Historia di Bida

Yehova A Bendishoná Mi Deseo di Ta Misionero Rikamente

Segun e Relato di Sheila Winfield da Conceição

Un biaha un misionero ku tabata di bishita for di Afrika a konta nos ku den e teritorio den su asignashon, tur hende ta lag’é drenta paden i ta skucha atentamente na e bon nobo di e Reino di Dios. Segun ku mi tabata tend’é, mi a pensa: ‘Lo mi tin gana di traha den un teritorio asina!’ E kòmbersashon ei, tempu ku mi tabatin 13 aña, a planta den mi kurason e deseo di ta un misionero.

SIN embargo, nos famia a kuminsá siña tokante Yehova hopi mas promé. Un mainta na aña 1939, dos yònkuman nèchi bistí a bati na nos porta na Hemel Hempstead, un pueblo djis pafó di e zona metropolitano di Lònden, Inglatera. Nan tabata Testigunan di Yehova. Mi a nase un aña promé ku esei, pues mi no ta kòrda e bishita ei. Pa kita nan for di su kurpa mi mama a bisa nan ku mi tata lo por ta interesá pero ku lo e no ta na kas promé ku 9 or di anochi. Esta sorprendí mi mama a keda ora ku nan a bolbe bèk e mesun anochi ei! Despues ku mi tata, Henry Winfield, a hasi sigur di nan posishon den asuntunan polítiko i nashonalista, el a invitá nan pa drenta i a aseptá un estudio di Beibel. El a progresá rápidamente i a batisá. Algun aña despues, mi mama Kathleen, tambe a kuminsá studia. El a batisá na aña 1946.

Na 1948, mi a kuminsá partisipá ku regularidat den e predikashon di e bon nobo di e Reino di Dios. Mi a haña ku mi tabatin mester di un oloshi pa mi por raportá presis kuantu ora mi a dediká na sirbishi. Si ami ku mi dos ruman hòmbernan a komportá nos mes bon, nos tabata haña tur djasabra komo zakgeld un  moneda ku a bal seis sèn. Mi a spar mi monedanan di seis sèn pa kasi dos aña pa mi por a kumpra e oloshi di mas barata ku tabatin e tempu ei. Sin embargo, Ray, mi ruman hòmber mas chikí, semper tabata pidi mi tata pa dun’é su zakgeld na dos moneda di tres sèn, nunka ún di seis sèn. Un dia el a insistí asina tantu pa haña dos moneda ku mi tata a rabia. Ray a kuminsá yora i a bisa ku e tabatin mester di dos moneda di tres sèn debí na un sekreto entre é ku Yehova. Finalmente, Ray a splika: “Un di e monedanan di tres sèn ta pa pone den kaha di kontribushon, i e otro ta pa mi.” Mi mama a yora di kontentu, mi tata a kore bai kambia e sèn, i ami a siña e importansia di apoyá e obra di Reino finansieramente.

Rònt di e tempu aki, mi tata a hasi areglo pa nos bai biba kaminda tabatin mas mester di proklamadónan di Reino. Na 1949 el a bende su boerderij i tambe su tereno di saka santu i greis i a kuminsá traha pionero, predikando fultaim komo un Testigu di Yehova. Ami a batisá dia 24 di sèptèmber 1950, komo símbolo di mi dedikashon na Yehova. Djei padilanti, durante fakansi di zomer, mi tabata sirbi komo pionero di fakansi (yamá awor pionero ousiliar), dedikando 100 ora òf mas pa luna na e trabou di prediká. Pero esei tabata apénas e prinsipio. Poko despues un deseo fuerte a lanta den mi kurason pa hasi mas ainda pa promové adorashon puru.

Mi Deseo di Ta Misionero

Na 1951, mi tata a ser asigná na Bideford, Nort Devon. Poko despues ku nos a yega einan, e misionero ku tabata sirbi na Afrika a bishitá nos kongregashon, manera mi a konta na kuminsamentu. Despues di e bishita ei, mi deseo pa bira un misionero a influensiá tur mi desishonnan. E dosentenan na skol tabata sa di mi meta i nan a hasi tur nan posibel pa pone mi kambia di opinion, ku e speransa ku lo mi a buska un karera den mundu. Sin embargo, riba mi último dia di skol, ora ku mi a bai na e kamber di e dosentenan pa gradisí nan i pa yama nan ayó, un di nan a bisa mi: “Pabien! Abo ta e úniko studiante ku realmente sa kiko bo ke den bida. Nos ta spera ku bo ta logra bo meta.”

