E Antikristu Desenmaskará

KON lo bo protehá bo mes si bo sa ku ta reina un epidemia mortal den bo área? Probablemente lo bo subi bo resistensia i keda leu for di hende ku por kontagiá bo. Den un sentido spiritual nos tin ku hasi meskos. E Skritura ta bisa nos ku e antikristu “ta den mundu kaba.” (1 Juan 4:3) Si nos no ke wòrdu “kontagiá,” nos tin ku identifiká e “portadónan” i evitá nan. Afortunadamente, Beibel ta duna bastante informashon riba e tópiko aki.

“Antikristu” ta nifiká “kontra (òf na lugá di) Kristu.” Pues den e sentido di mas amplio, e palabra ta referí na tur persona ku ta oponé Kristu òf su representantenan, òf ku falsamente ta pretendé di ta un di nan. Hesus mes a bisa: “Esun ku no ta ku mi ta kontra mi [òf, ta antikristu]; i esun ku no ta rekohé huntu ku mi ta plama.”—Lukas 11:23.

Naturalmente, ora Juan a skirbi tokante e antikristu tabata mas ku 60 aña despues ku Hesus a muri i a ser resusitá pa bida den shelu. P’esei, e aktividatnan di e antikristu ta afektá mas bien e siguidónan leal di Hesus riba tera, i ta den e konteksto ei nos mester mira esakinan.—Mateo 25:40, 45.

E Antikristu Ta Antikristian

Hesus a spièrta su siguidónan ku mundu en general lo odia nan. El a bisa: “Nan lo entregá boso na tribulashon i lo mata boso, i tur nashon lo odia boso pa kousa di mi nòmber. I hopi profeta falsu lo lanta i lo gaña hopi hende.”—Mateo 24:9, 11.

Komo ku e disipelnan di Hesus ta ser persiguí “pa kousa di [Hesus su] nòmber,” e persiguidónan klaramente ta antikristu, kontra Kristu. E ‘profetanan falsu,’ di kua algun un tempu tabata kristian, tambe ta kai den e kategoria ei. (2 Juan 7) Juan a skirbi ku e ‘hopi antikristunan’  aki “a sali for di nos, ma nan no tabata realmente di nos; pasobra si nan tabata di nos, nan lo a keda serka nos.”—1 Juan 2:18, 19.

Tantu e palabranan di Hesus komo di Juan ta indiká bon kla ku e antikristu no ta un solo persona sino ta konsistí di hopi antikristu individual. Ademas, komo ku nan ta profeta falsu, un di nan metanan prinsipal ta engaño religioso. Kua ta algun di nan táktikanan?

Nan Ta Plama Mentira Religioso

Apòstel Pablo a spièrta su kompañero Timoteo pa tene kuidou ku e siñansa di apóstatanan, manera Himeneo i Fileto, kende nan “palabranan lo plama manera gangrena.” Pablo a agregá: “[E hòmbernan aki] a desviá for di e bèrdat, bisando ku resurekshon a tuma lugá kaba, i asina nan ta trastorná fe di algun hende.” (2 Timoteo 2:16-18) Aparentemente, Himeneo i Fileto a siña hende ku e resurekshon tabata algu simbóliko i ku kristiannan a ser resusitá kaba den sentido spiritual. Ta bèrdat ku manera Pablo mes a deklará bon kla, den bista di Dios ora un hende bira un berdadero disipel di Hesus, e ta haña bida. (Efesionan 2:1-5) Sin embargo, e siñansa di Himeneo i Fileto a pasa por haltu e promesa di Hesus di ku lo tin un resurekshon literal di e mortonan bou di e gobernashon di e Reino di Dios.—Juan 5:28, 29.

Mas despues, un grupo yamá gnóstiko a amplia riba e idea di un resurekshon puramente simbóliko. E gnóstikonan tabata kere ku hende lo por haña konosementu (gnó·sis na griego) den un manera místiko, i p’esei nan a kombiná kristianismo apóstata ku filosofia griego i tradishon místiko oriental. Por ehèmpel, nan a kere ku tur materia físiko ta malbado, i pa e motibu ei, Hesus no a bin realmente den karni sino simplemente a parse di tin un kurpa humano. Pero manera nos a mira, esaki ta netamente loke apòstel Juan a spièrta di dje.—1 Juan 4:2, 3; 2 Juan 7.

