Historia di Bida

Desishonnan Bon A Hiba na Bendishon pa Bida Largu

Segun e relato di Paul Kushnir

NA AÑA 1897 mi tawela ku mi wela a emigrá for di Ukrania pa Canada i a establesé nan mes na Yorkton, Saskatchewan. Nan a yega einan ku kuater yu, tres hòmber i un muhé. Na 1923 nan yu muhé, Marinka, a haña ami; mi tabata su di shete yu. E tempu ei bida tabata simpel pero trankil. Nos tabatin bon kuminda i paña pa friu, i gobièrnu tabata perkurá e servisionan básiko. Bisiñanan amabel tabata kla pa yuda otro ku trabounan grandi. Durante e wenter di 1925, un di e Studiantenan di Beibel, manera Testigunan di Yehova tabata konosí e tempu ei, a bishitá nos. E bishita ei a motivá nos pa tuma desishonnan pa kua te awe mi ta gradisidu.

Bèrdat Bíbliko Ta Drenta Nos Hogar

Mi mama a aseptá algun foyeto chikí for di e Studiante di Beibel i poko despues el a rekonosé ku esaki ta e bèrdat. El a hasi progreso spiritual masha lihé i a batisá na 1926. Ora mi mama a bira un Studiante di Beibel, nos famia a haña kompletamente un otro punto di bista di bida. Nos kas a bira un lugá di mustra hospitalidat. Superintendentenan biahero, yamá peregrino, i otro Studiantenan di Beibel, tabata keda hopi biaha serka nos. Na 1928 un superintendente biahero a mustra nos e “Drama Eureka,” un vershon simplifiká di e “Foto-Drama di Kreashon.” Serka nos ku tabata mucha el a fia un sapu di ko’i hunga ku tabata saka un zonidu di klek. Ora e sapu a klek, tabata momento pa kambia e ‘slide.’ Nos a sinti nos orguyoso ku e por a usa nos sapu di ko’i hunga den e drama ei.

Un superintendente biahero ku yama Emil Zarysky a bishitá nos hopi bes ku su kas riba wil. Tabatin biaha ku su yu hòmber adulto a kompañ’é, i e yu tabata animá nos komo mucha pa pensa pa bira pionero, esta, predikadó di tempu kompletu. Hopi pionero tambe a keda na nos kas. Un biaha, Mama a fia un pionero un kamisa pa e bisti tanten ku Mama a drecha  su kamisa. E ruman, kabes yen, a bai ku e kamisa. Hopi tempu despues el a mand’é bèk i a pidi masha despensa pasobra el a tarda pa mand’é. El a skirbi: “Mi no tabatin moda di paga e dies sèn di stampia.” Pa nos, mihó el a keda ku e kamisa! Mi a spera ku un dia lo mi por a imitá e pioneronan ei ku a demostrá asina un aktitut di sakrifisio propio. Mi ta masha gradisidu na mi mama pa su spiritu hospitalario ku a enrikesé nos bida i a oumentá nos amor pa e hermandat.—1 Pedro 4:8, 9.

Mi tata no a bira un Studiante di Beibel, pero tampoko el a oponé nos. Na 1930 el a asta permití e rumannan usa su ket grandi pa un asamblea di ún dia. Ounke mi tabatin apénas shete aña, e goso i dignidat di e okashon ei a impreshoná mi. Mi tata a muri na 1933. Mi mama, ku a bira e ora ei un biuda ku ocho yu, no a desviá niun tiki for di su determinashon pa tene nos riba e kaminda di adorashon berdadero. E tabata sòru pa mi asistí na reunion huntu kuné. E tempu ei e reunionnan tabata parse masha largu mes, i ami tabata yen di gana di por a bai serka e otro muchanan, ku sí tabatin mag di hunga pafó. Sin embargo, pa rèspèt pa Mama mi a keda paden. Ora Mama tabata kushiná, hopi biaha el a sita un teksto bíbliko anto a puntra mi unda e teksto ei ta den Beibel. Na 1933 nos a haña un bon kosecha, anto Mama a usa e entrada èkstra pa kumpra un outo. Tabatin bisiña ku a kritik’é pasobra nan a haña ku e ta malgastá plaka, pero el a spera ku e outo lo a yuda nos den nos aktividatnan teokrátiko. Anto asina a resultá.

