Oumentá e Goso i Dignidat di Bo Dia di Kasamentu

“E DIA di mi kasamentu tabata un di e dianan di mas importante i gososo di mi bida,” Gordon, kende tin kasi 60 aña kasá, a bisa. Kiko ta hasi e dia di kasamentu asina importante pa kristiannan berdadero? Esei ta un dia riba kua nan ta hasi un voto òf promesa sagrado na dos persona ku nan ta stima profundamente: nan kasá i Yehova Dios. (Mateo 22:37; Efesionan 5:22-29) Sí, parehanan ku ta plania pa kasa lo ke disfrutá di nan dia di kasamentu, pero tambe nan ke onra e Originadó di matrimonio.—Génesis 2:18-24; Mateo 19:5, 6.

Kon un brùidehòm por oumentá e dignidat di e okashon gososo aki? Kiko un brùit por hasi pa mustra onor na su esposo i na Yehova? Kon otro personanan ku ta asistí por hasi e dia di kasamentu mas gososo ainda? Nos lo bai analisá algun prinsipio bíbliko ku lo yuda kontestá e preguntanan ei, i aplikashon di e prinsipionan ei lo mantené e posibel problemanan ku lo por deslusí e okashon spesial aki na un mínimo.

Ken Ta Responsabel?

Den hopi pais, lei ta permití un representante di Testigunan di Yehova efektuá un seremonia di matrimonio. Asta den paisnan kaminda ta un ámtenar mester hasi esaki, un pareha lo kier tin un diskurso basá riba Beibel. Den un diskurso asina, e oradó por lo general ta animá e brùidehòm pa reflekshoná riba e papel ku Dios a asign’é komo kabes di famia. (1 Korintionan 11:3) P’esei, ta e brùidehòm tin e responsabilidat prinsipal pa loke ta sosodé na e kasamentu. Klaru ku e preparashonnan pa e seremonia di kasamentu mes i pa e resèpsi ku kisas ta sigui despues generalmente ta tuma lugá hopi tempu di antemano. Pakiko esaki por ta un desafio pa e brùidehòm?

Un motibu ta ku famianan di sea e brùit òf brùidehòm por purba influensiá e plannan di kasamentu formalmente. Rodolfo, kende a kasa hopi pareha, a remarká: “Tin biaha, e brùidehòm ta hañ’é ku un preshon grandi di parti di famianan, foral si nan ta yuda kubri e gastunan di resèpsi. Tal bes nan ta para riba loke mester sosodé durante e seremonia di kasamentu i na e resèpsi. Esaki lo por debilitá e papel ku Beibel ta asigná na e brùidehòm komo esun responsabel pa e okashon.”

Max, kende tin mas ku 35 aña kaba ta kasando parehanan, a remarká: “Mi a nota un tendensia ku ta e brùit ta hiba delantera den disidí loke mester tuma lugá na e kasamentu i na e resèpsi, i ku e brùidehòm kada bes tin ménos di bisa.” David, kende tambe a kasa hopi pareha, a bisa: “Kisas e brùidehòmnan no tin kustumber di hiba delantera i por lo general no ta sufisientemente enbolbí den e preparashonnan di kasamentu.” Kon e brùidehòm por karga su responsabilidat na un manera efikas?

Komunikashon Ta Oumentá Goso

Pa e brùidehòm kumpli ku su responsabilidat en konekshon ku e preparashonnan di kasamentu ku éksito, e mester komuniká den un forma efikas. Beibel ta bisa bon kla: “Plannan ta frustra ora no tin papiamentu konfidensial.” (Proverbionan 15:22, NW) Ma si e brùidehòm papia promé tokante e preparashonnan pa kasamentu ku e brùit, ku miembronan  di famia i ku otro personanan ku por duna konseho bíbliko sano, e por evitá hopi frustrashon.

Sí, ta masha importante pa un pareha komprometí papia ku otro promé riba nan plannan i posibilidatnan. Pakiko? Wèl, skucha algun komentario di Ivan i su kasá, Delwyn, kendenan ta felismente kasá pa hopi aña pero ku ta bini di diferente kultura. Rekordando nan plannan di kasamentu, Ivan a bisa: “Mi tabatin algun idea konkreto tokante kiko mi tabata ke pa mi kasamentu, inkluso un resèpsi ku tur mi amigunan presente, un bolo di kasamentu, i mi brùit ku un shimis di kasamentu blanku bistí. Delwyn, di otro banda, tabata ke un kasamentu simpel i ku tiki hende, sin bolo di kasamentu. Asta el a pensa di no bisti un shimis di brùit mes, sino algu diferente.”

