Konserbá Bo Mes den e Amor di Dios!
Konserbá Bo Mes den e Amor di Dios!
“Rumannan stimá, . . . konserbá boso mes den e amor di Dios, . . . [antisipando] bida eterno.”—HUDAS 20, 21.
1, 2. Kon bo por keda den e amor di Dios?
YEHOVA stima e mundu di humanidat asina tantu ku el a duna su Yu unigénito pa tur hende ku ehersé fe den dje por haña bida eterno. (Juan 3:16) Ta algu magnífiko pa eksperensiá un amor asina! Si bo ta un sirbidó di Yehova, sin duda lo bo ke disfrutá di e amor ei pa semper.
2 Disipel Hudas a revelá kon bo por keda den e amor di Dios. El a skirbi: “Edifikando boso mes den boso santísimo fe, hasiendo orashon den spiritu santu, konserbá boso mes den e amor di Dios, sperando ku gran antisipashon e miserikòrdia di nos Señor Hesukristu pa bida eterno.” (Hudas 20, 21) Loke por yuda bo edifiká bo mes riba e “santísimo fe,” esta, e siñansanan kristian, ta un estudio di e Palabra di Dios i e trabou di prediká e bon nobo. Si bo ke keda den e amor di Dios, bo tin ku hasi orashon “den spiritu santu,” ke men, bou di su influensia. Pa bo por risibí e bendishon di bida eterno, bo tin ku ehersé fe tambe den e sakrifisio di reskate di Hesukristu.—1 Juan 4:10.
3. Pakiko algun persona no ta Testigu di Yehova mas?
3 Algun persona ku un tempu tabatin fe no a konserbá nan mes den e amor di Dios. Debí ku nan a skohe pa hiba un bida di piká, nan no ta Testigu di Yehova mas. Kon bo por evitá di yega asina leu? Algu ku por yuda bo keda leu for di piká i konserbá bo mes den e amor di Dios ta di meditá riba e siguiente puntonan.
Demostrá Bo Amor pa Dios
4. Kon importante obedensia na Dios ta?
4 Mustra bo amor pa Dios dor di obedes’é. (Mateo 22:37) Apòstel Juan a skirbi: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Un patronchi di obedensia na Dios por fortalesé bo pa resistí tentashon i duna bo goso. E salmista a bisa: “Bendishoná ta e hende ku no ta kana den e konseho di malbadonan . . . Ma su delisia ta den e lei di SEÑOR.”—Salmo 1:1, 2.
5. Kiko amor pa Yehova lo motivá bo pa hasi?
5 Bo amor pa Yehova lo motivá bo pa no kometé un piká serio ku lo trese reproche riba su nòmber. Agur a pidi den orashon: “No duna mi ni pobresa ni rikesa—duna mi solamente mi pan di kada dia, pa mi no tin di mas i nenga bo, i bisa: ‘Ken ta Yehova?’ Òf pa mi no ta den nesesidat i hòrta, i profaná e nòmber di mi Dios.” (Proverbionan 30:1, 8, 9) Sea determiná pa no ‘profaná e nòmber di Dios,’ tresiendo reproche riba dje. Mas bien, semper hasi esfuerso pa kumpli ku loke ta korekto i asina glorifik’é.—Salmo 86:12.
6. Kiko por pasa si bo kometé piká intenshonalmente?
6 Pidi bo Tata selestial amoroso regularmente den orashon p’e yuda bo resistí e tentashon di praktiká piká. (Mateo 6:13; Romanonan 12:12) Sigui apliká e konseho di Dios pa bo orashonnan no wòrdu strobá. (1 Pedro 3:7) Si bo kometé piká intenshonalmente, e konsekuensianan por ta masha lamentabel, pasobra Yehova simbólikamente ta tapa su mes ku un nubia pa e orashonnan di hende rebelde no por pasa yega serka dje. (Lamentashon 3:42-44) Pues mustra ku bo ta humilde i pidi den orashon pa bo no hasi nada ku por stroba bo di aserká Dios den orashon.—2 Korintionan 13:7.
Mustra Amor pa e Yu di Dios
7, 8. Si bo hasi kaso di e konseho di Hesus, kon esaki por yuda bo rechasá un bida di piká?
7 Mustra amor pa Hesukristu dor di obedesé su mandamentunan, pasobra esaki lo yuda bo rechasá un bida di piká. Hesus a bisa: “Si boso warda mi mandamentunan, boso lo keda den mi amor; meskos ku mi a warda e mandamentunan di mi Tata, i ta keda den su amor.” (Juan 15:10) Kon aplikashon di Hesus su palabranan por yuda bo keda den e amor di Dios?
