“Lo Bo Ta Berdaderamente Yen di Goso”

“Selebrá . . . un fiesta na SEÑOR bo Dios . . . , asina ku lo bo ta berdaderamente yen di goso.”—DEUTERONOMIO 16:15.

1. (a) Ki kuestionnan Satanas a lanta? (b) Kiko Yehova a profetisá despues di e rebelion di Adam ku Eva?

DIA Satanas a pone Adam ku Eva rebeldiá kontra nan Kreadó, el a lanta dos kuestion di vital importansia. Na promé lugá, el a insinuá ku Yehova no ta papia e bèrdat i ku su manera di goberná no ta bon. Na di dos lugá, Satanas a duna di komprondé ku hende ta sirbi Dios puramente pa motibunan egoista. El a menshoná e di dos kuestion aki abiertamente den e tempu di Jòb. (Génesis 3:1-6; Jòb 1:9, 10; 2:4, 5) Pero Yehova a aktua mesora pa korigí e situashon. Miéntras Adam ku Eva tabata den e hòfi di Edén ainda, Yehova a profetisá kon lo El a resolvé e kuestionnan ei. El a papia di e binida di un “simia,” kende Satanas lo a heridá su hilchi di pia, pero ku despues e simia aki lo a heridá kabes di Satanas mortalmente.—Génesis 3:15.

2. Kon Yehova a tira lus riba e manera ku lo e kumpli ku e profesia ku ta pará skirbí na Génesis 3:15?

² Den transkurso di tempu Yehova a tira mas i mas lus riba e profesia ei, i asina a demostrá ku lo e kumpli sigur den futuro. Por ehèmpel, Dios a bisa Abraham ku e “simia” lo a aparesé entre su desendientenan. (Génesis 22:15-18) Abraham su nietu Jakòb a bira tata di e 12 tribunan di Israel. Na aña 1513 promé ku nos era, ora e tribunan ei a bira un nashon, Yehova a duna nan un kódigo di lei ku a inkluí vários fiesta anual. Apòstel Pablo a bisa ku e fiestanan ei tabata un “sombra di loke mester [a] bin.” (Kolosensenan 2:16, 17; Hebreonan 10:1) Nan a duna un bista adelantá di kon e propósito di Yehova pa e Simia lo a kumpli. Selebrashon di e fiestanan ei a trese hopi goso den Israel. Un konsiderashon breve di nan lo fortalesé nos fe den Yehova su promesanan i laga nos mira kon konfiabel esakinan ta.

E Simia Ta Aparesé

3. Ken tabata e Simia primintí, i kon su hilchi di pia a ser heridá?

³ Mas ku 4.000 aña despues ku Yehova a duna e promé profesia, e Simia primintí a aparesé. Esei a resultá di ta Hesus. (Galationan 3:16) Komo un hòmber perfekto, Hesus a mantené su integridat te na morto i asina a demostrá ku e akusashonnan di Satanas tabata falsu. Ademas, siendo ku Hesus no tabatin piká, su morto tabata un sakrifisio di gran balor. Pa medio di dje, Hesus a perkurá liberashon for di piká i morto pa e desendientenan fiel di Adam ku Eva. E morto di Hesus riba un staka di tormento tabata e “herida” ku e Simia primintí a haña na su “hilchi di pia.”—Hebreonan 9:11-14.

4. Kiko a prefigurá e sakrifisio di Hesus?

⁴ Hesus a muri dia 14 di nisan di aña 33 di nos era. * Den Israel, 14 di nisan tabata e dia gososo di selebrashon di e Pasku hudiu. Kada aña riba e fecha ei famianan tabata kome huntu un kuminda ku a inkluí un lamchi yòn i sano. Dje manera aki, nan a rekordá e papel ku sanger di un lamchi a hunga den liberashon dje primogénitonan israelita ora e angel di morto a mata e primogénitonan di e egipsionan riba 14 di nisan di aña 1513 promé ku nos era. (Eksodo 12:1-14) E lamchi di Pasku Hudiu a  prefigurá Hesus, di kende apòstel Pablo a bisa: “Kristu, nos Pasku . . . a wòrdu sakrifiká.” (1 Korintionan 5:7) Meskos ku e sanger dje lamchi di Pasku Hudiu, e sanger dramá di Hesus ta perkurá salbashon pa hopi hende.—Juan 3:16, 36.