Kiko a yuda e pareha aki resolvé nan diferensianan di opinion? Komunikashon bondadoso i franko. (Proverbionan 12:18) Ivan a agregá: “Nos a studia artíkulonan bíbliko riba e tópiko di kasamentu, manera esnan ku a sali den E Toren di Vigilansia [na spañó] di 15 di aprel 1984. * E informashon aki a yuda nos haña un enfoke spiritual di e okashon. Komo ku nos kada un a bini di un kultura diferente, nos tabatin ku sede den vários kos ku tabatin di haber ku preferensia personal. Nos tur dos a kambia nos aktitut.”

Aret ku Penny tambe a hasi algu similar. Relashoná ku e dia di nan kasamentu, Aret a bisa: “Ami ku Penny a papia riba nos distinto deseonan pa e kasamentu, i nos por a yega na un akuerdo armonioso. Nos a pidi Yehova su bendishon riba e dia ei. Tambe mi a buska konseho serka nos mayornan i algun otro pareha kasá maduro den e kongregashon. Nan sugerensianan tabata masha balioso. Komo resultado, nos kasamentu tabata algu bunita.”

Mantené Dignidat den Bistí i Areglo Personal

Ta komprendibel ku tantu e brùit komo e brùidehòm ke ta bon bistí pa nan kasamentu. (Salmo 45:8-15) Kisas nan ta dediká tempu, esfuerso i plaka na bistí apropiá. Ki prinsipio di Beibel por yuda nan skohe loke ta nèchi i digno pa e okashon?

Konsiderá loke e brùit ta bisti pa e okashon ei. Ounke e estilonan ta varia di persona pa persona i di pais pa pais, e konseho di Beibel ta aplikabel tur kaminda. Hende muhé tin ku “dòrna nan mes ku bistí apropiá, desente i moderá.”  Esei ta konta pa hende muhé kristian na tur momento, i sigur pa e dia di kasamentu. Echo ta ku un kasamentu gososo no ta rekerí un “bistí kostoso.” (1 Timoteo 2:9; 1 Pedro 3:3, 4) Aplikashon di e konseho aki ta duna gran satisfakshon!

David, menshoná anteriormente, a bisa: “Mayoria pareha ta hasi esfuerso pa sigui prinsipionan di Beibel, i nan ta meresé un elogio. Pero tabatin kaso kaminda e shimis di brùit i di e bruidsmeisje-nan tabata inmodesto, demasiado eskotá òf transparente.” Den e reunion ku un ansiano kristian maduro ta tene ku e brùit i e brùidehòm promé ku e dia di kasamentu, e ta yuda nan mantené un punto di bista spiritual. Kon? Puntrando nan si e loke nan tin pensá di bisti lo ta sufisiente modesto pa bisti na un reunion kristian. Ta bèrdat ku e estilo di paña por ta diferente for di esun regular di bai reunion, i ku loke un ruman ta bisti pa su kasamentu por reflehá kustumber lokal, pero e norma di modestia mester kuadra ku loke ta digno pa un kristian. Maske algun hende di mundu kisas ta mira e kódigo moral di Beibel komo restriktivo, kristiannan berdadero sí ta kontentu pa resistí e intentonan di mundu pa hinka nan den su malchi.—Romanonan 12:2; 1 Pedro 4:4.

Penny di: “En bes di mira e pañanan òf e resèpsi komo e kos di mas importante, ami ku Aret a enfoká riba e seremonia, e parti spiritual di e okashon. Esei tabata e parti mas importante di e dia. E kosnan spesial ku mi ta kòrda no ta loke mi a bisti ni kome, sino den kompania di ken mi tabata riba e dia ei i e felisidat ku mi a sinti di kasa ku e hòmber ku mi ta stima.” Ta bon pa un pareha kristian tene e puntonan ei na mente ora nan ta plania nan kasamentu.

Salòn di Reino—Un Lugá di Dignidat

Hopi pareha kristian ta deseá di tene nan seremonia di kasamentu den un Salòn di Reino si esei ta posibel. Pakiko nan ta preferá esaki? Un pareha a splika nan rasonamentu: “Nos a realisá ku matrimonio ta e areglo sagrado di Yehova. E echo ku nos a kasa den Salòn di Reino, nos lugá di adorashon, a yuda graba den nos mente for di un prinsipio ku Yehova mester ta parti di nos matrimonio. Un otro benefisio di a tene e seremonia den Salòn di Reino en bes di na un otro sitio ta ku el a mustra nos famianan ku a asistí, ku no ta kreyente, kon importante e adorashon di Yehova ta pa nos.”

