Historia di Bida

Nos Lucha pa Keda Spiritualmente Fuerte

Segun e Relato di Rolf Brüggemeier

E promé karta ku mi a haña tempu mi tabata den prizon tabata di un amigu. El a informá mi ku outoridatnan a arestá mi mama i tambe mi ruman hòmbernan mas yòn, Peter, Jochen i Manfred. Esei a laga mi dos ruman muhénan chikí sin mayor i sin ruman. Dikon e outoridatnan di Alemania Oriental a persiguí nos famia? Kiko a yuda nos keda spiritualmente fuerte?

SEGUNDO GUERA MUNDIAL a destrosá nos dushi infansia; nos a eksperensiá personalmente e krueldatnan di guera. Tata a drenta ehérsito aleman i a muri komo prizonero di guera. Esaki a nifiká ku mi mama, Berta, mester a sòru pa seis yu di ún pa 16 aña.

E misa ku mi mama tabata bai a lag’é sinti totalmente desapuntá ku religion i esei a pone ku e no kier a tende nada mas tokante Dios. Pero un dia na aña 1949, Ilse Fuchs, un señora kòrtiku i diskreto, a bin na nos porta pa papia tokante e Reino di Dios. Su preguntanan i rasonamentu a lanta mi mama su kuriosidat. Un estudio di Beibel a duna mi mama speransa.

Sin embargo, ami ku mi ruman hòmbernan, na prinsipio tabatin nos dudanan. E nazinan i despues e komunistanan a primintí kosnan grandi, pero tur nan promesanan a kaba na desepshon. Ounke nos tabata deskonfiá tur promesa nobo, nos a keda impreshoná ora nos a haña sa di algun Testigu ku tabata será den kampo di konsentrashon pasobra nan a nenga di partisipá den guera. E siguiente aña, ami ku mi mama i Peter a batisá.

Nos ruman hòmber mas yòn Manfred tambe a batisá, pero aparentemente e bèrdat bíbliko no tabata ankrá den su kurason. Ora ku e komunistanan a prohibí nos obra na aña 1950  i polis sekreto—e notorio Stasi—a pone preshon riba dje, el a bisa nan na unda nos reunionnan tabata tuma lugá. Esaki ta loke despues a hiba na e aresto di mi mama i mi otro ruman hòmbernan.

Nos A Sirbi bou di Prohibishon

Debí na e prohibishon, nos tabatin ku trese literatura bíbliko di kontrabanda na Alemania Oriental. Komo mensahero, mi tabata rekohé literatura den e sekshon oksidental di Berlin kaminda e literatura no tabata prohibí, i a krusa frontera ku nan. Mas ku un biaha mi a skapa di polis, pero na novèmber 1950, nan a arestá mi.

Stasi a pone mi den un sèl bou di tera sin bentana. Den dia mi no tabatin mag di drumi, i anochi nan tabata interogá mi i tin biaha bati mi. Mi no tabatin ningun kontakto ku mi famia, sino te na mart 1951 ora ku mi mama, Peter i Jochen a bin pa sigui mi kaso den korte. Mi a haña un sentensia di seis aña.

Peter, Jochen i mi mama a keda arestá seis dia despues di mi huisio. Despues di esei, un ruman den fe a kuida mi ruman muhé Hannelore, ku tabatin 11 aña, i un tanta a tuma Sabine, ku tabatin 7 aña. E bewakernan di Stasi a trata mi mama ku mi rumannan manera kriminalnan peligroso, i asta a kita nan feter di sapatu. Nan tabatin ku keda pará durante henter e interogashonnan. Nan tambe a keda sentensiá na seis aña kada un.

Na 1953, outoridatnan a asigná ami ku algun otro Testigu pa traha un pista di aterisahe militar, lokual nos a nenga di hasi. Nan a kastigá nos ku 21 dia di enkarselashon solitario, lokual a nifiká nada di trabou, nada di karta i tiki kuminda. Algun ruman muhé kristian a warda pida pan di e tiki rashon ku nan mes tabata haña i a duna nos na skondí. Asina mi a sera konosí ku Anni, un di e ruman muhénan ei. I despues mi a kasa kuné ora nos a sali liber na 1957 i 1956 respektivamente. Un aña despues ku nos a kasa, nos yu muhé, Ruth, a nase. Peter, Jochen i Hannelore tambe a kasa rònt di mesun tempu.

