Stima e Dios Ku Ta Stima Bo

“Stima SEÑOR bo Dios ku henter bo kurason, i ku henter bo alma, i ku henter bo mente.”—MATEO 22:37.

1, 2. Kiko lo por tabatin tras di e pregunta tokante e mandamentu di mas grandi?

APARENTEMENTE e fariseonan den tempu di Hesus a debatí ampliamente riba un pregunta. Kua di e mas ku 600 leinan di e Lei di Moisés tabata esun di mas importante? Tabata un lei ku tabatin di haber ku sakrifisio? Al fin i al kabo, nan tabata hasi sakrifisio pa risibí pordon di piká i pa ofresé gradisimentu na Dios. Òf ta e lei tokante sirkunsishon tabata e lei supremo? Esei tambe tabata importante, ya ku sirkunsishon tabata un señal di e aliansa ku Yehova a sera ku Abraham.—Génesis 17:9-13.

² Di otro banda, aparentemente esnan ku a pega na tradishon a rasoná ku maske algun lei por a parse di tin ménos peso, tabata un ekibokashon pa konsiderá un mandamentu mas importante ku otro ya ku tur lei ku Dios a duna tabata importante. E fariseonan a disidí di presentá e pregunta kontroversial aki na Hesus. Podisé e lo a bisa algu ku lo por a pon’é pèrdè su kredibilidat. Un di nan a aserká Hesus i a puntr’é: “Kua ta e mandamentu di mas grandi di Lei?”—Mateo 22:34-36.

3. Kiko segun Hesus tabata e mandamentu di mas grandi?

³ E kontesta ku Hesus a duna ta di gran importansia pa nos awe. Den su kontesta, el a resumí loke semper tabata i loke semper lo ta e esensia di adorashon berdadero. Sitando for di Deuteronomio 6:5, Hesus a bisa: “‘Stima SEÑOR bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé.” Ounke e fariseo a puntra pa djis ún mandamentu, Hesus a dun’é ún mas. Sitando for di Levítiko 19:18, el a bisa: “E di dos ta semehante: ‘Stima bo próhimo manera bo mes.’” Despues Hesus a indiká ku e dos leinan aki a abarká henter e adorashon puru. Ku e meta di stroba kualke intento pa pidié menshoná e otro leinan den òrdu di importansia, el a konkluí: “Riba e dos mandamentunan aki henter e Lei i e Profetanan ta basá.” (Mateo 22:37-40) Den e artíkulo aki, nos lo konsiderá e mandamentu di mas grandi. Dikon nos tin ku stima Dios? Kon nos ta mustra ku nos ta stim’é? I kon nos por kultivá e amor ei? Ta hopi importante pa haña kontesta riba e preguntanan aki pasobra pa nos agradá Yehova, nos tin ku stim’é ku henter nos kurason, alma i mente.

E Importansia di Amor

4, 5. (a) Pakiko e fariseo no a keda sorprendí ku loke Hesus a bis’é? (b) Kiko Dios ta balorá mas ku sakrifisio i ofrenda?

⁴ Ta parse ku e fariseo no a keda molestiá ni sorprendí ku e kontesta ku Hesus a dun’é riba  e pregunta ku el a hasi. E tabata sa ku amor pa Dios tabata un aspekto esensial di adorashon berdadero, ounke hopi hende no a manifest’é. Den e snoanan, nan tabatin e kustumber di resitá e Shemá (un orashon hebreo), òf di hasi konfeshon di fe na bos haltu, i esaki a inkluí e pasashi na Deuteronomio 6:4-9, for di kua Hesus a sita. Segun e relato paralelo den Marko, e ora ei e fariseo a bisa Hesus: “Korekto, Maestro, bo a papia bèrdat, pasobra ta ún Dios tin; i fuera di dje no tin ni un otro. I pa stim’é ku henter bo kurason i ku tur bo komprondementu i ku tur bo forsa, i pa stima bo próhimo manera bo mes, ta bal mas ku tur ofrenda kimá i sakrifisio.”—Marko 12:32, 33.

