Kon Bo Por Tin Éksito
Kon Bo Por Tin Éksito
MESKOS ku mayornan ta interesá den nan yunan i ke pa nan logra éksito, asina tambe nos Tata selestial ta interesá den nos i ke pa nos logra éksito. Pa demostrá su tierno kariño, e ta duna nos hopi informashon tokante éksito i frakaso. De echo, ku konfiansa Beibel ta deklará tokante un persona ku ta presta atenshon na loke Dios ta bisa: “Tur loke ku e hasi ta prosperá.”—Salmo 1:3.
Si esei ta e kaso, dikon anto hopi hende no ta logra un bida eksitoso i felis ku ta duna nan satisfakshon? Si nos analisá e salmo aki mas a fondo, nos lo haña e kontesta i nos lo mira kon nos tambe por tin éksito.
“E Konseho di Malbadonan”
E salmista ta spièrta nos pa e peliger di kana den “e konseho di malbadonan.” (Salmo 1:1) “E malbado” prinsipal ta Satanas e Diabel. (Mateo 6:13) E Skritura ta bisa nos ku e ta “e prens di e mundu aki” i ku “henter mundu ta bou di kontròl di e malbado.” (Juan 16:11; 1 Juan 5:19) Pues, no ta nada straño ku gran parti di e konseho ku bo ta haña den mundu ta reflehá e manera di pensa di e malbado ei.
Ki klase di konseho malbadonan ta ofresé? En general, hende malbado no ta respetá Dios. (Salmo 10:13) Nan konseho, ku ta ignorá òf mustra falta di rèspèt pa Dios, ta tur kaminda rònt di nos. Sosiedat moderno ta promové “e deseo di karni i e deseo di wowo i e orguyo di bida [òf, pa “kana prònk ku loke bo tin,” BPK].” (1 Juan 2:16) Medionan di komunikashon ta bombardiá nos ku un filosofia materialista di “saka máksimo probecho di bida.” Rònt mundu kompanianan ta gasta mas ku 900 mil mion florin pa aña na propaganda pa konvensé hende pa kumpra nan produktonan; sea ku konsumidónan tin mester di nan òf nò. Anto e propagandanan aki no solamente a influensiá loke hende ta kumpra, sino tambe a trose mundu su punto di bista di éksito.
Komo resultado, hende tin un set insasiabel pa mas kos material apesar ku nan ta doño di kosnan ku un tempu nan por a soña so kuné. Nan ta haña ku si bo no tin e kosnan aki, bo no por ta felis ni eksitoso. E pensamentu aki no ta kuadra ku bèrdat i “no ta bin di e Tata, sino di e mundu.”—1 Juan 2:16.
Nos Kreadó sa kiko ta hasi nos realmente eksitoso. Su konseho ta diferente for di “e konseho di malbadonan.” P’esei, un hende ku ta purba gana Dios su fabor i a la bes ta kana den mundu su kaminda pa logra éksito ta meskos ku un hende ku ta purba kana den dos kaminda pareu. Esei simplemente no ta posibel. Nada straño anto ku Beibel ta duna e spièrtamentu: “No laga e manera di pensa di e mundu aki forma boso.”—Romanonan 12:2, BPK.
No Laga Mundu Forma Bo
E mundu bou di influensia di Satanas ta purba duna e impreshon ku e ta interesá den nos bienestar. Sin embargo nos mester ta kouteloso. Kòrda ku Satanas egoistamente a engañá e promé hende muhé, Eva, pa sirbi Satanas su propio interes. Despues el a usa Eva pa pone Adam peka. Awe tambe Satanas ta usa hende pa hasi propaganda malisioso p’e.