Rònt di tres aña despues ku mi a sali liber, nan a bolbe arestá mi. Un funshonario di Stasi a purba konvensé mi pa bira un informante. E di: “Kerido Sr. Brüggemeier, por fabor sea rasonabel. Bo sa kon bida den prizon ta, i nos no ke pa bo pasa den tur esei atrobe. Bo por keda un Testigu, sigui ku bo estudionan i papia tokante Beibel manera ku bo ke. Únikamente nos ke pa bo tene nos informá. Pensa riba bo kasá i bo yu muhé chikí.” E último palabranan ei a dal mi hopi duru. Sin embargo, mi tabata sa ku tanten mi ta den prizon, Yehova lo a perkurá pa mi famia mihó ku ami lo tabata por, i el a hasié!

 E outoridatnan a purba obligá Anni traha fultaim i laga otro hende kuida Ruth p’e den siman. Anni a resistí i a bai traha anochi di manera ku e por a kuida Ruth den dia. Nos rumannan spiritual tabata sumamente amoroso i atento i nan a duna mi kasá asina hopi kos ku e por a kompartí ku otro rumannan. Miéntras tantu, ami a pasa kasi seis aña mas den prizon.

Kon Nos A Mantené Fe den Prizon

Ora mi a bai bèk prizon, mi kompañeronan Testigu den mi sèl tabata ansioso pa sa kiko tabatin den e publikashonnan resientemente. Esta kontentu mi tabata ku mi a studia mi revista Toren di Vigilansia kuidadosamente i ku mi a asistí ku regularidat na e reunionnan, di manera ku mi por tabata un fuente di animashon spiritual pa nan!

Ora nos a pidi e bewakernan un Beibel, nan a kontestá: “Duna Testigunan di Yehova un Beibel ta mes peligroso ku duna un ladron enkarselá hèrmènt pa kibra sali.” Tur dia, e rumannan ku tabata hiba delantera tabata skohe un teksto bíbliko pa konsiderá. Durante nos kaminatanan diario di mei ora den kurá, nos no tabata dje interesá ei den ehersisio i aire fresku sino den benefisiá di e teksto di dia. Ounke nos tabatin ku keda sinku meter leu for di otro i no tabatin mag di papia, tòg nos a haña maneranan pa pasa e teksto di un pa otro. Unabes bèk den nos sèl, nos a pone huntu loke kada un a logra tende, i a tene nos konsiderashon bíbliko diario.

Ku tempu un informante a reda nos, i nan a sera mi mi so den un sèl. Mi tabata hopi kontentu ku pa e tempu ei ya mi a siña sentenáres di teksto bíbliko for di kabes! Mi por a yena e dianan bashí ei meditando riba un variedat di tópiko bíbliko. Despues nan a hiba mi na un otro prizon, kaminda un bewaker a pone mi den un sèl ku dos otro Testigu i—e kos di mas maravioso—a duna nos un Beibel. Despues di tabata seis luna será mi so den un sèl, mi tabata masha gradisidu di por a konsiderá tópikonan bíbliko atrobe ku rumannan den fe.

Peter, mi ruman hòmber, ta deskribí kiko a yud’é perseverá den un otro prizon: “Mi tabata imaginá kon bida lo ta den e mundu nobo i a tene mi mente okupá ku pensamentunan bíbliko. Nos ku tabata Testigu tabata fortalesé otro ku preguntanan bíbliko òf ku tèstnan basá riba e Skritura. Bida no tabata fásil. Tabatin biaha ku nan a sera nos 11 hende den un espasio di mas o ménos 12 meter kuadrá. Einan nos mester a hasi tur kos; kome, drumi, baña, asta nos nesesidatnan. Esei a hasi nos krepchi.”