Otro Rumannan A Yuda Mi Tuma Desishonnan Korekto

Ta yega un momento den bida ku un hóben tin ku skohe un rumbo, tuma desishonnan, ku lo tin efekto riba su futuro. Ora ku e momento ei a yega pa Helen ku Kay, mi ruman muhénan mas grandi, nan a kuminsá traha pionero. Un pionero ku a disfrutá di hospitalidat na nos kas tabata John Jazewsky, un bon yònkuman. Mama a pidi John pa keda un tempu pa yuda ku e boerderij. Despues, John a kasa ku Kay, i nan a bai traha pionero no muchu leu for di nos kas. Ora mi tabatin 12 aña, nan a invitá mi bin kompañá nan den sirbishi di vèlt durante fakansi di skol. Esei a duna mi e chèns di purba e bida di pionero.

Ku tempu, ami ku mi ruman hòmber John por a tuma gran parti di e maneho di e boerderij. Esei a duna Mama chèns pa usa e lunanan di zomer pa sirbi komo pionero ousiliar, manera nos ta yam’é awe. E tabata usa un kitoki halá pa un kabai bieu. Tata a yama e kabai terko Saul, pero pa Mama e tabata un bestia mansu ku e por a manehá. Ami ku John tabata gusta e boerderij masha hopi, pero kada biaha ku Mama bin kas for di sirbishi di vèlt i a konta su eksperensianan, nos amor pa e sirbishi di pionero a kuminsá bira mas tantu i nos amor p’e boerderij a kuminsá mengua. Na 1938 mi a oumentá mi aktividat den sirbishi di vèlt, i dia 9 di febrüari 1940 mi a batisá.

Poko tempu despues mi a keda nombrá komo sirbidó den e kongregashon. Mi tabata mantené e registronan di kongregashon i a alegrá ki ora ku tabatin un oumento. Mi tabatin un teritorio personal pa prediká den un pueblo ku a keda un 16 kilometer for di kas. Den wenter, mi tabata kana bai einan tur siman i a keda drumi un òf dos anochi den e zòlder di un famia ku a mustra interes den Beibel. Despues di un kòmbersashon ku e pastor luterano—durante kua mi no a demostrá masha takto—el a menasá di manda polis pa mi si mi no laga su tou na pas. Esei a hasi mi asta mas determiná pa sigui padilanti.

Na 1942 mi ruman muhé Kay ku su kasá, John, a traha plan pa asistí na un kongreso na Cleveland, Ohio, na Merka. Mi a keda masha  kontentu ku nan a invitá mi pa bai ku nan. E kongreso ei tabata un di e mihó kosnan ku a pasa ku mi. El a yuda mi plannan pa futuro bira mas konkreto. Ora Ruman Nathan Knorr, kende e tempu ei tabata hiba delantera den e trabou mundial, a hasi un yamada motivador pa haña 10.000 pionero, mi a disidí mesora pa ta un di nan!

Na yanüari 1943, Henry, un predikadó biahero, a bishita nos kongregashon. El a duna un diskurso stimulante ku a yena nos ku entusiasmo. E dia despues di su diskurso e temperatura tabata 40 grado Celsius bou di sero, i un bientu fuerte for di nortwèst tabata laga bo sinti asta mas friu ainda. Normalmente nos lo a keda paden durante un ola di friu asina, pero Henry tabata ansioso pa sali den sirbishi. E ku e otro rumannan a bai un pueblito ku a keda un 11 kilometer leu, den un ‘slee’ tapá, halá pa kabai i ekipá ku un tipo di konfó di karbon. Mi so a bai bishitá un famia ku tabatin sinku yu hòmber. Nan a aseptá mi oferta pa studia Beibel ku nan, i ku tempu nan a aseptá e bèrdat.

