Yehova Ta Duna “Spiritu Santu na Esnan Ku Pidié”

“Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!”—LUKAS 11:13.

1. Den ki momentonan spesialmente nos tin mester di yudansa di spiritu santu?

‘MI SO no por hiba e lucha aki. Ta ku yudansa di spiritu santu so lo mi por wanta e prueba aki!’ Abo a yega di ekspresá e sintimentunan profundo ei? Pa mayoria di kristian e kontesta ta sí. Tal bes abo a yega di ekspresá bo mes asina despues ku bo a haña sa ku bo tin un malesa grave. Òf kisas esei tabata na momento ku bo kasá a fayesé despues ku boso a kompartí bida pa hopi aña. Òf por tabata tempu ku bo a kai den un depreshon profundo, siendo ku anteriormente bo tabata un persona alegre. Den momentonan di doló, kisas bo a sinti ku bo a sobrebibí únikamente pasobra e spiritu santu di Yehova a duna bo “e poder mas ayá di loke ta normal.”—2 Korintionan 4:7-9, NW; Salmo 40:1, 2.

2. (a) Ki desafio kristiannan berdadero ta enfrentá? (b) Ki preguntanan nos lo konsiderá den e artíkulo aki?

² Kristiannan berdadero ta haña nan ku mas i mas preshon i oposishon di parti di e mundu malbado djawe. (1 Juan 5:19) Ademas, siguidónan di Kristu ta bou di atake di Satanas e Diabel mes, kende ta hibando un guera feros kontra esnan ku ta “warda e mandamentunan di Dios i [ta duna] testimonio di Hesukristu.” (Revelashon 12:12, 17) Pues, ta di komprondé ku awor mas ku nunka nos mester di e apoyo di Dios su spiritu. Kiko nos por hasi pa garantisá ku nos ta sigui risibí e spiritu santu di Dios na abundansia? I pakiko nos por ta sigur ku Yehova ta mas ku dispuesto pa duna nos e forsa nesesario den tempu di prueba? Nos ta haña kontesta riba e preguntanan aki den dos ilustrashon di Hesus.

Persistí den Orashon

3, 4. Ki ilustrashon Hesus a konta, i kon el a aplik’é na orashon?

³ Un di Hesus su disipelnan a yega di pidié: “Señor, siña nos hasi orashon.” (Lukas 11:1) Hesus a kontestá su disipelnan pa medio di dos ilustrashon ku tabatin algun punto en komun. E promé ta tokante un hòmber ku a haña bishita, i e di dos ta tokante un tata ku ta skucha su yu. Laga nos konsiderá e dos ilustrashonnan aki.

⁴ Hesus a bisa: “Suponé ku un di boso tin un amigu, i meianochi bo ta bai serka dje, i ta bis’é: ‘Amigu, fia mi tres pan, pasobra un amigu di mi a yega for di un biahe serka mi, i mi no tin nada pa pone su dilanti.’ I for di paden e lo kontestá i bisa: ‘No molestiá mi; ya porta ta será kaba i mi yunan i ami ta riba kama; mi no por lanta pa duna bo nada.’ Mi ta bisa boso, maske e no lanta dun’é nada pasobra e ta su amigu, tòg, pa motibu di su impertinensia [òf, “persistensia tribí,” NW] e lo lanta i dun’é tur loke e tin mester.” Anto Hesus a splika kon e ilustrashon aki ta apliká na orashon. E di: “Mi ta bisa boso, pidi, i lo wòrdu duná na boso; buska, i boso lo haña; bati, i lo wòrdu habrí pa boso. Pasobra ken ku pidi, ta risibí; i esun ku buska, ta haña; i pa esun ku bati, lo wòrdu habrí.”—Lukas 11:5-10.

5. Segun e ilustrashon tokante e hòmber persistente, ku ki aktitut nos tin ku hasi orashon?

 ⁵ E ilustrashon bibu aki tokante un hòmber persistente ta mustra ku ki aktitut nos mester hasi orashon. Ripará ku Hesus a bisa ku e hòmber ta logra haña loke e tin mester “pa motibu di su impertinensia.” (Lukas 11:8) E ekspreshon “impertinensia” ta aparesé un biaha so den Beibel, i ta ser tradusí for di un palabra griego ku ta nifiká literalmente “sinbèrgwenseria.” E palabra sinbèrgwensa tin hopi bes un konotashon negativo. Sin embargo, ora un persona ta sinbèrgwensa òf persistente pa un bon kousa, e por ta un kualidat positivo. Esei ta e kaso ku e anfitrion den e ilustrashon. E no a sinti niun tiki bèrgwensa pa pidi ku persistensia loke e tin mester. Siendo ku Hesus ta presentá e anfitrion aki komo un ehèmpel pa nos, nos orashonnan mester ta mesun persistente. Yehova ke pa nos sigui pidi, sigui buska i sigui bati. Komo kontesta, lo e duna “spiritu santu na esnan ku pidié.”

