Historia di Bida

Yehova A Yuda Mi Enfrentá e Retonan di Bida

SEGUN E RELATO DI DALE IRWIN

“OCHO TA BASTA! ‘VIERLING’ TA DÒBEL TRABOU.” Asina e titular di un korant lokal a anunsiá nasementu di un vierling den nos famia ku tabatin kuater yu muhé kaba. Tempu mi tabata yònkuman, mi no tabatin ningun intenshon di kasa, muchu ménos haña yu. Pero ata mi awor, tata di ocho yu!

MI A nase na 1934 den e pueblo di Mareeba, Oustralia. Mi tabata esun di mas chikitu den nos tres rumannan. Despues mi famia a muda bai Brisbane, kaminda mi mama tabata duna lès na un zondagschool di e iglesia metodista.

Na kuminsamentu di 1938, korantnan lokal a informá ku posiblemente outoridatnan lo no a bai laga Joseph F. Rutherford, di e sede mundial di Testigunan di Yehova, drenta Oustralia. Mi mama a puntra un Testigu ku a bishitá nos kas poko despues: “Pakiko nan no ke pa e bini?” E Testigu a kontestá: “Hesus no a bisa ku hende lo persiguí su siguidónan?” E ora ei mi mama a aseptá e foyeto chikitu Kurashon, ku a splika hopi di e diferensianan entre religion berdadero i falsu. * Mi mama a keda impreshoná ku e foyeto i e siguiente djadumingu el a bai ku nos—ami ku mi dos rumannan—na un reunion di Testigunan di Yehova. Na promé instante mi tata a oponé fuertemente, pero de bes en kuando e tabata skirbi un par di pregunta bíbliko pa mi mama duna un di e rumannan. E ruman, na su turno, tabata skirbi e kontestanan bíbliko pa mi mama duna mi tata.

 Riba un djadumingu mi tata a bai e reunion ku nos ku e intenshon di ekspresá su disgustu ku e Testigunan. Sin embargo, despues ku mi tata a papia ku e superintendente di sirkuito kende tabata bishitando e kongregashon e tempu ei, su aktitut a kambia i asta el a permití pa nos kas ser usa komo un sentro pa estudio semanal di Beibel, na kua personanan interesá den nos área tabata asistí.

Na sèptèmber 1938, mi mayornan a batisá. Ami ku mi rumannan a batisá na desèmber 1941 na un kongreso nashonal tené na Hargreave Park na Sydney, New South Wales. E tempu ei mi tabatin shete aña di edat. Despues di esei mi tabata partisipá regularmente den sirbishi di vèlt ku mi mayornan. Den e tempu ei, e Testigunan tabata bai ku tokadisko portátil di kas pa kas i pasa diskurso bíbliko grabá pa e hendenan tende.

Un di e Testigunan ku te ainda mi ta kòrda hopi bon ta Bert Horton. E tabatin un outo ekipá ku un amplifier poderoso i un spiker grandi montá riba e dak. Tabata eksitante pa traha ku Bert, foral pa un hobensitu di mi edat. Por ehèmpel, ora e tabata toka un diskurso bíbliko for di riba tòp di un seritu, hopi biaha nos tabata mira un outo di polis subi bini den nos direkshon. Mesora Bert tabata paga su ekipo, kore bai na un otro seritu vários kilometer leu i pasa un otro diskurso. Mi a siña hopi tokante konfia den Yehova i tene kurashi for di Bert i otro rumannan leal i balente manera e.—Mateo 10:16.

Tempu mi tabatin 12 aña di edat, mi tabata prediká regularmente mi so despues di skol. Na un okashon, mi a topa un famia ku yama Adshead. Ku tempu, ámbos mayor, nan ocho yunan i hopi nietu a siña e bèrdat. Mi ta gradisí Yehova ku el a permití mi, un simpel mucha hòmber, introdusí e bèrdat di Beibel na e ekselente famia aki.—Mateo 21:16.

