E Ambiente di Pasku Por Reina Henter Aña?

“Gloria den haltura na Dios, i riba tera pas entre hende di bon boluntat.”—Lukas 2:14, NW.

MIÓNES di hende ta konosí ku e palabranan aki di e angelnan di Dios ku a anunsiá e nasementu di Hesus na e wardadónan di karné ku tabata kuida nan bestianan anochi. Rònt di e fecha ku iglesianan ta pretendé ku Hesus a nase, hopi hende ku ta kristian pa nòmber ta hasi un esfuerso spesial pa komportá nan mes mihó. Durante e temporada ei hende ta mashá interesá den goso, pas i bon boluntat—kualidatnan menshoná den e proklamashon angelikal—i esaki ta loke hopi biaha nan ta referí na dje komo e ambiente di Pasku.

E sintimentunan positivo ei ta atraé asta hende ku no ta selebrá Pasku komo un fiesta religioso. Nan tambe ta gusta e kalor humano ku e selebrashon ei aparentemente ta promové. Na paisnan kaminda e temporada di Pasku ta nifiká dia liber di skol òf di trabou, e dianan di fiesta ta duna hende un oportunidat pa relahá, pa pasa tempu huntu ku nan famia i amigunan, òf simplemente pa pasa bon. Klaru ku hopi hende sinsero ta konsiderá Pasku prinsipalmente komo un tempu pa onra Hesukristu.

Sea kual sea e nifikashon ku hende ta duna na Pasku, mayoria di nan ta kla pa atmití ku hopi biaha e sintimentunan positivo ku e dianan di fiesta ta produsí ta di korto durashon. Rápidamente hende ta bai bèk na nan komportashon normal. Un karta titulá “E Ambiente di Pasku,” publiká pa Royal Bank di Canada, a deklará: “Hopi hende ku ta yama nan mes ‘kristian’ ta purba biba segun e nòmber ei pa solamente un par di siman tur aña, mustrando masha bon boluntat na nan próhimo te ku Aña Nobo, despues di kua nan ta reanudá nan bida egoista estilo kachó ta kome kachó i nan aktitut di no tin kunes ku e bienestar di otro sernan humano.” E karta ei a sigui bisa ku loke ta “básikamente robes” ku e ambiente di Pasku ta ku hende no ta bib’é “henter aña.”

Sea ku bo ta di akuerdo ku e análisis ei òf nò, e ta lanta preguntanan importante. Lo yega un dia ku hende lo por manifestá generosidat i komprenshon na otro riba un base permanente? Tin un speransa realístiko ku e proklamashon angelikal ku a tuma lugá e anochi ku Hesus a nase lo kumpli? Òf e speransa pa berdadero pas ta nada mas ku un soño?