Jochen, un di mi ruman hòmbernan, ta kòrda esaki di su eksperensianan den prizon: “Ami tabata kanta e kantikanan ku mi por a kòrda for di nos buki di kantika. Tur dia mi a meditá riba un teksto bíbliko ku mi a siña for di kabes. Despues ku mi a sali liber, mi a sigui ku un bon rutina di instrukshon spiritual. Tur dia mi ta lesa e teksto di dia ku mi famia. Nos ta prepará tambe pa tur reunion.”

Mi Mama A Sali for di Prizon

Despues di tabata será pa poko mas ku dos aña, nan a laga mi mama bai. El a usa su libertat pa studia Beibel ku Hannelore i Sabine, i asina a yuda nan pone un bon fundeshi pa nan fe. El a siña nan tambe kon pa trata ku kuestionnan ku a surgi na skol debí na nan fe den Dios. Hannelore ta remarká: “Nos no a wòri ku e konsekuensianan pasobra na kas nos tabata animá otro. Nos lasonan familiar fuerte a kompensá kualke problema ku nos a eksperensiá.”

Hannelore ta sigui bisa: “Ademas, nos a perkurá kuminda spiritual pa nos ruman hòmbernan den prizon. Ku lèter chikí riba papel di was, nos tabata kopia na man henter un edishon di E Toren di Vigilansia. Kaba nos a lora e blachinan den papel waterpruf i a skonde nan meimei di algun preimu ku nos tabata manda den e pakete mensual. Tabata un goso pa haña e mensahe ku e preimunan tabata ‘masha dushi.’ Nos tabata asina apsorbá den nos trabou ku, bon mirá, esei tabata un tempu maravioso.”

 Bida bou di Prohibishon

Peter ta deskribí kon tabata pa biba pa dékadanan bou di prohibishon na Alemania Oriental: “Nos tabata reuní den kasnan privá den gruponan chikí, i nos no tabata ni yega ni sali pareu. Na kada reunion, nos tabata hasi areglo pa e siguiente. Nos a hasi esaki ku seña i notanan skirbí komo ku konstantemente tabatin e peliger ku Stasi tabata tap nos kòmbersashonnan.”

Hannelore ta splika: “Tabatin biaha ku nos a haña sinta di grabashon di programanan di asamblea. Esaki semper tabata trese hopi alegria den e reunion. Nos grupo chikí tabata reuní pa skucha instrukshon bíbliko durante vários ora. Ounke nos no por a mira e oradónan, nos a sigui e programa kuidadosamente i a hasi anotashon.”

Peter ta bisa: “Nos rumannan kristian den otro pais tabata hasi tur nan esfuerso pa manda literatura bíbliko pa nos. E último dékada promé ku e Muraya di Berlin a basha abou na 1989, nan a produsí publikashonnan pa nos di tamaño chikí. Algun ruman a riska nan outo, nan plaka i asta nan libertat pa transportá kuminda spiritual pa Alemania Oriental. Un anochi un pareha ku nos tabata warda riba dje no a presentá. Logá ta polis a deskubrí e literatura i a konfiská nan outo. Apesar di e peligernan, nunka nos no a pensa pa stòp ku e trabou afin di hiba un bida mas trankil.”

Manfred, mi ruman hòmber mas yòn ku a traishoná nos na 1950, ta deskribí kiko a yud’é rekobrá su fe i mantené esaki: “Despues ku nan a detené mi pa algun luna, mi a muda pa Alemania Oksidental i a bandoná e bèrdat. Mi a bolbe na Alemania Oriental na 1954 i a kasa e siguiente aña. Poko despues, mi kasá a aseptá e bèrdat i a batisá na 1957. Ku tempu, mi konsenshi a kuminsá molestiá mi, i ku yudansa di mi kasá, mi a bolbe na e kongregashon.

Rumannan kristian ku tabata konosé mi promé ku mi a bandoná e bèrdat a aseptá mi bèk na un manera amoroso, komo si fuera nada no a pasa. Ta dushi pa bo ser saludá ku un sonrisa kaluroso i un abraso. Mi ta masha kontentu ku mi a hasi bon ku Yehova i ku mi rumannan.”

