Konstruyendo Unidamente pa Alabá Dios

E HENDENAN riba un di e Islanan Salomon a tuma nota di un Salòn di Reino nobo di Testigunan di Yehova. Un señora di: “Den nos iglesia, nos tin hopi evenemento pa rekoudá fondo. Nos ta pidi nos miembronan pa duna sèn, pero ainda no tin sufisiente fondo pa traha un misa nobo. Ta kon Testigunan ta yega na fondo?” E Testigu ku e tabata papia kuné a kontest’é: “Nos ta adorá Yehova komo un famia mundial. Nos kongregashon i nos rumannan rònt mundu a kontribuí loke tabata nesesario pa e Salòn di Reino nobo. Yehova a siña nos pa ta uní den tur kos.”

Den tur aktividat di Testigunan di Yehova bo por mira e union ku tin den nan, inkluso den e konstrukshon di míles di Salòn di Reino. E tipo di union ei ku tin na momento di realisá e proyektonan aki no ta algu nobo. El a eksistí den e pueblo di Dios pa míles di aña. Kon asina?

Konstrukshon di e Tabernakel i e Tèmpel

Yehova tabata referí na e nashon di Israel ora el a bisa Moisés mas ku 3.500 aña pasá: “Laga nan traha un santuario pa mi.” (Eksodo 25:8) Relashoná ku e diseño di e proyekto di konstrukshon aki, Yehova a bisa mas aleu: “Konforme tur loke mi ta bai mustra bo [refiriendo na Moisés], manera e diseño di e tabernakel i e diseño di tur su artíkulonan-di-uso, asina boso [refiriendo na henter e nashon] mester trah’é.” (Eksodo 25:9) Anto Yehova a duna detayenan spesífiko pa e struktura, mobilario i aksesorionan di e santuario. (Eksodo 25:10–27:19) E “tabernakel,” òf tènt, aki lo mester a bira e sentro di adorashon berdadero pa henter Israel.

Nos no sa kuantu hende a traha riba e proyekto, pero tur israelita a haña e invitashon pa kontribuí kuné. Moisés a bisa nan: ‘Tuma for di meimei di boso un ofrenda [òf, “kontribushon,” NW] pa Yehova; esun ku su kurason ta dispuesto, lag’é hiba esaki komo ofrenda pa Yehova.’ (Eksodo 35:4-9) Kon e israelitanan a reakshoná? Eksodo 36:3 ta deklará: “Di Moisés nan a risibí tur e kontribushonnan ku e yunan di Israel a hiba pa hasi e trabou den konstrukshon di e santuario. I ainda e pueblo tabata sigui hiba ofrendanan boluntario p’e tur mainta.”

No a tarda mashá ku tabatin monton di material kontribuí, i e pueblo a sigui trese mas. E artesanonan ku tabata hasi e trabou finalmente a bisa Moisés: “E pueblo ta hiba muchu mas ku sufisiente pa e trabou di konstrukshon ku SEÑOR a ordená nos pa hasi.” P’esei Moisés a duna òrdu: “No laga ni hòmber ni muhé hasi ningun trabou mas pa e ofrendanan di e santuario.” Ku ki resultado? “E material ku nan tabatin tabata sufisiente, i mas ku sufisiente, pa tur e trabou ku mester a wòrdu hasí.”—Eksodo 36:4-7.

 Debí na e generosidat di e israelitanan, e tabernakel a keda kompletá den un aña. (Eksodo 19:1; 40:1, 2) Dunando sosten na adorashon berdadero, e pueblo di Dios a onra Yehova. (Proverbionan 3:9) Ku tempu, nan lo a kuminsá ku un proyekto di konstrukshon muchu mas grandi. Anto un biaha mas, ken ku a deseá esei por a yuda, sea ku nan tabatin eksperensia riba tereno di konstrukshon òf nò.