8 Loke por yuda bo pega na prinsipionan moral ta di presta atenshon na e palabranan di Hesus. E Lei ku Dios a duna Israel a deklará: “No kometé adulterio.” (Eksodo 20:14) Pero Hesus a revelá un prinsipio tras di e mandamentu ei bisando: “Ken ku wak un muhé pa dese’é, ya kaba el a kometé adulterio kuné den su kurason.” (Mateo 5:27, 28) Apòstel Pedro a bisa ku algun persona den e kongregashon di promé siglo tabatin “wowo yen di adulterio” i tabata ‘sedusí almanan inkonstante.’ (2 Pedro 2:14) Sin embargo, distinto di nan, abo por evitá piká seksual si bo ta stima i obedesé Dios i Kristu i ta determiná pa konserbá bo relashon ku nan.
Laga e Spiritu di Yehova Guia Bo
9. Pa loke ta spiritu santu, kiko por sosodé si bo persistí den piká?
9 Pidi Dios pa su spiritu santu, i laga esaki guia bo. (Lukas 11:13; Galationan 5:19-25) Si bo persistí den piká, Dios por kita su spiritu for di bo. Despues ku David a peka en konekshon ku Bètsabé, el a roga Dios: “No tira mi for di bo presensia, i no kita bo spiritu santu for di mi.” (Salmo 51:11) Rei Saul a pèrdè Dios su spiritu pa motibu ku e no a repentí di su pikánan. El a peka ora el a ofresé un ofrenda kimá i ora el a keda sin destruí e tou di karné i buey, i e rei di e amalekitanan. Despues di esei Yehova a kita su spiritu santu for di Saul.—1 Samuel 13:1-14; 15:1-35; 16:14-23.
10. Pakiko bo tin ku rechasá asta e idea di praktiká piká?
10 Rechasá asta e idea di praktiká piká. Apòstel Pablo a skirbi: “Si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas.” (Hebreonan 10:26-31) Lo ta masha lamentabel si bo mester yega dje leu ei den hasimentu di piká!
Desplegá Berdadero Amor pa Otro Hende
11, 12. Kon amor i rèspèt lo kita bo di kometé inmoralidat seksual?
11 Amor pa próhimo lo impedí bo di kometé inmoralidat seksual. (Mateo 22:39) E amor ei lo motivá bo pa protehá bo kurason pa e no tenta bo pa buska e kariño di kasá di otro hende, ya ku esei lo por hiba na e piká di adulterio. (Proverbionan 4:23; Jeremias 4:14; 17:9, 10) Imitá e hòmber hustu Jòb, kende no a permití su mes fiha atenshon riba niun otro hende muhé ku no tabata su kasá.—Jòb 31:1, BPK.
12 Rèspèt pa e santidat di matrimonio por yuda bo evitá piká serio. E propósito di Dios tabata pa matrimonio onorabel i relashon seksual fungi komo e medio pa hende haña yu. (Génesis 1:26-28) Kòrda ku órganonan seksual tin di haber ku bida, i bida ta sagrado. Fornikadó i adúltero ta desobedesé Dios, ta rebahá e akto seksual, ta falta rèspèt pa e santidat di matrimonio i ta peka kontra nan mes kurpa. (1 Korintionan 6:18) Pero amor pa Dios i pa próhimo kombiná ku obedensia na Dios lo kita un persona di praktiká kondukta ku por resultá den su ekspulshon for di e kongregashon kristian.
13. Den ki manera un persona inmoral ta “destruí kosnan balioso”?
13 Nos tin ku resistí pensamentu pekaminoso pa nos no pone nos sernan kerí sufri. Proverbionan 29:3 ta bisa ku “esun ku anda ku prostituta ta malgastá su rikesa [“destruí kosnan balioso,” NW].” Un adúltero ku no ta repentí ta destruí su relashon ku Dios i ta daña lasonan familiar. Esei ta duna su esposa base pa divorsio. (Mateo 19:9) Sea ku ta e esposo òf e esposa a hasi malu, un divorsio por kousa e partner inosente, e yunan i otro personanan hopi doló. Ya ku nos sa kon destruktivo kondukta inmoral ta, esei mester motivá nos pa resistí e tentashon pa partisipá den dje, no ta bèrdat?