“E Promé Fruta di Esnan Ku A Muri”

5, 6. Na ki tempu Hesus a ser resusitá, i kiko den e Lei a prefigurá e suseso ei? (b) Kon e resurekshon di Hesus a hasi posibel pa Génesis 3:15 kumpli?

⁵ Riba e di tres dia, Hesus a ser resusitá pa por a presentá e balor di su sakrifisio na su Tata. (Hebreonan 9:24) Un otro fiesta a prefigurá su resurekshon. E dia despues di 14 di nisan tabata e kuminsamentu di e Fiesta di Pan sin Zürdeg. Riba e siguiente dia, 16 di nisan, e israelitanan tabata trese un bohí (tròshi) di e promé frutanan di e kosecha di puspas, e promé kosecha na Israel, pa e saserdote zoya dilanti Yehova. (Levítiko 23:6-14) Tabata masha apropiá ku na aña 33 di nos era, nèt riba e dia ei, Yehova a frustra e intentonan malisioso di Satanas pa silensiá pa semper su “testigu fiel i berdadero”! Dia 16 di nisan di aña 33, Yehova a resusitá Hesus for di morto pa un bida spiritual inmortal.—Revelashon 3:14; 1 Pedro 3:18.

⁶ Hesus a bira “e promé fruta di esnan ku a muri.” (1 Korintionan 15:20) Distinto for di e personanan ku a resusitá mas promé, Hesus no a bolbe muri. Mas bien, el a subi na shelu i a sinta na man drechi di Yehova, kaminda el a warda te ora el a wòrdu instalá komo Rei di e Reino selestial di Yehova. (Salmo 110:1; Echonan 2:32, 33; Hebreonan 10:12, 13) For di momento ku Hesus a ser instalá komo Rei, e ta den un posishon awor pa heridá òf machiká kabes di e gran enemigu, Satanas, permanentemente i destruí su simia.—Revelashon 11:15, 18; 20:1-3, 10.

Mas Miembro di e Simia di Abraham

7. Kiko tabata e Fiesta di Simannan?

⁷ Hesus tabata e Simia primintí den Edén i esun pa medio di ken Yehova lo “destruí e obranan di Diabel.” (1 Juan 3:8) Ma ora Yehova a papia ku Abraham, El a indiká ku e “simia” di Abraham lo a konsistí di mas ku un persona so. Lo el a bira “manera e streanan di e shelunan i manera e santu ku tin kantu di laman.” (Génesis 22:17) Un otro fiesta gososo a prefigurá e aparishon di otro miembronan di e “simia” òf desendientenan. Sinkuenta dia despues di 16 di nisan, Israel tabata selebrá e Fiesta di Simannan. E Lei tokante esaki a deklará: “Konta sinkuenta dia te na e dia despues di e di shete sabat, i e ora ei presentá un ofrenda di maishi fresku na SEÑOR. Trese for di boso lugánan di biba dos pan trahá di dos désimo parti di un efa komo un ofrenda di zoyamentu; nan mester ta di hariña fini, hòrná ku zürdeg komo promé frutanan pa SEÑOR.” *—Levítiko 23:16, 17, 20.

8. Ki suseso sobresaliente a tuma lugá riba dia di Pentekòste di aña 33 di nos era?

⁸ Tempu ku Hesus tabata riba tera, e Fiesta di Simannan tabata konosí komo Pentekòste (for di un palabra griego ku ta nifiká e  “di sinkuenta”). Riba dia di Pentekòste di aña 33 di nos era, e Sumo Saserdote di mas grandi, Hesukristu resusitá, a drama spiritu santu riba e grupo chikitu di 120 disipel ku a reuní na Yerusalèm. Asina e disipelnan ei a bira yunan ungí di Dios i rumannan di Hesukristu. (Romanonan 8:15-17) Nan a bira un nashon nobo, “e Israel di Dios.” (Galationan 6:16) For di un kuminsamentu chikitu, e nashon ei lo a bin konta finalmente ku 144.000 miembro.—Revelashon 7:1-4.