⁵ En bèrdat, ounke e Lei a rekerí ofrenda kimá i sakrifisio, loke ta konta realmente pa Dios ta ora su sirbidónan tin un kurason motivá pa amor. Un mòfi ofresí na Dios ku amor i deboshon tabata bal mas p’e ku míles di chubat’i karné duná ku un motivashon robes. (Mikeas 6:6-8) Kòrda e relato di e biuda den nesesidat ku Hesus a opservá den e tèmpel na Yerusalèm. Ku e dos monedanan chikitu ku el a tira den e kaha di ofrenda lo e no por a kumpra ni un solo mòfi. Pero e kontribushon ei, duná ku amor sinsero pa Yehova, a nifiká mas pa Yehova ku e donashonnan grandi ku hende riku a hasi di nan abundansia. (Marko 12:41-44) Ta un animashon pa sa ku Yehova ta duna mas balor na loke nos tur por ekspresá, sin importá nos sirkunstansianan: nos amor p’e!

6. Kiko Pablo a skirbi tokante e importansia di amor?

⁶ Enfatisando e importansia di amor den adorashon berdadero, apòstel Pablo a skirbi: “Maske mi papia lenga di hende i di angel, ma mi no tin amor, mi a bira manera un gòng ku ta zona òf un simbal ku ta resoná. I si mi tin don di profesia i ta komprondé tur misterio i tur konosementu; i si mi tin tur fe pa kita serunan for di nan lugá, ma mi no tin amor, mi no ta nada. I si mi duna tur mi propiedat pa duna e pobernan di kome, i si mi entregá mi kurpa pa wòrdu kimá, ma mi no tin amor, esei no ta sirbi mi di nada.” (1 Korintionan 13:1-3) Ta bon kla anto ku pa nos adorashon agradá Dios, nos mester tin amor. Pero kon nos ta mustra nos amor pa Yehova?

Kon Nos Ta Mustra Nos Amor pa Yehova

7, 8. Kon nos por mustra nos amor pa Yehova?

⁷ Hopi hende ta kere ku amor ta un emoshon riba kua nos no tin muchu kontròl, manera ora un persona tin djis un interes romántiko den un otro. Pero, berdadero amor no ta simplemente algu ku nos ta sinti. E ta ser karakterisá i definí pa akshon, no pa sintimentu. Beibel ta referí na amor komo “un kaminda mas ekselente” i komo algu ku nos ta “aspirá.” (1 Korintionan 12:31; 14:1) E Skritura ta animá kristiannan pa stima, no solamente “ku palabra ni ku lenga, ma ku echo i bèrdat.”—1 Juan 3:18.

⁸ Amor pa Dios ta impulsá nos pa hasi loke ta agrad’é i pa defendé i apoyá su soberania ku palabra i akshon. E ta motivá nos pa evitá di stima e mundu i su kamindanan malbado. (1 Juan 2:15, 16) Hende ku ta stima Dios ta odia loke ta malu. (Salmo 97:10) Amor pa Dios ta enserá tambe amor pa próhimo, lokual nos lo konsiderá den e siguiente artíkulo. Ademas, amor pa Dios ta rekerí obedensia. Beibel ta bisa: “Esaki ta e amor di Dios, ku nos ta warda su mandamentunan.”—1 Juan 5:3.

9. Kon Hesus a demostrá su amor pa Dios?

⁹ Hesus a demostrá perfektamente kiko ta nifiká stima Dios. Amor a motiv’é pa bandoná su hogar selestial i biba komo hende riba tera. Esei a impuls’é pa glorifiká su Tata pa medio di e kosnan ku el a hasi i siña hende. Amor a motiv’é pa ta “obedesidu te na morto.” (Filipensenan 2:8) E obedensia ei—un ekspreshon di su amor—a habri kaminda pa hende fiel haña un posishon hustu dilanti Dios. Pablo a skirbi: “Dor di desobedensia  di esun hende [Adam] hopi a wòrdu hasí pekadó, asina tambe dor di obedensia di esun [Kristu Hesus] hopi lo wòrdu hasí hustu.”—Romanonan 5:19.

10. Pakiko amor pa Dios ta enserá obedensia?

¹⁰ Meskos ku Hesus, nos ta mustra nos amor pa medio di nos obedensia na Dios. Juan, e apòstel stimá di Hesus, a skirbi: “Esaki ta amor, ku nos mester kana segun su mandamentunan.” (2 Juan 6) Esnan ku di bèrdat ta stima Yehova ta anhelá su guia. Nan ta rekonosé ku nan no por dirigí nan mes pasonan ku éksito, p’esei nan ta konfia den e sabiduria di Dios i ta someté nan na su guia amoroso. (Jeremias 10:23) Nan ta manera e hendenan di mente noble di Berea di antigwedat ku a aseptá e mensahe di Dios ku “anhelo mental,” pues ku tabatin un deseo profundo di hasi e boluntat di Dios. (Echonan 17:11, NW) Nan a analisá e Skritura kuidadosamente pa komprondé e boluntat di Dios mas plenamente, lokual a yuda nan ekspresá amor den mas aktonan di obedensia.

