Kiko Ke Men Stima Nos Próhimo?

“Stima bo próhimo manera bo mes.”—MATEO 22:39.

1. Kon nos ta mustra ku nos ta stima Dios?

KIKO Yehova ta rekerí di hende ku ta ador’é? Ku poko palabra simpel pero di peso, Hesus a resumí e kontesta. El a bisa ku e mandamentu di mas grandi ta pa stima Yehova ku henter nos kurason, alma, mente i forsa. (Mateo 22:37; Marko 12:30) Manera nos a mira den e artíkulo anterior, amor pa Dios ta enserá obedes’é i kumpli ku su mandamentunan komo reakshon riba e amor ku é a mustra na nos. Pa hende ku ta stima Dios, hasimentu di su boluntat no ta un karga. Al kontrario, e ta un delisia pa nan.—Salmo 40:8; 1 Juan 5:2, 3.

2, 3. Pakiko nos mester presta atenshon na e mandamentu pa stima nos próhimo, i ki pregunta ta surgi?

² Segun Hesus, e di dos mandamentu di mas grandi ta konektá ku e promé: “Stima bo próhimo manera bo mes.” (Mateo 22:39) Ta na e mandamentu aki nos ta bai presta atenshon awor, i pa un bon motibu. E tempu den kua nos ta biba ta marká pa un forma egoista i trosí di amor. Den apòstel Pablo su deskripshon inspirá di “e último dianan,” el a skirbi ku hende lo no stima otro, sino nan mes, plaka i plaser. Hopi hende lo no tin “kariño” [BPK], òf manera un otro tradukshon di Beibel ta bisa, nan lo no tin e “kariño normal pa nan famianan.” (2 Timoteo 3:1-4) Hesukristu a profetisá: “Hopi . . . lo entregá [“traishoná,” NW] otro i odia otro. . . . Amor di hopi hende lo fria.”—Mateo 24:10, 12.

³ Sin embargo, ripará ku Hesus no a bisa ku e amor di tur hende lo fria. Semper tabatin i semper lo tin hende ku ta desplegá e klase di amor ku Yehova ta rekerí i meresé. Hende ku realmente ta stima Yehova lo trata di mira otro hende manera e ta mira nan. Pero ken ta nos próhimo ku nos tin ku stima? Kon nos mester mustra amor pa nos próhimo? E Skritura por yuda nos kontestá e preguntanan importante aki.

 Ken Ta Mi Próhimo?

4. Segun Levítiko kapítulo 19, na ken e hudiunan mester a mustra amor?

⁴ Ora Hesus a bisa e fariseo ku e di dos mandamentu di mas grandi ta pa stima bo próhimo meskos ku bo mes, el a referí na un lei spesífiko ku a ser duná na Israel i ku ta pará na Levítiko 19:18. Den e mesun kapítulo ei, Dios a bisa e hudiunan ku nan mester a mira otro hende, ademas di nan paisanonan israelita, tambe komo nan próhimo. Versíkulo 34 ta deklará: “E stranhero ku ta biba serka boso mester ta pa boso manera un yu di tera meimei di boso; stim’é manera bo mes, pasobra boso tabata stranhero na tera di Egipto.” Pues, asta e hendenan ku no tabata hudiu, spesialmente e prosélitonan, mester a ser tratá ku amor.

5. Ki konsepto e hudiunan tabatin di amor pa próhimo?

⁵ Sin embargo, e lidernan hudiu di e tempu di Hesus tabatin un otro punto di bista. Algun di nan a pretendé ku e palabranan “amigu” i “próhimo” a konta solamente pa hudiu. Hende ku no tabata hudiu mester a wòrdu odiá. E maestronan ei a rasoná ku hende ku ta adorá Dios mester despresiá hende sin Dios. Un buki di referensia ta bisa: “Den un ambiente asina tabata imposibel pa kaba ku odio. Ei el a haña tereno fértil pa sigui plama.”

6. Ki dos punto Hesus a menshoná ora el a papia tokante amor pa próhimo?

⁶ Den Hesus su Sermon Riba Seru, el a papia riba e asuntu aki, tirando lus riba ken mester ser tratá ku amor. El a bisa: “Boso a tende ku a wòrdu bisá: ‘Stima bo próhimo i odia bo enemigu.’ Ma ami ta bisa boso, stima boso enemigunan . . . i hasi orashon pa esnan ku ta maltratá boso i ta persiguí boso, pa boso por ta yunan di boso Tata ku ta den shelu; pasobra e ta hasi su solo sali riba mal hende i riba bon hende, i ta laga awa yobe riba hende hustu i riba hende inhustu.” (Mateo 5:43-45) Aki Hesus a menshoná dos punto. Na promé lugá, Yehova ta generoso i bondadoso tantu pa bon hende komo pa mal hende. Na di dos lugá, nos mester sigui su ehèmpel.

