Kon Bo Ta Midi Éksito?

TIN hende ta konsiderá Jesse Livermore komo e persona di mas eksitoso den historia di bolsa di balor di Wall Street. E tabata konosí pa e echo ku e tabata tuma bon desishon den asuntunan di negoshi. Komo resultado el a akumulá un gran kantidat di rikesa. E tabata bisti e bachinan di mihó kalidat, kosé na man. El a biba den un manshon di 29 kamber i a kore den un Rolls-Royce pretu ku su shofùr.

David * tabata riba e mesun rumbo ei. Komo visepresidente i gerente general di un kompania grandi di arte gráfiko, e tabata den fila pa bira presidente di un divishon di e kompania. Rikesa i prestigio tabata atra’é. Sin embargo, David a disidí di entregá su retiro. El a bisa: “Mi sa ku nunka mas lo mi sigui un karera lukrativo komo ehekutivo.” Bo ta kere ku David a tuma un mal desishon?

Hopi hende ta kere ku éksito ta nifiká alkansá rikesa, popularidat i prominensia. Pero, hende ku tin hopi kos material tòg por sinti ku nan ta bashí i sin propósito den bida. Esei tabata bisto den kaso di Jesse Livermore. Apesar di su rikesa, su bida tabata yen di sufrimentu, tragedia i tristesa. El a sufri di depreshon, a pasa den vários divorsio i no tabatin un bon relashon ku su yu hòmbernan. Finalmente, despues ku el a pèrdè gran parti di su fortuna, Jesse Livermore a sinta un dia den un bar di  un hotèl luhoso i lamentá su desgrasianan. El a pidi un drinks, a saka su buki di nota di kueru i a skirbi un nota di despedida pa su esposa. Ora el a kaba di dal su drinks, el a bai den un kuarto un poko skur kaminda hende ta kologá bachi i otro artíkulonan i lamentablemente a pone fin na su bida.

Ta bèrdat ku e motibunan pakiko hende ta kometé suisidio ta hopi kompliká, pero e eksperensia aki ta mustra ku e siguiente deklarashon bíbliko ta bèrdat: “Esnan ku kier bira riku . . . a traspasá nan mes ku hopi doló.”—1 Timoteo 6:9, 10.

Ta posibel ku esnan ku ta midi éksito a base di rikesa, posishon i prominensia ta usando un kriterio robes? Bo ta konsiderá bo mes un hende eksitoso? Dikon? Ki kriterio bo ta usa pa determiná esei? Kiko ta forma bo punto di bista pa loke ta trata éksito? E siguiente artíkulo ta trata konseho konfiabel ku a yuda miónes di hende logra éksito. Laga nos mira kon abo tambe por tin éksito.

[Nota]