Aseptá Semper e Disiplina di Yehova

“No rechasá e disiplina di [Yehova].”​—⁠PROVERBIONAN 3:⁠11.

1. Pakiko nos tin ku aseptá disiplina di Dios?

REI SALOMON di Israel di antigwedat a duna kada un di nos un bon motibu pa aseptá disiplina di Dios. E di: “Mi yu, no rechasá e disiplina di SEÑOR, ni aboresé su reprendementu, pasobra esun ku SEÑOR ta stima, e ta reprendé, meskos ku un tata ta reprendé e yu ku e tin delisia den dje.” (Proverbionan 3:​11, 12) Sí, bo Tata selestial ta disipliná bo pasobra e stima bo.

2. Kiko ta “disiplina” i kon un persona por ser disipliná?

² “Disiplina” por referí na kastigu, korekshon, instrukshon i edukashon. Apòstel Pablo a skirbi: “Na e momento mes ningun disiplina no ta parse di ta kousa di goso, sino di doló; ma pa esnan ku a wòrdu entrená dor di dje, despues e ta duna e fruta pasífiko di hustisia.” (Hebreonan 12:⁠11) Si bo ta aseptá i apliká disiplina di Dios, esei por yuda bo kana den e kaminda di hustisia i permití bo yega mas serka di e Dios santu, Yehova. (Salmo 99:⁠5) Korekshon por bini di parti di bo rumannan den fe, pa medio di e kosnan ku bo ta siña na reunion kristian i for di bo estudio di e Palabra di Dios i e publikashonnan di ‘e mayordomo fiel.’ (Lukas 12:​42-⁠44) Pues, bo por ta gradisidu ora hala bo atenshon den un di e formanan aki riba algu ku bo tin ku drecha! Pero ki disiplina por ta nesesario ora un kristian kometé piká serio?

Dikon Algun Persona Ta Ser Ekspulsá

3. Ki ora un miembro di kongregashon ta ser ekspulsá?

³ Sirbidónan di Dios ta studia Beibel i publikashonnan kristian. Na nan reunion-, asamblea- i kongresonan nan ta siña tokante e normanan di Yehova. Pues, kristiannan sa kiko  Yehova ta rekerí di nan. Ta solamente ora un miembro di e kongregashon kometé piká serio sin repentí e ta ser ekspulsá.

4, 5. Ki ehèmpel bíbliko di ekspulshon ta ser presentá aki, i pakiko Pablo a urgi e kongregashon pa restorá e hòmber?

⁴ Konsiderá un ehèmpel bíbliko di un persona ku a ser ekspulsá. E kongregashon na Korinto a tolerá “inmoralidat di tal forma ku no [tabata] eksistí ni meimei di e paganonan, ku un hòmber [tabata] biba ku esposa di su tata.” Pablo a urgi e korintionan pa “entregá un hende asina na Satanas pa destrukshon di su karni, pa [e] spiritu wòrdu salbá.” (1 Korintionan 5:​1-⁠5) Ora e pekadó a ser ekspulsá, na moda di papia entregá na Satanas, el a bolbe bira parti di e mundu di Diabel. (1 Juan 5:⁠19) Su ekspulshon a eliminá un influensia karnal maligno for di e kongregashon i a konserbá e kongregashon su “spiritu,” òf aktitut dominante, di manera ku esaki por a sigui reflehá e kualidatnan di Dios.​—⁠2 Timoteo 4:​22, NW; 1 Korintionan 5:​11-⁠13.

⁵ No muchu tempu despues, Pablo a urgi e kristiannan na Korinto pa restorá òf restablesé e malechor. Dikon? Segun e apòstel, nan mester a hasi esei pa “Satanas no tuma bentaha” riba nan. Tur kos a mustra ku e pekadó a repentí i a kuminsá hiba un bida moralmente limpi. (2 Korintionan 2:​8-⁠11) Si e korintionan a nenga di restorá e hòmber arepentí, Satanas lo a tuma bentaha riba nan den e sentido ku nan lo tabata sin heful i sin miserikòrdia nèt manera Diabel tabata ke. Muy probablemente, nan no a tarda pa ‘pordoná i konsolá’ e hòmber arepentí.​—⁠2 Korintionan 2:​5-⁠7.