Predikando bou di Prohibishon

Durante Segundo Guera Mundial, outoridatnan a prohibí e obra di Reino na Canada. Nos mester a skonde nos literatura bíbliko, i nos boerderij tabatin kantidat di lugá di skonde kos. Polis tabata pasa ku frekuensia serka nos pero nunka nan no a haña nada. Ora di bai prediká, nos tabata usa Beibel so. Nos tabata reuní den grupo chikí, i e rumannan a skohe ami ku mi ruman John pa fungi komo mensahero sekreto.

Durante e guera, nos kongregashon a partisipá den un distribushon nashonal di e foyeto chikí Fin di Nazismo. Nos a sali meianochi pa bai parti nan. Mi tabata hopi nervioso ora nos tabata aserká kada kas kuchikuchi i laga un foyeto dilanti di porta. Esei tabata e kos di mas spantoso ku mi a yega di hasi. Ki un alivio ora nos a laga e último ehemplar di e foyeto ei! E ora ei nos a pura bai bèk na outo, hasi sigur ku tur hende tabat’ei i a disparsé den e skuridat di anochi.

Sirbishi di Pionero, Prizon i Asamblea

Dia 1 di mei 1943, mi a yama mi mama ayó. Ku 20 dòler den mi pòtmòni i un maleta chikí, mi a sali rumbo pa mi promé asignashon di pionero. Ruman Tom Troop ku su famia amoroso na Quill Lake, Saskatchewan, a duna mi posada hospitalariamente. E siguiente aña, mi a bai un teritorio aislá na Weyburn, Saskatchewan. Predikando riba kaya dia 24 di desèmber 1944, polis a arestá mi. Despues di a pasa algun dia den e prizon lokal, nan a hiba mi na un kampamentu na Jasper, Alberta. Ami huntu ku otro Testigunan tabata einan rondoná pa e grandesa di Yehova su kreashon, esta, e Rocky Mountains kanades. Na kuminsamentu di aña 1945, ofisialnan di e kampamentu a permití nos asistí na un reunion na Edmonton, Alberta. Ruman Knorr a duna un informe eksitante tokante e progreso di e obra mundial. Nos tabata anhelá e dia ku nos lo a sali for di prizon pa nos por a partisipá plenamente atrobe den e ministerio.

Ora mi a sali liber, mi a reanudá e sirbishi di pionero. Poko despues, a keda anunsiá ku lo tene e Asamblea “Ekspanshon di Tur Nashon” na Los Angeles, California. Un ruman hòmber den mi asignashon nobo di pionero a pone banki den su trùk di manera ku 20 pasahero por a sinta. Dia 1 di ougùstùs 1947, nos a kuminsá ku un biahe memorabel di 7.200 kilometer ku a hiba nos atraves di sabana, desierto i paisahenan mahestuoso, inkluso e parkenan nashonal Yellowstone i Yosemite. Henter e biahe a dura 27 dia, ki un eksperensia maravioso!

E kongreso mes tabata un bendishon inolvidabel. Pa benefisiá plenamente di e okashon mi a sirbi den dia komo ùsher i anochi komo vigilante. Mi a yena un solisitut pa sirbishi di misionero despues di a asistí na un reunion pa esnan interesá den esei, pero mi no a karga masha speransa di haña un invitashon. Miéntras tantu, na 1948, mi a reakshoná riba e yamada pa pioneronan bai sirbi na e provinsia kanades di Quebec.—Isaias 6:8.

 Galaad i Despues

Na 1949 mi a keda hopi kontentu di haña un invitashon pa asistí na e di 14 klas di e Skol Bíbliko di Galaad di Watchtower. E entrenamentu ei a fortalesé mi fe i a hala mi mas serka di Yehova. John ku Kay a gradua mas promé for di e di 11 klas i tabata sirbi komo misionero na Nort Rodesia (awor Zambia). Mi ruman hòmber John a gradua di Galaad na 1956. Huntu ku su kasá Frieda, el a sirbi na Brazil pa 32 aña te na su morto.