E Lucha Spiritual Ta Sigui

Tur miembro di nos famia tabatin ku hiba un lucha fuerte pa e fe. Mi ruman hòmber Peter a bisa: “Awe, mas ku nunka, nos ta rondoná pa hopi distraishon i tentashon material. Bou di e prohibishon, nos tabata kontentu ku loke nos tabatin. Por ehèmpel, ningun di nos no kier a bai un otro grupo di estudio djis pa motibunan personal, i ningun hende no tabata keha ku e reunionnan tabata muchu leu ni muchu lat. Nos tur tabata kontentu di por a reuní huntu, maske algun di nos tabatin ku warda te 11 or djanochi pa nos por a sali for di e lugá di reunion.”

Na 1959, mi mama a disidí di muda pa Alemania Oksidental huntu ku Sabine, ku e  tempu ei tabatin 16 aña. Komo ku nan kier a sirbi kaminda tabatin mester di mas publikadó di Reino, sukursal a dirigí nan pa Ellwangen, na Baden-Württemberg. Mama su selo apesar ku su salú no tabata bon, a motivá Sabine pa kuminsá traha pionero ora e tabatin 18 aña. Ora ku Sabine a kasa, mi mama—na edat di 58 aña—a siña kore outo p’e por a partisipá mas tantu den e trabou di prediká. El a disfrutá di e sirbishi aki te na su morto na 1974.

Pa loke ta ami, despues di a sinta kasi seis aña di mi di dos kastigu di prizon, nan a deportá mi na 1965 pa Alemania Oksidental, sin ku mi famia tabata sa. Sin embargo, ku tempu Anni mi kasá, i nos yu muhé Ruth, a bin serka mi. Mi a puntra sukursal si nos por a sirbi kaminda tin mester di mas publikadó, pues nan a pidi nos pa bai Nördlingen, na Bavaria. Einan Ruth, i nos yu hòmber, Johannes, a lanta. Anni a drenta den sirbishi di pionero. Su bon ehèmpel a motivá Ruth pa kuminsá traha pionero asina ku el a kaba skol. Tur nos dos yunan a kasa ku pionero. Awor nan tin nan mes famia, i nos ta bendishoná ku seis dushi nietu.

Na 1987, mi a probechá di e oportunidat pa baha ku penshon adelantá i a djòin Anni den e sirbishi di pionero. Tres aña despues, mi a haña invitashon di e ofisina di sukursal na Selters pa yuda ekspandé e fasilidatnan. Despues di esei, nos a yuda traha e promé Salòn di Asamblea di Testigunan di Yehova na loke tabata Alemania Oriental, na Glauchau, kaminda mas despues nos a bira kuidadónan di e lugá. Pa motibunan di salú, nos a bai bèk serka nos yu muhé den e Kongregashon Nördlingen, i ei nos ta sirbi komo pionero.

Mi ta hopi kontentu ku tur mi rumannan i mayoria miembro di nos famia ta sigui sirbi nos maravioso Dios, Yehova. Atraves di añanan, nos a siña ku tanten ku nos keda spiritualmente fuerte, nos por eksperensiá e bèrdat di e palabranan di Salmo 126:3: “[Yehova] a hasi kosnan grandi pa nos; p’esei nos ta kontentu.”

[Plachi na página 13]

Dia nos a kasa, 1957

[Plachi na página 13]

Huntu ku mi famia na 1948: (dilanti, di robes pa drechi) Manfred, Berta, Sabine, Hannelore, Peter; (patras, di robes pa drechi) ami ku Jochen

[Plachinan na página 15]

Un buki di tamaño chikí ku nos a usa durante e prohibishon i Stasi su ekipo di tap kòmbersashon

[Rekonosementu]

Forschungs- und Gedenkstätte NORMANNENSTRASSE

[Plachi na página 16]

Huntu ku mi rumannan: (dilanti, di robes pa drechi) Hannelore i Sabine; (patras, di robes pa drechi) ami, Jochen, Peter i Manfred