Bo Por Wanta e Tempestat

DEN e tempunan trabahoso aki, tin hopi hende ta wanta kontratempunan turbulento ku ta manera tempestat. Sin embargo pa kristiannan, amor pa Dios i lealtat na su prinsipionan ta yuda nan trata ku e situashon. Kon asina? Nos por haña e kontesta den un ilustrashon ku Hesukristu a konta. El a kompará su disipelnan obediente ku “un hòmber sabí ku a traha su kas riba baranka.” Hesus a bisa: “Áwaseru a kai, diluvionan a bin, i bientunan a supla, i a suta duru kontra e kas ei; i tòg e no a kai, pasobra e tabata fundá riba baranka.”—Mateo 7:24, 25.

Tuma nota ku maske e hòmber den e ilustrashon ta sabí, tòg e ta hañ’é ku kontratempu, representá pa e áwaseru, diluvio i bientunan destruktivo. Pues anto, Hesus no a indiká ku su disipelnan lo ta liber di tur difikultat i gosa semper di un bida di pas i trankilidat. (Salmo 34:19; Santiago 4:13-15) Pero el a bisa sí ku fiel sirbidónan di Dios por prepará pa e kontratempu- i krísisnan turbulento ei i enfrentá nan ku éksito.

Hesus a kuminsá e ilustrashon ku e palabranan: “Ken ku tende e palabranan aki di mi, i hasi nan, lo wòrdu kompará ku un hòmber sabí ku a traha su kas riba baranka.” Klaru ku Hesus no tabata papia di trahamentu di kas literal, sino tokante edifiká bida kristian, esta, desaroyá motivashon i echonan kristian. Hende ku ta hasi kaso di e palabranan di Kristu ta usa disernimentu i ta demostrá sano huisio. Nan ta edifiká nan motivashon- i echonan riba e baranka sólido di e siñansanan di Kristu dor di pone na práktika loke nan a ser siñá. Un punto interesante ta ku nos no ta haña e baranka figurativo aki na superfisie. E hòmber den e ilustrashon mester a “koba hundu” pa yeg’é. (Lukas 6:48) Asina tambe disipelnan di Hesus ta sigui traha duru pa kultivá kualidatnan duradero ku ta hala nan mas serka di Dios.—Mateo 5:5-7; 6:33.

Kiko ta pasa ora ku difikultatnan turbulento ta tèst e firmesa di e fundeshi kristian di e siguidónan di Hesus? Nan fuentenan di fortalesa durante tal difikultatnan ta e echo ku nan ta obedesé e siñansanan di Kristu di buena gana i ku nan tin kualidatnan kristian. Mas importante ainda, esei lo fortalesé nan durante e binidero tempestat di Armagedón. (Mateo 5:10-12; Revelashon 16:15, 16) Sí, hopi hende ta wanta difikultatnan turbulento ku éksito komo ku nan ta sigui e siñansanan di Kristu. Abo tambe por hasi meskos.—1 Pedro 2:21-23.