6. Den tempu di Hesus, kon hende a mira e kustumber di mustra hospitalidat?

⁶ Hesus a mustra nos no solamente kon nos mester hasi orashon—ku persistensia tribí—sino tambe pakiko nos mester hasi orashon. Pa komprondé e lès ei bon kla, pensa riba kon esnan ku a skucha Hesus su ilustrashon tokante e anfitrion persistente a mira e kustumber di brinda hospitalidat. Vários pasashi den e Skritura ta mustra ku den tempu di Beibel, hende, foral sirbidónan di Dios, tabata tuma e kustumber di perkurá pa bishitante mashá na serio. (Génesis 18:2-5; Hebreonan 13:2) Tabata un bèrgwensa pa no mustra hospitalidat. (Lukas 7:36-38, 44-46) Ku esei na mente, laga nos bolbe wak e relato di Hesus.

7. Pakiko e anfitrion den Hesus su ilustrashon no tin bèrgwensa di lanta su amigu for di soño?

⁷ E anfitrion den e ilustrashon ta haña un bishitante meianochi. E anfitrion ta sinti su mes obligá pa sirbi kuminda na su huéspet pero e “no tin nada pa pone su dilanti.” Den su bista, esaki ta un situashon di emergensia! E tin ku buska un par di pan, maske kuantu esei lo bai kost’é. Pues e ta bai serka un amigu i sin sinti bèrgwensa e ta lant’é for di soño. “Amigu, fia mi tres pan,” e anfitrion ta bisa. E ta persistí ku su petishon te ora e haña loke e tin mester. E ora ei numa, ku e pannan den su poder, e por ta un bon anfitrion.

Mas Grandi Nos Nesesidat Ta, Mas Nos Mester Pidi

8. Kiko lo motivá nos pa persistí den orashon pa nos haña spiritu santu?

⁸ Kiko e ilustrashon aki ta mustra tokante e motibu pakiko nos ta persistí den orashon? E hòmber a sigui pidi pan pasobra el a haña ku pa e por a kumpli ku su deber komo anfitrion tabata sumamente nesesario pa e tabatin e pannan ei den su poder. (Isaias 58:5-7) Sin pan, lo e no tabata un bon anfitrion. Di igual  manera, nos ta realisá ku pa nos kumpli ku nos ministerio komo kristiannan berdadero, ta sumamente nesesario pa nos tin e spiritu di Dios. P’esei nos ta sigui resa na Dios i pidié pa su spiritu. (Zakarias 4:6) Sin e spiritu ei nos lo frakasá. (Mateo 26:41) Bo ta mira ki konklushon importante nos por saka for di e ilustrashon aki? Si nos mira e spiritu di Dios komo algu ku nos tin mester urgentemente, ta mas probabel ku nos lo pidié ku persistensia.

9, 10. (a) Ilustrá pakiko nos mester pidi Dios ku persistensia pa haña su spiritu. (b) Ki pregunta nos tin ku hasi nos mes, i pakiko?

⁹ Pa apliká e lès aki den nos bida djawe, imaginá bo ku un di bo miembronan di famia bira malu meianochi. Lo bo lanta un dòkter for di soño pa pidié yudansa? No si e pashènt ta sinti su mes djis un poko malu. Ma si el a haña un atake di kurason, lo bo no tin bèrgwensa di yama un dòkter. Pakiko nò? Pasobra bo ta den un situashon di emergensia. Bo ta realisá ku yudansa profeshonal ta sumamente nesesario. Si bo no buska yudansa, e konsekuensianan por ta fatal. Di igual manera, kristiannan berdadero ta na moda di papia den un situashon kontinuo di emergensia. Al fin i al kabo, Satanas ta kana rònt manera “un leon ku ta gruña,” buskando un manera pa devorá nos. (1 Pedro 5:8) Pa nos keda na bida spiritualmente, e yudansa di e spiritu di Dios ta sumamente nesesario. Si nos no pidi e yudansa di Dios, e konsekuensianan por ta fatal. P’esei, ku persistensia nos ta pidi Dios pa haña su spiritu santu. (Efesionan 3:14-16) Ta ora nos ta hasi esei so nos lo mantené e fortalesa nesesario pa “perseverá te na fin.”—Mateo 10:22; 24:13.

¹⁰ P’esei ta masha importante pa de bes en kuando nos para ketu un ratu i puntra nos mes: ‘Frankamente, kon persistente mi orashonnan ta?’ Kòrda, ta ora nos realisá plenamente ku nos tin mester di e yudansa di Dios, nos orashonnan pa haña spiritu santu lo bira mas persistente.