Kasi sinku siglo despues di a traha e tabernakel, Israel a kuminsá konstruí e tèmpel na Yerusalèm. (1 Reinan 6:1) Esaki lo tabata un kas magnífiko, un struktura permanente trahá di piedra i palu. (1 Reinan 5:17, 18) Yehova a duna David e plannan di konstrukshon pa e tèmpel mediante inspirashon. (1 Krónikanan 28:11-19) Pero el a skohe Salomon, yu di David, pa dirigí e trabou di konstrukshon. (1 Krónikanan 22:6-10) David a duna e proyekto su pleno sosten. El a sòru pa tin piedra, palu i otro material i a kontribuí gran kantidat di oro i plata for di su propiedat personal. Ademas, el a enkurashá e otro israelitanan pa nan ta generoso, puntrando nan: “Ken mas ta dispuesto pa hasi un donashon boluntario pa SEÑOR awe?” Kon e pueblo a reakshoná?—1 Krónikanan 29:1-5, BPK.

Pa ora Salomon a kuminsá konstruí e tèmpel, e tabatin na su disposishon míles di tonelada di oro i plata. Tabatin asina tantu bròns i heru ku no por a pisa e metalnan ei. (1 Krónikanan 22:14-16) Ku respaldo di Yehova i sosten di henter Israel, e proyekto a kaba den apénas shete aña i mei.—1 Reinan 6:1, 37, 38.

‘E Kas di e Dios Berdadero’

Tantu e tabernakel komo e tèmpel a ser yamá ‘e kas di e Dios berdadero.’ (Huesnan 18:31; 2 Krónikanan 24:7) Pero Yehova nunka tabatin mester di e protekshon di un kas. (Isaias 66:1) El a laga traha e lugánan ei pa benefisiá hende. De echo, na inougurashon di e tèmpel, Salomon a puntra: “Di bèrdat Dios lo biba riba tera? Mira, shelu i e shelu di shelunan no por kontené bo; kuantu ménos e kas aki ku mi a traha!”—1 Reinan 8:27.

Yehova a bisa pa medio di su profeta Isaias: “Mi kas lo wòrdu yamá kas di orashon pa tur e pueblonan.” (Isaias 56:7) E sakrifisio- i orashonnan  ku hende tabata ofresé na e tèmpel, i tambe e seremonianan ku a tene einan, a permití hende deboto na Dios—hudiu i no-hudiu—hala serka di e Dios berdadero. Nan a haña Yehova su amistat i protekshon pasobra nan tabata rindi adorashon na su kas. E orashon ku Salomon a ofresé durante dedikashon di e tèmpel a enfatisá e bèrdat aki. Bo por lesa e palabranan konmovedor ku el a ekspresá na Dios na 1 Reinan 8:22-53 i 2 Krónikanan 6:12-42.

Ya for di hopi tempu pasá e antiguo kas ei di e Dios berdadero a pasa pa historia. Pero e Palabra di Dios a señalá ku lo yega un tempu ku lo rekohé hende di tur nashon pa adorá Yehova na un tèmpel spiritual hopi mas grandi. (Isaias 2:2) E manera pa aserká Yehova lo tabata mediante e solo sakrifisio perfekto di Dios su Yu unigénito, prefigurá pa e sakrifisionan di bestia ofresé na e tèmpel. (Juan 14:6; Hebreonan 7:27; 9:12) Testigunan di Yehova ta adorando Dios awe den e manera superior ei, i nan ta yudando hopi hende pa hasi meskos.

Proyektonan di Konstrukshon di Tempu Aktual

Rònt mundu, Testigunan di Yehova ta sirbi e Dios berdadero. Nan ta forma “un nashon poderoso,” di kua su poblashon ta sigui krese. (Isaias 60:22) E lugá prinsipal di reuní di Testigunan di Yehova ta e Salòn di Reino. * Tin míles di e edifisionan aki den uso, i mester di míles mas.

Testigunan di Yehova ta ‘pone nan mes disponibel’ boluntariamente pa konstruí e Salònnan di Reino nesesario. (Salmo 110:3) Sin embargo, hopi biaha Testigunan lokal no tin e eksperensia nesesario den konstrukshon, i den algun region kaminda tin gran oumento ta reina hopi pobresa. Na aña 1999 e Kuerpo Gobernante di Testigunan di Yehova a instituí un programa di konstrukshon di Salòn di Reino pa yuda superá e opstákulonan ei. Mediante e programa aki, Testigunan ku tin eksperensia den fishinan di konstrukshon a biaha bai lugánan leu afin di entrená nan rumannan hòmber i muhé pa traha Salònnan di Reino. E trahadónan entrená aki e ora ei a sigui ku e trabou di konstrukshon den e region ei. Kiko tabata e resultado di e esfuerso spesial aki?