14. Ki lès relashoná ku malecho nos por siña for di Proverbionan 6:30-35?
14 E echo ku no tin nada ku por kompensá adulterio mester motivá bo pa evitá e akto sumamente egoista aki. Proverbionan 6:30-35 ta mustra ku miéntras hende por komprondé pa un ladron ku ta hòrta pasobra e tin hamber, nan ta despresiá un adúltero pasobra e tin un mal kurason. E ta “kaba ku su mes.” Bou di e Lei di Moisés, lo el a haña pena di morto. (Levítiko 20:10) Un persona ku kometé adulterio ta pone otro hende sufri djis pa satisfasé su pashon, i un adúltero ku no ta repentí no ta keda den e amor di Dios sino ta ser ekspulsá for di e kongregashon kristian limpi.
Mantené un Konsenshi Limpi
15. Den ki kondishon un konsenshi marká “komo si fuera ta ku heru kayente esaki a wòrdu hasí” ta?
15 Pa keda den e amor di Dios, nos no por laga nos konsenshi kria kayo. Ta lógiko ku nos no mester aseptá e normanan moral degradá di mundu, i nos tin ku tene kuidou den asuntunan manera ki tipo di amigu, material pa lesa i entretenimentu nos ta skohe. Pablo a duna e spièrtamentu: “Den e último tempunan algun lo kai for di fe, dor di paga atenshon na spiritunan engañoso i doktrinanan di demoñonan, pa medio di e hipokresia di gañadónan, kende nan mes konsenshi a wòrdu kimá komo si fuera ta ku heru kayente esaki a wòrdu hasí.” (1 Timoteo 4:1, 2) Un konsenshi marká “komo si fuera ta ku heru kayente esaki a wòrdu hasí” ta manera kueru kimá tur na sikatris i sin heful. Un konsenshi asina lo no spièrta nos mas pa keda leu for di hende apóstata i situashonnan ku por pone nos kai for di e fe.
16. Pakiko ta asina importante pa nos tin un konsenshi limpi?
16 Pa nos haña salbashon nos mester tin un konsenshi limpi. (1 Pedro 3:21) Mediante nos fe den Hesus su sanger dramá, nos konsenshi a ser purifiká di obranan morto pa nos por rindi sirbishi sagrado na “e Dios bibu.” (Hebreonan 9:13, 14) Si nos kometé piká boluntariamente, nos lo susha nos konsenshi i lo no ta kualifiká mas komo hende limpi pa e sirbishi di Dios. (Tito 1:15) Pero ku yudansa di Yehova, nos por tin un konsenshi limpi.
Otro Maneranan pa Evitá Mal Kondukta
17. Ki benefisio tin den ‘sigui Yehova kompletamente’?
17 ‘Sigui Yehova kompletamente,’ manera Kalèb di Israel di antigwedat a hasi. (Deuteronomio 1:34-36) Hasi loke Dios ta rekerí di bo, i no pensa mes di partisipá na “e mesa di demoñonan.” (1 Korintionan 10:21) Rechasá apostasia. Si bo ta alimentá bo mes ku apresio ku e kuminda spiritual ku ta disponibel solamente na e mesa di Yehova, lo bo no ser engañá pa maestro falsu ni pa forsanan spiritual malbado. (Efesionan 6:12; Hudas 3, 4) Enfoká riba kosnan spiritual, manera estudio di Beibel, asistensia na reunion i sirbishi di vèlt. Si bo sigui Yehova kompletamente i mantené bo mes okupá den e obra di Señor, bo por konta ku lo bo ta felis.—1 Korintionan 15:58.
18. Ki efekto temor di Yehova lo tin riba bo kondukta?
18 Sea determiná pa “ofresé na Dios un sirbishi aseptabel ku reverensia i temor.” (Hebreonan 12:28) Temor respetuoso di Yehova lo motivá bo pa rechasá un rumbo di desobedensia. Lo e yuda bo komportá bo mes na armonia ku e konseho ku Pedro a duna kristiannan ungí: “Si boso ta invoká komo Tata esun ku imparsialmente ta husga di akuerdo ku kada hende su obra, komportá boso mes ku temor durante di e tempu ku boso ta pasa riba mundu.”—1 Pedro 1:17.
19. Pakiko semper bo tin ku pone na práktika loke bo ta siña for di e Palabra di Dios?
19 Semper pone na práktika loke bo ta siña for di e Palabra di Dios. Esaki lo yuda bo evitá piká serio pasobra lo bo resultá di ta entre hende ku “pa motibu di práktika, tin nan mente entrená pa diserní loke ta bon i loke ta malu.” (Hebreonan 5:14) En bes di no tin kunes ku e manera ku bo ta papia i komportá bo, sòru pa bo kana manera un persona sabí, ‘hasiendo bon uso di bo tempu’ den e dianan malbado aki. ‘Komprondé kiko ta e boluntat di Yehova’ i sigui hasié.—Efesionan 5:15-17; 2 Pedro 3:17.
