Pasku—Den Ki Direkshon e Ta Bayendo?

DIES aña pasá den e mesun luna aki, e revista U.S.News & World Report tabatin komo artíkulo di portada e tema “En Buska di Pasku.” El a enfoká riba e punto ku si Pasku tabata birando “mas puru i ménos komersial.” Kosnan ta bayendo den e direkshon ei?

E artíkulo a splika pakiko nos no mester spera ku esei ta bai tuma lugá. El a deklará: “No tin ningun registro ku hende a selebrá ofisialmente e nasementu di Kristu sino te den siglo kuater, tempu ku Constantino . . . tabata emperador di Roma.” Esei ta mustra “por lo ménos parsialmente ku ningun hende no tabata sa sigur ki dia Hesus a nase.” E artíkulo a atmití ku “e evangelionan no ta bisa nada di e aña, pa no papia mes di e luna òf dia eksakto.” Segun un historiadó di e Universidat di Texas, “e promé-promé kristiannan simplemente no tabata interesá den selebrá e Nasementu di Hesus.”

Bou di e suptítulo “Asuntu di Spekulashon,” e artíkulo a splika “kon iglesia a yega na 25 di desèmber.” El a rekonosé: “E punto di bista ku a haña mas aseptashon ta ku e fiesta tabata un ‘kristianisashon’ intenshonal di Saturnalia i otro fiestanan pagano.” “Dor di pone Pasku te den kabamentu di desèmber, ora hende tabatin e kustumber kaba di festehá, lidernan di iglesia a hasi sigur ku mas tantu hende posibel por a selebrá e nasementu di e Salbadó.” Meimei di siglo 19, hende a kuminsá pone mas énfasis riba kumpra i duna regalo. “E tradishon nobo di dunamentu di regalo di Pasku a krea un oportunidat direkto pa gana hopi plaka den komersio, i komersiantenan i empresanan di publisidat a kuminsá promové e temporada mesora.”

Pues no tin motibu pa spera ku Pasku ta bai den direkshon di kristianismo puru. Ounke tin hopi “komersialismo ekstrabagante” den e Pasku moderno, echo ta ku nunka kristiannan berdadero a spera di selebrá Hesus su nasementu. Mas bien, Beibel ta pone énfasis riba e reskate ku Kristu a perkurá pa medio di su morto i resurekshon pa shelu. (Mateo 20:28) Pa semper esei lo keda di importansia primordial.