Mustra Rèspèt pa Nos Reunionnan Sagrado

“Eseinan lo mi hiba na mi seru santu, i lo mi hasi nan kontentu den mi kas di orashon.”—ISAIAS 56:7.

1. Ki motibunan bíbliko nos tin pa mustra e debido rèspèt pa nos reunionnan?

YEHOVA a reuní su pueblo, e kristiannan ungí i nan kompañeronan, pa ador’é na su “seru santu.” E ta hasi nan kontentu den su “kas di orashon,” esta, su tèmpel spiritual, ku ta “un kas di orashon pa tur nashon.” (Isaias 56:7; Marko 11:17) E desaroyonan aki ta indiká ku e adorashon di Yehova ta santu, puru i elevá. Ora nos ta mustra e debido rèspèt pa nos reunionnan, kaminda nos ta studia i adorá Dios, nos ta duna prueba ku nos tin e punto di bista di Yehova di kosnan sagrado.

2. Kiko ta indiká ku Yehova a konsiderá e lugá ku el a skohe pa rindi adorashon na dje komo sagrado, i kon Hesus a mustra ku e tambe a mir’é meskos?

² Den antiguo Israel, nan mester a konsiderá e lugá ku Yehova a skohe pa rindi adorashon na dje komo sagrado. E tabernakel i su mobilario i artíkulonan di uso mester a ser ungí i santifiká pa “nan por ta masha santu mes.” (Eksodo 30:26-29) E dos sekshonnan di e santuario a ser yamá “e Lugá Santu” i “e Santísimo.” (Hebreonan 9:2, 3) Despues e tabernakel a keda remplasá pa e tèmpel den Yerusalèm. Nan a yama Yerusalèm “e stat santu,” ya ku e tabata e sentro di adorashon di Yehova. (Nehemias 11:1; Mateo 27:53) Hesus mes a mustra e debido rèspèt pa e tèmpel durante su ministerio riba tera. El a rabia ku e hendenan pa e manera sin rèspèt ku nan a usa e área di tèmpel pa propósitonan komersial i pa kòrta kaminda ora nan tabatin ku karga merkansia.—Marko 11:15, 16.

3. Kiko ta ilustrá e karakter sagrado di e asambleanan di Israel?

³ E israelitanan tabata reuní ku regularidat pa adorá Yehova i pa skucha e lesamentu di su Lei. Sierto dianan di nan fiestanan a ser yamá konvokashonnan santu òf asambleanan solèm, indikando e karakter sagrado di e reunionnan aki. (Levítiko 23:2, 3, 36, 37) Na un asamblea públiko den e tempu di Esdras i Nehemias, e levitanan “a splika e lei na e pueblo.” Komo ku “henter e pueblo tabata yora ora nan a tende e palabranan di lei,” e levitanan “a kalma henter e pueblo, bisando: ‘Keda ketu, pasobra e dia ta santu.’” Despues di esei e israelitanan a selebrá e Fiesta di Tabernakelnan (òf di Ramada) ku “gran goso.” Ademas, “tur dia . . . tabata lesa for di e buki di e lei di Dios, for di e promé dia te na e último dia. I nan a selebrá e fiesta shete dia largu. I riba e di ocho dia tabatin un reunion solèm di akuerdo ku e ordenansa.” (Nehemias 8:7-11, 17, 18) Esakinan realmente tabata okashonnan santu kaminda esnan presente mester a presta atenshon ku rèspèt.

Nos Reunionnan Ta Sagrado

4, 5. Ki rasgonan di nos reunionnan ta duna prueba ku nan ta okashonnan sagrado?

⁴ Ta bèrdat ku awe Yehova no tin un stat santu literal riba tera, ku un tèmpel spesial dediká na su adorashon. Sin embargo, nos no mester lubidá ku reunionnan pa rindi adorashon na Yehova ta okashonnan sagrado. Tres biaha pa siman, nos ta reuní pa lesa i studia e Skritura. E Palabra di Yehova ta ser  ‘spliká,’ i meskos ku den tempu di Nehemias, ta “duna e nifikashon” di e lei di Dios. (Nehemias 8:8) Tur nos reunionnan ta kuminsá i kaba ku orashon, i na mayoria di nan nos ta kanta kantika di alabansa na Yehova. (Salmo 26:12) E reunionnan di kongregashon ta realmente un parti di nos adorashon i ta rekerí di nos pa nos tin un aktitut deboto i di presta atenshon ku rèspèt.

