ku tempu esei lo pone nos pèrdè e fortalesa i kurashi pa biba segun prinsipionan moral. Den e kondishon ei, nos por asta “noufragá enkuanto [nos] fe.” (1 Timoteo 1:19) Di otro banda, berdadero speransa ta fortifiká nos fe.

Speransa Ta Esensial pa Fe

7. Den ki manera speransa ta esensial pa fe?

⁷ Beibel ta bisa: “Fe ta e siguransa di kosnan ku hende ta spera, e konvikshon di kosnan ku hende no ta mira.” (Hebreonan 11:1) Pues, speransa no ta djis algu ku ta kompañá fe; e ta un parti esensial di fe. Tuma por ehèmpel Abraham. For di un punto di bista humano, e ku su kasá, Sara, a pasa nan edat di haña yu ora ku Yehova a primintí nan un heredero. (Génesis 17:15-17) Kon Abraham a reakshoná? “Ounke e tabata mas ayá di speransa, tòg basá riba speransa e tabatin fe, ku e por bira tata di hopi nashon.” (Romanonan 4:18, NW) Sí, ta e speransa ku Dios a duna Abraham a perkurá un base firme pa su fe ku lo e haña un yu. Su fe, en buèlta, a hasi su speransa mas bibu i fuerte. Figura bo, Abraham ku Sara tabatin asta e kurashi di bandoná nan kas i nan famianan i biba e restu di nan bida den tènt den un pais stranhero!

8. Kon fiel perseveransia ta fortifiká speransa?

⁸ Abraham a mantené su speransa bibu dor di obedesé Yehova inkondishonalmente, asta ora ku tabata difísil pa hasi esei. (Génesis 22:2, 12) Di igual manera, si nos ta obedesé Yehova i perseverá den su sirbishi, nos por tin sigur di nos rekompensa. Pablo a skirbi ku “perseveransia” ta resultá den “karakter” [òf, “un kondishon aprobá” NW], lokual na su turno ta produsí speransa, “i speransa no ta desapuntá.”  (Romanonan 5:4, 5) Ta p’esei Pablo a skirbi tambe: “Nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin.” (Hebreonan 6:11) Un punto di bista positivo asina, ku ta basá riba un relashon íntimo ku Yehova, por yuda nos enfrentá kualke difikultat ku kurashi, i asta ku goso.

‘Alegrá den Speransa’

9. Hasiendo kiko ku regularidat por yuda nos ‘alegrá den speransa’?

⁹ E speransa ku Dios a duna nos ta infinitamente superior na kualke kos ku mundu por ofresé. Salmo 37:34 ta bisa: “Spera riba SEÑOR i sigui su kaminda, i e lo halsa bo pa heredá e tera; ora ku e malbadonan wòrdu kòrta kitá afó, abo lo mira esaki.” Sí, nos tin tur motibu pa alegrá òf ‘regosihá den speransa.’ (Romanonan 12:12) Sin embargo, pa por hasi esei nos tin ku mantené nos speransa bibu den nos mente. Abo ta reflekshoná ku regularidat riba e speransa ku Dios a duna bo? Bo por mira bo mes den Paradeis, gosando di bon salú, liber di inkietut, rondoná pa hendenan ku bo stima i hasiendo trabou ku ta duna bo berdadero satisfakshon? Bo ta meditá riba e esenanan di Paradeis ku ta sali den nos publikashonnan? Nos por kompará tal meditashon regular ku e limpiamentu di un bentana ku ta duna nos un bista riba un esena magnífiko. Si nos neglishá di limpia e bentana, den poko tempu stòf i sushi lo stroba nos di tin un bista kla di e esena atraktivo. E ora ei otro kosnan lo por kapta nos atenshon. Laga nos nunka permití esei sosodé!

10. Dikon e echo ku nos ta antisipá e rekompensa ta un indikashon di nos bon relashon ku Yehova?

¹⁰ Klaru ku e motibu prinsipal pakiko nos ta sirbi Yehova ta nos amor p’e. (Marko 12:30) Pero huntu ku esei, nos mester spera ansiosamente riba e rekompensa. De echo, Yehova ta ferwagt ku nos ta hasi esei! Hebreonan 11:6 ta bisa: “Sin fe ta imposibel pa agrad’é, pasobra esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” Dikon Yehova ke pa nos mir’é komo Esun ku ta duna rekompensa? Pasobra ora nos ta mir’é asina, nos ta demostrá ku nos konosé nos Tata selestial bon. E ta un Tata generoso i ta stima su yunan. Imaginá bo kon infelis nos lo tabata i kon fásil nos lo a desanimá si nos no tabatin “un futuro i un speransa.”—Jeremias 29:11.