Mi a buska un trabou partaim mesora, i riba promé di desèmber 1955, mi a bira un pionero regular. Mas despues, mi mama ku mi ruman hòmbernan tambe a bira pionero. Asina a sosodé ku durante vários aña, henter nos famia tabata den sirbishi di tempu kompletu.

Rumbo pa Irlanda

Un aña despues, mi a haña invitashon pa sirbi na Irlanda. Esaki tabata un paso den direkshon di mi meta di bira misionero. Na febrüari 1957, huntu ku dos otro pionero hóben, June Napier i Beryl Barker, mi a yega na Cork, den zùit di Irlanda.

Sirbishi di vèlt na Irlanda tabata un reto. Tabatin hopi oposishon di parti di Iglesia  Katóliko Romano. Nos a siña hasi sigur ku tin un kaminda pa salida for di un edifisio di flèt òf un proyekto di bibienda, den kaso ku nos mester a bati retirada purá. Nos tabatin kustumber di skonde nos baiskelnan na un distansia leu, pero hopi biaha ken ku ta tabata haña nan i kòrta e tayernan òf baha nan.

Un biaha ku ami ku Beryl tabata bishitá e habitantenan di un proyekto grandi di bibienda, un grupo di mucha a kuminsá grita palabranan di insulto i tira nos ku piedra. P’esei nos a drenta un tienda, ku tabata parti di un kas, kaminda nan ta bende lechi. Un multitut desordená a kuminsá forma pafó di e lugá. Komo ku Beryl stima lechi, el a bebe dos pa tres glas pokopoko, ku e speransa ku e hendenan lo a plama. Pero nan no a bai. Nèt na e momento ei un pastor hóben a drenta e tienda. El a mira nos pa bishitante i el a ofresé pa mustra nos e bario. Sin embargo, promé el a hiba nos na un otro kuarto den e kas, i miéntras nos a sinta ketu-ketu, el a duna santoli na un hòmber bieu ku tabata muriendo. Kaba nos a sali for di e kas huntu ku e pastor. Ora e multitut a mira nos sali kòmbersando kuné, nan a plama.

Rumbo pa Galaad

Na 1958 lo tabatin e Asamblea Internashonal Boluntat Divino na New York. Mi tata tabata bai e asamblea ei, i mi tambe tabatin gana di bai, pero mi no tabatin sèn. Anto mi wela a muri ònferwagt i a laga 100 libra (500 florin) pa mi. E pasashi ida i buèlta pa e asamblea tabata kosta 96 libra, pues mi a buk mi pasashi mesora.

Poko despues, un representante di e sukursal di Testigunan di Yehova na Gran Bretaña a bishitá nos i a invitá tur e pioneronan spesial ku tabata bai e asamblea pa solisitá pa haña entrenamentu komo misionero na e Skol Bíbliko di Galaad di Watchtower. Mi no por a kere mi oreanan! El a duna un formulario di solisitut na tur ku eksepshon di mi. Mi tabata muchu yòn. Mi a pidié pa inkluí mi, i a splik’é ku ya kaba mi a bandoná mi pais natal i tabata práktikamente den un asignashon di misionero. Ora el a mira kon determiná mi tabata, el a duna mi un formulario. Esta hopi orashon mi a hasi pa mi ser aseptá! E kontesta a bin bèk lihé, i mi a haña e invitashon pa asistí na Galaad.

Pa mi gran goso, mi tabata den e di 33 klas di Galaad, huntu ku 81 pionero di 14 pais. E sinku lunanan di e kurso a pasa masha lihé. Kasi na final, Ruman Nathan H. Knorr a duna nos un diskurso motivador di kuater ora. El a animá esnan ku por a keda soltero pa hasi esei. (1 Korintionan 7:37, 38, NW) Pero pa nos ku a deseá di kasa un dia, el a sugerí pa nos traha un lista di loke nos personalmente tabata rekerí di un kasá apropiá. Anto si un posibel kandidato  mester presentá, nos lo por a saminá e persona a base di e rekisitonan ei.

Mi lista personal di loke mi a rekerí di un posibel esposo a inkluí lo siguiente: E tambe lo mester ta un misionero i ta stima Yehova, e mester sa mas tokante e bèrdat bíbliko ku mi, e mester ta dispuesto pa no haña yu promé ku Armagedón pa nos por sigui den sirbishi di tempu kompletu, e mester ta papia ingles bon i e mester tin mas edat ku mi. Mi lista tabata un gran yudansa pa mi, un hóben di 20 aña ku tabata a punto di haña un asignashon pa bai un pais leu.