7. Ki lès nos ta siña for di e komparashon di e bon samaritano?

⁷ Na un otro okashon, un hudiu vèrsá den e Lei a puntra Hesus: “Ken ta mi próhimo?” Hesus a kontest’é kontando un komparashon tokante un samaritano ku a topa un hòmber, un hudiu, kende ladron a asaltá i kita tur kos for di dje. Ounke e hudiunan por lo general a despresiá e samaritanonan, e samaritano a verbant e hòmber su heridanan i a hib’é na un posada, fuera di peliger, kaminda e por a rekuperá. Ki lès nos ta siña? Amor pa próhimo no mester ta limitá solamente na hende di nos mes rasa, nashonalidat òf religion.—Lukas 10:25, 29, 30, 33-37.

Kiko Ke Men Stima Nos Próhimo?

8. Kiko Levítiko kapítulo 19 ta bisa tokante e maneranan ku e israelitanan mester a mustra amor?

⁸ Amor pa próhimo, meskos ku amor pa  Dios, no ta djis un sintimentu; e ta enserá akshon. Ta bon pa konsiderá mas aleu e konteksto di e mandamentu registrá na Levítiko 19 ku a animá e pueblo di Dios pa stima nan próhimo meskos ku nan mes. Ei nos ta lesa ku e israelitanan mester a laga e hendenan den nesesidat i e stranheronan ku tabata biba den e pueblo di Israel rekohé loke a resta di e kosecha. No tabatin espasio pa ladronisia, gañamentu òf estafa. Den asuntunan hudisial e israelitanan no a mustra parsialidat. Ounke nan mester a duna reprendementu ora tabata nesesario, e Skritura a bisa nan spesífikamente: “No odia bo ruman den bo kurason.” Esakinan i hopi otro mandamentu a ser resumí den e siguiente palabranan: “Stima bo próhimo manera bo mes.”—Levítiko 19:9-11, 15, 17, 18.

9. Pakiko Yehova a manda e israelitanan pa keda separá for di e otro nashonnan?

⁹ Ounke e israelitanan mester a mustra amor pa otro hende, nan mester a keda separá tambe for di hende ku a adorá dios falsu. Yehova a spièrta nan di e peliger- i konsekuensianan di mal asosiashon. Por ehèmpel, relashoná ku e nashonnan ku e israelitanan mester a kore kuné, Yehova a manda: “No emparentá [“sera aliansa matrimonial,” NW] ku nan; no duna bo yu muhé na nan yu hòmber, ni tuma nan yu muhé pa bo yu hòmber. Pasobra nan lo kita bo yu hòmber di sigui mi pa sirbi otro diosnan; e ora ei e rabia di SEÑOR lo sende kontra bo.”—Deuteronomio 7:3, 4.

10. Kiko nos tin ku tene kuidou kuné?

¹⁰ Di mes manera, kristiannan ta tene kuidou pa no sera amistat ku hende ku por debilitá nan fe. (1 Korintionan 15:33) Beibel ta spièrta nos: “No uni boso mes den yugo desigual ku inkrédulonan,” esnan ku no ta parti di e kongregashon kristian. (2 Korintionan 6:14) Ademas, Beibel ta konsehá kristiannan pa kasa solamente “den Señor.” (1 Korintionan 7:39) Pero hamas nos mester hasi bofon di personanan ku no ta kere den Yehova manera nos. Kristu a muri pa pekadónan, i hopi hende ku un tempu a praktiká kosnan baho a bandoná nan mal kaminda i a rekonsiliá ku Dios.—Romanonan 5:8; 1 Korintionan 6:9-11.

11. Kon ta e mihó manera pa mustra amor pa hende ku no ta sirbi Yehova, i pakiko?

¹¹ Ora ta trata di mustra amor na hende ku no ta sirbi Dios, e mihó kos ku nos por hasi ta di imitá Yehova mes. Ounke e ta odia maldat, e ta mustra bondat amoroso na tur hende, ekstendiendo e oportunidat na nan pa bira bèk for di nan mal kaminda i risibí bida eterno. (Ezekiel 18:23) Yehova ta deseá “pa tur [hende] bin na repentimentu.” (2 Pedro 3:9) Su boluntat ta pa “tur hende wòrdu salbá i yega na konosementu di e bèrdat.” (1 Timoteo 2:4) P’esei mes Hesus a enkargá su siguidónan ku e trabou di prediká i siña i pa ‘hasi hende di tur e nashonnan disipel di dje.’ (Mateo 28:19, 20) Ku nos partisipashon den e trabou aki, nos ta mustra amor pa Dios i pa nos próhimo, sí, asta pa nos enemigunan!