11. Kon e speransa ku Dios a duna Moisés a yud’é tuma desishonnan sabí?

¹¹ Un ehèmpel sobresaliente di un persona ku a sigui enfoká riba e speransa ku Dios a dun’é tabata Moisés. Komo “yu di e yu muhé di fárao,” Moisés tabatin poder, prestigio i e rikesanan di Egipto na su disposishon. Lo el a kore tras di e kosnan aki, òf lo el a sirbi Yehova? Ku kurashi Moisés a skohe pa sirbi Yehova. Dikon?  Pasobra “e tabata fiha su bista riba e rekompensa di den futuro.” (Hebreonan 11:24-26, BPK) Sí, Moisés sigur no tabatin un aktitut di no a preokupá ku e speransa ku Yehova a pone su dilanti.

12. Dikon speransa kristian ta manera un hèlm?

¹² Apòstel Pablo a kompará speransa ku un hèlm. Nos hèlm figurativo ta protehá nos mente i asina ta kapasitá nos pa tuma desishonnan sabí, fiha prioridatnan ku ta reflehá sano huisio i mantené integridat. (1 Tesalonisensenan 5:8) Bo tin bo hèlm figurativo henter ora bistí? Si ta asina, e ora ei meskos ku Moisés i Pablo, lo bo no fiha bo speransa “riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.” Ta bèrdat ku bo mester tin kurashi pa no aseptá tendensianan popular i pa bira lomba pa aktividatnan egoista, pero ta bale la pena! De echo, pakiko lo bo aseptá kualke kos ku ta ménos ku e “bida berdadero” ku tin wardá pa esnan ku ta pone nan speransa den Yehova i ta stim’é?—1 Timoteo 6:17, 19.

“Nunka Lo Mi No Bandoná Bo”

13. Ki siguransa Yehova ta duna su sirbidónan leal?

¹³ Hende ku ta pone nan speransa den e mundu aktual mester pensa seriamente riba e kosnan teribel ku nan ta bai konfrontá segun ku mundu ta sufri mas i mas ‘doló di parto,’ esta, doló di angustia. (Mateo 24:8) Pero esnan ku ta pone nan speransa den Yehova no tin tal temor. Nan lo sigui “biba trankil, sin miedu di maldat.” (Proverbionan 1:33) Komo ku nan speransa no ta den e mundu aktual, gustosamente nan ta hasi kaso di Pablo su konseho: “Laga boso karakter ta liber di amor pa plaka i sea kontentu ku loke boso tin; pasobra e mes a bisa: ‘Nunka lo mi no bandoná bo, i nunka lo mi no laga bo desampará.’”—Hebreonan 13:5.

14. Dikon kristiannan no mester ta indebidamente preokupá tokante nan nesesidatnan material?

¹⁴ E ekspreshon kategóriko “nunka,” no ta laga ningun duda ku Dios lo perkurá pa nos. Hesus tambe a sigurá nos di Dios su interes amoroso, bisando: “Ma buska promé e reino di Dios i su hustisia, i tur e kosnan aki [e nesesidatnan material di bida] lo wòrdu añadí na boso. P’esei, no preokupá boso mes pa e dia di mañan . . . Kada dia tin sufisiente problema di su mes.” (Mateo 6:33, 34) Yehova sa ku ta difísil pa nos ta seloso pa su Reino i na mesun tempu karga e pleno responsabilidat di perkurá pa nos nesesidatnan físiko. P’esei laga nos pone nos pleno konfiansa den su kapasidat i deseo di perkurá pa nos nesesidatnan.—Mateo 6:25-32; 11:28-30.

15. Kon kristiannan ta mantené un ‘wowo simpel’?

¹⁵ Nos ta demostrá ku nos ta stèns riba Yehova ora ku nos ta mantené un ‘wowo simpel.’ (Mateo 6:22, 23, NW) Un wowo simpel ta sinsero, ku motivashon puru i liber di golosidat i ambishon egoista. E echo ku nos tin un wowo simpel no ke men ku nos mester biba den pobresa ekstremo òf neglishá di atendé nos responsabilidatnan kristian. Al kontrario, e ta nifiká demostrá “sano huisio” segun ku nos ta pone sirbimentu di Yehova na promé lugá.—2 Timoteo 1:7.

16. Dikon fe i kurashi ta nesesario pa mantené un wowo simpel?

¹⁶ Pa mantené un wowo simpel nos mester tin fe i kurashi. Por ehèmpel, si bo doño di trabou ta insistí pa bo traha ku regularidat na un ora ku ta programá pa reunionnan kristian, lo bo demostrá kurashi i pega na bo prioridatnan spiritual? Si un persona ta duda ku Yehova lo kumpli ku Su promesa di perkurá pa Su sirbidónan, Satanas e ora ei simplemente tin ku sigui pone preshon i e persona ei lo stòp di asistí na tur reunion mes. Sí, un falta di fe di nos parti por laga Satanas haña un gara riba nos di tal manera ku ta é, no Yehova, ta fiha nos prioridatnan. Ki un tragedia esei lo ta!—2 Korintionan 13:5.

