“Nos Mester Obedesé Dios Mas Ku Hende”

Pablo A Duna un Testimonio Kabal ku “Kurashi”

UN MULTITUT violento ta kla pa bati un sirbidó obedesidu di Dios mata. Nèt na tempu, sòldánan romano ta ranka e hòmber for di e atakadónan i ta deten’é. Esaki ta inisio di un seri di suseso ku ta abarká mas o ménos sinku aña. Komo resultado, hopi funshonario romano di alto rango ta tende tokante Hesukristu.

E víktima ta apòstel Pablo. Rònt di aña 34 di nos era, Hesus a revelá ku Pablo (Saulo) lo a hiba Hesus su nòmber dilanti di “reinan.” (Echonan 9:⁠15) Te ku aña 56, esaki no a sosodé ainda. Sin embargo, ora ku e apòstel ta yegando na final di su di tres biahe komo misionero, e situashon ta a punto di kambia.

Ataká Pero No Deskurashá

Pablo ta bayendo rumbo pa Yerusalèm, i “pa medio di e spiritu” sierto kristiannan ta spièrt’é ku persekushon intenso ta sper’é den e stat ei. Ku kurashi, Pablo ta bisa: “Mi ta kla, no solamente pa wòrdu mará, ma asta pa muri na Yerusalèm pa e nòmber di Señor Hesus.” (Echonan 21:​4-14) Asina ku Pablo bishitá e tèmpel na Yerusalèm, hudiunan di Asia ku sa di e éksito ku e apòstel tabatin na Asia, ta instigá un multitut violento pa mat’é. Pero sòldánan romano rápidamente ta ousili’é. (Echonan 21:​27-⁠32) Debí na e reskate ei, Pablo ta haña oportunidatnan úniko pa deklará e bèrdat tokante Kristu na personanan di alto rango i na ouditorionan antipátiko.

Pablo Ta Prediká na Personanan Difísil pa Alkansá

E sòldánan ta skapa Pablo for di peliger subiendo kuné riba e trapinan di e fòrti konosí komo Toren di Antonia. * Pará riba e trapi ei, e apòstel ta duna un testimonio impaktante na e multitut religioso violento. (Echonan 21:⁠33–22:⁠21) Pero asina ku e menshoná su enkargo di prediká na hende no-hudiu, e multitut ta bolbe bira violento. E komandante militar, Lisias, ta duna òrdu pa interogá Pablo ku sota pa haña sa dikon e hudiunan ta akus’é. Sin embargo, Pablo ta skapa e sota ora e informá nan ku e ta un siudadano romano. E siguiente dia, Lisias ta hiba Pablo dilanti e Konsilio, òf Sanedrin, pa haña sa dikon e hudiunan ta akus’é.​—⁠Echonan 22:​22-⁠30.

Pará dilanti di e korte supremo aki, Pablo ta haña un otro oportunidat ekselente pa duna testimonio na su paisanonan hudiu. E evangelisadó intrépido aki ta deklará su fe den e resurekshon. (Echonan 23:​1-8) E odio asesino di e hudiunan ta mesun intenso, i e sòldánan ta hiba Pablo na kazèrne. E siguiente anochi, Pablo ta haña e garantia alentador aki di Señor: “Tene kurashi, pasobra meskos ku bo a duna testimonio di mi kousa na Yerusalèm, asina bo tin ku duna testimonio na Roma tambe.”​—⁠Echonan 23:​9-11.

Den sekreto e sòldánan ta pura hiba Pablo Cesarea, i asina nan ta prevení un kòmplòt pa mata Pablo. (Echonan 23:​12-24) Na Cesarea, kapital romano atministrativo di Hudea, mas oportunidat balioso ta presentá, i Pablo ta duna testimonio na “reinan.” Pero promé e apòstel ta mustra Gobernadó Felix ku no tin prueba ku ta apoyá e akusashonnan kontra dje. Mas despues, Pablo ta prediká na Felix ku su kasá Drusila tokante Hesus, dominio propio, hustisia i e huisio ku ta bin. Sin embargo, Pablo ta keda enkarselá pa dos aña, ya ku Felix ta spera di haña plaka bou di mesa. Pero Pablo no ta dun’é niun soborno.​—⁠Echonan 23:⁠33–24:⁠27.

 Ora ku Festo bin na lugá di Felix, e hudiunan ta bolbe hasi un intento pa laga kondená Pablo i ehekut’é. Ta bolbe trata e kaso na Cesarea, i pa evitá ku ta transferí e huisio pa Yerusalèm, Pablo ta deklará: “Mi ta pará dilanti di tribunal di Cesar . . . Mi ta apelá na Cesar.” (Echonan 25:​1-11, 20, 21) Algun dia despues, ora e apòstel presentá su kaso dilanti di Rei Herodes Agripa II, e rei ei ta bisa: “Kasi bo ta konvensé mi pa bira kristian.” (Echonan 26:​1-28) Rònt di aña 58, nan ta manda Pablo Roma. Siendo prezu einan, pa dos aña mas e apòstel ingenioso aki ta sigui haña maneranan pa prediká tokante Kristu. (Echonan 28:​16-31) Parse ku despues di tempu Pablo a presentá dilanti di Emperador Nero, el a ser deklará inosente, i finalmente por a reanudá su aktividat di misionero komo un hòmber liber. No tin registro di ningun otro apòstel ku a haña e oportunidat di alkansá personanan asina prominente ku e bon nobo.

Manera lo anterior ta mustra, apòstel Pablo a biba na armonia ku e prinsipio signifikativo ku su kompañeronan kristian a ekspresá dilanti di e tribunal hudiu: “Nos mester obedesé Dios mas ku hende.” (Echonan 5:⁠29) Ki un ehèmpel ekselente el a pone pa nos! Apesar di esfuersonan humano persistente pa par’é, e apòstel a obedesé plenamente e mandamentu pa duna un testimonio kabal. Debí na tal obedensia firme na Dios, Pablo a kumpli ku su asignashon komo “un instrumènt skohí” pa hiba e nòmber di Hesus “na e paganonan i reinan i e yunan di Israel.”​—⁠Echonan 9:⁠15.

[Nota]

[Kuadro/​Plachinan na página 9]

PABLO TABATA ÚNIKAMENTE INTERESÁ DEN DEFENDÉ SU MES?

Komentando riba e pregunta aki, outor Ben Witherington III, a skirbi: “For di Pablo . . . su punto di bista, e kos krusial no tabata pa e defendé su mes, sino mas bien p’e duna testimonio di e evangelio na outoridatnan, tantu hudiu komo no-hudiu. . . . Bon mirá, loke realmente ta ser husgá ta e evangelio.”