Amor pa Nos Rumannan Kristian

12. Kiko apòstel Juan a skirbi tokante stima nos ruman?

¹² Apòstel Pablo a skirbi: “Laga nos hasi bon na tur hende, i spesialmente na esnan ku ta di e famia di fe.” (Galationan 6:10) Komo kristian, nos tin e obligashon di mustra amor pa hende ku ta di e famia di fe—nos rumannan spiritual. Kon importante e amor aki ta? Apòstel Juan a enfatisá e punto aki ora el a skirbi: “Ken ku odia su ruman ta un matadó . . . Si un hende bisa: ‘Mi ta stima Dios,’ i ta odia su ruman, e ta un gañadó; pasobra esun ku no ta stima su ruman ku el a mira, no por stima Dios, kende e no a mira.” (1 Juan 3:15; 4:20) Esakinan ta palabranan fuerte. Hesukristu a apliká e palabranan “matadó” i “gañadó” na Satanas e Diabel. (Juan 8:44) Hamas nos lo ke pa e palabranan ei apliká na nos!

13. Den ki maneranan nos por mustra amor pa nos rumannan den fe?

 ¹³ “Dios ta siña [kristiannan berdadero pa] stima otro.” (1 Tesalonisensenan 4:9) Nos tin ku stima no “ku palabra ni ku lenga, ma ku echo i bèrdat.” (1 Juan 3:18) Nos amor mester ta “sin hipokresia.” (Romanonan 12:9) Amor ta impulsá nos pa ta bondadoso, kompasivo, dispuesto pa pordoná, pa mustra pasenshi, i no yalurs, gabadó, arogante òf egoista. (1 Korintionan 13:4, 5; Efesionan 4:32) E ta impulsá nos pa “sirbi otro.” (Galationan 5:13) Hesus a bisa su disipelnan pa stima otro meskos ku é a stima nan. (Juan 13:34) P’esei un kristian mester ta dispuesto pa sakrifiká asta su bida na fabor di su rumannan ora esei ta nesesario.

14. Kon nos por manifestá amor den famia?

¹⁴ Amor mester ser manifestá spesialmente den un famia kristian i partikularmente entre esposo i esposa. Lasonan matrimonial ta asina íntimo ku Pablo a bisa: “Esposonan tambe mester stima nan esposa manera nan mes kurpa.” Anto el a agregá: “Esun ku ta stima su esposa ta stima su mes.” (Efesionan 5:28) Pablo ta ripití e konseho aki sinku versíkulo mas despues. Un esposo ku ta stima su esposa lo no imitá e israelitanan di e tempu di Malakias ku a trata nan kasá ku traishon. (Malakias 2:14) Lo e balor’é. Lo e stim’é meskos ku Kristu a stima e kongregashon. Meskos tambe, amor lo motivá un esposa pa respetá su esposo.—Efesionan 5:25, 29-33.

15. Kiko algun persona a sinti nan impulsá pa bisa i hasi ora nan a opservá amor fraternal na akshon?

¹⁵ Sin duda e klase di amor aki ta identifiká kristiannan berdadero. Hesus a bisa: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) Nos amor pa otro ta atraé hende na e Dios ku nos ta stima i representá. E eksperensia di un famia Testigu na Mozambique ta ilustrá esaki. Nan a konta: “Nunka nos a yega di mira un kos asina. Atardi a kuminsá supla un bientu feros siguí pa áwaseru pisá i hagel. E bientunan fuerte a destruí nos kas di bambu, i e dak di zink a bula bai. Ora nos rumannan di e kongregashonnan den bisindario a bin yuda rekonstruí nos kas, nos bisiñanan asombrá a bisa: ‘Boso religion ta hopi bon. Nunka nos iglesia no a yuda nos di e manera ei.’ Nos a habri nos Beibel i mustra nan Juan 13:34 i 35. Aworakí hopi di nos bisiñanan ta studiando Beibel.”

Amor pa un Hende en Partikular

16. Kiko ta e diferensia entre stima un grupo di hende i stima un persona en partikular?

¹⁶ No ta difísil pa stima nos próhimo komo grupo. Pero pa stima un hende en partikular sí kisas no ta dje fásil ei. Por ehèmpel, algun hende ta manifestá e amor ku nan tin pa próhimo dor di djis hasi un donashon na un organisashon karitativo. En bèrdat, ta hopi mas fásil pa bisa ku nos ta stima nos próhimo ku stima un kolega di trabou ku aparentemente no ta preokupá ku nos, un bisiña ku tin mal manera òf un amigu ku ta desapuntá nos.