9, 10. Kon e kongregashon di kristian ungí a ser prefigurá durante Pentekòste?

⁹ E dos pannan ku zürdeg ku a ser zoyá dilanti Yehova tur aña riba dia di Pentekòste a prefigurá e kongregashon di kristian ungí. E echo ku e pannan tabatin zürdeg a indiká ku ainda kristiannan ungí lo tabatin e zürdeg di piká heredá. No opstante, nan por a aserká Yehova a base di e sakrifisio di reskate di Hesus. (Romanonan 5:1, 2) Pakiko dos pan? Esei lo por tabata un indikashon ku e yunan ungí di Dios ku tempu lo a bin for di dos grupo—promé, for di e hudiunan natural i despues for di e gentilnan.—Galationan 3:26-29; Efesionan 2:13-18.

¹⁰ E dos pannan ku a ser ofresé riba dia di Pentekòste a bini for di e promé frutanan di e kosecha di trigu. Asina tambe, e kristiannan engendrá pa spiritu santu ta ser yamá “e promé frutanan entre su kriaturanan.” (Santiago 1:18) Nan ta e promé personanan ku ta haña pordon di nan pikánan a base di Hesus su sanger dramá, i esei ta hasi posibel pa nan risibí bida inmortal den shelu, kaminda nan ta goberná ku Hesus den su Reino. (1 Korintionan 15:53; Filipensenan 3:20, 21; Revelashon 20:6) Den e posishon ei, pronto nan lo “goberná [e nashonnan] ku bara di heru” i mira kon ‘Satanas lo ser plècha bou di nan pia.’ (Revelashon 2:26, 27; Romanonan 16:20) Apòstel Juan a bisa: “Esakinan ta esnan ku ta sigui e Lamchi unda ku e bai. Esakinan a wòrdu kumprá for di entre hende komo e promé frutanan pa Dios i pa e Lamchi.”—Revelashon 14:4.

Un Dia Ku Ta Enfatisá Liberashon

11, 12. (a) Kiko a sosodé riba e Dia di Ekspiashon? (b) Ki benefisionan Israel a risibí for di e ofrendanan di e toro i e kabritunan?

¹¹ Riba e di dies dia di etanim (yamá despues  tisri), * Israel tabata selebrá un fiesta ku a prefigurá kon humanidat lo benefisiá di e sakrifisio di reskate di Hesus. Riba e dia ei henter e nashon tabata bini huntu pa e Dia di Ekspiashon pa laga hasi sakrifisio pa nan pa kubri nan pikánan.—Levítiko 16:29, 30.

¹² Riba e Dia di Ekspiashon, e sumo saserdote tabata mata un toro yòn i sprengu poko di su sanger den e Santísimo shete biaha dilanti di e tapa dje Arka, ofresiendo asina e sanger den un forma simbóliko dilanti Yehova. E ofrenda ei tabata pa e pikánan di tantu e sumo saserdote komo “pa e hendenan di su kas,” pa e supsaserdotenan i e levitanan. Despues e sumo saserdote tabata tuma dos kabritu. Un di nan e tabata mata komo un ofrenda pa piká “pa e pueblo.” E tabata sprengu poko di e sanger di esaki tambe dilanti di e tapa dje Arka den e Santísimo. Despues di esei, e sumo saserdote tabata pone su mannan riba kabes di e di dos kabritu i konfesá e pikánan di e yunan di Israel. Despues e tabata manda e kabritu bai den desierto pa asina den un forma simbóliko hiba e pikánan di e nashon.—Levítiko 16:3-16, 21, 22.