Kiko Ta Motivá Nos pa Hasi Orashon ku Konfiansa?

11. Kon Hesus a apliká e ilustrashon di un tata ku su yu na orashon?

¹¹ Hesus su ilustrashon di e anfitrion persistente ta enfatisá e aktitut ku esun ku ta hasi orashon, esta, e kreyente, mester tin. E siguiente ilustrashon ta resaltá e aktitut ku esun ku ta tende orashon, esta, Yehova Dios, tin. Hesus a puntra: “Suponé ku un tata entre boso, si su yu pidié un piská, lo e dun’é un kolebra? Òf si e pidié un webu, lo e dun’é un skòrpion?” Anto, Hesus a hasi e aplikashon, bisando: “Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e spiritu santu na esnan ku pidié!”—Lukas 11:11-13.

12. Kon e ilustrashon di e tata ku ta tende e petishon di su yu ta demostrá klaramente ku Yehova ta dispuesto pa kontestá nos orashonnan?

¹² Ku e ehèmpel aki di un tata ku ta reakshoná riba e petishonnan di su yu, Hesus a revelá kiko Yehova ta pensa di esnan ku ta aserk’é den orashon. (Lukas 10:22) Na promé lugá, tuma nota di e kontraste. Distinto for di  e hòmber den e promé ilustrashon ku no tabatin gana di kumpli ku e petishon pa yudansa, Yehova ta manera un mayor humano amoroso ku ta ansioso pa kumpli ku un petishon di su yu. (Salmo 50:15) Hesus a revelá mas aleu kon dispuesto Yehova ta pa yuda nos ora e ta kompará un tata riba tera ku esun selestial. El a bisa ku si un tata humano—ounke e ta “malbado” pa motibu di piká heredá—ta duna su yu un bon regalo, ku kuantu mas rason nos por spera pa nos bondadoso Tata selestial duna spiritu santu na su famia di adoradónan!—Santiago 1:17.

13. Ki siguransa nos por tin ora nos ta aserká Yehova den orashon?

¹³ Ki lès nos por siña? Nos por tin e siguransa ku ora nos pidi nos Tata selestial pa spiritu santu, e ta mas ku dispuesto pa kumpli ku nos petishon. (1 Juan 5:14) Ora nos aserk’é bes tras bes den orashon, Yehova lo no bisa nos nunka, na moda di papia: “No molestiá mi; ya porta ta será kaba.” (Lukas 11:7) Al kontrario, Hesus a deklará: “Sigui pidi, i lo e ser duná na boso; sigui buska i boso lo haña; sigui bati, i lo ser habrí pa boso.” (Lukas 11:9, 10, NW) Sí, Yehova ta “skucha nos dia nos [yam’é].”—Salmo 20:9, BPK; 145:18.

14. (a) Ki pensamentu eróneo ta molestiá algun persona ku ta pasando den prueba? (b) Ora nos ta pasa den prueba, pakiko nos por aserká Yehova ku konfiansa den orashon?

¹⁴ Hesus su ilustrashon di e tata amoroso ta enfatisá tambe ku Yehova su bondat ta muchu mas grandi ku e bondat ku kualke mayor humano por demostrá. P’esei, ningun di nos no mester sinti nunka ku e pruebanan ku kisas nos ta pasando aden ta pasobra Dios ta disgustá ku nos. Ta Satanas, nos enemigu prinsipal, ke pa nos pensa asina. (Jòb 4:1, 7, 8; Juan 8:44) No tin base bíbliko pa nos kondená nos mes ku e pensamentunan ei. Yehova no ta tenta nos òf pone nos na prueba ku “maldat.” (Santiago 1:13) Meskos ku un tata amoroso lo no duna su yu nada ku lo por perhudik’é, asina tambe Yehova lo no someté nos na pruebanan perhudisial. Nos tata selestial ta duna “loke ta bon na esnan ku pidié.” (Mateo 7:11; Lukas 11:13) En bèrdat, mas nos komprondé e bondat di Yehova i su disponibilidat pa yuda nos, mas nos lo sinti nos konmoví pa aserk’é den orashon ku konfiansa. Segun ku nos ta hasi esei, nos tambe lo por ekspresá e sintimentunan manera esnan di e salmista ku a skirbi: “Di bèrdat, Dios a tende; el a paga atenshon na e bos di mi orashon.”—Salmo 10:17; 66:19.

Kon Spiritu Santu Ta Yuda Nos

15. (a) Kiko Hesus a primintí relashoná ku spiritu santu? (b) Menshoná un manera ku spiritu santu ta yuda nos.