Rumbo pa Brazil

Riba djadumingu, 2 di ougùstùs 1959, nos a gradua i a haña sa unda nos asignashon lo ta. Ami ku Vehanouch Yazedjian, Sarah Greco, Ray i Inger Hatfield, Sonia Springate i Doreen Hines, a ser asigná pa bai Brazil. Nos tabata hopi emoshoná. Mi a imaginá hopi selva, kolebra, mata di rùber i indjan nativo. Sin embargo, ki un sorpresa mi a haña ora m’a yega! En bes di e selva di yobida di Amazona, mi a haña Rio de Janeiro, ku e tempu ei tabata e kapital di e pais, un stat moderno i ku hopi solo.

Nos promé reto tabata pa siña portugues. Durante e promé luna, nos tabata siña 11 ora pa dia. Despues di a prediká na Rio i a biba pa un tempu na e sukursal di Testigunan di Yehova einan, nan a manda mi na un kas di misionero na Piracicaba, den Estado São Paulo, i despues pa un kas di misionero na Porto Alegre, den Estado Rio Grande do Sul.

Pero na prinsipio di 1963, mi a haña un invitashon pa traha den e Departamento di Tradukshon na sukursal. Floriano Ignez da Conceição, kende a duna nos lès di portugues na kuminsamentu ora nos a yega Brazil, tabata na enkargo di e departamento. El a konosé e bèrdat na 1944, tempu ku tabatin apénas un 300 Testigu na Brazil, i despues el a asistí na e di 22 klas di Galaad. Riba un dia, algun luna despues, Ruman Conceição a pidi mi keda un ratu mèrdia, ya ku e tabatin un kos di papia ku mi. Na promé instante, mi a preokupá. Akaso mi a hasi algu robes? Ora ku por fin bèl a bati pa bai kome, mi a puntr’é ta kiko e tabatin di bisa mi. Komo kontesta el a puntra mi: “Bo ke kasa ku mi?” Mi a keda babuká. Mi a pidié duna mi tempu pa pensa riba e asuntu i mi a kore bai abou pa bai kome.

Floriano no tabata e promé ruman hòmber ku a ekspresá interes den mi. Sin embargo, te ku e momento ei ningun di nan no a satisfasé loke personalmente mi tabata rekerí di un kasá apropiá. Mi ta kere ku mi lista a yuda mi evitá di tuma mal desishon. Pero e biaha aki tabata otro. Floriano a satisfasé tur loke mi tabata rekerí! Pues nos a kasa dia 15 di mei 1965.

Konfrontando e Difikultatnan di Malesa

Matrimonio tabata un dushi eksperensia pa mi ku Floriano, apesar di e retonan ku nos a konfrontá. Un di e retonan aki tabata Floriano su problemanan di salú ku a kuminsá djis promé ku nos a kasa. Añanan promé, el a sufri un kolapso di pulmon, i awor e efektonan di esei a kuminsá kous’é hopi doló. Komo resultado, nos a bandoná Bètel i a ser asigná komo pionero spesial na e stat Teresópolis, den e region montañoso di Estado Rio de Janeiro. Nos a spera ku e klima ku tin einan lo a yud’é rekuperá.

Ademas, na desèmber 1965 mi a haña e notisia ku mi mama tabata gravemente malu ku kanser. Nos tabata skirbi otro ku regularidat, pero mi tabatin shete aña sin mira mi mama. P’esei el a paga nos pasashi pa bin bishit’é na Inglatera. Dòkternan a operá mi mama, pero nan no por a saka e kanser. Ounke e tabata na kama i hopi malu, el a keda ku su deseo di partisipá den e trabou di prediká. E tabatin un mashin di taip den su kamber di manera ku e por a dikta karta pa bo taip p’e. E tabata prediká tambe brevemente na bishitantenan. El a muri dia 27 di novèmber 1966. E mesun luna ei, el a raportá dies ora di sirbishi di vèlt! Mi tata a sigui fiel den sirbishi di pionero te na su morto na 1979.

Despues di morto di mi mama, ami ku Floriano a regresá Brazil, kaminda nos a sigui sirbi te  awe den Estado Rio de Janeiro. Na prinsipio, nos a ser asigná pa hasi e trabou di sirkuito den e kapital di e estado, pero nos goso tabata di korto durashon, ya ku Floriano a bolbe bira malu. E ora ei nos a regresá Teresópolis komo pionero spesial.

