Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko por yuda bo si un ser kerí di bo bandoná Yehova?

Fortalesé bo mes i otro miembronan fiel di bo famia. Keda kompletamente okupá ku aktividatnan spiritual. Hasi bo mes disponibel pa yuda otro hende. Nunka pèrdè e speransa ku e ser kerí por bini bèk. No kulpa bo mes. Respetá Dios su areglo pa disiplina i papia ku bo amigunan di bo sintimentunan.—1/9, página 18-21.

• Den ki dos manera e Skritura ta yuda identifiká “e último dianan”?

Beibel ta papia di susesonan ku lo tuma lugá durante “e konklushon di e sistema di kosnan.” (Mateo 24:3, 7, 8, NW; Lukas 21:11) Tambe e ta deskribí kambio den aktitut i akshon di hende ku ta biba durante “e último dianan.” (2 Timoteo 3:1-5) Ta bon pa nota ku e bon nobo mester wòrdu prediká durante e tempu aki.—15/9, página 4-6.

• Ki responsabilidat e kongregashon tin si un kristian ku ta stür un outo haña su mes den un aksidente ku ta kousa morto di otro hende?

Ora e ansianonan ta investigá e asuntu kisas nan ta haña ku e shofùr no tin kulpa di sanger pasobra e tabatin masha poko òf ningun kontròl riba e sirkunstansianan ku a resultá den e aksidente fatal. Pero si e ruman kristian tin kulpa di sanger i e ta repentí, lo e risibí reprendementu basá riba e Skritura i lo pèrdè privilegio den e kongregashon.—15/9, página 30.

• Pakiko bida eterno no ta dependé di avansenan sientífiko?

Tin vários esfuerso sientífiko pa alargá bida di hende, manera e intentonan pa ekstendé e kantidat di biaha ku selnan ta renobá nan mes òf hasi klonashon terapéutiko pa por duna pashèntnan órganonan nobo i kompatibel. Pero Beibel ta mustra ku e úniko medio via kua hende por haña bida eterno ta e reskate di Hesus.—1/10, página 3-5.

• Bañamentu ritual di hudiu tabata predesesor di boutismo kristian?

Nò. E hudiunan tabata efektuá ritonan di purifikashon riba nan mes kurpa, lokual e boutismo di Juan no a eksigí. E purifikashon ku e Lei di Moisés a rekerí mester a ser ripití, pero boutismo kristian ta ser efektuá un biaha so.—15/10, página 12-13.

• Kiko ta e Skol di Entrenamentu Ministerial?

Esei ta un kurso di ocho siman pa ansiano i sirbidó ministerial di kongregashon ku ta soltero i ku ta den un posishon pa bai sirbi kaminda tin mas nesesidat. Esei por ta ku e kongregashon for di kua nan a bini, otro kaminda den e mesun pais òf den un otro pais.—15/11, página 10-11.

• Kiko òf ken ta e antikristu menshoná na 1 Juan 2:18; 4:3?

Den un sentido amplio, “antikristu” ta referí na tur persona ku ta oponé òf ku ta pretendé di ta Kristu òf su representantenan. Tantu e palabranan di Hesus komo di Juan ta indiká ku e antikristu ta un grupo ku ta konsistí di hopi antikristu individual ku ta plama engaño religioso i ku ta rechasá e Reino di Dios.—1/12, página 4-6.