Por ehèmpel David, menshoná den e artíkulo anterior, lo mester a traha overtaim i bai afó ku frekuensia pa negoshi. David a bisa: “Mi tabata biaha djaluna mainta trempan i bin bèk djaweps anochi.” Amigu-, famia,- i koleganan di trabou sinsero tabata sa ku e tipo di sakrifisionan ei ta nesesario pa logra éksito den mundu, p’esei nan tabata urgi David: “Hasié pa bo famia.” Nan tabata rasoná ku lo e tin ku mantené e rutina ei pa un par di aña so te ora e ta bon establesé. David a splika: “Nan tabata hustifiká esei bisando ku esaki ta mihó pa mi famia pa motibu ku lo mi trese mas plaka kas, pues, lo mi por ta mas eksitoso. Maske mi no tabata huntu ku mi famia, mi amigunan a konvensé mi ku en realidat asina lo mi ta dunando mas na mi famia.” Meskos ku David, tin hopi hende ta traha duru pa duna nan famia tur loke nan ta kere ku nan sernan kerí tin mester. Pero siguiendo e tipo di konseho aki ta hiba na éksito? Kiko un famia realmente tin mester?
David a deskubrí esei miéntras e tabata afó riba un biahe di negoshi. El a konta: “Mi tabata papia na telefòn ku mi yu muhé Angelica, i el a puntra: ‘Papi, pakiko bo no kier keda kas serka nos?’ E palabranan ei a troumatisá mi.” Loke su yu muhé a bisa a hasié mas determiná pa entregá su retiro. David a disidí di duna su famia lokual nan realmente tabatin mester: e mes.
Aplikashon di Dios Su Konseho Ta Resultá den Éksito
Kon bo por logra resistí propaganda negativo ku tin asina tantu influensia riba e mundu aki? E salmista ta bisa nos ku hende eksitoso i felis ta esnan ku nan ‘delisia ta den e lei di Yehova, i den su lei nan ta meditá di dia i anochi.’—Salmo 1:2.
Ora Dios a nombra Josué komo lider di e nashon di Israel, el a bisa Josué: “Bo mester meditá den [e Palabra di Dios] di dia i anochi.” Sí, tabata masha importante pa lesa i meditá riba e Palabra di Dios, pero tambe Josué mester a “perkurá di hasi konforme tur loke [tabatin] pará skirbí den dje.” Klaru ku lesamentu di Beibel riba su mes lo no hasi bo outomátikamente un persona eksitoso. Bo mester apliká loke bo ta lesa. Dios a bisa Josué: “Pasobra e ora ei lo bo hasi bo kaminda prosperá, i e ora ei lo bo tin éksito.”—Josué 1:8.
Imaginá bo un mucha sintá kontentu di dje riba skochi di un mayor amoroso segun ku nan ta lesa un kuenta preferí huntu. Sin importá kuantu biaha nan a yega di les’é, nan no ta lubidá e momentonan inolvidabel ei. Asina tambe, un hende ku ta stima Dios ta haña lesamentu diario di Beibel un eksperensia agradabel, un dushi momento ku e ta pasa huntu ku su Tata selestial. Un hende ku ta sigui Yehova su konseho i guia ta bira “manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.”—Salmo 1:3.
E palu ku e salmista a deskribí no ta krese pa kasualidat. E kunukero ta plant’é kuidadosamente kantu di un fuente di awa i e ta kuid’é. Di un manera similar, nos Tata selestial ta ahustá i korigí nos manera di pensa mediante e konseho ku tin den e Skritura. Komo resultado, nos ta bona i ta produsí fruta òf kualidatnan ku ta na armonia ku Dios su guia.
Sin embargo, “no t’asina ku e malbadonan.” Ta bèrdat ku pa un tempu por parse ku nan ta prosperá, pero finalmente kos lo bai malu ku nan. Nan ‘lo no keda para durante huisio.’ Mas bien, “e kaminda di e malbadonan lo peresé.”—Salmo 1:4-6.
P’esei no laga mundu forma bo metanan ni bo norma- i balornan. Por ta masha bon ku bo tin hopi talento i e potensial pa logra éksito den e mundu aki, pero tene kuidou kon bo ta usa bo talento òf kon bo ta laga mundu us’é. Metanan materialista inútil por pone un hende “marchitá.” Di otro banda, un bon relashon ku Dios sí ta resultá den éksito i felisidat.