13. Kon e susesonan riba e Dia di Ekspiashon a prefigurá e papel ku Hesus ta hunga?

¹³ E aktonan ei a prefigurá kon e gran Sumo Saserdote, Hesus, ta usa e balor di su mes sanger pa pordoná piká. Na promé lugá, e balor di su sanger ta ser apliká na e “kas spiritual” di 144.000 kristian ungí, i dor di esei nan por wòrdu deklará hustu i disfrutá di un posishon limpi dilanti Yehova. (1 Pedro 2:5; 1 Korintionan 6:11) Esaki ta loke e sakrifisio di e toro a prefigurá, lokual ta habri kaminda pa e ungínan risibí nan herensia selestial. Na di dos lugá, e balor di Hesus su sanger ta ser apliká na fabor di miónes di otro hende ku ta ehersé fe den Kristu, manera e sakrifisio di e kabritu ta demostrá. Esakinan lo ser bendishoná ku bida eterno aki riba tera, e herensia ku Adam ku Eva a pèrdè. (Salmo 37:10, 11) A base di Hesus su sanger dramá, e ta hiba e pikánan di humanidat, meskos ku e kabritu bibu den un forma simbóliko a hiba e pikánan di Israel den desierto.—Isaias 53:4, 5.

Alegrá Dilanti Yehova

14, 15. Kiko a sosodé durante e Fiesta di Tabernakel, i di kiko esaki a rekordá e israelitanan?

¹⁴ Despues di e Dia di Ekspiashon, e israelitanan tabata selebrá e Fiesta di Tabernakel, e  fiesta di mas gososo di e aña hudiu. (Levítiko 23:34-43) E fiesta ei a tuma lugá for di dia 15 te dia 21 di etanim i a kaba ku un asamblea solèm riba dia 22 di e luna. Esei a marka e fin di e rekohementu dje kosecha i tabata un tempu di gradisimentu pa e bondat abundante di Dios. Pa e motibu ei, Yehova a ordená esnan ku a selebr’é: “SEÑOR bo Dios lo bendishoná bo den henter bo kosecha i den tur e trabou di bo mannan, asina ku lo bo [“mester,” NW] ta berdaderamente yen di goso.” (Deuteronomio 16:15) Esta un tempu gososo esei lo mester tabata!

¹⁵ Durante e fiesta ei, e israelitanan tabata biba den tabernakel òf kabaña pa shete dia. Esei a sirbi pa rekordá nan ku un tempu nan tabata biba den kabaña den desierto. E fiesta a duna nan oportunidat amplio pa meditá riba e kuido paternal di Yehova. (Deuteronomio 8:15, 16) I ya ku nan tur, sea riku òf pober, a biba den kabañanan similar, esei a rekordá e israelitanan ku en konekshon ku e fiesta, nan tur tabata igual.—Nehemias 8:14-16.

16. Kiko e Fiesta di Tabernakel a prefigurá?

¹⁶ E Fiesta di Tabernakel tabata un fiesta di kosecha, un selebrashon gososo di rekohementu, i el a prefigurá e rekohementu gososo di personanan ku ta ehersé fe den Hesukristu. E rekohementu a kuminsá riba dia di Pentekòste di aña 33, dia ku e 120 disipelnan di Hesus a ser ungí pa bira parti di “un saserdosio santu.” Meskos ku e israelitanan a biba den kabaña pa un par di dia, asina kristiannan ungí sa ku nan ta simplemente “stranheronan” den e mundu malbado aki. Nan speransa ta unu selestial. (1 Pedro 2:5, 11) E rekohementu ei di kristiannan ungí ta alkansá su kulminashon durante e “último dianan” aki, ora ku e delaster miembronan di e 144.000 ta ser rekohé.—2 Timoteo 3:1.

17, 18. (a) Kiko ta indiká ku otro personanan ademas di kristiannan ungí ta benefisiá di Hesus su sakrifisio? (b) Ken awe ta benefisiando di loke e Fiesta di Tabernakel a prefigurá, i na ki tempu e fiesta gososo ei lo alkansá su kulminashon?

¹⁷ Ta interesante pa nota ku durante e fiesta  di antigwedat aki, e israelitanan a sakrifiká 70 toro. (Numbernan 29:12-34) E sifra 70 ta representá 7 biaha 10, sifranan ku den Beibel ta representá perfekshon selestial i terenal. P’esei e sakrifisio di Hesus lo benefisiá personanan fiel di tur e 70 famianan di humanidat ku a bini for di Noe. (Génesis 10:1-29) Na armonia ku esei, den nos tempu e rekohementu a ekstendé pa inkluí personanan di tur nashon ku ta ehersé fe den Hesus i ku tin e speransa di biba den un paradeis riba tera.