20. Pakiko nos mester evitá kudishi?
20 No duna kudishi un chèns. Kudishi ta e deseo golos pa loke ta pertenesé na otro hende. Un di e Dies Mandamentunan ta bisa: “No kudishá [“deseá,” BPK] kas di bo próhimo; no kudishá esposa di bo próhimo, ni su sirbidó hòmber, ni su sirbidó muhé, ni su buey, ni su buriku, ni nada ku ta pertenesé na bo próhimo.” (Eksodo 20:17) E lei aki a protehá un persona su kas, esposa, kriá, animal, etcetera. Pero loke ta mas importante ainda ta Hesus su deklarashon ku kudishi ta kontaminá hende.—Marko 7:20-23.
21, 22. Ki medidanan preventivo un kristian por tuma pa evitá di kometé piká?
21 Tuma medida preventivo pa deseo no hiba na piká. Disipel Santiago a skirbi: “Kada un ta wòrdu tentá ora ku e wòrdu atraí i sedusí dor di su mes pashon [“deseo,” NW ]. Anto ora pashon konsebí, e ta duna lus na piká; i ora piká keda kumplí, e ta produsí morto.” (Santiago 1:14, 15) Por ehèmpel, si un persona tabatin un problema ku bebementu den pasado, kisas e ta sòru pa e no tin bebida alkohóliko mes na kas. Pa evitá tentashon ku ta enbolbé un persona di e sekso opuesto, un kristian podisé tin ku kambia su lugá di sinta òf para na trabou òf asta su trabou mes.—Proverbionan 6:23-28.
22 No dal ni e promé stap pa bai kometé piká. Flirtmentu i pensamentu riba kosnan inmoral por hiba na fornikashon òf adulterio. Mentira chikí por duna un persona kurashi pa gaña kosnan mas serio i esei por hiba na e kustumber pekaminoso di gaña. Ladronisia di kosnan chikitu por dof konsenshi di un persona asina tantu ku e ta kuminsá hòrta na gran eskala. Asta ora un persona tolerá djis un pensamentu apóstata, esei por hib’é riba e kaminda di apostasia total.—Proverbionan 11:9; Revelashon 21:8.
Kiko Bo Mester Hasi si Bo A Peka?
23, 24. Ki konsuelo nos por haña for di 2 Krónikanan 6:29, 30 i Proverbionan 28:13?
23 Tur hende ta imperfekto. (Eklesiastés 7:20) Pero si bo a kometé un piká serio, bo por haña konsuelo for di e orashon di Rei Salomon na inougurashon di e tèmpel di Yehova. Salomon a pidi Dios den orashon: “Kualke orashon òf súplika ku un hende òf ku henter bo pueblo Israel hasi, ora kada un konosé su mes aflikshon i su mes doló, i ta habri su mannan den direkshon di e kas aki, e ora ei tende abo for di shelu, bo lugá di biba, i pordoná, i duna kada un segun tur su kamindanan, kende su kurason bo konosé (pasobra ta abo so konosé kurason di e yunan di hende).”—2 Krónikanan 6:29, 30.
24 Sí, Dios konosé e kurason i e ta pordoná. Proverbionan 28:13 ta bisa: “Esun ku skonde su pikánan lo no prosperá, ma esun ku konfesá i laga nan lo haña miserikòrdia.” Si un persona konfesá su piká ku un kurason arepentí i stòp di praktik’é, e por risibí e miserikòrdia di Dios. Awor, si bo ta den un kondishon spiritualmente débil, kiko otro por yuda bo keda den e amor di Dios?
Kon Lo Bo Kontestá?
• Kon nos por konserbá nos mes den e amor di Dios?
• Kon amor pa Dios i pa Kristu por yuda nos rechasá un bida di piká?
• Pakiko berdadero amor pa otro hende ta impedí nos di kometé inmoralidat seksual?
• Den ki otro manera nos por evitá mal kondukta?
[Preguntanan di Estudio]
[Plachi na página 21]
Hudas ta mustra kon nos por konserbá nos mes den e amor di Dios
[Plachi na página 23]
Un divorsio por kousa e partner inosente i yunan hopi doló
[Plachi na página 24]
Bo ta determiná pa ‘sigui Yehova kompletamente,’ meskos ku Kalèb?
[Plachi na página 25]
Pidi yudansa regularmente den orashon pa resistí tentashon