Kon Bo Por Tin Éksito
Dikon ora un hende ta sigui Dios su konseho, tur loke ku e hasi lo prosperá? E salmista no tabata papia tokante éksito den e mundu aki. Pa un hende deboto por tin éksito e tin ku hasi e boluntat di Dios, anto e boluntat di Dios semper tin éksito. Laga nos wak kon aplikashon di prinsipio bíbliko por yuda bo logra éksito.
Famia: E Skritura ta instruí esposonan pa “stima nan esposa manera nan mes kurpa,” i na esposa kristian e ta bisa “pa e respetá su esposo.” (Efesionan 5:28, 33) Mayornan ta wòrdu animá pa pasa tempu huntu ku nan yunan, pa hari ku nan, i siña nan tokante e kosnan importante den bida. (Deuteronomio 6:6, 7; Eklesiastés 3:4) Ademas, e Palabra di Dios ta konsehá mayornan: “No provoká boso yunan na rabia.” Ora nan ta apliká e konseho aki, ta hopi mas fásil pa yunan “obedesé [nan] mayornan” i pa nan “onra [nan] tata i [nan] mama.” (Efesionan 6:1-4) Famianan ku sigui e konseho divino aki por logra éksito den nan bida di famia.
Amigunan: Mayoria di hende ke tin amigu. Nos tin e kapasidat mental i emoshonal pa stima i ser stimá. Hesus a bisa su siguidónan ku nan mester “stima otro.” (Juan 13:34, 35) Entre e siguidónan di Hesus nos ta haña amigunan ku nos por stima i konfia asta ku nos sintimentu- i pensamentunan di mas profundo. (Proverbionan 18:24) Anto loke ta mas importante ainda ta ku ora nos ta apliká prinsipionan bíbliko, nos por “hala serka Dios” i asta ser yamá ‘amigu di Yehova,’ meskos ku Abraham.—Santiago 2:23; 4:8.
Propósito den Bida: En bes di djis biba pa biba, esnan ku ta berdaderamente eksitoso ta haña un propósito den bida. Nan bida no ta basá riba e kondishonnan instabil di e sistema di kosnan aki. Nan metanan ta hiba na satisfakshon berdadero i duradero ya ku nan ta enfoká riba e berdadero propósito di bida. Kiko ta duna un hende propósito den bida? “Teme Dios i warda su mandamentunan, pasobra esaki ta aplikabel na kada persona.”—Eklesiastés 12:13.
Speransa: Ora nos tin Dios komo nos amigu, esei ta duna nos un speransa pa futuro tambe. Apòstel Pablo a urgi kristiannan “pa nan no fiha nan speransa riba e insiguridat di rikesa, ma riba Dios.” Di e manera ei, nan lo “montoná pa nan mes e tesoro di un bon fundeshi pa futuro, pa nan gara loke ta bida berdadero.” (1 Timoteo 6:17-19) E bida berdadero aki pronto lo bira un realidat ora e Reino selestial di Dios restorá Paradeis aki riba tera.—Lukas 23:43.
Si bo apliká prinsipionan bíbliko, lo bo no ta liber di problema, pero lo bo evitá sí hopi pena i doló ku e malbadonan ta kousa nan mes. David, menshoná anteriormente, i miónes di persona meskos kuné a siña e balor di apliká prinsipio bíbliko den nan bida. Despues ku David a haña un trabou ku un orario mas mihó, el a bisa: “Mi ta apresiá e relashon ku mi tin ku mi kasá i ku mi yunan i tambe e privilegio di por sirbi Yehova Dios komo un ansiano di kongregashon.” Nada straño ku e salmo ta bisa tokante un hende ku ta presta atenshon na e konseho di Dios: “Tur loke ku e hasi ta prosperá”!
[Tabèl na página 6]
SINKU PASO PA LOGRA ÉKSITO
1 No laga e norma- i balornan di e mundu aki forma bo.
2 Lesa i meditá riba e Palabra di Dios tur dia.
3 Apliká konseho bíbliko den bo bida.
Josué 1:7-9
4 Laga Dios bira bo amigu.
5 Teme e Dios berdadero, i warda su mandamentunan.
[Plachinan na página 7]
Abo ta siguiendo e pasonan pa logra éksito?