6. Kiko ekspulshon por logra?

⁶ Kiko un ekspulshon ta logra? E ta mantené e nòmber santu di Yehova liber di reproche i ta protehá e bon reputashon di su pueblo. (1 Pedro 1:​14-⁠16) Ekspulshon di un malechor ku no repentí for di e kongregashon ta respaldá e normanan di Dios i ta konserbá e puresa spiritual di e kongregashon. Tambe e por yuda e persona ku no a repentí realisá e gravedat di su piká.

Repentimentu Ta Hasi un Diferensia

7. Tanten ku David no a konfesá su transgreshonnan, ki efekto esei tabatin riba dje?

⁷ Mayoria kristian ku kometé un piká serio ta sinseramente arepentí i no ta ser ekspulsá for di e kongregashon. Naturalmente no ta fásil pa mustra berdadero repentimentu. Tuma por ehèmpel Rei David di Israel, kende a komponé Salmo 32. E kantika ei ta revelá ku pa un tempu David no a konfesá su piká serio ku probablemente tabatin di haber ku Bètsabé. Esei a pone ku e angustia ku el a sinti pa motibu di su pikánan a kaba ku su vigor, meskos ku tempu di hopi kalor ta kaba ku e humedat di un palu. David a sufri físikamente i mentalmente, pero ora el a ‘konfesá su transgreshonnan, Yehova a pordon’é.’ (Salmo 32:​3-⁠5) Anto David a kanta: “Bendishoná ta e hende, kende su inikidat SEÑOR no ta tuma na kuenta.” (Salmo 32:​1, 2) Tabata algu magnífiko pa eksperensiá Dios su miserikòrdia!

8, 9. Kon repentimentu ta ser manifestá, i kon importante esei ta pa determiná ki ora un persona ekspulsá por ser restorá?

⁸ Esaki ta mustra bon kla anto ku si un pekadó ke haña miserikòrdia, e mester ta arepentí. Sin embargo, bèrgwensa i miedu di wòrdu deskubrí no ta repentimentu. “Repentí” ta nifiká “kambia di pensamentu” relashoná ku mal kondukta, pa motibu di duele. Un persona arepentí tin ‘un kurason kibrá’ i ke korigí e malecho si esei ta posibel.​—⁠Salmo 51:⁠17; 2 Korintionan 7:​11, NW.

⁹ Repentimentu ta un faktor masha importante pa determiná ki ora un persona ekspulsá por ser restorá den e kongregashon kristian. Un persona ekspulsá no ta ser aseptá outomátikamente bèk den e kongregashon despues ku un sierto kantidat di tempu a pasa. Promé ku e por ser restorá, mester bin un kambio grandi den e kondishon di su kurason. E mester realisá ki grave su piká tabata i ki reproche  el a trese riba Yehova i e kongregashon. E pekadó mester repentí, pidi pordon di kurason i kumpli ku e rekisitonan hustu di Dios. Ora e ta pidi pa e ser restorá, e mester por duna evidensia ku el a repentí i ku e ta produsiendo “obranan ku ta kuadra ku repentimentu.”​—⁠Echonan 26:⁠20.

Pakiko Konfesá Malecho?

10, 11. Pakiko nos no mester purba skonde un piká?

¹⁰ Kisas algun persona ku a kometé piká ta rasoná: ‘Si mi konta un hende di mi piká, lo mi tin ku bai kontestá pregunta ku ta duna mi bèrgwensa i mi por wòrdu ekspulsá. Ma si mi keda ketu, mi por evitá esei i niun hende den kongregashon lo no haña sa nunka.’ Pero e pensamentu ei no ta tene kuenta ku algun faktor importante. Kiko nan ta?