⁵ Yehova ta bendishoná su pueblo ora ku nan ta reuní huntu pa ador’é, pa studia su Palabra i pa gosa di dushi asosiashon kristian. Nos por tin sigur ku ora tin un reunion, ta einan Yehova ‘ta ordená pa tin bendishon.’ (Salmo 133:1, 3) Nos ta risibí parti di e bendishon aki si nos t’ei presente i ta sigui e programa spiritual ku atenshon. Es mas, Hesus a deklará: “Kaminda dos òf tres ta reuní den mi nòmber, ei mi ta meimei di nan.” E deklarashon aki den su konteksto ta apliká na ansianonan kristian ku ta reuní huntu pa trata problemanan serio entre algun persona, pero den un sentido amplio e ta apliká tambe na nos reunionnan. (Mateo 18:20) Si pa medio di spiritu santu, Kristu ta presente ora ku kristiannan ta reuní huntu den su nòmber, nos no mester konsiderá e reunionnan ei komo sagrado?

6. Kiko nos por bisa di nos lugánan di reunion, tantu grandi komo chikí?

⁶ Ta bèrdat ku Yehova no ta biba den tèmpel ku man di hende a traha. Sin embargo, nos Salònnan di Reino ta lugánan di adorashon berdadero. (Echonan 7:48; 17:24) Nos ta reuní einan pa studia e Palabra di Yehova, hasi orashon na dje i kanta su alabansanan. Esei ta konta tambe pa nos Salònnan di Asamblea. Lugánan mas grandi ku nos ta hür pa nos kongresonan—manera salanan di eksibishon òf stadionnan—ta bira lugánan di  adorashon durante e periodo ku nos ta usa nan pa nos reunionnan sagrado. Tal okashonnan pa rindi adorashon, sea ta un lugá grandi òf chikí, meresé nos rèspèt, i nos mester reflehá e rèspèt ei den nos aktitut i komportashon.

Maneranan pa Mustra Rèspèt pa Nos Reunionnan

7. Den ki manera konkreto nos por mustra rèspèt pa nos reunionnan?

⁷ Tin maneranan konkreto ku nos por mustra rèspèt pa nos reunionnan. Un manera ta di t’ei presente pa kanta e kantikanan di Reino. Hopi di nan ta den forma di orashon i p’esei nos tin ku kanta nan ku rèspèt profundo. Sitando Salmo 22, apòstel Pablo a skirbi tokante Hesus: “Lo mi proklamá bo nòmber na mi rumannan, meimei di e kongregashon lo mi kanta bo alabansa.” (Hebreonan 2:12) Pues, nos mester hasié un kustumber pa ta sintá na nos lugá promé ku e presidente di e reunion introdusí e kantika, anto konsentrá riba e nifikashon di e palabranan segun ku nos ta kanta. Laga nos kantamentu reflehá e sintimentunan di e salmista ku a skirbi: “Lo mi duna gradisimentu na [Yehova] ku henter mi kurason, den e reunion di e hendenan rekto i den e asamblea.” (Salmo 111:1) Sí, un bon motibu pa yega nos reunionnan trempan i keda te ora nan kaba ta pa kanta alabansa na Yehova.

8. Ki ehèmpel den Beibel ta mustra ku e orashonnan na nos reunionnan meresé nos atenshon ku rèspèt?

⁸ Un otro rasgo ku ta duna realse spiritual na tur nos reunionnan ta orashon di kurason hasí na fabor di tur esnan presente. Na un okashon, kristiannan di promé siglo na Yerusalèm a reuní huntu i “nan a halsa nan bos di ún akuerdo na Dios” den orashon ferviente. Ku ki resultado? Nan a sigui “papia e palabra di Dios ku tur frankesa,” apesar di persekushon. (Echonan 4:24-31) Nos por imaginá ku kualke un di esnan presente a laga su mente dual durante e orashon ei? Nò, nan a hasi orashon “di ún akuerdo.” Orashonnan ekspresá na nos reunionnan ta reflehá e sintimentu di tur esnan presente. Nan ta meresé nos atenshon ku rèspèt.

