“E Promé Resurekshon” Ta Tumando Lugá Aktualmente!

“E mortonan den Kristu lo lanta promé.”—1 TESALONISENSENAN 4:16.

1, 2. (a) Ki speransa tin pa hende ku a muri? (b) A base di kiko bo ta kere den e resurekshon? (Mira nota na pia di página.)

“E BIBUNAN sa ku nan lo muri.” Esei tabata e kaso for di dia ku Adam a peka. Atraves di historia, tur hende ku a nase tabata sa ku un dia nan lo a muri, i hopi di nan a puntra nan mes: ‘Kiko ta bini despues? Den ki kondishon e mortonan ta?’ Beibel ta kontestá: “E mortonan no sa nada.”—Eklesiastés 9:5.

² Tin un speransa anto pa hende ku a muri? Sí. De echo, pa Dios su propósito original pa humanidat kumpli lo mester tin un speransa pa e mortonan. Den transkurso di siglonan, sirbidónan leal di Dios a ehersé fe den e promesa di Yehova tokante un Simia ku lo destruí Satanas i deshasí di tur e daño ku el a kousa. (Génesis 3:15) Mayoria di e personanan aki a muri. Pa nan por mira tantu e promesa ei komo otronan ku Yehova a hasi  kumpli, nan mester ser lantá for di morto. (Hebreonan 11:13) Esei ta posibel? Sí, definitivamente. Apòstel Pablo a bisa: “Lo tin un resurekshon di tantu e hustunan komo e malbadonan.” (Echonan 24:15) Un biaha Pablo a resusitá un hóben ku tabata yama Eutiko, kende a kai for di un bentana na di tres piso i a ser ‘lantá morto for djabou.’ Esaki ta e último di nuebe kaso di resurekshon registrá den Beibel.—Echonan 20:7-12. *

3. Ki konsuelo abo personalmente a haña for di Hesus su palabranan registrá na Juan 5:28 i 29, i dikon?

³ E nuebe resurekshonnan ei ta pone base pa fe den e deklarashon di Pablo. Nan ta fortalesé nos konfiansa den Hesus su siguransa: “E ora lo yega den kua tur ku ta den graf lo tende [Hesus] su bos, i lo sali.” (Juan 5:28, 29) Esta alentador e palabranan ei ta! Nan ta un gran konsuelo pa e miónes di hendenan ku a pèrdè nan sernan kerí den morto.

4, 5. Ki resurekshon Beibel ta menshoná, i kua di nan e artíkulo aki lo trata?

⁴ Mayoria di hende ku lo haña resurekshon lo bin bèk riba un tera pasífiko bou di e Reino di Dios. (Salmo 37:10, 11, 29; Isaias 11:6-9; 35:5, 6; 65:21-23) Sin embargo, promé ku yega asina leu, otro resurekshonnan lo mester a tuma lugá. Na promé lugá, Hesukristu mester a ser resusitá pa presentá e balor di su sakrifisio na Dios na fabor di nos. Hesus a muri i a ser resusitá na aña 33 di nos era.

⁵ Siguientemente, miembronan ungí di “e Israel di Dios” mester djòin Señor Hesukristu den gloria selestial, kaminda nan lo ta pa “semper ku Señor.” (Galationan 6:16; 1 Tesalonisensenan 4:17) E suseso ei ta ser yamá “e resurekshon mas trempan” òf “e promé resurekshon.” (Filipensenan 3:10, 11, NW; Revelashon 20:6) Ora e resurekshon ei ser kompletá, lo ta tempu pa miónes di hende resusitá bèk na tera ku e speransa di haña bida eterno den  Paradeis. P’esei, sea nos speransa ta selestial òf terenal, nos ta mashá interesá den “e promé resurekshon.” Ki sorto di resurekshon esei ta? Na ki tempu e ta tuma lugá?

“Ku Ki Sorto di Kurpa”?

6, 7. (a) Promé ku kristiannan ungí por bai shelu, kiko mester tuma lugá? (b) Ku ki klase di kurpa nan lo resusitá?

⁶ Den Pablo su promé karta na e korintionan, e ta hasi un pregunta tokante e promé resurekshon: “Kon e mortonan ta wòrdu lantá? I ku ki sorto di kurpa nan ta bin?” Anto e ta kontestá e pregunta: “Loke bo sembra no ta haña bida si e no muri . . . Ma Dios ta dun’é un kurpa manera el a deseá . . . E gloria di esnan selestial ta ún, i e gloria di esnan terenal ta otro.”—1 Korintionan 15:35-40.

