Bo Por Mustra Mas Amor?

E KADENA di anker di un barku mester por wanta e forsa inmenso ku ta hala na dje pa asina evitá ku e barku ta drif bai. Sin embargo, esaki ta posibel solamente si e wowonan di e kadena ta fuerte i bon será. Si no ta asina, e kadena ta kibra.

Nos por bisa meskos di e kongregashon kristian. Pa un kongregashon ta fuerte i salú, e miembronan individual mester ta uní ku otro. Kiko ta uni nan? Amor. Esei ta e forsa di mas fuerte pa union. P’esei no ta straño ku Hesukristu a bisa su disipelnan: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.” Sí, kristiannan berdadero tin e tipo di amor pa otro ku ta bai mas leu ku simpel amistat i rèspèt mutuo. Nan ta desaroyá amor apnegá, es desir, amor di sakrifisio propio.—Juan 13:34, 35.

Apresiá Nos Rumannan den Fe

Hopi kongregashon ta konsistí di hende di diferente edat, rasa, nashonalidat, kultura, idioma i antesedente sosial. Kada miembro tin su kosnan ku e ta gusta i no ta gusta, su speransa- i temornan, i kada un por lo general tin un peso personal ku e ta karga, podisé problema ku salú òf insiguridat finansiero. E variedat aki lo por ta un reto pa union kristian. Kiko anto por yuda nos mustra mas amor i keda uní apesar ku esei ta un reto? Berdadero apresio pa tur hende den kongregashon lo yuda nos profundisá nos amor pa otro.

Kon nos por apresiá otro hende? Si nos ta apresiá nos rumannan den fe, nos ta kla pa reakshoná riba nan nesesidatnan, nos tin gran rèspèt i atmirashon pa nan, nos ta rekonosé nan kualidatnan ekselente i nos ta gradisidu ku nan ta adorá e mesun Dios huntu ku nos. Komo resultado, nos ta siña stima nan masha hopi. Un konsiderashon kòrtiku di loke apòstel Pablo a skirbi den promé siglo na e kristiannan na Korinto lo yuda nos mira kon nos por demostrá amor kristian na e grado mas kompletu posibel.

Korintionan Tabata “Pèrtá i sin Espasio”

Pablo a skirbi su promé karta na e korintionan na aña 55 di nos era i su di dos karta ménos ku un aña despues. Su komentarionan ta indiká ku algun hende den e kongregashon di Korinto tabata falta apresio pa nan rumannan den fe. Pablo a deskribí e situashon den e siguiente palabranan: “Nos boka a habri pa boso, korintionan, nos kurason a hancha su mes. Boso no ta pèrtá i sin espasio den nos, pero sí boso ta pèrtá i sin espasio den boso propio tierno kariño.” (2 Korintionan 6:11, 12, NW) Kiko Pablo tabata ke men ora el a bisa nan ku nan ta “pèrtá i sin espasio”?

E tabata ke men ku nan no tabatin un kurason generoso, nan kurason tabata limitá. Segun un analista di Beibel, e amor ku e korintionan tabatin pa Pablo tabata “blòkiá pa motibu di situashonnan difísil ku a surgi debí na deskonfiansa sin base . . . i e sintimentu di a ser ofendí.”

 Tuma nota di e konseho ku Pablo a ofresé: “Awor di e mesun manera—mi ta papia manera ku mucha—habri boso kurason hanchu pa nos tambe.” (2 Korintionan 6:13) Pablo a animá e korintionan pa habri nan kurason hanchu i mustra mas amor na rumannan den fe. Esaki lo a nifiká ku nan mester a ser motivá pa un aktitut positivo i un kurason generoso, no pa deskonfiansa i ofensanan chikí.

Kon pa Mustra Mas Amor Awe

Ta alentador pa mira kon berdadero adoradónan di Dios awe ta hasi gran esfuerso pa mustra mas amor na otro. Ta bèrdat ku pa mustra mas amor nos tin ku hasi esfuerso. E no ta simplemente un asuntu di teoria, di sa kiko pa hasi. E ta eksigí di nos pa nos komportá nos mes otro for di hende ku no ta biba segun e normanan di Beibel. Personanan asina hopi biaha tin tiki apresio pa otro hende. Nan tin un aktitut di no tin kunes, sin e debido rèspèt i ta sarkástiko. P’esei nunka permití nos mes ser influensiá pa e aktitutnan ei. Lo ta masha tristu si nos amor, meskos ku den kaso di e korintionan, wòrdu strobá di krese debí na sintimentunan di deskonfiansa. Esaki lo por sosodé si nos ta kla pa mira e faltanan di un ruman kristian pero slow pa rekonosé su bon kualidatnan. Lo e por sosodé tambe si den nos kurason no tin espasio pa mustra kariño na un persona pasobra e ta di un otro kultura.