¹¹ Yehova ta un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat; kende ta mantené miserikòrdia pa milnan, kende ta pordoná inikidat, transgreshon i piká.” Pero debidamente e ta korigí su pueblo “manera mester ta.” (Eksodo 34:​6, 7; Jeremias 46:⁠28) Si bo a kometé un piká serio, kon bo por risibí e miserikòrdia di Dios si bo ta purba skonde bo piká? Yehova ta konsiente di dje i e no ta djis sera wowo pa malecho.​—⁠Proverbionan 15:3; Habakuk 1:⁠13.

12, 13. Kiko por pasa ku un kristian ku ta purba skonde su malecho?

¹² Si bo a kometé un piká serio, konfeshon por yuda bo rekobrá un bon konsenshi. (1 Timoteo 1:​18-20) Pero si bo keda sin konfesá, esei por resultá den un konsenshi sushi ku por pone bo kai den mas piká. Kòrda ku bo piká no ta djis kontra un otro hende òf e kongregashon. E ta kontra Dios. E salmista a kanta: “E trono di Yehova ta den shelu. Su mes wowo ta mira, su propio wowo radiante ta eksaminá e yunan di hende. Yehova mes ta eksaminá e hustu i tambe e malbado.”​—⁠Salmo 11:​4, 5, NW.

¹³ Yehova lo no bendishoná niun persona ku ta skonde piká serio i ta purba keda den e kongregashon kristian limpi. (Santiago 4:⁠6) Pues si bo a kai den piká i ke hasi loke ta korekto, no vasilá pa konfesá esei onestamente, sino bo konsenshi lo keda remordé bo, foral ora bo lesa òf tende konseho tokante asuntunan relashoná ku e piká serio ei. Kiko lo sosodé si Yehova kita su spiritu for di bo, meskos ku el a hasi den e kaso di Rei Saul? (1 Samuel 16:⁠14) Sin e spiritu di Dios, bo por kai den piká mas serio ainda.

Konfia Bo Rumannan Fiel

14. Pakiko un malechor mester sigui e konseho di Santiago 5:⁠14 i 15?

¹⁴ P’esei, kiko un malechor repentí mester hasi? “Lag’é yama e ansianonan . . . i laga nan hasi orashon p’e, huntando e ku zeta den e nòmber di [Yehova]; i e orashon hasí den fe lo restorá esun ku ta malu, i SEÑOR lo lant’é.” (Santiago 5:​14, 15) Un manera ku un persona ta “duna fruta ku ta kuadra ku repentimentu” ta di aserká e ansianonan. (Mateo 3:⁠8) E hòmbernan fiel i amoroso aki lo ‘hasi orashon p’e i hunt’é ku zeta den e nòmber di Yehova.’ Meskos ku zeta òf un ungwento ku ta suavisá, nan konseho bíbliko lo resultá di ta un konsuelo pa ken ku ta berdaderamente arepentí.​—⁠Jeremias 8:⁠22.

15, 16. Kon ansianonan kristian ta sigui e ehèmpel ku Dios a pone, manera Ezekiel 34:⁠15 i 16 ta trese dilanti?

¹⁵ Yehova, nos Wardadó, a pone un ehèmpel amoroso ora el a libra e hudiunan for di sklabitut na Babilonia na aña 537 promé ku nos era i ora el a libra Israel spiritual for di “e Gran Babilonia” na aña 1919 di nos era! (Revelashon 17:​3-⁠5; Galationan 6:⁠16) Asina el a kumpli ku su promesa: “Lo mi alimentá mi tou i lo mi hiba nan na un lugá kaminda nan por sosegá . . . Lo mi buska esnan ku ta pèrdí, trese bèk esnan ku tabata dual, pone verbant pa esnan ku ta heridá, i fortifiká esnan ku ta malu.”​—⁠Ezekiel 34:​15, 16.