Si e ansianonan di kongregashon ku ta responsabel pa e Salòn di Reino duna pèrmit pa e kasamentu tuma lugá einan, e pareha mester avisá nan adelantá di e manera ku nan ta pensa di drecha e lugá. Un manera ku e brùit i brùidehòm por mustra e debido rèspèt pa esnan invitá na e kasamentu ta di keda firmemente determiná pa yega na e ora programá pa e kasamentu. I nan lo kier hasi sigur ku tur kos ta tuma lugá ku dignidat. * (1 Korintionan 14:40) Pues nan lo evitá e komportashonnan ekstrabagante ku ta karakterisá hopi kasamentu mundano.—1 Juan 2:15, 16.

Esnan ku ta asistí n’e kasamentu tambe por mustra ku nan tin e punto di bista di Yehova tokante matrimonio. Por ehèmpel, nan lo no bai spera pa e kasamentu sobresalí riba otro kasamentunan kristian, komo si fuera ta un kompetensia tin di ken su kasamentu ta mas sofistiká. Kristiannan maduro ta realisá tambe ku nan presensia na Salòn di Reino pa e diskurso basá riba Beibel ta mas importante i benefisioso ku nan presensia na un fiesta di kasamentu òf un resèpsi ku lo por sigui despues. Si tempu òf sirkunstansia ta permití pa un kristian asistí na un so di e dos okashonnan aki, asistensia na Salòn di Reino sigur mester haña preferensia. Un ansiano ku yama William a bisa: “Si invitadonan keda  sin bini Salòn di Reino sin motibu válido pero ta asistí sí na e resèpsi despues, nan ta mustra un falta di apresio pa e santidat di e okashon. Maske nos no ta invitá na e resèpsi, ora nos asistí na e seremonia na Salòn di Reino nos por mustra nos apoyo pa e brùit i brùidehòm i duna un testimonio ekselente na famianan ku no ta kreyente.”

Goso Ku Ta Dura Mas Ayá ku e Dia di Kasamentu

E mundu di komersio a kombertí e selebrashon di kasamentu den un negoshi formal. Segun un informe resien, na Merka un kasamentu por lo general “ta kosta 22.000 dòler, esta, mitar di e entrada [anual] promedio di un famia merikano.” Bou di influensia di propaganda komersial, hopi pareha resien kasá òf nan famia ta hinka nan kurpa den un debe pisá pa esun dia ei, un debe ku nan ta keda kuné pa hopi aña. Esei ta un manera sabí pa kuminsá bo matrimonio? Hende ku no sa òf ku no tin kunes ku prinsipio bíbliko kisas ta opta pa un kasamentu ekstrabagante asina, pero esei sigur no ta e kaso ku kristiannan berdadero!

Hopi pareha kristian ku a limitá e tamaño di nan kasamentu na loke ta rasonabel i pagabel i ku a enfoká riba e aspekto spiritual di e okashon por a usa nan tempu i rekursonan na armonia ku nan dedikashon na Dios. (Mateo 6:33) Tuma por ehèmpel Lloyd i Alexandra, kendenan ta trahando pa 17 aña kaba den e ministerio di tempu kompletu for di dia nan a kasa. Lloyd a komentá: “Kisas tabatin hende ku a haña nos kasamentu muchu simpel, pero ami ku Alexandra tabata masha kontentu. Nos a sinti ku nos dia di kasamentu no mester tabata un karga finansiero, sino un selebrashon di e areglo di Yehova pa duna dos hende un gran felisidat.”

Alexandra a agregá: “Ami tabata den e sirbishi di pionero promé ku nos a kasa, i mi no tabata kier a laga e privilegio aki djis pa mi por tabatin un kasamentu ekstrabagante. E dia di nos kasamentu tabata masha spesial. Sin embargo, esei tabata apénas e promé dia di e restu di nos bida huntu. Nos a apliká e konseho pa evitá di konsentrá muchu riba e akto di kasa i a buska e guia di Yehova den nos bida kasá. Esaki definitivamente a trese e bendishon di Yehova riba nos.” *

Sí, bo dia di kasamentu ta un okashon spesial. E aktitut- i akshonnan ku ta bisto riba e dia ei por establesé un patronchi pa bo bida kasá den futuro. P’esei, konfia den e guia di Yehova. (Proverbionan 3:5, 6) Mantené e nifikashon spiritual di e dia ei na promé lugá den bo mente. Apoyá otro den e papel ku Dios a asigná na boso kada un. Asina boso por pone un fundeshi sólido pa boso matrimonio, i ku Yehova su bendishon, boso lo tin e goso ku ta dura mas ayá ku boso dia di kasamentu.—Proverbionan 18:22.

[Nota]

[Plachi na página 29]

Un pareha mester komuniká na un manera franko pero ku rèspèt ora nan ta plania nan kasamentu

[Plachi na página 31]

Mantené e nifikashon spiritual di bo dia di kasamentu na promé lugá den bo mente