‘Spera den Yehova’

17. Kon e personanan ku ta konfia den Yehova ta bendishoná for di awor?

¹⁷ E Skritura ta mustra bes tras bes ku e personanan ku pone nan speransa den Yehova i ta konfia den dje nunka ta sali pèrdí.  (Proverbionan 3:5, 6; Jeremias 17:7) Ta bèrdat ku tin biaha nan lo tin ku keda kontentu ku ménos komodidat material, pero nan ta konsiderá esaki un sakrifisio chikí na komparashon ku e bendishonnan ku ta warda nan. Pues nan ta demostrá ku nan ta ‘spera den Yehova’ i ku nan tin e konfiansa ku den futuro lo e duna su sirbidónan leal tur e deseonan hustu di nan kurason. (Salmo 37:4, 34) P’esei, nan ta realmente felis for di awor. “E speransa di e hustu ta alegria, ma e ekspektativa di e malbado lo peresé.”—Proverbionan 10:28.

18, 19. (a) Ki garantia amoroso Yehova ta duna nos? (b) Kon nos ta mantené Yehova na nos “man drechi”?

¹⁸ Ora ku un mucha hòmber chikitu ta kana ku man di su tata tené, e ta sintié safe i sigur. Nos tambe ta sinti nos asina segun ku nos ta kana ku nos Tata selestial. Yehova a bisa Israel: “No tene miedu, pasobra mi ta ku bo . . . Sí, lo mi yuda bo . . . Pasobra ami ta SEÑOR bo Dios, kende ta sostené bo man drechi, kende ta bisa bo: ‘No tene miedu, lo mi yuda bo.’”—Isaias 41:10, 13.

¹⁹ Ki un kuadro konmovedor esei ta deskribí: Yehova ta kohe bo man tene! David a skirbi: “Mi a pone SEÑOR semper mi dilanti; pasobra e ta na mi man drechi, lo mi no wòrdu moví.” (Salmo 16:8) Kon nos ta mantené Yehova na nos “man drechi”? Nos ta hasi esei den por lo ménos dos manera. Na promé lugá, nos ta laga su Palabra guia nos den tur aspekto di bida; i na di dos lugá, nos ta enfoká riba e premio glorioso ku Yehova a pone nos dilanti. Salmista Asaf a kanta: “Mi ta konstantemente serka bo; bo a kohe mi man drechi tene. Ku bo konseho lo bo guia mi, i despues risibí mi den gloria.” (Salmo 73:23, 24) Ku un garantia asina, nos realmente por enfrentá futuro ku konfiansa.

“Boso Redenshon Ta Yegando Serka”

20, 21. Ki futuro ta warda e personanan ku ta pone nan speransa den Yehova?

²⁰ Kada dia ku pasa, ta bira mas urgente pa nos mantené Yehova na nos man drechi. Denter di poko, kuminsando ku destrukshon di religion falsu, Satanas su mundu lo eksperensiá un tribulashon ku nunka el a yega di eksperensiá. (Mateo 24:21) Miedu lo poderá di humanidat sin fe. Sin embargo, durante e tempu di káos ei, Yehova su sirbidónan balente lo alegrá den nan speransa! Hesus a bisa: “Ora ku e kosnan aki kuminsá tuma lugá, wak ariba i lanta boso kabes, pasobra boso redenshon ta yegando serka.”—Lukas 21:28.

²¹ P’esei laga nos alegrá den e speransa ku Dios a duna nos i no laga Satanas su distraishonnan astuto gaña nos ni tenta nos. Na mesun tempu, laga nos traha duru pa kultivá fe, amor i temor di Dios. Si nos hasi esaki, nos lo tin e kurashi pa obedesé Yehova bou di tur sirkunstansia i resistí e Diabel. (Santiago 4:7, 8) Sí, ‘sea fuerte i fortalesé boso kurason, boso tur ku ta spera den Yehova.’—Salmo 31:24.

[Nota]

Bo Por Kontesta Esaki?

• Den ki manera Hesus su speransa a kontribuí na su kurashi?

• Kon fe i speransa ta konektá ku otro?

• Kon speransa huntu ku fe por duna un kristian e kurashi pa fiha prioridatnan sano den bida?

• Dikon e personanan ku ta “spera den Yehova” por mira futuro ku konfiansa?

[Preguntanan di Estudio]

[Plachi na página 28]

Sea bo ta hóben òf bieu, bo por mira bo mes den Paradeis?