Yehova Lo “Hasi Hustisia”

“Dios lo no hasi hustisia na su skohínan ku ta sklama na dje di dia i anochi?”—LUKAS 18:7.

1. Ken ta un fuente di animashon pa bo, i dikon?

RÒNT mundu Testigunan di Yehova ta disfrutá di e kompania di hòmber- i muhénan kristian ku a sirbi Yehova fielmente pa hopi aña. Bo konosé algun di e rumannan stimá aki personalmente? Kisas bo ta pensa riba un ruman muhé di edat, unu ku tin hopi aña batisá i ku masha poko ta falta reunion na Salòn di Reino. Òf podisé bo ta pensa riba un ruman hòmber di edat ku fielmente ta apoyá e aktividatnan di sirbishi di vèlt di e kongregashon siman aden siman afó i ku ta hasi esei ya pa vários dékada. Sí, hopi di e rumannan fiel ei a pensa un tempu ku pa aworakí Armagedón lo mester a yega dia bieu. Pero, e echo ku e mundu inhustu aki ta eksistí te ainda no a debilitá nan konfiansa den e promesanan di Yehova, ni e no a suak nan determinashon pa “perseverá te na fin.” (Mateo 24:13) E gran fe ku e sirbidónan leal aki di Yehova a demostrá ta un berdadero fuente di animashon pa henter e kongregashon.—Salmo 147:11.

2. Ki situashon ta hasi nos tristu?

² Pero tin biaha nos ta nota nèt lo kontrario. Algun Testigu ku tabata aktivo pa hopi aña den e ministerio ku tempu a pèrdè nan fe den Yehova i a stòp di asosiá ku e kongregashon kristian. Ta tristu pa mira kon algun di nos kompañeronan di ántes a bandoná Yehova, i nos tin e deseo sinsero di sigui yuda kada “karné pèrdí” bolbe na e tou. (Salmo 119:176; Romanonan 15:1) Sin embargo, e dos desaroyonan distinto aki—algun kristian ta keda fiel miéntras otronan ta pèrdè fe—ta lanta sierto pregunta. Kiko ta permití hopi Testigu mantené nan fe den e promesanan di Yehova miéntras otronan ta pèrd’é? Kiko kada un di nos por hasi pa garantisá ku nos ta keda ku e firme konvikshon ku e ‘gran dia di Yehova’ ta aserkando? (Sofonias 1:14) Laga nos analisá un ilustrashon òf parábola ku nos ta haña den e Evangelio di Lukas.

Un Spièrtamentu pa Hende Ku Ta na Bida “Ora e Yu di Hende Bin”

3. Ken spesialmente por benefisiá di e ilustrashon di e biuda i e hues, i dikon?

³ Den Lukas kapítulo 18, nos ta haña e ilustrashon di Hesus tokante un biuda i un hues. E parse e ilustrashon tokante e anfitrion persistente ku nos a analisá den e artíkulo anterior. (Lukas 11:5-13) Sin embargo, e konteksto di e pasashi di Beibel ku ta kontené e ilustrashon di e biuda i e hues ta mustra ku esaki ta apliká spesialmente na hende ku ta na bida “ora ku e Yu di hende bin” den poder di Reino, un periodo ku a kuminsá na 1914.—Lukas 18:8. *

4. Kiko Hesus a deklará promé ku el a konta e ilustrashon ku nos ta haña den Lukas kapítulo 18?

⁴ Promé ku Hesus a duna e ilustrashon, el a deklará ku e prueba di su presensia den poder di Reino lo ta mes ampliamente visibel  ku werlek, òf lamper, ku “ta kòrta for di un parti di shelu [i] lusa te na e otro parti di shelu.” (Lukas 17:24; 21:10, 29-33) No opstante, mayoria di hende ku ta biba den “e tempu di e fin” lo no presta atenshon na e evidensia bisto ei. (Daniel 12:4) Pakiko nò? Pa e mesun motibu ku e hendenan den tempu di Noe i di Lòt no a hasi kaso di e spièrtamentunan di Yehova. Den e tempunan ei, hende ‘tabata kome, bebe, kumpra, bende, planta i traha kas te dia ku nan a ser destruí.’ (Lukas 17:26-29) Nan a pèrdè nan bida pasobra nan tabata asina okupá ku e aktividatnan komun ei ku nan no a presta atenshon na e boluntat di Dios. (Mateo 24:39, NW) Awe tambe hende por lo general ta asina okupá ku nan asuntunan di tur dia ku nan no ta mira e evidensia ku fin di e mundu malbado aki ta serka.—Lukas 17:30.

5. (a) Na ken Hesus a dirigí un spièrtamentu, i pakiko? (b) Kiko a pone algun di su siguidónan pèrdè nan fe?