¹⁸ Apòstel Juan a mira e rekohementu aki di tempu moderno den un vishon. Promé el a tende e anunsio di e seyamentu di e último miembronan di e 144.000. Despues el a mira “un multitut grandi ku ningun hende no por a konta,” pará dilanti Yehova i Hesus, ku “rama di palma den nan man.” Esakinan ta “sali for di e gran tribulashon” pa drenta e mundu nobo. Aktualmente nan tambe ta simplemente residentenan temporal den e mundu bieu aki, i ku konfiansa nan ta anhelá p’e tempu yega pa “e Lamchi . . . guia nan hiba na fuentenan di e awa di bida.” E tempu ei, “Dios lo seka tur lágrima for di nan wowo.” (Revelashon 7:1-10, 14-17) Loke e Fiesta di Tabernakel a prefigurá lo alkansá su kulminashon despues di e fin dje Reinado di Mil Aña di Kristu ora e multitut grandi, huntu ku e personanan fiel resusitá, haña bida eterno.—Revelashon 20:5.

19. Kon un konsiderashon di e fiestanan ku a ser selebrá den Israel ta benefisiá nos?

¹⁹ Ora nos meditá riba e nifikashon di e fiestanan hudiu di antigwedat, nos tambe por ta “berdaderamente yen di goso.” E fiestanan aki ta duna nos un bista adelantá di kon e profesia ku Yehova a duna aya den Edén lo kumpli, i esei ta yena nos ku emoshon. Ta eksitante tambe pa mira kon e profesia ei ta kumpliendo den e tempu aki. Awe, nos sa ku e Simia a aparesé i ku el a ser heridá na su hilchi di pia. Awor e ta un Rei selestial. Ademas, mayoria di e 144.000 miembronan a duna prueba kaba di nan fieldat te na morto. Kiko mas mester tuma lugá? Kuantu tempu mas falta pa e profesia kumpli kompletamente? Nos lo konsiderá esaki den e siguiente artíkulo.

[Nota]

Bo Por Splika?

• Kiko e lamchi di Pasku Hudiu a prefigurá?

• Ki rekohementu e Fiesta di Pentekòste a prefigurá?

• Ki rasgonan di e Dia di Ekspiashon a indiká kon e sakrifisio di reskate di Hesus ta ser apliká?

• Den ki manera e Fiesta di Tabernakel a prefigurá e rekohementu di kristiannan?

[Preguntanan di Estudio]

[Tabèl na página 22 23]

(Pa e teksto den su formato kompleto, wak e publikashon)

Pasku Hudiu

14 di nisan

Evenemento:

A mata e lamchi di Pasku Hudiu

A Prefigurá:

Sakrifisio di Hesus

Fiesta di Pan sin Zürdeg (15-21 di nisan)

15 di nisan

Evenemento:

Sabat

16 di nisan

Evenemento:

Ofrenda di puspas

A Prefigurá:

Resurekshon di Hesus

50 dia

Fiesta di Simannan (Pentekòste)

6 di sívan

Evenemento:

Ofrenda di dos pan

A Prefigurá:

Hesus a presentá su rumannan ungí na Yehova

Dia di Ekspiashon

10 di tisri

Evenemento:

Ofrenda di un toro i dos kabritu

A Prefigurá:

Hesus a ofresé e balor di su sanger na fabor di henter humanidat

Fiesta di Tabernakel (Rekohementu, Kabaña)

15-21 di tisri

Evenemento:

E israelitanan a biba gososamente den kabaña i a kosecha; nan a sakrifiká 70 toro

A Prefigurá:

Rekohementu di e ungínan i un “multitut alegrá den e grandi”

[Plachinan na página 21]

Meskos ku e sanger di e lamchi di Pasku Hudiu, Hesus su sanger dramá ta perkurá salbashon pa hopi hende

[Plachinan na página 22]

E promé frutanan di e kosecha di puspas ofresí dia 16 di nisan a prefigurá e resurekshon di Hesus

[Plachinan na página 23]

E dos pannan ku a ser ofresé riba dia di Pentekòste a prefigurá e kongregashon di kristian ungí

[Plachinan na página 24]

E Fiesta di Tabernakel a prefigurá e rekohementu gososo di kristian ungí i “un multitut grandi” di hende di tur nashon