Dia di mi graduashon na febrüari 1950, mi a haña hopi animashon for di dos telegram, un di mi mama i e otro di famia Troop di Quill Lake. E telegram di famia Troop, ku e enkabesamentu “Konseho na un Graduado,” a bisa: “Esaki ta un dia grandi pa bo. Un dia ku semper lo bo atesorá; i ohalá ku éksito i felisidat tambe lo bo realisá.”

Mi a haña e asignashon pa sirbi den e stat di Quebec, pero pa un tempu mi a keda na e Hasienda di Reino na Estado di New York, kaminda Skol di Galaad tabata situá. Un dia, Ruman Knorr a puntra mi si lo mi ta dispuesto pa bai Bèlgika. Sin embargo, un par di dia despues, el a puntra mi si lo mi ta di akuerdo pa haña un asignashon na Hulanda. Mi a haña e karta di asignashon, i den dje tabatin pará ku mi mester a “asumí e trabou di sirbidó di sukursal.” Esei tabata abrumador.

Dia 24 di ougùstùs 1950, mi a sali riba barku pa un biahe di 11 dia rumbo pa Hulanda. Mi tabatin sufisiente tempu pa lesa henter e Tradukshon di Mundu Nobo di e Skritura Griego Kristian ku a kaba di sali nobo. Mi a yega Rotterdam dia 5 di sèptèmber 1950, i a haña un kaluroso bonbiní di e famia di Bètel. Apesar di e destrukshon ku Segundo Guera Mundial a kousa, e rumannan a hasi bon trabou pa reanudá e aktividatnan kristian. Segun ku mi tabata skucha nan konta kon nan a mantené integridat bou di persekushon severo, mi tabata pensa ku lo por ta duru pa e rumannan ei ku awor nan lo tin ku bai sirbi bou di e guia di un sirbidó di sukursal hóben i sin eksperensia. Sin embargo, poko despues a bira bisto ku mi no tabatin nodi preokupá.

Klaru ku algun asuntu tabatin mester di atenshon. Mi a yega nèt promé ku un kongreso i a keda impreshoná ora mi a mira ku míles di delegado tabata hospedá na e sitio di kongreso. Pa e siguiente kongreso, mi a sugerí pa nos buska akomodashon den kasnan privá. E rumannan a haña esei un bon idea, pero no pa nan pais. Despues di a rasoná riba e asuntu, nos a yega na un kompromiso: mitar di e delegadonan lo a hospedá na e sitio di kongreso i e otro mitar den kasnan di hende ku no ta Testigu den e stat di kongreso. Komo ku mi a keda basta kontentu ku e resultado, mi a menshoná esei na Ruman Knorr ora ku el a asistí na e kongreso. Sin embargo, kualke sintimentu di logro ku mi tabatin a disparsé umbes ora ku mi a lesa despues un informe tokante nos kongreso den E Toren  di Vigilansia. E informe a bisa: “Nos tin sigur ku e siguiente biaha e rumannan lo demostrá fe i hasi esfuerso pa hospedá e delegadonan di kongreso den e manera ku ta mas efektivo pa duna testimonio, esta, den kas di hende.” Esei ta presis loke nos a hasi e “siguiente biaha”!

Na yüli 1961, dos representante di nos sukursal a haña invitashon pa asistí na un reunion na Lònden ku representantenan di otro sukursal. Ruman Knorr a anunsiá ku lo bai hasi e Tradukshon di Mundu Nobo di e Santu Skritura disponibel na mas idioma, inkluso na hulandes. Esta un notisia eksitante! Afortunadamente, nos no por a imaginá e magnitut di e proyekto. Dos aña despues, na 1963, mi tabatin e plaser di partisipá den un programa na un kongreso na New York kaminda a anunsiá publikashon di e Tradukshon di Mundu Nobo di e Skritura Griego Kristian na hulandes.