 Un otro mentira, inventá siglonan despues, ta e doktrina di e asina yamá Santísimo Trinidat, ku ta pretendé ku Hesus ta tantu Dios Todopoderoso komo Yu di Dios. Dr. Alvan Lamson a deklará den su buki The Church of the First Three Centuries (E Iglesia di e Promé Tres Siglonan) ku e doktrina di Trinidat “a originá di un fuente henteramente aheno for di esun di e Skritura hudiu i kristian; ku el a krese i a ser di ènter den kristianismo mediante e Tatanan influensiá pa e doktrina di Plato.” Ken “e Tatanan influensiá pa e doktrina di Plato” tabata? Nan tabata klero apóstata ku tabata loko ku e siñansanan di Plato, un filósofo pagano di Gresia.

E echo ku a “ènter” Trinidat den e doktrina di Iglesia tabata un zèt maestral di e antikristu, pasobra e doktrina aki a krea un misterio rònt di Dios i a hasi e relashon ku su Yu un kos konfuso. (Juan 14:28; 15:10; Kolosensenan 1:15) Figura bo, kon un persona por “hala serka Dios,” manera e Skritura ta animá nos, si Dios ta un misterio?—Santiago 4:8.

Pa krea mas konfushon ainda, hopi traduktor di Beibel a kita e nòmber di Dios, Yehova, for di nan tradukshon, apesar ku e ta aparesé mas ku 7.000 biaha den e teksto original! Ta bisto anto ku e intento pa kombertí e Todopoderoso no solamente den un misterio, sino un misterio sin nòmber, ta un gran falta di rèspèt pa nos Kreadó i pa su Palabra inspirá. (Revelashon 22:18, 19) Ademas, remplasando e nòmber divino ku títulonan manera Señor i Dios ta bai kontra di e orashon modelo di Hesus, ku ta bisa en parti: “Bo nòmber sea santifiká [òf, hasí santu].”—Mateo 6:9.

Antikristunan Ta Rechasá e Reino di Dios

Antikristunan a bira hopi mas aktivo durante “e último dianan,” e tempu den kua nos ta biba awe. (2 Timoteo 3:1) Un meta prinsipal di e gañadónan aki di tempu aktual ta pa konfundí hende tokante e papel di Hesus komo Rei di e Reino di Dios, un gobièrnu selestial ku pronto lo goberná henter e tera.—Daniel 7:13, 14; Revelashon 11:15.

Por ehèmpel, tin lidernan religioso ta prediká ku e Reino di Dios ta un kondishon den kurason di hende, un punto di bista ku no tin base den e Skritura. (Daniel 2:44) Otronan ta pretendé ku Kristu ta obra mediante gobièrnu- i institutonan humano. Sin embargo, Hesus a deklará: “Mi reino no ta parti di e mundu aki.” (Juan 18:36, NW) De echo, ta Satanas i no Kristu, ta “e prens” i “e dios di e mundu aki.” (Juan 14:30; 2 Korintionan 4:4) Pa e motibu aki pronto Hesus lo eliminá tur gobièrnu humano i lo bira e úniko Gobernante di e tera. (Salmo 2:2, 6-9; Revelashon 19:11-21) Ta pa esaki e hendenan ta pidi ora ku nan ta resitá e Orashon di Nos Tata, bisando: “Ku bo reino bin. Ku bo boluntat sosodé na tera.”—Mateo 6:10.

Komo ku hopi lider religioso ta sostené e sistemanan polítiko di mundu, nan a oponé—asta persiguí—e personanan ku ta proklamá e bèrdat tokante e Reino di Dios. Un punto interesante ta ku e buki bíbliko di Revelashon ta menshoná un prostituta simbóliko—“e Gran Babilonia”—ku ta “burachi di e sanger di e santunan i di e sanger di e testigunan di Hesus.” (Revelashon 17:4-6) Ademas, e ta praktiká prostitushon spiritual ora e ta duna su sosten na e “reinan” (òf gobernantenan polítiko) di e tera, a kambio di sierto fabor. E muhé simbóliko aki ta nada ménos ku e religionnan falsu di mundu. E ta un parti prinsipal di e antikristu.—Revelashon 18:2, 3; Santiago 4:4.

E Antikristu Ta ‘Bisa Loke Orea Kier Tende’

Fuera di rechasá bèrdat bíbliko, hopi hende ku ta yama nan mes kristian a rechasá normanan bíbliko di kondukta i ta bai tras di e normanan moral popular. E Palabra di Dios a predisí e desaroyo aki, bisando: “E tempu lo bin ku nan [hende ku ta pretendé di ta sirbi Dios] lo no soportá doktrina sano mas; ma al kontrario,  pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende.” (2 Timoteo 4:3) E siñadónan religioso falsu aki ta ser deskribí tambe komo “apòstelnan falsu, trahadónan engañoso, kendenan ta disfrasá nan mes komo apòstelnan di Kristu.” Beibel ta sigui bisa: “Nan fin lo ta segun nan obranan.”—2 Korintionan 11:13-15.