¹⁵ Djis promé ku Hesus su morto, el a ripití e siguransa ku el a duna den su ilustrashonnan. Papiando di spiritu santu, el a bisa su apòstelnan: “Lo mi pidi e Tata, i e lo duna  boso un otro konsolador [“ayudante,” NW], pa e keda serka boso pa semper.” (Juan 14:16) Asina Hesus a primintí ku e ayudante, esta, spiritu santu, lo tabata despues ku su siguidónan, te den nos tempu. Den ki manera signifikativo nos ta eksperensiá e apoyo ei awe? Spiritu santu ta yuda nos wanta vários prueba. Kon asina? Apòstel Pablo, kende tambe a pasa den prueba, a deskribí den un karta pa e kristiannan na Korinto kon e spiritu di Dios a yud’é. Laga nos konsiderá brevemente kiko el a skirbi.

16. Kon nos situashon por ta meskos ku esun di Pablo?

¹⁶ Na promé lugá, Pablo a bisa su rumannan den fe frankamente ku e tabata luchando ku un “sumpiña den karni,” esta, un ke otro prueba. Anto el a agregá: “Mi a roga Señor [Yehova] tres biaha pa esaki por kita for di mi.” (2 Korintionan 12:7, 8) Maske Pablo a supliká Dios pa kita su difikultat, el a keda ku e problema. Podisé abo ta den un situashon similar awe. Meskos ku Pablo, kisas bo a hasi orashon ku persistensia i ku konfiansa, pidiendo Yehova pa kita un prueba. Sin embargo, apesar di bo frekuente petishonnan, e problema t’ei ketu bai. Akaso esei ta nifiká ku Yehova no a kontestá bo orashonnan i ku su spiritu no ta yudando bo? Di ningun manera! (Salmo 10:1, 17) Wak kiko apòstel Pablo a bisa siguientemente.

17. Kon Yehova a kontestá e orashonnan di Pablo?

¹⁷ Komo kontesta riba e orashonnan di Pablo, Dios a bis’é: “Mi grasia ta basta pa bo, pasobra mi poder ta wòrdu hasí perfekto den debilidat.” Pablo a bisa: “P’esei, gustosamente lo mi preferá di gaba den mi debilidatnan, pa e poder di Kristu por biba den mi [“keda riba mi manera un tènt,” NW].” (2 Korintionan 12:9; Salmo 147:5) Ku otro palabra, Pablo a mira kon mediante Kristu e protekshon poderoso di Dios a ser di span manera un tènt riba dje. Awe, Yehova ta kontestá nos orashonnan den un manera paresido. E ta span su protekshon manera un dak riba su sirbidónan.

18. Pakiko nos por wanta prueba?

¹⁸ Naturalmente, un tènt no ta stòp awa di kai òf bientu di supla, pero e ta duna sí algun protekshon kontra nan. Meskos tambe, e protekshon ku “e poder di Kristu” ta perkurá no ta stòp prueba òf difikultat di bini riba nos. Pero sí e ta duna nos protekshon spiritual kontra e elementonan dañino di e mundu aki i e atakenan di su gobernante, Satanas. (Revelashon 7:9, 15, 16) P’esei, asta si bo ta tratando ku un prueba ku no ta ‘kita for di bo,’ bo por tin sigur ku Yehova ta konsiente di bo lucha i ku e ta kontestá “e zonidu di bo yoramentu.” (Isaias 30:19; 2 Korintionan 1:3, 4) Pablo a skirbi: “Dios ta fiel, kende lo no permití pa boso wòrdu tentá mas ku boso por soportá, ma huntu ku e tentashon e lo proveé salida tambe, pa boso por soportá.”—1 Korintionan 10:13; Filipensenan 4:6, 7.

19. Kiko bo ta determiná pa hasi, i pakiko?

¹⁹ Ta bèrdat ku e “último dianan” di e mundu malbado aki ta karakterisá pa “tempunan trabahoso.” (2 Timoteo 3:1) Pero pa sirbidónan di Dios no ta imposibel pa trata ku nan. Pakiko nò? Pasobra nan tin e apoyo i protekshon di e spiritu santu di Dios, ku Yehova ta duna di buena gana i abundantemente na tur esnan ku pidié ku persistensia i konfiansa. P’esei, laga nos ta determiná pa sigui pidi tur dia pa spiritu santu.—Salmo 34:6; 1 Juan 5:14, 15.

Kon Lo Bo Kontestá?

• Kiko nos tin ku hasi pa risibí spiritu santu di Dios?

• Pakiko nos por tin e siguransa ku Yehova lo kontestá nos orashonnan pa haña spiritu santu?

• Kon spiritu santu ta yuda nos wanta prueba?

[Preguntanan di Estudio]

[Plachi na página 21]

Kiko nos por siña for di Hesus su ilustrashon tokante e anfitrion persistente?

[Plachi na página 22]

Abo ta pidi Yehova pa su spiritu santu ku persistensia?

[Plachi na página 23]

Kiko e ilustrashon di un tata amoroso ta siña nos tokante Yehova?