11. Kiko ke men stima Dios ku henter nos kurason, mente, alma i forsa?

¹¹ Manera Hesus a bisa, amor pa Dios ta enserá henter nos kurason, mente, alma i forsa. (Marko 12:30) E amor ei ta sali di kurason—e ta enserá nos sintimentu-, deseo- i pensamentunan mas profundo—i nos tin e deseo ferviente pa agradá Yehova. Nos ta stima tambe ku nos mente. Nos deboshon no ta algu siegu; nos a siña konosé Yehova, su kualidatnan, normanan i propósito. Nos ta usa nos alma, henter nos ser i e bida ku nos tin, pa sirbié i alab’é. I nos ta usa nos forsa ku e meta ei tambe.

Dikon Nos Tin Ku Stima Yehova

12. Pakiko Dios ta rekerí pa nos stim’é?

¹² Un motibu dikon nos tin ku stima Yehova ta pasobra e ta rekerí pa nos reflehá su kualidatnan. Dios ta e fuente i tambe e ehèmpel supremo di amor. Apòstel Juan a skirbi bou di inspirashon: “Dios ta amor.” (1 Juan 4:8) Hende a ser kreá den imágen di Dios; nos a ser trahá pa stima. De echo, e soberania di Yehova ta basá riba amor. E ke komo súpdito hende ku ta sirbié pa motibu ku nan ta stim’é i ku ta anhelá su forma hustu di goberná. Realmente, amor ta esensial pa e pas i armonia di henter kreashon.

13. (a) Pakiko Hesus a bisa e hudiunan: ‘Stima Yehova bo Dios’? (b) Pakiko ta rasonabel ku Yehova ta ferwagt ku nos ta stim’é?

¹³ Un otro motibu pakiko nos ta stima Yehova ta pasobra nos ta gradisidu pa loke el a hasi pa nos. Kòrda ku Hesus a bisa e hudiunan: ‘Stima Yehova bo Dios.’ E no a manda nan stima un ser divino ku tabata leu i deskonosí. Nan mester a stima e Persona ku a revelá su amor na nan. Yehova tabata nan Dios. E tabata Esun ku a saka nan for di Egipto pa drenta e Tera Primintí, Esun ku a protehá nan, sostené nan i stima nan, Esun ku a disipliná nan den amor. Te na dia djawe, Yehova ta nos Dios, esun ku a duna su Yu komo reskate pa nos por haña bida eterno. Pues, ta masha rasonabel ku Yehova ta ferwagt ku nos tambe ta stim’é! Nos amor ta un reakshon riba su amor; e ta ferwagt ku nos ta stima e Dios ku ta stima nos. Nos amor ta pa Esun ku “a stima nos promé.”—1 Juan 4:19.

14. Den ki manera e amor di Yehova ta manera esun di un mayor amoroso?

¹⁴ E amor ku Yehova tin pa humanidat ta manera esun ku un mayor amoroso tin pa su yunan. Ounke mayornan amoroso ta imperfekto, pa añanan largu nan ta lucha pa kria nan yunan, hasiendo entre otro hopi sakrifisio material. Mayornan ta instruí, animá, sostené i disipliná nan yunan pasobra nan ke pa nan ta felis i pa bai bon ku nan. Kiko mayornan ta deseá a kambio? Nan ke pa nan yunan stima nan i tuma na pechu loke nan a siña nan pa nan mes bon. Awor, no ta rasonabel ku nos Tata selestial perfekto ta ferwagt pa nos mustra apresio amoroso pa tur loke el a hasi pa nos?

 Kultivá Amor pa Dios

15. Kiko ta e promé kos ku nos tin ku hasi pa kultivá amor pa Dios?

¹⁵ Ounke nunka nos no a mira Dios ni tende su stèm, e ta invitá nos pa drenta den un relashon kuné basá riba amor. (Juan 1:18; Santiago 4:8) Kon nos por hasi esei? E promé kos ku nos tin ku hasi pa nos por stima un persona ta konos’é; ta difísil pa stima un persona ku nos no sa nada di dje. Yehova a perkurá su Palabra, Beibel, pa nos por siña tokante dje. P’esei Yehova, mediante su organisashon, ta animá nos pa lesa Beibel regularmente. Ta Beibel ta siña nos tokante Dios, su kualidatnan, su personalidat, i tambe di su trato ku hende durante míles di aña. Segun ku nos ta meditá riba e relatonan ei, nos apresio i amor p’e lo krese.—Romanonan 15:4.

