“Ekspertonan” Ta Bin i Bai

DEN e mundu djawe, un hende ku tin akseso na kòmpiuter por buska konseho pa mayor riba Internet i den un fregá di wowo e ta haña mas ku 26 mion referensia riba e tópiko aki. Si bo mester tuma ún minüt so pa lesa kada un di e referensianan ei, bo yu lo krese bira grandi te bai for di kas promé ku bo por kaba di lesa nan tur.

Unda mayornan tabata bai buska konseho tempu ku no tabatin dòkter di mucha, sikólogo di mucha ni Internet? Por lo general, nan tabata akudí na otro miembronan di famia. Mama-, tata-, tanta- i tionan tabata dispuesto i den posishon pa duna guia i yudansa finansiero, i asta wak yu. Pero den hopi pais, debí ku mayoria di hende di kunuku a bai biba den stat, esaki a pone ku e lasonan familiar estrecho ei a kaba kasi kompletamente. Den hopi kaso awe, mama ku tata ta haña nan so pará dilanti di e reto di lanta yu.

Esaki sin duda ta un di e motibunan pakiko e negoshi di kuido di yu a krese asina lihé. Un otro motibu ta ku tur kaminda hende tin masha konfiansa ku siensia por duna nan bon konseho. Rònt di fin di siglo 19, e públiko merikano a kuminsá kere di bèrdat ku siensia lo por a drecha tur aspekto di bida humano. Awèl, pakiko no kriamentu di yu tambe? P’esei ora ku e Kongreso Nashonal di Mamanan di Merka a lamentá públikamente na aña 1899 ku ‘mayornan ta inkompetente,’ un batayon di “eksperto sientífiko” a blo rápidamente pa duna un man. Nan a primintí di yuda mama- ku tatanan ku tabata luchando pa lanta nan yunan.

Konseho pa Lanta Yu Ku Tin den Buki

Sin embargo, kiko e ekspertonan aki a logra? Akaso e mayornan djawe tin ménos preokupashon i ta mihó prepará pa lanta nan yunan ku esnan di ántes? E kontestá ta nò, segun un enkuesta resien na Gran Bretaña. E enkuesta ei a revelá ku rònt di 35 porshento di mayor ku tin yu chikitu te ainda ta en buska di konseho konfiabel. Otro mayornan ta sinti ku nan no tin ningun otro opshon ku di sigui nan propio instinto.

Ann Hulbert, un mama di dos yu, a analisá e historia di literatura profeshonal tokante lantamentu di yu den su buki Raising America: Experts, Parents, and a Century of Advice About Children (Lantando Yu na Merka: Ekspertonan, Mayornan i un Siglo di Konseho Tokante Yu). Hulbert a señalá ku masha poko konklushon di ekspertonan tabata basá riba siensia bon fundá. Mas bien, ta parse ku nan konseho tabata mas bou di influensia di nan propio eksperensianan den bida ku influensia di kualke informashon ophetivo. Mirando bèk, ta parse ku gran parti di loke e ekspertonan ei a skirbi tabata “in” den nan tempu, kosnan kontradiktorio i tin biaha ekstrabagante.

Pues den ki situashon mayornan djawe ta? Frankamente bisá, hopi di nan ta tur konfundí, ya ku nan ta haña nan ku mas konseho, opinion i kontroversia ku nunka. Sin embargo, no ta tur mayor ta sinti nan pèrdí. Manera e siguiente artíkulo lo mustra, rònt parti di mundu tin mayornan ku ta benefisiando di un fuente di sabiduria masha bieu ku te ainda ta resultá di ta un fuente di konseho konfiabel.