Un Hòmber Ku A Stima Bida i Hende

DANIEL SYDLIK, kende pa hopi tempu tabata un miembro di Kuerpo Gobernante di Testigu di Yehova, a terminá su karera terenal riba djamars, 18 di aprel 2006. E tabatin 87 aña di edat i a sirbi komo un miembro di e famia di Bètel na Brooklyn, New York, pa kasi 60 aña.

Ruman Dan (esei tabata su nòmber di kariño) a bin Bètel na aña 1946. Promé ku esei, el a sirbi komo pionero spesial na California i tambe el a pasa un periodo den prizon durante Segundo Guera Mundial pa motibu di su neutralidat kristian. Su eksperensianan durante e tempu ei a ser deskribí na un manera bibu den su historia di bida ku a sali den E Toren di Vigilansia di 1 di yüni 1985 na spañó, bou di e tema “Esta Presioso Bo Amistat Ta, O Dios!”

Ruman Sydlik tabata konosí p’e echo ku e tabata un persona aserkabel i humilde. Ora e tabata kondusí e programa di adorashon di mainta pa e famia di Bètel, su aktitut positivo i amor pa bida hopi bes a keda reflehá den su palabranan di apertura: “Ta dushi pa ta na bida pa sirbi e Dios bibu i berdadero.” Komo un diskursante públiko e tabata animá otro hende pa nan tambe tin e punto di bista aki. P’esei su diskursonan tabatin temanan manera “Felis Ta e Pueblo Kende Su Dios Ta Yehova,” “Reflehando e Goso di Yehova,” “Mantené e Kandela di Dios Su Spiritu Bibu” i “Lo Mihó Tin Ku Bin Ainda.”

Na aña 1970, Ruman Sydlik a kasa ku Marina Hodson di Inglatera. El a deskribí Marina komo “un apoyo ku Dios a manda p’e.” Nan a sirbi Yehova huntu pa mas ku 35 aña.

Durante su añanan na Bètel, Ruman Sydlik a sirbi den vários departamento. El a traha den e imprenta i e Departamento di Redakshon. Tambe el a traha na e emisora di radio WBBR. Anto na novèmber 1974, el a keda nombrá komo un miembro di Kuerpo Gobernante i ku tempu el a traha den e Komité di Personal i di Redakshon.

Ruman Sydlik a traha pa mas ku 30 aña den e Komité di Personal, i durante e tempu ei e tabata un bon ehèmpel den desplegá amor intenso pa hende. E tabata animá hopi hende ku su bos potente, semper halando atenshon na e privilegio presioso ku nos tin di sirbi Yehova. Tur ora bai e tabata enfatisá ku berdadero felisidat ta dependé no di faktornan eksterno sino di nos relashon ku Yehova i di e manera ku nos ta mira bida.

E famia di Bètel ta sinti hopi falta di Ruman Sydlik, pero su ehèmpel di un persona ku realmente a stima bida i hende lo sigui benefisiá e famia. Nos tin sigur ku e ta entre esnan ku Revelashon 14:13 ta papia di dje, bisando: “‘Bendishoná ta e mortonan ku di awor padilanti ta muri den Señor!’ ‘Sí,’ e spiritu ta bisa, ‘ku nan sosegá di nan trabounan, pasobra nan obranan ta sigui huntu ku nan.’”