Privilegionan di Sirbishi na un Edat Yòn

Ku 18 aña di edat mi a bira un pionero, un predikadó di tempu kompletu, i a ser asigná na Maitland, New South Wales. Na 1956, nan a invitá mi pa bin sirbi na e sukursal di Oustralia na Sydney. Di e personal di 20 persona, un di kada tres miembro tabata ungí, ku e speransa di goberná ku Kristu den su Reino selestial. Tabata un privilegio pa traha huntu ku nan.—Lukas 12:32; Revelashon 1:6; 5:10.

Mi determinashon pa keda soltero a kaba na nada dia mi a topa Judy Helberg, un ruman muhé pionero atraktivo ku a ser invitá na e sukursal temporalmente pa yuda mi ku un proyekto grandi. Ami ku Judy a namorá di otro i dos aña despues nos a kasa. Despues di esei, nos a kuminsá e trabou di sirkuito, ku a enserá bishitá un kongregashon di Testigunan di Yehova tur siman pa animá e rumannan.

Na 1960, Judy a duna lus na nos promé yu muhé, Kim. Awe, si bo haña un yu lo bo tin ku bandoná e trabou di sirkuito i establesé bo mes un kaminda. Pero pa nos gran sorpresa, nan a invitá nos pa sigui bishitá e kongregashonnan. Despues di hopi orashon, nos a aseptá e invitashon, i pa e siguiente shete lunanan, Kim a biaha 13.000 kilometer huntu ku nos den bùs, avion i trein segun ku nos a sirbi kongregashonnan ku tabata keda hopi leu na Queensland i Teritorio di Nort. E tempu ei nos no tabatin outo.

Semper nos tabata keda na kas di e rumannan. Pa motibu di e klima tropikal, den e tempu  ei kambernan di drumi por lo general tabatin kortina en bes di porta, lokual a duna nos mas strès ora Kim tabata yora anochi. Ku tempu e responsabilidat di perkurá pa un beibi i pa nos asignashon a resultá muchu difísil. P’esei nos a establesé nos mes na Brisbane, i mi a kuminsá traha bòrchi di propaganda, un tipo di arte komersial. Dos aña despues di Kim su nasementu, nos a haña un otro yu muhé, Petina.

Kon Nos A Trata ku Tragedia

Na 1972, ora mi yu muhénan tabatin 12 i 10 aña di edat, Judy a fayesé di e enfermedat di Hodgkin, un tipo di tumor maligno. E pèrdida aki tabata kasi insoportabel pa nos famia. No opstante, durante Judy su enfermedat i despues di su morto, Yehova a konsolá nos pa medio di su Palabra, su spiritu santu i e hermandat. E Toren di Vigilansia ku nos a risibí djis despues di e morto di mi kasá tambe a fortalesé nos. E tabatin un artíkulo ku a trata ku pruebanan personal, inkluso morto di un ser kerí, i a mustra kon pruebanan por yuda nos desaroyá kualidatnan piadoso, manera perseveransia, fe i integridat. *—Santiago 1:2-4.

Despues di Judy su morto, ami ku mi yu muhénan a sera hopi mas ku otro. Pero mi tin ku atmití ku tabata un lucha pa kumpli ku e papel di tantu tata komo mama. Sin embargo, mi dos prendanan a hasi e trabou hopi mas fásil.

Kasa di Nobo i un Famia Mas Grandi

Ku tempu, mi a bolbe kasa. Ami ku Mary, mi kasá nobo, tabatin hopi kos en komun. E tambe a pèrdè su kasá pa motibu di e malesa di Hodgkin. E tambe tabatin dos yu muhé, esta, Colleen i Jennifer. Colleen tabata mas o ménos tres aña mas yòn ku Petina. P’esei nos famia tabata konsistí awor di kuater yu muhé, di 14, 12, 9 i 7 aña di edat.

Ami ku Mary a disidí ku na prinsipio nos kada un lo a disipliná su mes yunan biológiko te ora e otro yunan a sinti nan mas konfortabel pa aseptá òrdu di e mayor di kriansa. Den nos mes relashon di esposo i esposa, ami ku Mary tabatin dos regla importante. Unu, nunka nos tabata atendé nos diferensianan di opinion den presensia di e muchanan, i dos, na armonia ku e prinsipio di Beibel ku tin pará skirbí na Efesionan 4:26, nos tabata papia te ora nos a resolvé asuntunan—maske esei a tuma oranan!

