Pakiko Identifiká e Antikristu?

“Boso a tende ku antikristu ta bin,” e apòstel inspirá a skirbi hopi tempu pasá. (1 Juan 2:18) E palabranan ei ta masha remarkabel! Pa hopi siglo, hende a puntra nan mes kiko nan ta nifiká. Ken ta e antikristu? Ki tempu lo e bin? Kiko lo e hasi ora e bin?

E LISTA di persona akusá di ta e antikristu ta masha largu. Den pasado, personanan denominá komo “antikristu” a inkluí hudiunan, papanan katóliko i emperadornan romano. Por ehèmpel, ora Emperador Frederick II (1194-1250) a disidí di no partisipá den un Krusada na fabor di iglesia, Papa Gregorio IX a identifik’é komo e antikristu i a ekskomulg’é. Despues Inosente IV, susesor di Gregorio, a bolbe ekskomulg’é. Komo kontesta, Frederick a deklará ku ta Inosente tabata e antikristu.

Apòstel Juan ta e úniko eskritor bíbliko ku a usa e palabra “antikristu.” E palabra ta aparesé sinku biaha den dos di e kartanan ku ta karga su nòmber, i e ta papia di ún òf hopi antikristu. Den e kuadro riba e siguiente página bo ta haña e versíkulonan kaminda e palabra ta aparesé. For di e versíkulonan aki, nos por mira ku e antikristu ta un mentiroso, un gañadó, ku ta determiná pa destruí hende su relashon ku Kristu i ku Dios. Ta p’esei e apòstel a urgi su rumannan kristian: “Stimánan, no kere tur spiritu [“ekspreshonnan inspirá,” NW], ma pone e spiritunan na prueba pa mira si nan ta bin di Dios, pasobra hopi profeta falsu a sali bai den mundu.”—1 Juan 4:1.

Hesus tambe a duna spièrtamentu kontra hende engañoso, òf profeta falsu, bisando: “[Nan] ta bin serka boso bistí manera karné, ma di paden nan ta lobo hambrá. Na nan fruta [òf, obranan] boso lo konosé nan.” (Mateo 7:15, 16) Ta pa e antikristu figurativo Hesus tambe a spièrta su siguidónan? Laga nos wak kon nos por identifiká e gañadó malisioso aki.