Kon e Nasementu di Hesus Ta Trese Pas

EPROKLAMASHON di “pas entre hende di bon boluntat” no tabata e úniko profesia konektá ku e nasementu di Hesus. Fuera di loke e angelnan a anunsiá na e wardadónan di karné asombrá, mensaheronan selestial a ekspresá deklarashonnan inspirá pa Dios na Maria i na su kasá, Hosé, tokante e yu resien nasí Hesus. Un análisis di e mensahenan aki lo yuda nos haña un bista mas amplio di e nasementu di Hesus i tambe nos lo komprondé e berdadero nifikashon di e promesa angelikal di pas entre hende.

Promé ku Hesus a nase, asta promé ku Maria a sali na estado, el a haña bishita di un angel ku Beibel a identifiká komo Gabriel. E angel a kumind’é bisando: “Saludo, abo ku ta altamente faboresí! SEÑOR ta ku bo.” Manera bo por imaginá, Maria a keda tur aribabou i kisas asta un poko spantá. Ta kiko e saludo ei por a nifiká?

Gabriel a splik’é: “Mira, lo bo konsebí den bo matris i duna lus na un yu hòmber, i lo bo yam’é Hesus. E lo ta grandi i lo wòrdu yamá Yu di e Haltísimo; i SEÑOR Dios lo dun’é e trono di su tata David; i e lo reina riba e kas di Jakòb pa semper, i su reino lo no tin fin.” Maria a puntra ta kon esaki por ta, siendo ku e ta un bírgen i no a tene relashon seksual ku un hòmber. Gabriel a kontest’é ku e yu lo ser konsebí pa medio di Dios su spiritu santu. Esaki lo no ta un yu komun i koriente.—Lukas 1:28-35.

Un Rei Profetisá

E palabranan di Gabriel lo mester a yuda Maria komprondé ku e yu ku lo e haña tabata e tópiko di profesianan di antigwedat. Loke e angel a bisa, esta, ku Yehova lo duna e yu di Maria “e trono di su tata David,” lo a pone Maria—i de echo kualke persona hudiu ku konosé e Skritura—pensa riba e promesa ku Dios a hasi na Rei David di Israel.

Pa medio di profeta Natan, Yehova a bisa David: “Bo kas i bo reino lo permanesé mi dilanti pa semper; bo trono lo ta establesí pa semper.” (2 Samuel 7:4, 16) Yehova a deklará relashoná ku David: “Lo mi establesé su desendientenan pa semper, i su trono manera e dianan di shelu. Su desendientenan lo permanesé pa semper, i su trono lo permanesé manera solo mi dilanti.” (Salmo 89:20, 29, 35, 36) Pues, no tabata un koinsidensia ku tantu Maria komo Hosé tabata desendiente di e kas di David.

Esakinan no tabata e úniko profesianan den e Skritura Hebreo tokante un yu di David ku lo ta rei. Maria lo tabata na haltura tambe di e profesia di Isaias ku a bisa: “Un yu a nase pa nos, un yu hòmber ta duná na nos, i e gobernashon lo ta riba su skouder. Su nòmber lo ta Konsehero Maravioso, Dios Poderoso, Tata Eterno, Prens di Pas. Lo no tin fin na e oumento di su gobernashon i di pas, riba e trono di David i riba su reino, pa establesé esaki i manten’é ku huisio i hustisia for di e tempu ei i pa semper. E selo di e SEÑOR di ehérsitonan lo hasi esaki.”—Isaias 9:6, 7.

P’esei, loke Gabriel a anunsiá na Maria tabata mas ku djis e nasementu milagroso di un yu hòmber. Su yu lo ta e heredero real di Rei David, e heredero permanente i eterno di un Reino establesé pa Dios. E profesianan di Gabriel tokante e papel ku Hesus lo tin den futuro tin un nifikashon profundo pa nos tur.

 Ora ku Hosé a haña sa ku su futuro esposa tabata na estado, el a disidí di pone un fin na nan kompromiso. E tabata sa ku e yu no ta di dje pasobra e ku su namorada no a tene relashon seksual. Bo por imaginá kon difísil lo mester tabata pa Hosé kere e splikashon ku Maria a dun’é tokante kon bin e ta na estado. E relato di Evangelio ta informá nos: “Un angel di SEÑOR a aparesé na dje den un soño, bisando: ‘Hosé, yu di David, no tene miedu di tuma Maria komo bo esposa; pasobra loke a wòrdu konsebí den dje ta di spiritu santu. I e lo haña un yu hòmber; i lo bo dun’é e nòmber Hesus, pasobra ta e ta esun ku lo salba su pueblo di nan pikánan.’”—Mateo 1:20, 21.

Beibel no ta bisa si Hosé a komprondé kompletamente kon e yu aki lo a “salba su pueblo di nan pikánan.” Sin embargo, e mensahe aki tabata sufisiente pa sigurá Hosé ku e mama na estado tabata inosente di kualke malecho. Hosé a hasi manera e angel a bis’é i a bai kas ku Maria; ku e akto ei el a duna di konosé ku el a kasa kuné.