Pa mi sorpresa, tur miembro a ahustá su mes na e bida di un famia di kriansa, pero e rekuerdonan di nos sernan kerí ku a bai laga nos si no a disparsé di un dia pa otro. Por ehèmpel, djaluna anochi a bira Mary su “anochi pa yora.” Despues di nos estudio di famia, ora e muchanan a bai drumi, hopi biaha Mary tabata deshogá su sintimentunan ku e tabatin wantá paden.

Mary tabata ke pa nos dos haña un yu. Lamentablemente, el a pèrdè barika. Ora Mary a sali na estado atrobe, un gran sorpresa tabata warda nos. Un ekografia a revelá ku e tabata na estado di, no ún, sino kuater beibi! Mi a keda den shòk. Ata mi awor, ku 47 aña di edat i serka di bira tata di ocho yu! E vierling a nase  via operashon sesárea dia 14 di febrüari 1982 ku 32 siman. Den e órden ku nan a nase, nan tabata Clint ku 3,5 liber; Cindy ku 4,2 liber; Jeremy ku 3,1 liber i Danette ku 3,8 liber. Niun no tabata parse otro.

Djis despues ku e beibinan a nase, e dòkter di Mary a bini i kai sinta banda di mi.

El a puntra mi: “Bo ta preokupá kon bo ta bai kuida e yunan?”

Mi di kuné: “Wèl, nunka mi a yega di haña mi den un kos asin’aki.”

Su siguiente palabranan a ègt sorprendé mi i animá mi.

E di: “Bo kongregashon lo no laga bo na kaya. Si bo djis hera nister, lo bo mira kuantu klinèks nan lo saka pa bo!”

Mi ta hopi gradisidu na e ekselente ginekólogo aki i su staf médiko pasobra despues di apénas dos luna kuater beibi rasonablemente saludabel a sali for di hospital.

E Reto di Lanta un Vierling

Pa kosnan por a kana bon, ami ku Mary a hinka un programa di 24 ora den otro. E kuater yu muhénan mas grandi a yuda nos hopi bon ku e beibinan. I tabata en bèrdat manera e dòkter a bisa—asina nos a “nister,” e kongregashon tabata kla pa duna nos un man. Mas promé, un amigu di hopi tempu, John MacArthur, a organisá e Testigunan ku tabatin un fishi pa rèk nos kas. Ora e beibinan a bini kas, un tim di ruman muhé a yuda kuida nan. Tur e gestonan bondadoso aki tabata un demostrashon di amor kristian den akshon.—1 Juan 3:18.

E vierling tabata manera “beibi di e kongregashon.” Te n’e dia djawe, nan ta mira e tantísimo rumannan amoroso ku a yuda nos komo famia. Pa loke ta Mary, el a resultá di ta un ekselente esposa i mama ku a sakrifiká su mes pa kuida su yunan. El a ègt apliká loke el a siña for di e Palabra di Dios i su organisashon. No tin mihó konseho!—Salmo 1:2, 3; Mateo 24:45.

E reunionnan kristian i e trabou di prediká a keda un parti importante di nos rutina semanal, ounke tabata un lucha pa atendé ku kuater beibi. Un bendishon ku nos a risibí e tempu ei tabata e estudionan di Beibel ku nos a tene ku dos pareha kasá, kendenan tabatin e bondat di bini na nos kas pa studia. Ounke esaki a hasi kosnan mas fásil pa nos, tin biaha Mary tabata asina kansá ku e tabata pega soño durante e estudio, ku un beibi drumí den su brasanan. Ku tempu ámbos pareha a bira nos rumannan spiritual.

Edukashon Spiritual for di Chikí

Asta promé ku e beibinan por a kana, ami ku Mary i e yu muhénan mas grandi tabata sali den sirbishi ku nan. Ora nan a siña kana, ami ku Mary kada un tabata bai ku dos, i nan no tabata un karga. De echo, hopi biaha nan tabata bira e tópiko pa kuminsá kòmbersashon ku doñonan di kas amigabel. Un dia mi a topa un hòmber ku tabata pretendé ku si bo a nase bou di un sierto signo riba un dia en partikular, bo personalidat lo kuadra ku un sierto patronchi. Mi no a diskutí kuné, pero mi a puntr’é si mi por a bolbe bèk mas lat e mainta ei. El a bai di akuerdo, i despues mi a bini bèk ku e vierling. Segun ku el a para wak nan babuká, mi a pone e muchanan den e órden ku nan a nase. Despues nos tabatin un kòmbersashon amigabel, no solamente tokante nan diferensianan físiko opvio sino tambe tokante e gran diferensianan den nan personalidat, lokual a pone henter su teoria kai den otro. E di: “Figura bo, mi ta bin  ku mi teoria nèt serka bo. Lo mi tin ku hasi mas investigashon, no ta bèrdat?”