Te ku febrüari 2006, Testigunan di Yehova a konstruí mas ku 13.000 Salòn di Reino nobo den paisnan di poko rekurso. Wak kiko algun persona ku ta hasi uso di e Salònnan di Reino nobo a bisa.

“E kongregashon tabatin un promedio di asistensia di 160 hende. Na e promé reunion despues ku a traha e Salòn di Reino nobo, e asistensia a subi te 200. Awor, seis luna despues, nan tin un asistensia di 230 hende. Ta bisto ku Yehova su bendishon ta riba e konstrukshon di e lugánan modesto i tòg práktiko aki.”—Un superintendente di sirkuito na Ekuador.

“Pa años hende tabata puntra nos: ‘Ki dia boso lo tin un Salòn di Reino manera esnan ku nos ta mira den boso publikashonnan?’ Grásias na Yehova, por fin nos tin un lugá di adorashon representabel. Nos tabata tene reunion den e tienda di un ruman, ku un promedio di asistensia di 30 hende. Na e promé reunion  den e Salòn di Reino nobo, 110 persona a asistí.”—Un kongregashon na Uganda.

“Dos ruman muhé pionero regular ta informá ku for di dia ku a traha e Salòn di Reino a bira mas dushi pa prediká den e teritorio. E hendenan ta mas inkliná na skucha den sirbishi di kas pa kas i tambe den situashonnan informal. E rumannan muhé aki ta kondusí awor 17 estudio di Beibel, i hopi di e studiantenan di Beibel aki ta asistí na reunion.”—Sukursal di Islanan Salomon.

“Un pastor ku ta biba den bisindario di un Salòn di Reino nobo a bisa ku esaki a subi e prestigio di henter e bario i ku e hendenan lokal ta orguyoso di dje. Hopi hende ku pasa dilanti di e salòn ta bisa kon bunita el a keda. Esaki ta duna e rumannan bon chèns pa prediká. Mas i mas hende ke sa tokante nos hermandat mundial. Hopi persona ku pa años no tabata asistí na reunion a ser motivá pa bolbe kuminsá asosiá ku regularidat.”—Sukursal di Myanmar.

“Un ruman muhé a invitá un persona interesá pa pasa na e sitio di konstrukshon den su bario. E hòmber a konta despues: ‘Ami a pensa ku e trahadónan lo no a laga mi drenta. Pa mi sorpresa, e Testigunan a kumindá mi amablemente. Hòmber i muhé tabata traha duru, sin pèrdè tempu. Tabatin armonia i un bon spiritu.’ E hòmber a aseptá un estudio di Beibel i a kuminsá asistí na e reunionnan. Mas despues el a bisa: ‘Mi manera di pensa a kambia. Lo mi no bandoná Dios awor ku mi a hañ’é.’”—Sukursal di Colombia.

 Nos Sosten Ta Importante

Konstrukshon di Salònnan di Reino ta un parti importante di nos sirbishi sagrado. E manera ku Testigunan di Yehova di tur parti di mundu a sostené e trabou ei—finansieramente i tambe den otro manera—ta realmente digno di elogio. Pero nos tin ku kòrda ku otro aspektonan di sirbishi sagrado tambe ta masha importante. De bes en kuando, kristiannan ta víktima di desasternan natural i nan tin mester di nos yudansa. Produkshon di literatura bíbliko ta hunga un papel klave den sostené sirbishi sagrado. Mayoria di nos a yega di mira e impakto ku un revista òf buki bíbliko, lagá den man di un persona ku tin e disposishon korekto, tabatin riba dje. Ademas, ta masha importante pa sostené misioneronan i otro rumannan den sirbishi spesial di tempu kompletu. E kristiannan ei ku ta sakrifiká nan mes ta hunga un papel klave den e ekspanshon di e trabou di prediká den e último dianan aki.

