Hòmber i Muhé Kreá pa Pas ku Otro

SEMPER hòmber i muhé a anhelá pa ta huntu. Ta Dios mes a krea hende ku e deseo aki. Yehova a mira ku no tabata bon pa e promé hòmber, Adam, sigui su so. P’esei Dios a traha “un yudadó [pa e hòmber] ku ta pas kuné.”

Yehova a pone Adam pega un soño profundo, i despues a tuma un di su repchinan i “a traha un muhé ku e repchi . . . i a hib’é pa e hòmber.” Ora Adam a mira e bunita kreashon aki di Yehova e tabata asina emoshoná ku el a deklará: “Esaki ta awor wesu di mi wesunan, i karni di mi karni.” Eva, e muhé perfekto ku su kualidatnan femenino, en bèrdat tabata hopi atraktivo. I Adam, komo un hòmber perfekto ku su dignidat maskulino, a meresé rèspèt. Nan a ser kreá pa pas ku otro. Beibel ta bisa: “P’esei un hòmber lo bandoná su tata i su mama i lo uni ku su esposa. I nan lo bira ún karni.”—Génesis 2:18-24.

Sin embargo, awe famianan ta habriendo for di otro, i hopi esposo i esposa ta trata otro masha malu i di un forma egoista. Un spiritu di kompetensia entre hòmber i muhé a fomentá un esfera di konflikto i diskordia. Tur esaki ta kontrali na e propósito di Dios pa nan. E hòmber a ser kreá pa kumpli ku un papel maravioso riba tera. E muhé mester a okupá un lugá úniko i digno na lado di e hòmber. Huntu nan mester a traha na armonia ku otro. For di kuminsamentu di eksistensia humano, hòmber i muhé ku ta respetá Dios a hasi esfuerso pa kumpli fielmente ku e papelnan ku Yehova a duna nan, i esaki a oumentá nan felisidat i satisfakshon. Kiko e papelnan aki ta, i kon nos por kumpli ku nan?

[Plachi na página 3]

Hòmber i muhé a ser kreá pa kumpli ku un papel digno den e areglo di Dios