 ¹⁶ Yehova a alimentá su karnénan figurativo, el a pone nan sosegá na un lugá sigur i a buska esnan pèrdí. Meskos tambe, wardadónan kristian ta perkurá pa e tou di Dios ta spiritualmente bon alimentá i fuera di peliger. E ansianonan ta buska e karnénan ku dual for di e kongregashon. Meskos ku Dios a ‘pone verbant pa esun heridá,’ superintendentenan ta “verbant” karné ku tin herida kousá pa loke otro hende por a bisa òf pa motibu di nan mes akshonnan. I meskos ku Dios a ‘fortifiká esun ku ta malu,’ e ansianonan ta yuda esun ku a bira spiritualmente enfermo, posiblemente pa motibu di un malecho ku el a kometé.

E Manera Ku Wardadónan Ta Duna Yudansa

17. Pakiko nos no mester vasilá pa buska yudansa spiritual di e ansianonan?

¹⁷ E ansianonan ta kumpli gustosamente ku e konseho aki: “Tene miserikòrdia ku temor.” (Hudas 23) Algun kristian a kometé e piká serio di inmoralidat seksual. Pero si nan ta berdaderamente arepentí, nan por spera un trato miserikòrdioso i amoroso serka ansianonan ku ta ansioso pa yuda nan spiritualmente. Papiando entre otro di su mes, Pablo a bisa relashoná ku e hòmbernan aki: “No ku nos tin dominio riba boso fe, ma nos ta trahadó huntu ku boso pa boso goso.” (2 Korintionan 1:⁠24) P’esei, nunka vasilá pa buska nan yudansa spiritual.

18. Kon ansianonan ta trata ku un ruman den fe ku a faya?

¹⁸ Si bo a kometé un piká serio, pakiko bo por tin konfiansa den e ansianonan? Pasobra nan ta na promé lugá wardadónan di e tou di Dios. (1 Pedro 5:​1-⁠4) Niun wardadó amoroso no ta bati un lamchi mansu ku ta grita pa motibu ku el a lastimá su kurpa. P’esei, ora ansianonan ta trata ku un ruman den fe ku a faya, nan enfoke no ta riba ki kastigu su malecho ta meresé, sino riba ki piká el a kometé i kon nan por yud’é rekuperá spiritualmente kaminda esei ta posibel. (Santiago 5:​13-⁠20) Ansianonan mester husga ku hustisia i “trata e tou ku ternura.” (Echonan 20:​29, 30, NW; Isaias 32:​1, 2) Meskos ku tur otro kristian, ansianonan mester ‘hasi hustisia, stima miserikòrdia, i kana humildemente ku Dios.’ (Mikeas 6:⁠8) E kualidatnan ei ta sumamente importante ora nan tin ku tuma desishon ku tin di haber ku e bida i sirbishi sagrado di “e karnénan ku [Yehova] ta pastoriá.”​—⁠Salmo 100:⁠3.

19. Ku ki aktitut ansianonan kristian ta purba reahustá un persona?

 ¹⁹ Wardadónan kristian ta haña nan nombramentu via di spiritu santu i nan ta hasi esfuerso pa laga e spiritu aki guia nan. “Si un hende wòrdu sorprendí den kualke delitu,” hòmbernan ku kualifikashon spiritual ta purba “restorá un hende asina den un spiritu di mansedumbre.” (Galationan 6:⁠1; Echonan 20:⁠28) Ku suavedat, pero pegando firmemente na normanan divino, e ansianonan ta purba reahustá su forma di pensa, meskos ku un dòkter kompasivo ta pega un man òf pia kibrá ku hopi kuidou pa evitá di kousa doló innesesario i tòg solushoná e problema. (Kolosensenan 3:⁠12) Ya ku e ansianonan ta hasi orashon i ta usa e Skritura pa determiná si mester ekstendé miserikòrdia, nan desishon lo reflehá e manera ku Dios ta mira e asuntu.​—⁠Mateo 18:⁠18.