⁷ E palabranan di Pablo ta mustra ku kristiannan ungí ku spiritu santu mester muri promé ku nan risibí nan rekompensa selestial. Ora nan muri, nan kurpa terenal ta bolbe na stòf. (Génesis 3:19) Na Dios su tempu señalá, nan ta ser resusitá ku un klase di kurpa ku ta apropiá pa bida den shelu. (1 Juan 3:2) Dios ta duna nan inmortalidat tambe. Esei no ta algu ku nan ta nase kuné, komo si fuera Dios a supla e rosea di un asina yamá alma inmortal den nan. Pablo a bisa: “Loke ta mortal aki mester wòrdu bistí ku loke ta inmortal.” Inmortalidat ta un don di Dios ku esnan ku ta partisipá den e promé resurekshon ta ‘bisti.’—1 Korintionan 15:50, 53; Génesis 2:7; 2 Korintionan 5:1, 2, 8.

8. Kon nos por sa ku Dios no ta selektá e 144.000 personanan for di miembro di diferente religion?

⁸ Solamente 144.000 persona ta haña e promé resurekshon. Yehova a kuminsá skohe nan riba dia di Pentekòste di aña 33 di nos era, djis despues ku el a resusitá Hesus. Nan tur tin “[Hesus] su nòmber i e nòmber di su Tata skirbí na nan frenta.” (Revelashon 14:1, 3) P’esei, nan no ta ser selektá for di diferente religion. Tur ta kristian, i tur ta karga e nòmber di e Tata, Yehova, ku onor. Ora nan resusitá, nan ta risibí un asignashon di trabou den shelu. E perspektiva di por sirbi Dios den un forma direkto asina ta simplemente algu emoshonante pa nan.

E Ta Tumando Lugá Aktualmente?

9. Kon Revelashon 12:7 i 17:14 ta yuda nos kalkulá e tempu ku e promé resurekshon ta kuminsá?

⁹ Na ki tempu e promé resurekshon ta tuma lugá? Tin evidensia fuerte ku esei ta tumando lugá aktualmente. Por ehèmpel, kompará dos kapítulo di Revelashon. Wak promé Revelashon kapítulo 12. Ei nos ta lesa ku Hesukristu resien entronisá, huntu ku su angelnan santu, ta hiba un guera kontra Satanas i su demoñonan. (Revelashon 12:7-9) Manera e revista aki a mustra hopi bes, e bataya ei a kuminsá na 1914. * Pero ripará ku e kapítulo aki no ta bisa ku Kristu su siguidónan ungí ta huntu kuné den e guera selestial ei. Awor wak Revelashon kapítulo 17. Ei nos ta lesa ku despues di e destrukshon di ‘Babilonia e Grandi,’ e Lamchi lo vense e nashonnan. Anto e ta agregá: “I esnan ku ta huntu kuné ta e yamánan i skohínan i fielnan.” (Revelashon 17:5, 14) Pa e “yamánan i skohínan i fielnan” por ta huntu ku Hesus pa e derota final di e mundu di Satanas, nan lo mester a resusitá kaba. Ta rasonabel anto pa asumí ku e ungínan ku muri promé ku Armagedón ta ser resusitá entre 1914 i Armagedón.

10, 11. (a) Ken ta e 24 ansianonan, i kiko un di nan ta revelá na Juan? (b) Kiko nos por dedusí for di esaki?

¹⁰ Nos por bisa mas presis na ki tempu e promé resurekshon ta kuminsá? Nos ta haña un klave interesante na Revelashon 7:9-15, kaminda apòstel Juan ta deskribí su vishon di “un multitut grandi ku ningun hende no por a konta.” Esun ku ta revelá e identidat di e multitut grandi ei na Juan ta un di e 24 ansianonan, i e ansianonan aki ta representá e  144.000 ko-herederonan ku Kristu den nan gloria selestial. * (Lukas 22:28-30; Revelashon 4:4) Juan mes tabatin un speransa selestial; pero siendo ku ainda e tabata komo hende riba tera ora e ansiano a papia kuné, den e vishon Juan mester ta representá e ungínan riba tera ku ainda no a risibí nan rekompensa selestial.

¹¹ P’esei, kiko nos por dedusí for di e echo ku un di e 24 ansianonan ta identifiká e multitut grandi na Juan? Aparentemente personanan resusitá ku ta forma parti di e grupo di 24 ansiano lo por ta enbolbí awe den komuniká bèrdatnan divino. Dikon esei ta importante? Pasobra e identidat korekto di e multitut grandi a ser revelá na e sirbidónan ungí di Dios riba tera na 1935. Si un di e 24 ansianonan a ser usá pa transmití e bèrdat importante ei, lo e mester a resusitá pa bai shelu pa mas tardá na 1935. Esei lo indiká ku e promé resurekshon a kuminsá entre 1914 i 1935. Pero nos por ta mas eksakto ainda?