⁵ Ta bisto anto ku Hesus tabata preokupá pa su siguidónan tambe no laga e mundu di Satanas distraé nan, te n’e punto ku nan ta “bai bèk pa wak loke a keda atras.” (Lukas 17:22, 31, BPK) I esaki, en bèrdat, ta loke a sosodé ku algun kristian. Pa hopi aña nan a anhelá pa e dia yega ku Yehova lo pone fin na e mundu malbado aki. Sin embargo, ora Armagedón no a bini n’e tempu ku nan a ferwagt, nan a keda desilushoná. Pokopoko nan konvikshon ku e dia di huisio di Yehova ta serka a kaba na nada. Nan a baha man den e ministerio i pokopoko pero sigur a bira asina enbolbí den e kosnan di bida di tur dia ku no a sobra muchu tempu pa kosnan spiritual. (Lukas 8:11, 13, 14) Ku tempu, nan a “bai bèk pa wak loke a keda atras.” Hopi tristu!

Nos Mester “Hasi Orashon Tur Ora Bai”

6-8. (a) Konta e ilustrashon di e biuda i e hues. (b) Kon Hesus a apliká e ilustrashon aki?

⁶ Kiko por yuda nos hasi sigur ku nos konfiansa den e kumplimentu di Yehova su promesanan no ta bira débil? (Hebreonan 3:14) Hesus a trata e pregunta ei djis despues ku el a spièrta su disipelnan pa no bai bèk n’e mundu malbado di Satanas.

⁷ Lukas ta informá ku Hesus a “konta nan un parábola pa mustra nan ku nan mester hasi orashon tur ora bai i no desmayá.” Hesus a bisa: “Den un sierto stat tabatin un hues ku no tabatin temor pa Dios, ni rèspèt pa hende. I tabatin un biuda den e stat ei ku tur ora bai tabata bin serka dje, bisando: ‘Hasi hustisia pa mi kontra mi atversario.’ I pa un tempu e no tabata kier; ma despues el a bisa den su mes: ‘Maske mi no tin temor pa Dios, ni rèspèt pa hende, tòg, pasobra e biuda aki ta molestiá mi, lo mi hasi hustisia p’e, pa e no kansa mi dor di bin kada bes asina.’”

⁸ Despues ku Hesus a konta e komparashon  aki, el a hasi e siguiente aplikashon: “Tende loke e hues inhustu a bisa; awor Dios lo no hasi hustisia na su skohínan ku ta sklama na dje di dia i anochi, i lo e tarda pa kontestá nan? Mi ta bisa boso ku e lo hasi hustisia pronto pa nan. Sin embargo, ora ku e Yu di hende bin, lo e haña fe riba mundu?”—Lukas 18:1-8.

“Hasi Hustisia pa Mi”

9. Ki tema ta resaltá den e ilustrashon di e biuda i e hues?

⁹ E tema sentral di e ilustrashon bibu aki ta resaltá bon kla. E dos personahenan den e ilustrashon i Hesus mes tambe ta menshon’é. E biuda a roga e hues: “Hasi hustisia pa mi.” E hues a bisa: “Lo mi hasi hustisia p’e.” Hesus a puntra: “Dios lo no hasi hustisia”? I Hesus a bisa di Yehova: “E lo hasi hustisia pronto pa nan.” (Lukas 18:3, 5, 7, 8) Na ki tempu en partikular Dios “lo hasi hustisia”?

10. (a) Na ki tempu Dios a hasi hustisia den e promé siglo? (b) Na ki tempu i kon Dios lo hasi hustisia pa su sirbidónan djawe?

¹⁰ Den e promé siglo, e tempu pa hasi hustisia, òf “dianan di vengansa,” a yega na aña 70 di nos era tempu ku Yerusalèm i su tèmpel a ser destruí. (Lukas 21:22) Pa e pueblo di Dios awe, e tempu pa hasi hustisia lo ta riba ‘e gran dia di Yehova.’ (Sofonias 1:14; Mateo 24:21) E tempu ei, Yehova lo “paga ku aflikshon esnan ku ta afligí” su pueblo ora ku “[Hesukristu] duna pago meresí na esnan ku no konosé Dios i na esnan ku no ta obedesé e evangelio di nos Señor Hesus.”—2 Tesalonisensenan 1:6-8; Romanonan 12:19.