9. Kon nos por mustra rèspèt pa nos reunionnan sagrado pa medio di nos paña i komportashon?

⁹ Ademas, nos por mustra kon profundo nos rèspèt pa e karakter sagrado di nos reunionnan ta na e manera ku nos ta bisti. Nos areglo personal pa loke ta trata nos paña i nos estilo di kabei por kontribuí hopi na e dignidat di nos reunionnan. Apòstel Pablo a konsehá: “Mi kier pa e hòmbernan di tur lugá hasi orashon, hisando mannan santu, sin rabia i sin pleitu. Meskos, mi kier pa hende muhé dòrna nan mes ku bistí apropiá, desente i moderá, no ku kabei tur na flègtu i oro òf pèrla òf bistí kostoso, sino mas bien . . . manera ta pas pa muhénan ku ta teme Dios.” (1 Timoteo 2:8-10) Ora nos ta asistí na kongresonan grandi tené den stadionnan na aire liber, nos por bisti na un manera ku ta pas pa e klima di kalor pero tòg na un manera ku ta indiká dignidat. Ademas, nos rèspèt pa e okashon lo yuda pa nos no kome ni kou bals durante e seshonnan. Nos paña apropiá i bon komportashon na nos reunionnan ta duna onor na Yehova Dios, na su adorashon i na nos rumannan den fe.

Kondukta Ku Ta Pas pa e Kas di Dios

10. Kon apòstel Pablo a mustra ku na nos reunionnan kristian nos mester tin un norma haltu di kondukta?

¹⁰ Na 1 Korintionan, kapítulo 14, nos ta haña e konseho sabí di apòstel Pablo tokante e manera ku mester kondusí reunionnan kristian. El a konkluí ku e palabranan: “Laga tur kos sosodé korektamente i na un manera ordená.” (1 Korintionan 14:40) Nos reunionnan ta un parti importante di e aktividat di e kongregashon kristian, i nan ta rekerí un tipo di kondukta ku ta pas pa e kas di Yehova.

11, 12. (a) Kiko nos mester graba den mente di e muchanan ku ta asistí na nos reunionnan? (b) Den ki manera apropiá chikitinnan por ekspresá nan fe na nos reunionnan?

 ¹¹ Nos tin ku siña foral nos muchanan kon pa komportá nan mes na nos reunionnan. Mayornan kristian mester splika nan yunan ku Salòn di Reino i kaminda ta tene Estudio di Buki di Kongregashon no ta lugá pa hunga. Nan ta lugánan kaminda nos ta adorá Yehova i ta studia su Palabra. Rei sabí Salomon a skirbi: “Warda bo pasonan ora bo ta bai na e kas di Dios, i hala serka pa skucha.” (Eklesiastés 5:1) Moisés a siña e israelitanan pa reuní huntu, tantu hende grandi komo “mucha.” El a bisa: “Reuní e pueblo . . . pa nan tende i siña i teme SEÑOR boso Dios, i perkurá di kumpli ku tur e palabranan di e lei aki. I nan yunan, ku no tabata sa, lo tende i siña pa teme SEÑOR.”—Deuteronomio 31:12, 13.

¹² Awe ta meskos. Nos chikitinnan ta bin reunion huntu ku nan mayornan prinsipalmente pa nan tende i siña. Unabes muchanan por paga tinu i komprondé por lo ménos e bèrdatnan bíbliko básiko, nan por hasi tambe un “deklarashon públiko” di nan fe dor di partisipá ku komentarionan breve. (Romanonan 10:10, NW) Un chikitin lo por kuminsá ku duna komentario dor di bisa un par di palabra komo kontesta riba un pregunta ku e ta komprondé. Na kuminsamentu, kisas e tin ku lesa e kontesta, pero ku tempu lo e purba ekspresá su mes ku su propio palabranan. Esaki ta probechoso i dushi pa e mucha, i tal ekspreshonnan spontáneo di fe ta alegrá kurason di e hendenan grandi presente. Klaru ku mayornan mes ta pone un bon ehèmpel dor di duna komentario. Kaminda ta posibel, ta bon pa e muchanan tin nan propio Beibel, buki di kantika i ehemplar di e publikashon ku nos ta studia. Nan mester siña mustra e debido rèspèt pa e publikashonnan ei. Tur esaki lo graba den mente di e muchanan ku nos reunionnan ta sagrado.

13. Kiko nos ta spera pa loke ta e hendenan ku asistí na nos reunion pa promé biaha?

¹³ Klaru ku nos no ke pa nos reunionnan parse e servisionan religioso di kristiandat. Esakinan tin sea un ambiente friu i di deboshon hipókrita òf hopi bochincha manera na un konsierto di ròk. Nos ke pa e reunionnan na nos Salònnan di Reino ta kaluroso i hospitalario, pero no na e ekstremo ku nan ta parse un klup sosial den bario. Nos ta reuní pa adorá Yehova, p’esei nos reunionnan semper mester reflehá dignidat. Nos deseo ta pa despues ku hendenan ku asistí pa promé biaha a tende e informashon presentá i a opservá e komportashon di nos ku nos yunan, nan bisa: “Sigur-sigur Dios ta meimei di boso.”—1 Korintionan 14:25.