12. Splika pakiko nos por mira e lènte di 1918 komo e posibel tempu ku e promé resurekshon a kuminsá tuma lugá.

¹² Algu ku por yuda nos riba e punto aki ta un konsiderashon di loke nos por yama un paralelo di Beibel. Hesukristu a ser ungí komo e futuro Rei di e Reino di Dios den e hèrfst di aña 29 di nos era. Tres aña i mei despues, den e lènte di aña 33, el a ser resusitá komo un persona spiritual poderoso. Nos por rasoná anto ku siendo ku Hesus a ser entronisá den e hèrfst di 1914, e resurekshon di su fiel siguidónan ungí a kuminsá tres aña i mei despues, den e lènte di 1918? Esei ta un posibilidat interesante. Ounke nos no por konfirmá esaki direktamente den Beibel, no ta inkonsistente ku otro partinan di Beibel pa indiká ku e promé resurekshon a kuminsá tuma lugá djis despues ku e presensia di Kristu a kuminsá.

13. Kon 1 Tesalonisensenan 4:15-17 ta indiká ku e promé resurekshon a kuminsá trempan durante e presensia di Kristu?

¹³ Por ehèmpel, Pablo a skirbi: “Nos, e bibunan ku ta sobrebibí te na e presensia di Señor [no te na fin di su presensia] di ningun manera lo ta promé ku esnan ku a bai drumi den morto; pasobra Señor mes lo baha for di shelu ku un yamada imperativo, ku bos di arkangel i ku e tròmpèt di Dios, i esnan ku ta morto den union ku Kristu lo lanta promé. Despues, nos, e bibunan ku ta sobrebibí, huntu ku nan, lo ser hibá den nubia pa kontra ku Señor den laira; i asina nos lo ta semper ku Señor.” (1 Tesalonisensenan 4:15-17, NW) P’esei, e kristiannan ungí ku a muri promé ku e presensia di Kristu a ser lantá pa bida den shelu promé ku esnan ku ta na bida ainda durante e presensia di Kristu. Esaki ta nifiká ku e promé resurekshon lo mester a kuminsá trempan den Kristu su presensia, i ta sigui “durante su presensia.” (1 Korintionan 15:23, NW) Klaru ku no ta tur a resusitá na mes momento; e promé resurekshon ta tuma lugá durante un periodo di tempu.

‘A Duna Kada Un di Nan un Bistí Blanku’

14. (a) Na ki tempu e vishonnan registrá den Revelashon kapítulo 6 ta kumpli? (b) Kiko Revelashon 6:9 ta deskribí?

¹⁴ Konsiderá tambe e evidensia ku Revelashon kapítulo 6 ta kontené. Ei nos ta mira Hesus koriendo riba kabai komo un Rei vensedó. (Revelashon 6:2) E nashonnan ta enbolbí den guera na gran eskala. (Revelashon 6:4) Ta reina skarsedat di kuminda. (Revelashon 6:5, 6) Plaganan mortífero ta asotá humanidat. (Revelashon 6:8) Tur e susesonan profetisá aki ta kuadra bon kla ku e situashon di mundu desde 1914. Pero tin algu mas ta sosodé. Beibel ta hala nos atenshon na un altar di sakrifisio. Na pia di e altar tin “e almanan  di esnan ku a wòrdu matá pa motibu di e palabra di Dios, i pa motibu di e testimonio ku nan [“a duna,” NW]. (Revelashon 6:9) Siendo ku e alma òf “bida di e karni ta den e sanger,” loke tin na pia di e altar ta representá realmente e sanger di fiel sirbidó di Hesus ku a ser matá pa motibu di e kurashi i selo ku nan a demostrá den e trabou di duna testimonio.—Levítiko 17:11.

15, 16. Splika dikon e palabranan di Revelashon 6:10 i 11 ta referí na e promé resurekshon.