Na kontraste, un sirbidó di Dios ku ta mustra mas amor tin berdadero apresio pa su rumannan den fe. E tin gran rèspèt i atmirashon pa nan, ta respetá nan dignidat i ta kla pa reakshoná riba nan nesesidatnan. Asta ora tin motibu válido pa keha, e ta ansioso pa pordoná i ta nenga di karga renkor. Na lugá di esei e ta  konfia ku su rumannan den fe no ta hasi kos ku mal intenshon. Un kurason generoso ta yud’é mustra e tipo di amor ku Hesus tabatin na mente ora el a profetisá: “Na esaki tur hende lo sa ku boso ta mi disipel, si boso tin amor un pa otro.”—Juan 13:35.

Hasi Esfuerso i Sera Amistatnan Nobo

Amor sinsero lo yuda nos hasi esfuerso pa bai mas ayá di nos sírkulo di amigu i buska kompañerismo di e rumannan den kongregashon ku normalmente nos no tin kontakto estrecho kuné. Ken esakinan lo por ta? Algun di nos rumannan kristian ta tímido òf, pa un motibu òf otro, nan tin tiki amigu. Na promé instante nos lo por sinti ku fuera di ta uní den adorashon, nos no tin mashá en komun ku nan. Pero no ta asina ku den Beibel algun di e amistatnan di mas será tabata entre hende ku na promé bista a parse di tin masha tiki en komun?

Por ehèmpel, Ruth ku Noemí no tabata di mesun edat, nan tabata di diferente nashonalidat i kultura i asta nan lenga materno tabata distinto for di otro. Tòg nan amistat a surpasá e diferensianan ei. Jonatan a lanta komo prens, i David komo wardadó di karné. E diferensia di edat entre nan dos tabata basta grandi, sin embargo nan amistat ta un di esnan mas será menshoná den e Santu Skritura. Tur e dos amistatnan aki tabata un fuente di plaser i sosten spiritual pa esnan enbolbí.—Ruth 1:16; 4:15; 1 Samuel 18:3; 2 Samuel 1:26.

Asta awe amistatnan será ta desaroyá entre kristiannan berdadero ku no ta di e mesun generashon òf kende nan situashon den bida ta kompletamente distinto for di otro. Por ehèmpel, Regina ta un mama soltero ku dos yu tiner. * E ta un hende hopi okupá i tin tiki tempu pa sosialisá. Harald ku Ute ta un pareha kasá penshoná ku no tin yu. Superfisialmente, e dos famianan aki por parse di tin poko en komun. Pero Harald ku Ute a apliká e konseho bíbliko pa habri nan kurason i mustra mas amor. Nan a hasi esfuerso pa inkluí Regina ku su muchanan den hopi aktividat, i nan ta pasa tempu huntu ku nan den e ministerio públiko i den rekreo.

Nos tambe lo por bai mas ayá di nos sírkulo regular di amigu? Pakiko no buska kontakto mas estrecho ku rumannan den fe di otro nashonalidat, kultura òf edat, sea mas yòn òf mas bieu?

Sea Kla pa Reakshoná Riba e Nesesidatnan di Otro Hende

Un kurason generoso lo motivá nos pa presta atenshon na e nesesidatnan di otro hende. Ki sorto di nesesidat? Wèl, opservá e miembronan di e kongregashon kristian. Hóbennan tin mester di guia, rumannan di edat tin mester di animashon, rumannan den sirbishi di tempu kompletu tin mester di elogio i sosten, i rumannan deprimí tin mester di un hende pa skucha nan. Tur hende tin nesesidat. Nos lo ke yuda ku e nesesidatnan aki te kaminda rasonablemente nos por.

Hasi esfuerso pa mustra mas amor ta nifiká tambe ku nos lo mustra komprenshon na e rumannan ku tin nesesidatnan spesial. Bo konosé un ruman ku ta krónikamente malu òf ku ta konfrontá kualke otro prueba den bida? Si bo habri bo kurason hanchu pa mustra amor i kultivá un kurason generoso, esei lo yuda bo mustra komprenshon i duna sosten na personanan den nesesidat.

Ora ku profesianan bíbliko di futuro serkano kuminsá kumpli, lasonan fuerte di union den e kongregashon lo ta di hopi mas balor ku poseshon material, abilidat òf logronan. (1 Pedro 4:7, 8) Kada un di nos personalmente por yuda fortalesé e lasonan di union den nos propio kongregashon pa medio di hasi esfuerso pa mustra mas amor na nos rumannan den fe. Nos por tin sigur ku Yehova lo bendishoná nos rikamente pasobra nos ta aktua na armonia ku e palabranan di su Yu, Hesukristu, kende a bisa: “Esaki ta mi mandamentu, ku boso stima otro meskos ku ami a stima boso.”—Juan 15:12.

[Nota]

[Komentario na página 10]

Apresio pa nos rumannan ta nifiká ku nos tin gran rèspèt i atmirashon pa nan, ta respetá nan dignidat i ta kla pa reakshoná riba nan nesesidatnan