11. Den ki manera Yehova lo hasi hustisia “pronto”?

¹¹ Pero kon nos mester komprondé e siguransa di Hesus ku Yehova lo hasi hustisia “pronto”? E Palabra di Dios ta mustra ku “ounke [Yehova] tin gran pasenshi,” lo e ehekutá huisio rápidamente ora e tempu ta hechu. (Lukas 18:7, 8, NW; 2 Pedro 3:9, 10) Den tempu di Noe, ora e Diluvio a yega, Yehova no a tarda pa destruí e malbadonan. Meskos tambe, den tempu di Lòt, ora kandela a yobe for di shelu, e malbadonan a peresé. Hesus a bisa: “Lo ta meskos riba e dia ku e Yu di hende wòrdu revelá.” (Lukas 17:27-30) Un biaha mas, ‘pèrdishon lo bin diripiente’ riba e malbadonan. (1 Tesalonisensenan 5:2, 3) De echo, nos por tin e pleno konfiansa ku Yehova lo no permití e mundu di Satanas eksistí ni un dia mas ku hustisia ta rekerí.

“E Lo Hasi Hustisia”

12, 13. (a) Kon e ilustrashon di Hesus tokante e biuda i e hues ta siña nos un lès? (b) Pakiko nos por ta sigur ku Yehova lo tende nos orashonnan i hasi hustisia pa nos?

¹² E ilustrashon di Hesus tokante e biuda i e hues ta enfatisá mas bèrdatnan importante. Ora di mustra e aplikashon di e ilustrashon, Hesus a bisa: “Tende loke e hues inhustu a bisa; awor Dios lo no hasi hustisia na su skohínan”? Klaru ku Hesus no tabata komparando Yehova ku e hues, komo si fuera Dios lo trata kreyentenan den e mesun manera. Mas bien, Hesus a siña su siguidónan un lès tokante Yehova dor di resaltá un kontraste entre e hues ei i Dios. Kiko tabata algun di e diferensianan entre nan dos?

¹³ E hues di Hesus su ilustrashon tabata “inhustu,” miéntras ku “Dios ta un Hues hustu.” (Salmo 7:11; 33:5) E hues no tabata niun tiki interesá den e biuda, pero Yehova sí ta interesá den kada hende individual. (2 Krónikanan 6:29, 30) E hues no tabata dispuesto pa yuda e biuda, pero Yehova sí ta dispuesto—asta ansioso—pa yuda hende ku ta sirbié. (Isaias 30:18, 19) Ki lès nos por siña for di esaki? Si e hues inhustu a skucha e petishonnan di e biuda i a sòru pa hustisia tuma lugá, kuantu mas Yehova lo tende e orashonnan di su pueblo i sin duda hasi hustisia pa nan!—Proverbionan 15:29.

14. Pakiko nos no mester pèrdè fe den e binidero dia di huisio di Dios?

 ¹⁴ P’esei, esnan ku ta pèrdè fe den e binidero dia di huisio di Dios ta kometé un ekibokashon serio. Pakiko? Pasobra dor ku nan no ta kere firmemente mas ku ‘e gran dia di Yehova’ ta serka, ta komo si fuera nan ta duda ku Yehova ta konfiabel i ku e por kumpli fielmente ku su promesanan. Pero niun hende no por tin base pa duda den e fieldat di Dios. (Jòb 9:12) Un bon pregunta ku nos tin ku hasi nos mes ta: Nos personalmente lo keda fiel? I esei ta netamente e punto ku Hesus a presentá na final di e ilustrashon tokante e biuda i e hues.

“Realmente Lo E Haña e Fe Aki Riba Tera?”

15. (a) Ki pregunta Hesus a hasi, i pakiko? (b) Kiko nos tin ku puntra nos mes?

¹⁵ Hesus a presentá e siguiente pregunta interesante: “Ora e Yu di hende yega, realmente lo e haña e fe aki riba tera?” (Lukas 18:8, NW, nota na pia di página) E ekspreshon “e fe aki” ta indiká ku Hesus a referí, no na fe den un sentido general, sino na un klase di fe en partikular, fe manera di e biuda. Hesus no a kontestá su pregunta. El a hasi e pregunta pa su disipelnan por a pensa riba e kalidat di nán fe. Akaso nan fe tabata debilitando gradualmente, poniendo nan den peliger di bai bèk na e kosnan ku nan a laga atras? Òf nan tabatin e klase di fe manera esun ku e biuda a demostrá? Awe, nos tambe tin ku puntra nos mes: ‘Ki klase di fe “e Yu di hende” ta haña den mi kurason?’