20. Ki ora lo por ta nesesario pa anunsiá na e kongregashon ku a reprendé un sierto ruman?

²⁰ Si un piká ta ampliamente konosí òf sin duda lo bira konosí, probablemente lo ta apropiá pa hasi un anunsio na e kongregashon pa asina protehá su reputashon. Lo hasi un anunsio tambe si mester informá e kongregashon. Durante e tempu ku un individuo ku a haña un reprendementu hudisial ta kurando spiritualmente, por kompar’é ku un persona ku ta rekuperando di un leshon, lokual ta limitá su aktividat temporalmente. Probablemente, pa un tempu lo ta mihó pa e persona arepentí skucha en bes di duna komentario na reunion. E ansianonan por hasi areglo pa laga un ruman kristian studia Beibel kuné pa fortales’é kaminda e ta débil pa asina e por bira “sano den fe” atrobe. (Tito 2:⁠2) Tur esaki ta sosodé ku amor i no ta pa kastigá e malechor.

21. Kon algun kaso di malecho por ser tratá?

²¹ Ansianonan por duna yudansa spiritual den vários manera. Por ehèmpel, suponé ku un ruman ku den pasado tabatin problema ku bebementu, a bebe di mas un òf dos biaha ora e tabata su so na kas. Òf tal bes un ruman ku hopi tempu pasá a stòp di usa tabako, a huma un òf dos biaha den un momento di debilidat. Ounke el a hasi orashon i ta kere ku Dios a pordon’é, e mester buska yudansa di un ansiano pa su piká no bira un kustumber. Un òf dos ansiano por atendé e situashon. Sin embargo, e ansiano(nan) lo informá e superintendente presidente, ya ku lo por tin mas faktor enbolbí.

Sigui Aseptá Disiplina di Dios

22, 23. Pakiko bo mester sigui aseptá disiplina di Dios?

²² Pa risibí e aprobashon di Dios, kada kristian mester presta atenshon na e disiplina di Yehova. (1 Timoteo 5:⁠20) P’esei, tuma na pechu kualke korekshon ku bo risibí ora bo ta studia e Skritura i publikashonnan kristian òf ora bo tende konseho presentá na reunion-, asamblea- i kongresonan di e pueblo di Yehova. Keda alerta pa hasi e boluntat di Yehova. E ora ei disiplina di Dios lo yuda bo mantené un defensa fuerte⁠—⁠manera un fòrti⁠—⁠kontra piká.

²³ Ora bo ta aseptá disiplina di Dios, esei lo por yuda bo keda den su amor. Ta bèrdat ku algun individuo a ser ekspulsá for di e kongregashon kristian, pero esei no tin nodi di sosodé ku bo si bo ta “warda bo kurason” i ‘kana manera hende sabí.’ (Proverbionan 4:⁠23; Efesionan 5:⁠15) Sin embargo, si na e momentonan aki bo ta ekspulsá, pakiko no dal e pasonan pa bo wòrdu restorá? Dios ke pa tur hende ku a hasi un dedikashon na dje ador’é fielmente i ku “un kurason kontentu.” (Deuteronomio 28:⁠47) Bo por hasi esei pa eternidat si bo ta aseptá semper e disiplina di Yehova.​—⁠Salmo 100:⁠2.

Kon Lo Bo Kontestá?

• Pakiko algun individuo ta ser ekspulsá for di e kongregashon kristian?

• Kiko berdadero repentimentu ta enserá?

• Pakiko bo mester konfesá piká serio?

• Den ki manera ansianonan kristian ta yuda malechornan arepentí?

[Preguntanan di Estudio]

[Plachi na página 26]

Pakiko apòstel Pablo a manda instrukshon tokante ekspulshon pa e korintionan?

[Plachi na página 29]

Meskos ku wardadó di karné di antigwedat, ansianonan kristian ta “verbant” Dios su karnénan leshoná