Desishonnan i Asignashon Nobo

Na ougùstùs 1961, mi a kasa ku Leida Wamelink. Henter su famia a aseptá e bèrdat na 1942 durante e tempu di persekushon nazi. Leida a kuminsá traha pionero na 1950 i a bin Bètel na 1953. E manera ku e tabata traha na Bètel i den kongregashon a laga mi mira ku lo e ta un kompañero leal den mi ministerio.

Un poko mas ku un aña despues ku nos a kasa, mi a haña invitashon pa bai Brooklyn pa un kurso di entrenamentu adishonal di dies luna. No tabatin areglo pa esposa kompañá nan esposo. Ounke Leida su salú no tabata bon, amorosamente el a bai di akuerdo pa mi aseptá e invitashon. Mas despues, Leida su problemanan di salú a empeorá. Nos a purba sigui ku nos trabou na Bètel, pero ku tempu nos a disidí ku lo ta mas práktiko pa sigui ku nos sirbishi di tempu kompletu den vèlt. Pues nos a kuminsá sirbi den e sirbishi biahero. Poko despues mi kasá mester a hasi un operashon grandi. Ku e sosten amoroso di e rumannan, nos a logra trata ku e situashon, i un aña despues nos por a asta aseptá e asignashon pa sirbi den e trabou di distrito.

Nos a disfrutá di shete aña di sirbishi stimulante den e trabou biahero. Anto nos mester a bolbe tuma un desishon pisá ora ku mi a haña e invitashon pa ta instruktor di e Skol di Ministerio di Reino na Bètel. Nos a bai di akuerdo pa hasié, ounke esei tabata un kambio difísil, pasobra nos tabata stima e sirbishi biahero. E 47 klasnan di e skol—kada un a dura dos siman—a duna mi un ekselente oportunidat pa kompartí bendishonnan spiritual ku e ansianonan di kongregashon.

Durante e tempu ei mi tabata hasiendo preparashon pa bishitá mi mama na 1978. Pero diripiente, dia 29 di aprel 1977, mi a haña un telegram ku a informá mi ku mi mama a fayesé. Mi a keda hopi tristu ora mi a realisá ku lo mi no por a tende su dushi stèm mas ni bis’é un biaha mas kon gradisidu mi ta pa tur loke el a hasi pa mi.

Na konklushon di e kurso di Skol di Ministerio di Reino, e rumannan a pidi nos pa bira miembro di e famia di Bètel. Durante e añanan ku a sigui, mi a sirbi pa dies aña komo kordinadó di e Komité di Sukursal. Ku tempu, Kuerpo Gobernante a nombra un kordinadó nobo, kende tabata mihó kapasitá pa manehá e responsabilidat. Mi ta masha gradisidu pa esei.

Sirbiendo Segun Edat Ta Permití

Ami ku Leida tur dos tin 83 aña awor. Mi a disfrutá di mas ku 60 aña den sirbishi di tempu kompletu, e último 45 añanan huntu ku mi fiel esposa. Semper el a konsiderá e sosten ku e tabata duna mi den tur nos asignashonnan komo parti di su sirbishi dediká na Yehova. Aktualmente, nos ta hasi loke nos por na Bètel i den kongregashon.—Isaias 46:4.

De bes en kuando, nos ta gusta sinta rekordá algun di e okashonnan sobresaliente den nos bida. No ta duel nos niun tiki tur loke nos a hasi den e sirbishi di Yehova, i nos ta konvensí ku e desishonnan ku nos a tuma for di trempan den bida tabata esnan di mas mihó. Nos ta determiná pa sigui sirbi i onra Yehova ku tur nos forsa.

[Plachi na página 13]

Ami ku mi ruman hòmber mas grandi, Bill, i Saul, nos kabai

[Plachi na página 15]

Dia nos a kasa, ougùstùs 1961

[Plachi na página 15]

Ami ku Leida awe