¹⁵ Meskos ku e sanger di e hòmber hustu Abel, e sanger di e mártirnan kristian aki ta sklamando pa hustisia. (Génesis 4:10) “Nan a sklama na bos haltu, bisando: ‘Kuantu tempu mas, o Señor, santu i berdadero, lo bo keda sin husga i sin venga nos sanger riba esnan ku ta biba riba tera?’” Kiko ta sosodé despues? “A wòrdu duná na kada un di nan un bistí blanku; i a wòrdu bisá na nan ku nan mester sosegá un poko tempu mas, te ora ku e kantidat di nan ko-sirbidónan i nan rumannan ku mester a wòrdu matá ainda meskos ku nan, lo a keda kompletá tambe.”—Revelashon 6:10, 11.

¹⁶ Ta na plasnan di sanger na pia di un altar a duna e bistínan blanku aki? Klaru ku nò! E bistínan blanku a ser duná na personanan di kende nan sanger a ser dramá, na moda di papia, riba e altar. Nan a sakrifiká nan bida den nòmber di Hesus i awor a ser resusitá komo sernan spiritual. Kon nos por sa esei? Mas promé den e buki di Revelashon, nos ta lesa: “Esun ku vense lo wòrdu bistí na paña blanku; i lo mi no kita su nòmber for di e buki di bida.” Kòrda tambe ku e 24 ansianonan tabata “bistí na paña blanku i ku korona di oro riba nan kabes.” (Revelashon 3:5; 4:4) Pues, despues ku guera, hamber i pèst a kuminsá asotá tera, miembronan di e 144.000 ungínan ku tabata morto, representá pa e sanger na pia di e altar, a ser lantá pa bida selestial i bistí simbólikamente na blanku.

17. Den ki sentido esnan ku ta risibí bistí blanku mester ‘sosegá’?

¹⁷ E personanan resien resusitá ei mester ‘sosegá,’ esta, nan mester warda ku pasenshi riba e dia di vengansa di Dios. Nan “ko-sirbidónan,” kristiannan ungí ku ta riba tera ainda, lo mester demostrá nan integridat bou di prueba. Ora e tempu pa huisio divino yega, e ‘sosiegu’ ei lo terminá. (Revelashon 7:3) Na e tempu ei, personanan resusitá lo djòin Señor Hesukristu den destrukshon di e malbadonan, inkluso esnan ku a drama sanger di kristiannan inosente.—2 Tesalonisensenan 1:7-10.

 Kiko Esaki Ta Nifiká pa Nos?

18, 19. (a) Pa ki motibu bo por konkluí ku e promé resurekshon ta tumando lugá aktualmente? (b) Kon bo komprondementu di e promé resurekshon ta pone bo sinti?

¹⁸ E Palabra di Dios no ta revelá un fecha eksakto pa e promé resurekshon, pero sí e ta revelá ku esaki ta tuma lugá den un periodo di tempu, durante e presensia di Kristu. E proménan ku ta haña resurekshon ta kristiannan ungí ku a muri promé ku Kristu su presensia a kuminsá. Segun ku e presensia di Kristu ta transkurí, kristiannan ungí ku ta terminá nan bida riba tera fielmente ta ser kambiá “den un fregá di wowo” den kriaturanan spiritual poderoso. (1 Korintionan 15:52) Tur e ungínan lo risibí nan rekompensa selestial promé ku e guera di Armagedón? Nos no sa. Loke sí nos sa ta ku na e debido tempu di Dios, henter e grupo di 144.000 lo ta pará riba e Seru di Sion selestial.

¹⁹ Nos sa tambe ku mayoria di e miembronan dje 144.000 a uni kaba ku Kristu. A sobra relativamente poko di nan riba tera. Esei ta un indikashon fuerte ku e tempu pa e ehekushon dje huisio di Dios ta aserkando rápidamente! Pronto, henter e mundu di Satanas lo ser destruí. Satanas mes lo ser tirá den abismo. E ora ei, e resurekshon general por kuminsá i a base di e sakrifisio di reskate di Hesus, hende fiel lo por ser elevá na e perfekshon ku Adam a pèrdè. E profesia di Yehova registrá na Génesis 3:15 lo kumpli na un manera maravioso. Esta un gran privilegio pa biba den e tempu aki!

[Nota]

Bo Por Splika?

Kon e siguiente tekstonan bíbliko ta yuda nos saka afó na ki tempu “e promé resurekshon” ta tuma lugá?

• Revelashon 12:7; 17:14

• Revelashon 7:13, 14

• 1 Korintionan 15:23; 1 Tesalonisensenan 4:15-17

• Revelashon 6:2, 9-11

[Preguntanan di Estudio]

[Plachinan na página 26]

Ki resurekshon ta tuma lugá promé ku humanidat en general ser lantá for di morto?

[Plachi na página 29]

Den ki sentido a duna sierto personanan ku tabata drumi den morto un bistí blanku?