Ta Bale la Pena pa Ta Onesto

FALTA di onestidat ta eksistí for di tempu di hòfi di Edén. Sin embargo, te ainda mayoria kultura i sosiedat ta duna balor na onestidat i ta konsiderá gañamentu i engaño komo algu indeseabel i sensurabel. Nos por ta orguyoso ora hende ta konsiderá nos digno di konfiansa. Pero mas i mas hende ta haña ku pa sobrebibí den e mundu moderno djawe nan mester ta desonesto. Kiko abo ta pensa di esei? Ta bale la pena pa ta onesto? A base di ki normanan bo ta disidí kua komportashon ta onesto i kua nò?

Pa agradá Dios, nos mester ta onesto den tur loke nos ta papia i hasi. Apòstel Pablo a konsehá su rumannan kristian: “Kada un di boso papia bèrdat ku su próhimo.” (Efesionan 4:25) Pablo a skirbi tambe: “Nos ta deseá na komportá nos mes onradamente den tur kos.” (Hebreonan 13:18, NW) E motibu pakiko nos ta onesto no ta pa haña elogio serka otro hende. Nos ta onesto pasobra nos ta respetá nos Kreadó i ke agrad’é.

No Skonde Ken Bo Ta

Den hopi pais, hende ta duna informashon falsu tokante nan mes pa saka sierto benefisio den bida. Nan ta optené dokumento, diploma i papel di identidat falsu pa drenta un pais ilegalmente òf pa haña un trabou òf un puesto pa kua nan no ta kualifiká. Tin mayor ta falsifiká papel di nasementu di nan yunan pa nan por keda mas largu na skol.

Sin embargo, pa agradá Dios nos no mag gaña. Beibel ta bisa ku Yehova ta e “Dios di bèrdat” i ku e ta spera di esnan ku tin amistat íntimo kuné ku nan ta onesto. (Salmo 31:5, BPK) Si nos ke mantené un bon relashon ku Yehova, nos no por imitá “hòmbernan gañadó,” ku ta ‘hipókrita,’ skondiendo ken nan ta.—Salmo 26:4.

Ta komun tambe pa hende skonde e bèrdat ora nan mira ku probablemente nan lo ser disipliná pa malecho. Asta den e kongregashon kristian un persona lo por ta inkliná pa hasi esei. Por ehèmpel, den un kongregashon un yònkuman a atmití na e ansianonan ku el a kometé sierto pikánan. Sin embargo, e no a atmití ku el a hòrta tambe, maske tabatin prueba kontra dje. Ku tempu esei a sali na kla tòg i mester a ekspuls’é for di e kongregashon. Lo no tabata mas sabí di su parti pa ta kompletamente onesto i asina haña yudansa pa restorá su relashon presioso ku Yehova? De echo, Beibel ta bisa: “No menospresiá e disiplina di SEÑOR, ni desmayá ora ku e  reprendé bo; pasobra esnan ku SEÑOR ta stima, e ta disipliná.”—Hebreonan 12:5, 6.

Tin biaha, un ruman hòmber ku ta deseá di haña responsabilidat den kongregashon kisas ta purba skonde problemanan personal òf mal kondukta di pasado. Por ehèmpel, ora e ta yena un solisitut pa un privilegio spesial di sirbishi, kisas e no ta duna kontestanan kompletu riba preguntanan relashoná ku salú i moralidat, pensando ku si e skirbi e bèrdat esei lo por deskualifik’é. Podisé e ta rasoná: ‘Mi no a ègt gaña.’ Pero e tabata realmente franko i onesto? Wak e punto ku Proverbionan 3:32 ta trese dilanti: “E hende pèrvèrso [“tramposo,” NW] ta un abominashon pa SEÑOR, ma e tin komunion íntimo ku e hende rekto.”

Ser onesto ta nifiká, na promé lugá, ser onesto ku nos mes. Hopi biaha nos ta kere loke nos ke kere en bes di loke ta korekto òf bèrdat. Ta masha fásil pa nos tira falta riba otro hende! Por ehèmpel, Rei Saul a purba hustifiká su desobedensia tirando falta riba otro hende. Konsekuentemente, Yehova a rechas’é komo rei. (1 Samuel 15:20-23) Ki un kontraste grandi ku Rei David, kende a bisa Yehova den orashon: “Mi a atmití mi piká na bo, i mi inikidat mi no a skonde; mi a bisa: ‘Lo mi konfesá mi transgreshonnan na SEÑOR’; i bo a pordoná e kulpa di mi piká.”—Salmo 32:5.