Un Rasgo Permanente di Nos Adorashon

14, 15. (a) Kon nos por evitá di ‘neglishá e kas di nos Dios’? (b) Kon Isaias 66:23 ta kumpliendo kaba?

¹⁴ Manera a ser bisá kaba na prinsipio di e artíkulo aki, Yehova ta reuniendo su pueblo i ta hasi nan kontentu den su “kas di orashon,” su tèmpel spiritual. (Isaias 56:7) E hòmber fiel, Nehemias, a rekordá su kompañeronan  hudiu ku nan mester a mustra e debido rèspèt pa e tèmpel literal dor di sosten’é materialmente. El a deklará: “Nos lo no neglishá e kas di nos Dios.” (Nehemias 10:39) Ademas, nos no mester neglishá Yehova su invitashon pa ador’é den su “kas di orashon.”

¹⁵ Demostrando ku ta nesesario pa nos reuní huntu ku regularidat pa rindi adorashon, Isaias a profetisá: “‘Lo ta di luna nobo pa luna nobo, i di sabat pa sabat, ku henter humanidat lo bin pa bùig mi dilanti,’ SEÑOR ta bisa.” (Isaias 66:23) Esaki ta tumando lugá awe. Regularmente, tur siman di tur luna, kristiannan dediká ta bin huntu pa adorá Yehova. Nan ta hasi esaki, entre otro, dor di asistí na reunionnan kristian i partisipá den e ministerio públiko. Abo ta un di esnan ku regularmente ta ‘bin bùig dilanti Yehova’?

16. Dikon asistensia regular na reunion lo mester ta un rasgo permanente di nos bida aktual?

¹⁶ Isaias 66:23 lo apliká plenamente na e bida ku nos lo tin den e mundu nobo ku Yehova ta primintí. E tempu ei, “henter humanidat,” den un sentido literal, siman aden siman afó i luna aden luna afó, ‘lo bin pa bùig dilanti Yehova,’ es desir, lo ador’é pa henter eternidat. Siendo ku reuní huntu pa rindi adorashon na Yehova lo ta un rasgo permanente di nos bida spiritual den e mundu nobo, pakiko nos no ta hasi asistensia regular na nos reunionnan sagrado un rasgo permanente di nos bida aktual?

17. Dikon nos tin mester di nos reunionnan “muchu mas ainda [ku nos] ta mira ku e dia ta yegando serka”?

¹⁷ Segun ku e fin ta yega serka, nos mester ta mas determiná ku nunka pa asistí na nos reunionnan kristian pa rindi adorashon. Komo muestra di rèspèt pa e karakter sagrado di nos reunionnan, nos lo no permití nos empleo, hùiswèrk òf skol djanochi stroba nos di reuní regularmente huntu ku nos rumannan den fe. Nos tin mester di e fortalesa ku nos ta haña mediante e asosiashon ei. Nos reunionnan di kongregashon ta duna nos e oportunidat di siña konosé otro, di enkurashá otro i di stimulá otro “pa stima i hasi bon obra.” Nos tin mester di esaki “muchu mas ainda [ku nos] ta mira ku e dia ta yegando serka.” (Hebreonan 10:24, 25) P’esei laga nos semper demostrá e debido rèspèt pa nos reunionnan sagrado dor di asistí regularmente na nan, bisti na un manera apropiá, i komportá nos mes na un manera ku ta pas pa e okashon. Hasiendo asina, nos ta demostrá ku nos tin Yehova su punto di bista di kosnan sagrado.

Komo Repaso

• Kiko ta mustra ku mester konsiderá e reunionnan di e pueblo di Yehova komo sagrado?

• Ki rasgonan di nos reunionnan ta duna prueba ku nan ta okashonnan sagrado?

• Kon muchanan por mustra ku nan ta respetá e karakter sagrado di nos reunionnan?

• Dikon nos tin ku hasi asistensia regular na reunion un rasgo permanente di nos bida?

[Preguntanan di Estudio]

[Plachinan na página 28]

Reunionnan pa adorá Yehova ta sagrado na unda ku tene nan

[Plachi na página 31]

Nos chikitinnan ta asistí na reunion pa tende i pa siña