Ora e kuater chikitinnan a komportá nan mes malu nan no tabata gusta disiplina den grupo, p’esei nos tabata korigí nan un pa un. No opstante, nan a siña ku e mesun reglanan a konta pa tur. Ora nan a enfrentá asuntunan di konsenshi na skol, nan a para firme pa prinsipionan di Beibel i a apoyá otro. Cindy a bira nan bosero. Pronto hende a haña sa ku un vierling tabata un influensia poderoso ku bo mester tene kuenta kuné!

Ami ku Mary tabatin e retonan di kustumber di yuda e muchanan keda leal na Yehova durante nan adolesensia. Úniko kos ku nos por bisa ta ku si no tabata pa e apoyo di un kongregashon amoroso i e abundansia di alimento spiritual ku nos a risibí for di e parti visibel di Yehova su organisashon, e trabou lo tabata muchu mas difísil. Nos a trata di tene un estudio di Beibel regular den famia i mantené un bon komunikashon ku nan, ounke esaki no tabata semper fásil. Tòg, e esfuerso tabata bale la pena pasobra tur nos ocho yunan a skohe pa sirbi Yehova.

Luchando ku Edat Avansá

Den transkurso di añanan, mi a disfrutá di hopi privilegio spiritual: ansiano di kongregashon, superintendente di stat i superintendente di sirkuito supstituto. Tambe mi a sirbi komo miembro di e Komité di Kontakto ku Hospital ku tin e funshon di yuda dòkternan koperá ku pashèntnan Testigu ora surgi e kuestion di transfushon di sanger. Pa 34 aña mi tabatin tambe e onor di por a kasa hende ofisialmente. Mi a kondusí rònt di 350 seremonia di matrimonio, inkluso esnan di mi seis yu muhénan.

Mi ta gradisí Yehova konstantemente pa e apoyo leal ku mi a risibí, promé di Judy i awor di Mary. (Proverbionan 31:10, 30) Huntu ku e apoyo ku nan a duna mi den mi trabou komo ansiano di kongregashon, nan a pone tambe un bon ehèmpel den e ministerio i a yuda inkulká kualidatnan spiritual den e muchanan.

Na 1996, dòkternan a diagnostiká mi ku un trastorno selebral ku ta pone mi mannan tembla i mi kurpa pèrdè balansa. P’esei mi no por a sigui mas ku mi trabou di traha bòrchi di propaganda. Sin embargo, ainda mi tin hopi goso den e sirbishi di Yehova, ounke mi ritmo a baha. Un aspekto positivo di esaki ta ku mi a haña mas konsiderashon pa hende grandi.

Ora mi reflekshoná riba mi bida, mi ta gradisí Yehova ku semper e tabat’ei pa yuda tantu ami komo mi famia enfrentá nos hopi retonan ku goso. (Isaias 41:10) Ami ku Mary, huntu ku nos ocho yunan, ta gradisidu tambe pa e sosten ku nos a risibí di un famia spiritual maravioso di rumannan hòmber i muhé. Tur a demostrá nan amor den hopi mas manera ku nos lo por relatá.—Juan 13:34, 35.

[Nota]

[Plachi na página 12]

Huntu ku mi mama, mi ruman hòmber mayó Garth i mi ruman muhé Dawn, kla pa bai e kongreso di 1941 na Sydney

[Plachi na página 13]

Ami ku Judy i Kim, na beibi, tempu mi tabata den e trabou di sirkuito na Queensland

[Plachi na página 15]

Despues ku e vierling a nase, nos kuater yu muhénan mas grandi i e kongregashon a uni forsa pa duna nos un man