Nan kondukta ta inkluí “sensualidat” [“libertinahe,” NW], ku ta un gran falta di rèspèt pa prinsipionan moral haltu. (2 Pedro 2:1-3, 12-14) Akaso nos no ta mira kon un kantidat kresiente di lider religioso i nan siguidónan ta adoptá—òf a lo ménos no ta kondená—práktikanan no-kristian, manera homoseksualidat i relashon seksual pafó di matrimonio? Para un ratu i kompará e puntonan di bista i estilonan di bida ampliamente aseptá aki ku loke Beibel ta deklará na Levítiko 18:22; Romanonan 1:26, 27; 1 Korintionan 6:9, 10; Hebreonan 13:4; i Hudas 7.

“Pone e Ekspreshonnan Inspirá na Prueba”

En bista di lo anterior, nos tin ku hasi kaso di e palabranan di apòstel Juan i no ser indiferente pa ku nos kreensianan religioso. Juan a spièrta: “No kere tur ekspreshon inspirá, sino pone e ekspreshonnan inspirá na prueba pa mira si nan ta originá di Dios, pasobra hopi profeta falsu a sali den e mundu.”—1 Juan4:1, NW.

Konsiderá e bon ehèmpel di sierto hende ‘di mentalidat noble’ ku tabata biba den e stat di Berea den promé siglo. Nan “a risibí e palabra ku bon boluntat i tabata skudriñá e Skrituranan tur dia, pa mira si e kosnan aki [ku Pablo i Silas a papia] tabata asina.” (Echonan 17:10, 11) Sí, ounke e bereanonan tabata ansioso pa siña, nan a hasi sigur ku loke nan a tende i aseptá tabata firmemente ankrá den e Skritura.

Awe tambe, kristiannan berdadero no ta bai tras di tur e diferente puntonan di bista popular aki sino mas bien ta tene firmemente na bèrdat bíbliko. Apòstel Pablo a skirbi: “Esaki ta mi orashon, ku boso amor por abundá mas i mas ainda den konosementu berdadero i tur disernimentu.”—Filipensenan 1:9.

Si bo no a hasié ainda, pone komo bo meta pa haña sa loke Beibel ta siña realmente i asina gana “konosementu berdadero i tur disernimentu.” Hende ku ta imitá e bereanonan no ta laga “palabranan di engaño” di e antikristunan desviá nan. (2 Pedro 2:3) Mas bien, e bèrdat spiritual di e berdadero Kristu i su siguidónan outéntiko ta hasi nan liber.—Juan 8:32, 36.

[Kuadro/​Plachi na página 4]

LOKE BEIBEL TA BISA DI E ANTIKRISTU

“Yunan, ta e último ora [evidentemente fin di e periodo apostóliko]; i meskos ku boso a tende ku antikristu ta bin, asina awor kaba hopi antikristu a lanta.”—1 Juan 2:18.

“Ta ken ta e mentiroso, sino esun ku ta nenga ku Hesus ta e Kristu? Esaki ta e antikristu, esun ku ta nenga e Tata i e Yu.”—1 Juan 2:22.

“Tur spiritu [“ekspreshon inspirá,” NW] ku no ta konfesá Hesus no ta di Dios; i esaki ta e spiritu di e antikristu, di kual boso a tende ku e ta bin, i awor e ta den mundu kaba.”—1 Juan 4:3.

“Pasobra hopi gañadó a sali bai den mundu, esnan ku no ta rekonosé ku Hesukristu a bin den karni. Esaki ta e gañadó i e antikristu.”—2 Juan 7.

[Kuadro/​Plachinan na página 5]

UN GAÑADÓ KU HOPI KARA

E palabra “antikristu” ta apliká na tur hende ku ta nenga loke Beibel ta bisa tokante Hesukristu, tur ku ta oponé su Reino i tur ku ta maltratá su siguidónan. E ta inkluí tambe personanan, organisashonnan i nashonnan ku ta pretendé di ta representá Kristu, òf ku indebidamente ta asumí e papel di Mesias ora nan ta primintí arogantemente ku nan lo logra loke Kristu so por hasi, esta, trese berdadero pas i siguridat.

[Rekonosementu]

Agustin: ©SuperStock/age fotostock

[Plachi na página 7]

Meskos ku e bereanonan, nos mester “skudriñá e Skrituranan tur dia”