16. Ora nos reflekshoná riba e ministerio di Hesus, kon esei ta oumentá nos amor pa Dios?

 ¹⁶ Algu importante ku por yuda nos amor pa Yehova krese ta ora nos ta reflekshoná riba e bida i ministerio di Hesus. Al fin i al kabo, Hesus a imitá su Tata asina perfektamente ku e por a bisa: “Esun ku a mira mi a mira e Tata.” (Juan 14:9) E kompashon ku Hesus a demostrá ora el a resusitá e úniko yu di un biuda no ta konmové bo? (Lukas 7:11-15) E echo ku e Yu di Dios—e hòmber di mas grandi ku a yega di biba—humildemente a laba pia di su disipelnan no ta atraé bo? (Juan 13:3-5) Ounke e tabata mas grandi i mas sabí ku kualke otro hende, el a hasi su mes aserkabel pa tur hende, inkluso pa mucha; esei no ta impreshoná bo? (Marko 10:13, 14) Ora nos meditá ku apresio riba e kosnan aki, nos ta bira manera e kristiannan di kende Pedro a skirbi: “Maske boso no a mir’é [esta, Hesus], boso ta stim’é.” (1 Pedro 1:8) Segun ku nos amor pa Hesus ta krese, nos amor pa Yehova tambe ta krese.

17, 18. Meditashon riba ki provishonnan amoroso di Yehova por oumentá nos amor p’e?

¹⁷ Otro kos ku por yuda nos amor pa Dios krese ta ora nos meditá riba e abundansia di su provishonnan amoroso ku ta permití nos disfrutá di bida—e bunitesa di kreashon, e variedat sinfin di kosnan delisioso pa kome, e kompañerismo kaluroso di bon amigu i tambe hopi otro deleite ku ta duna nos plaser i satisfakshon. (Echonan 14:17) Mas nos siña tokante nos Dios, mas motibu nos tin pa gradisié pa su bondat i generosidat sin límite. Pensa riba tur e kosnan ku Yehova a hasi pa bo personalmente. Bo no ta haña ku e meresé bo amor?

¹⁸ Un di e hopi donnan ku Dios a duna hende ta e oportunidat ku nos tin di aserk’é den orashon na kualke momento, sabiendo ku e “Skuchadó di orashon” ta tende nos. (Salmo 65:2, BPK) Yehova a delegá na su Yu stimá e outoridat di goberná i husga. Ma pa loke ta trata tende orashon, esei sí e no a delegá na niun otro persona, ni na su Yu. E mes personalmente ta skucha nos orashonnan. E interes personal amoroso ku Yehova ta mustra asina ei ta hala nos serka dje.

19. Ki promesanan di Yehova ta atraé nos na dje?

¹⁹ Algu mas ku ta atraé nos na Yehova ta ora nos pensa riba loke e tin prepará pa humanidat den futuro. El a primintí di pone fin na enfermedat, tristesa i morto. (Revelashon 21:3, 4) Unabes humanidat alkansá perfekshon, niun hende mas lo no sufri di depreshon, desanimashon òf tragedia. Lo no tin hamber, pobresa ni guera mas. (Salmo 46:9; 72:16) Tera lo ser transformá den un paradeis. (Lukas 23:43) Yehova lo trese e bendishonnan aki, no pa motibu ku e ta obligá di hasié, sino pa motibu ku e ta stima nos.

20. Kiko Moisés a bisa tokante e benefisionan di stima Yehova?

²⁰ Pues anto, nos tin motibunan konvinsente pa stima nos Dios i pa laga e amor ei krese. Abo lo sigui fortalesé bo amor pa Dios i permitié dirigí bo pasonan? Esei ta keda na abo. Moisés a rekonosé e benefisionan di kultivá i mantené amor pa Yehova. Moisés a bisa e israelitanan di hopi tempu pasá: “Skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje; pasobra esaki ta bo bida i e largura di bo dianan.”—Deuteronomio 30:19, 20.

Bo Ta Kòrda?

• Pakiko ta esensial pa nos stima Yehova?

• Kon nos por mustra amor pa Dios?

• Ki motibu nos tin pa stima Yehova?

• Kon nos por kultivá amor pa Dios?

[Preguntanan di Estudio]

[Plachi na página 20]

Yehova ta duna hopi balor na loke nos tur por ekspresá: nos amor p’e

[Plachinan na página 23]

“Esun ku a mira mi a mira e Tata.” —Juan 14:9