 Onestidat Ta Trese Bendishon

Onestidat, òf falta di onestidat, ta influensiá e manera ku otro hende ta mira bo. Si hende haña sa ku bo a gaña nan maske ta ún biaha so, lo bo pèrdè nan konfiansa, i bo no ta haña esei bèk fásilmente. Di otro banda, si semper bo ta papia e bèrdat i ta onesto, lo bo krea e reputashon di ta un persona íntegro, digno di konfiansa. Testigunan di Yehova a gana tal reputashon. Konsiderá algun ehèmpel.

Un direktor di un kompania a realisá ku hopi di su empleadonan tabata hòrta e kompania, p’esei el a pidi intervenshon di polis. Ora el a tende ku entre esnan ku polis a arestá tabatin un empleado ku ta Testigu di Yehova, el a bai polis pa nan a saka e Testigu liber inmediatamente. Dikon? Pasobra e direktor tabata sa ku e persona aki ta un trahadó onesto i ku e ta inosente. E Testigu a keda ku su trabou, miéntras ku e otro empleadonan a haña nan retiro. E Testigu su rumannan di kongregashon a alegrá, sabiendo ku su kondukta a trese onor pa e nòmber di Yehova.

Hende ta tuma nota di kondukta ekselente. Den un komunidat afrikano, mester a drecha un brùg ku tabata pasa riba un labadó grandi pasobra ladron a bai ku algun di su tablanan. E habitantenan lokal a disidí di kolektá plaka pa remplasá e tablanan, pero ta ken nan por a konfia pa manehá e fondonan? Tur hende tabata di akuerdo ku mester ta un di e Testigunan di Yehova.

Ora ku disturbionan polítiko i étniko a surgi na un pais afrikano, un Testigu ku tabata traha komo akountent pa un kompania internashonal a keda transferí pa su empresa, ya ku su bida tabata na peliger. E kompania a hasi areglo p’e traha pa hopi luna den un otro pais riba nan gastunan te ora ku e situashon a kalma. Dikon? Pasobra anteriormente el a nenga di kolaborá ku personanan ku tabata traha un kòmplòt pa estafá e kompania. Gerente di e kompania tabata na haltura di su reputashon di onestidat impekabel. Nan lo tabata dispuesto pa yuda e empleado aki si e tabata konosí pa práktikanan dudoso?

Proverbionan 20:7 ta deklará: “Un hende hustu . . . ta kana den su integridat.” Un persona onesto ta un persona di integridat. Nunka e no ta estafá ni gaña su próhimo. No ta asina bo ta deseá pa hende trata bo? Onestidat ta un parti esensial di adorashon berdadero. E ta un ekspreshon di nos amor pa Dios i pa próhimo. Ora nos ta onesto, nos ta demostrá nos deseo di sigui e prinsipio di kondukta ku Hesus a ekspresá: “Tur loke boso kier pa hende hasi pa boso, hasi meskos pa nan.”—Mateo 7:12; 22:36-39.

Klaru ku no ta tur ora ta kumbiní nos pa ta onesto, pero e konsenshi limpi ku esei ta produsí ta bal hopi mas ku kualke resultado desagradabel. Riba término largu, ser onesto i rekto ta duna mayor benefisio. Echo ta ku un bon relashon ku Yehova ta algu presiosísimo. Pakiko daña esei dor di rekurí na algu desonesto afin di skapa kara òf pa haña un òf otro bentaha ilegal? Sea kual sea e difikultat ku kisas nos ta enfrentá, nos por tin konfiansa den e palabranan di e salmista: “Bendishoná ta e hende ku ta pone su konfiansa den [Yehova], i ku no ta mira riba e orguyosonan, ni riba esnan ku ta desviá bai tras di mentira.”—Salmo 40:4.

[Plachinan na página 18]

Kristiannan berdadero no ta kumpra ni usa dokumentonan falsifiká