E israelitanan ku a kontribuí ku konstrukshon di e tèmpel a alegrá mashá. (1 Krónikanan 29:9) Awe, ora nos ta sostené adorashon berdadero ku nos kontribushon, esei di igual manera ta hasi nos felis. (Echonan 20:35) Nos ta eksperensiá e felisidat ei ora nos tira nos kontribushon den e kaha destiná pa e Fondo pa Salòn di Reino i ora nos kontribuí ku e obra mundial, sosteniendo asina otro proyektonan ligá ku e predikashon di e bon nobo di Reino. Den un manera maravioso, Testigunan di Yehova djawe ta uní den adorashon berdadero. Ohalá nos tur por ser yená ku e felisidat ku ta bin di sostené e adorashon ei!

[Nota]

[Kuadro/​Plachi na página 20, 21]

MANERANAN KU ALGUN HENDE TA SKOHE PA DUNA

KONTRIBUSHON PA E OBRA MUNDIAL

Hopi hende ta apartá, òf hinka den nan presupuesto, un montante pa nan pone den e kahanan di kontribushon marká: “Kontribushon pa e Obra Mundial—Mateo 24:14.”

Tur luna kongregashonnan ta manda e montantenan aki pa e sukursal di Testigunan di Yehova ku ta sirbi nan respektivo pais. Tambe por manda donashon boluntario di plaka direktamente na Watch Tower Bible and Tract Society of Pennsylvania, Attention Treasurer’s Office, 25 Columbia Heights, Brooklyn, New York 11201-2483, òf n’e ofisina di sukursal di Testigunan di Yehova ku ta sirbi bo pais. Si manda chèk, e mester ta na nòmber di “Watch Tower.” Tambe por hasi donashon di prenda òf otro kos di balor. Un karta breve ku ta deklará ku esakinan ta un regalo inkondishonal mester kompañá e kontribushonnan aki.

AREGLO DI DONASHON KONDISHONAL

Por hasi donashon di plaka via un areglo spesial den kua, riba petishon di e dunadó, lo por debolbé e donashon na dje. Pa mas informashon, por fabor, tuma kontakto ku e Treasurer’s Office na e adrès ya menshoná.

DONASHON PLANIÁ

Ademas di regalo inkondishonal di plaka, tin otro métodonan di duna na benefisio di e sirbishi di Reino mundial. Esakinan ta inkluí:

Seguro: Por nombra Watch Tower komo benefisiario di un pólisa di seguro di bida òf di un areglo di penshon.

Kuenta di Banko: Por duna Watch Tower derecho di usa kuenta di banko, ‘time deposit’ òf kuenta di penshon personal, òf derecho di kobra nan despues di morto di nan doño, konforme rekisitonan bankario lokal.

Akshon i Bono: Por hasi donashon di akshon i bono na Watch Tower komo un regalo inkondishonal.

Propiedat: Por hasi donashon di propiedat ku por ser bendé, sea komo regalo inkondishonal òf bou di e kondishon ku e dunadó por sigui biba den dje te na su morto. Tuma kontakto ku e ofisina di sukursal di bo pais promé ku traha e akta pa traspasá kualke propiedat.

Tèstamènt i ‘Trust’: Por nombra Watch Tower komo heredero di propiedat òf plaka via un tèstamènt legal, òf por nombra Watch Tower komo benefisiario di un areglo di trust. Un trust ku ta benefisiá un organisashon religioso por duna sierto benefisionan fiskal.

Pa mas informashon, bo por tuma kontakto ku Watch Tower, via karta òf telefòn, na e adrès indiká aki bou, òf na e ofisina di Testigunan di Yehova ku ta sirbi bo pais.

Watch Tower

P.O. Box 4708 (Seroe Loraweg 142A)

Curaçao, N.A.

Telefòn: (599-9) 461-7528

[Plachi na página 18]

Nos esfuersonan uní ta hasi posibel ku por traha Salònnan di Reino bunita rònt mundu

[Plachi na página 18]

Salòn di Reino nobo na Ghana