Ku yudansa di informashon ku nos ta haña den otro parti di e Skritura, nos por komprondé kiko e angel tabata ke men. Na prinsipio di historia humano, un angel rebelde a kuestioná Yehova su derecho di goberná komo rei supremo. E Skritura Hebreo ta mustra ku, entre otro, e rebelde aki a pretendé ku Dios su manera di goberná tabata inhustu i ku ningun hende lo no mantené integridat na Yehova ora pone nan na prueba. (Génesis 3:2-5; Jòb 1:6-12) Adam mes tabata un ku no a mantené su integridat. Debí na su piká tur hende ta heredá piká, i e konsekuensia di e piká ei ta morto. (Romanonan 5:12; 6:23) Sin embargo, Hesus a nase sin piká pasobra no ta un tata humano a prokre’é. Komo ku boluntariamente el a entregá su bida humano perfekto komo un reskate ku ta korespondé eksaktamente ku loke Adam a pèrdè, Hesus tabata den posishon pa  salba hende di nan pikánan i ofresé nan e speransa di bida eterno.—1 Timoteo 2:3-6; Tito 3:6, 7; 1 Juan 2:25.

Durante Hesus su ministerio riba tera, el a duna un idea di loke eliminashon di e efektonan di piká lo nifiká pa hende. El a libra hende di tur sorto di malesa i asta a trese e mortonan bèk na bida. (Mateo 4:23; Juan 11:1-44) E milagernan ei tabata un muestra di loke lo e hasi den futuro. Hesus mes a bisa: “E ora lo yega den kua tur ku ta den graf lo tende [mi] bos, i lo sali.”—Juan 5:28, 29.

E promesa ei di un futuro resurekshon ta splika dikon e nasementu—i mas ku esei e morto—di Hesus ta di sumo importansia pa nos. Dios a manda su Yu na tera “pa mundu wòrdu salbá dor di dje,” segun Juan 3:17. E notisia maravioso aki ta trese nos bèk na e proklamashon ku e angelnan a hasi na e wardadónan di karné ku tabata kuida nan bestianan e anochi ku Hesus a nase.

“Bon Nobo di Gran Goso”

En bèrdat e tabata pa humanidat un “bon nobo di gran goso” ora ku e angelnan a anunsiá nasementu di “un Salbadó, kende ta Kristu e Señor.” (Lukas 2:10, 11) E yu aki lo a bira e Mesias, e gran Profeta i Gobernante tan sperá pa e pueblo di Dios. (Deuteronomio 18:18; Mikeas 5:2) Su bida i morto riba tera lo a hunga un papel masha importante den e vindikashon di Yehova su soberania universal, ta p’esei e angelnan por a bisa: “Gloria na Dios den halturanan.”—Lukas 2:14.

Hesus, kende Beibel ta yama “e último Adam,” a mustra ku hende por keda fiel na Yehova asta bou di e prueba di mas severo. (1 Korintionan 15:45) Di e manera ei el a demostrá ku Satanas ta un mentiroso malisioso. Esaki tabata motibu pa gran goso den shelu entre e angelnan fiel.

Pero laga nos bai bèk na e pregunta: “Tin un speransa realístiko ku e proklamashon angelikal ku a tuma lugá e anochi ku Hesus a nase lo kumpli?” E kontesta ta sí! Pas ta un kondishon básiko den e kumplimentu di Dios su propósito pa e tera, ku ta inkluí restorashon di un ambiente di paradeis. Ora ku esei kumpli mundialmente, tur hende lo ta motivá pa amor i lealtat. Pues, kumplimentu di Yehova su propósito ta nifiká tambe eliminashon di tur resistensia kontra su soberania. Pa hende ku ta tuma parti pa Satanas ora nan ta laga sa ku e normanan di Yehova ta malu, esaki no ta masha bon notisia. Pa nan, lo e nifiká destrukshon.—Salmo 37:11; Proverbionan 2:21, 22.

Tuma nota ku e angelnan no a bisa e wardadónan ku lo tin pas i bon boluntat pa tur hende. Mas bien, nan a anunsiá “pas entre hende di bon boluntat.” Esei ke men, entre esnan ku Dios ta aprobá i ku tin su bon boluntat. Esnan ku ta ekspresá berdadero fe den Yehova ta bira fiel siguidó i imitadó di Hesus. E hòmber- i muhénan ei ta dispuesto pa mustra generosidat i komprenshon na otro hende tur dia, i no djis durante un par di dia di aña.

Un Spiritu Kristian Henter Aña?

E poder di e bon nobo ku Hesus a prediká a influensiá e bida di miónes di hende. Hopi di nan a adoptá prinsipionan kristian den tur aspekto di nan bida. Hende ku un tempu tabata básikamente egoista a kuminsá puntra nan mes kiko Hesus lo a hasi si e tabata den nan situashon. Algun hende ku anteriormente tabata kore tras di kos material i plaser, a bin mira e importansia di balornan spiritual i di kompartí esakinan ku nan próhimo. Hendenan asina ta hasi nan bèst pa demostrá generosidat i bondat henter aña. No ta esei ta loke bo ta spera di kristiannan berdadero?

 Si tur persona sinsero para ketu un ratu pa reflekshoná riba e importansia i nifikashon di e mensahe di pas ku e angelnan a proklamá i aktua na armonia ku esei, mundu sigur lo ta hopi mas mihó.

E profesianan konektá ku e nasementu di Hesus ta sigurá e hendenan ku tin Dios su aprobashon ku nan por disfrutá di berdadero pas pa semper. No ta esei abo ta deseá? Nos por tin sigur ku e glorioso anunsio profétiko di pas ku e angelnan a hasi na e nasementu di Hesus lo kumpli sin faya. Leu di ta palabranan bashí ku ta ser ripití durante temporada di Pasku, pas definitivamente lo bira un realidat eterno.

[Plachinan na página 7]

Nos por i lo mester desplegá un spiritu kristian henter aña