17, 18. Kon Hesus a mustra amor pa personanan individual, i kiko tabata su motivashon?

¹⁷ Den e asuntu di stima un persona en partikular, nos ta siña for di Hesus, kende a reflehá e kualidatnan di Dios a la perfekshon. Ounke el a bin na tera pa kita piká di mundu, el a mustra amor pa hende individual, por ehèmpel pa un señora enfermo, un leproso i  un mucha. (Mateo 9:20-22; Marko 1:40-42; 7:26, 29, 30; Juan 1:29) Di mes manera, nos ta mustra amor pa nos próhimo den e manera ku nos ta trata ku e personanan ku nos tin kontakto kuné riba un base diario.

¹⁸ Pero nos no mester lubidá nunka ku amor pa próhimo ta ligá ku amor pa Dios. Ounke Hesus a yuda hende pober, a kura e enfermonan i a alimentá hende ku hamber, su motivashon tras di tur e kosnan aki i pa siña e multitutnan tabata pa yuda hende rekonsiliá ku Yehova. (2 Korintionan 5:19) Hesus a hasi tur kos pa e gloria di Dios, sin lubidá nunka ku el a representá i reflehá e Dios ku el a stima. (1 Korintionan 10:31) Dor di imitá e ehèmpel di Hesus, nos tambe por mustra berdadero amor pa próhimo i na mes momento evitá di bira parti di e mundu malbado di humanidat.

Kon Nos Ta Stima Nos Próhimo Manera Nos Mes

19, 20. Kiko ke men stima nos próhimo manera nos mes?

¹⁹ Hesus a bisa: “Stima bo próhimo manera bo mes.” Ta normal pa ta interesá den nos mes i pa nos tin un grado rasonabel di rèspèt propio. Si esei no tabata e kaso, e mandamentu lo no tabatin muchu sentido. Pero nos no mester konfundí e amor apropiá aki di nos mes ku e amor egoista ku apòstel Pablo a menshoná na 2 Timoteo 3:2. Mas bien, e ta un sentido rasonabel di balor propio. Un erudito di Beibel a deskribié komo un “amor propio balansá ku no tin un aire egoséntriko di ‘mi ta superior’ ni un aktitut masokista di ‘mi ta inferior.’”

²⁰ Stima otro hende meskos ku nos mes ke men mira otro hende manera nos ke wòrdu mirá i trata otro hende manera nos ke wòrdu tratá. Hesus a bisa: “P’esei, tur loke boso ke pa hende hasi pa boso, hasi meskos pa nan.” (Mateo 7:12) Ripará ku Hesus no a bisa pa nos keda kòrda loke otro hende a hasi ku nos den pasado i despues paga nan bèk. Mas bien, nos mester pensa riba kon nos ke ser tratá anto aktua di akuerdo ku esei. Ripará tambe ku Hesus no a limitá su palabranan na amigunan i rumannan spiritual. El a usa e palabra “hende,” tal bes pa indiká ku nos mester aktua den e manera aki ku tur hende, ken ku nos topa.

21. Ora nos ta mustra amor na otro hende, kiko nos ta demostrá?

²¹ Amor pa próhimo lo protehá nos for di hasi loke ta malu. Apòstel Pablo a skirbi: “‘No kometé adulterio, no mata, no hòrta, no kudishá,’ i si tin algun otro mandamentu, esaki ta keda resumí den e palabra aki: ‘Stima bo próhimo manera bo mes.’ Amor no ta hasi daño na próhimo.” (Romanonan 13:9, 10) Amor lo impulsá nos pa buska maneranan pa hasi loke ta bon pa otro hende. Dor di stima otro hende, nos ta demostrá ku nos ta stima tambe esun ku a krea hende den Su imágen, Yehova Dios.—Génesis 1:26.

Kon Lo Bo Kontestá?

• Na ken nos tin ku mustra amor, i pakiko?

• Kon nos por mustra amor na hende ku no ta sirbi Yehova?

• Kon Beibel ta deskribí e amor ku nos mester tin pa nos rumannan?

• Kiko ke men stima nos próhimo manera nos mes?

[Preguntanan di Estudio]

[Plachi na página 26]

“Ken ta mi próhimo?”

[Plachi na página 29]

Hesus a stima hende individualmente