Na 1974, despues di vários aña di tratamentunan doloroso, dòkternan finalmente a kita Floriano su pulmon robes. Durante e tempu ei, e no por a sirbi komo superintendente presidente ni komo pionero spesial, pero sí e por a kondusí estudio di Beibel durante oranan di bishita na hospital. Un di e estudionan ei tabata na ingles ku Bob, un merikano penshoná. Bob a aseptá e bèrdat i despues a batisá. Pokopoko Floriano a rekuperá i el a sigui sirbi komo pionero regular te ku awe.

Yehova A Bendishoná Mi Ministerio

Atraves di añanan, mi a sigui sirbi komo pionero spesial, i Yehova a bendishoná mi ministerio. Na Teresópolis, mi tabatin e privilegio maravioso di yuda mas ku 60 hende dediká nan bida na Yehova. Entre nan tabatin un señora ku yama Jupira, ku a siña lesa serka mi. Ku tempu, mi a studia ku ocho di su yunan adulto. Komo resultado, Jupira i mas ku 20 miembro di su famia ta sirbiendo Yehova aktivamente awe. Un di nan ta ansiano, tres ta sirbidó ministerial i dos ta pionero.

Mi a siña mantené un aktitut positivo pa loke ta e posibilidat ku hende por aseptá e bèrdat. Na un okashon, mi tabata kondusiendo un estudio di Beibel ku un señora hóben ku yama Alzemira ora ku su kasá, Antônio, a menasá di manda dos kachó grandi riba mi si mi no bandoná nan kas inmediatamente. Despues di esei, de bes en kuando mi tabatin kontakto ku Alzemira te ku shete aña despues, ora ku mi a logra haña Antônio su pèrmit pa bolbe studia ku Alzemira. Pero asina mes, Antônio a taha mi di papia tokante Beibel kuné. Sin embargo, un dia ku áwaseru tabata kai mi a invitá Antônio pa partisipá den e estudio. E ora ei mi a deskubrí ku su problema tabata ku e no por a lesa ni skirbi. Djei padilanti, Floriano i otro rumannan a studia kuné i a siñ’é lesa. Awe tantu Alzemira komo Antônio ta rumannan batisá. Antônio ta un gran yudansa den e kongregashon, i ta kompañá hopi hóben den e ministerio.

Esakinan ta djis algun di e tantísimo eksperensianan ku nos tabatin durante mas ku 20 aña ku nos a sirbi na Teresópolis. Na prinsipio di 1988, nos a haña un asignashon nobo: e stat di Niterói. Einan nos a sirbi pa sinku aña i despues nos a muda pa Santo Aleixo. Kaba nos a muda pa Kongregashon Japuíba den kurason di e estado i nos tabatin e privilegio di lanta Kongregashon Ribeira.

Un Bida Simpel Pero Rekompensador

Atraves di añanan, ami ku Floriano tabatin e privilegio di a yuda mas ku 300 hende dediká nan bida na Yehova. Aktualmente, algun ta sirbi na sukursal, i tin di nan ta pionero, ansiano i sirbidó ministerial. Mi ta masha gradisidu ku Dios mediante su spiritu santu a usa nos pa yuda asina tantu hende!—Marko 10:29, 30.

Ta bèrdat ku Floriano tabatin ku trata ku problemanan serio di salú. Apesar di su kondishon, e ta keda firme, gososo i ku konfiansa den Yehova. Hopi biaha e ta bisa: “Awendia felisidat no ta bin di hiba un bida sin problema. E ta bin di tin Yehova su yudansa pa trata ku nos problemanan.”—Salmo 34:19.

Na aña 2003, dòkternan a haña kanser den mi wowo robes. Mi a operá i nan a remplasá mi wowo pa un wowo artifisial ku mi tin ku limpia vários biaha pa dia. Apesar di esaki, Yehova a bendishoná mi ku e energia pa sigui sirbié komo pionero spesial.

Pa loke ta kosnan material, mi a hiba un bida simpel. Sin embargo, Yehova a bendishoná mi den mi asignashon i hasi mi riku den sentido spiritual. E komentario di e ruman muhé misionero tokante e trabou di prediká na Afrika a resultá di ta un bon deskripshon di nos asignashon na Brazil. De echo, Yehova a bendishoná mi deseo di ta misionero rikamente!

[Plachi na página 9]

Ami huntu ku mi famia, 1953

[Plachi na página 9]

Predikando na Irlanda, 1957

[Plachi na página 10]

Na Brazil, 1959, huntu ku otro misionero. Di robes pa drechi: Ami, Inger Hatfield, Doreen Hines, i Sonia Springate

[Plachi na página 10]

Huntu ku mi kasá