16. Ki klase di fe e biuda tabatin?

¹⁶ Pa nos por ta entre e hendenan ku lo haña e hustisia di Yehova, nos tin ku imitá e biuda. Ki klase di fe e tabatin? El a demostrá su fe dor di akudí “tur ora bai . . . serka [e hues], bisando: ‘Hasi hustisia pa mi.’” E biuda ei a persistí pa haña hustisia for di un hòmber inhustu. Meskos tambe, sirbidónan di Dios djawe por tin e konfiansa ku nan lo haña e hustisia di Yehova, asta si esei ta tuma mas tempu ku nan a spera. Ademas, nan ta mustra nan konfiansa den e promesanan di Dios dor di persistí den orashon, sí, dor di ‘sklama na Yehova di dia i anochi.’ (Lukas 18:7) Bon mirá, si un kristian stòp di pidi den orashon pa hustisia wòrdu hasí, e ta mustra ku el a pèrdè konfiansa ku Yehova ta bai aktua na fabor di su sirbidónan.

17. Pa ki motibu nos tin ku perseverá den orashon i mantené nos fe ku Yehova su dia di huisio lo bini sigur?

¹⁷ E sirkunstansianan partikular di e biuda ei ta mustra nos ku nos tin motibunan adishonal pa perseverá den orashon. Konsiderá algun di e diferensianan entre su situashon i esun di nos. E biuda a sigui bai serka e hues ounke niun hende no a anim’é pa e hasi esei, pero e Palabra di Dios sí ta duna nos hopi animashon pa “perseverá den orashon.” (Romanonan 12:12, NW) E biuda no tabatin sigur ku e hues lo a kumpli ku su petishonnan, pero Yehova sí ta sigurá nos ku lo e hasi hustisia. Yehova a deklará pa medio di su profeta: “Maske e ta tarda, sper’é; pasobra e lo bin sigur, e lo no tarda.” (Habakuk 2:3; Salmo 97:10) E biuda no tabatin un ayudante ku por a boga p’e i asina duna mas  forsa na su petishon. Pero nos sí tin un ayudante poderoso, Hesus, “kende ta na man drechi di Dios, kende tambe ta intersedé pa nos.” (Romanonan 8:34; Hebreonan 7:25) P’esei, si e biuda, apesar di su situashon difísil, a sigui roga e hues ku e speransa ku lo e haña hustisia, kuantu mas nos mester mantené nos fe den Yehova su dia di huisio ku lo bini sigur!

18. Kon orashon lo fortalesé nos fe i yuda nos haña hustisia?

¹⁸ E ilustrashon di e biuda ta siña nos ku tin un relashon estrecho entre orashon i fe, i ku nos orashonnan persistente por kontrarestá e influensianan ku por debilitá nos fe. Klaru ku esaki no ta nifiká ku hasimentu di orashon djis pa bista di hende ta un protekshon kontra pèrdèmentu di fe. (Mateo 6:7, 8) Ora nos ta sinti nos konmoví pa hasi orashon pasobra nos ta realisá ku nos ta dependé kompletamente di Dios, e ora ei orashon ta hala nos serka Dios i ta fortalesé nos fe. I siendo ku nos mester tin fe pa wòrdu salbá, ta di komprondé ku Hesus a haña ta nesesario pa animá su disipelnan pa “hasi orashon tur ora bai i no desmayá”! (Lukas 18:1; 2 Tesalonisensenan 3:13) Ta bèrdat ku e binimentu di ‘e gran dia di Yehova’ no ta dependé di nos orashonnan; sea nos pidi p’e òf nò, lo e bini. Pero loke ta determiná si nos personalmente lo haña hustisia i sobrebibí e guera di Dios ta realmente e fe ku nos tin i e kaminda hustu ku nos ta kana huntu ku orashon.

19. Kon nos ta demostrá ku nos ta kere firmemente ku Dios ‘lo hasi hustisia’?

¹⁹ Manera nos ta kòrda, Hesus a puntra: “Ora e Yu di hende yega, realmente lo e haña e fe aki riba tera?” Kiko ta e kontesta riba e pregunta interesante aki? Nos ta hopi kontentu ku awe miónes di fiel sirbidó di Yehova rònt mundu ta demostrá mediante nan orashonnan, pasenshi i perseveransia ku nan tin e fe aki! Pues, Hesus su pregunta por ser kontestá den forma afirmativo. Sí, apesar di e inhustisianan ku e mundu di Satanas ta kousa nos aktualmente, nos ta kere firmemente ku Dios ‘lo hasi hustisia na su skohínan.’

[Nota]

Bo Ta Kòrda?

• Kiko a pone algun kristian pèrdè fe?

• Pakiko nos por tin un fe firme den Yehova su binidero dia di huisio?

• Pa ki motibu nos tin ku perseverá den orashon?

• Kon orashon persistente lo yuda nos evitá di pèrdè nos fe?

[Preguntanan di Estudio]

[Plachi na página 26]

Kiko e ilustrashon di e biuda i e hues ta resaltá?

[Plachi na página 29]

Awe, miónes di hende ta kere firmemente ku Dios lo “hasi hustisia”