Kon pa Keda Firme Ora un Yu Bira Rebelde
Kon pa Keda Firme Ora un Yu Bira Rebelde
UN SEÑORA kristian ku nos lo yama Joy a purba inkulká amor pa Yehova den su yu hòmber. Sin embargo, ora e yu tabata serka di kumpli binti aña, el a bira rebelde i a bandoná kas. Joy a bisa: “Esei ta e kos di mas doloroso ku mi a yega di pasa aden. Mi a sinti mi traishoná, kibrá i frustrá. Pensamentunan negativo a kaba ku mi.”
Kisas bo tambe a purba lanta bo yunan, siñando nan pa stima Dios i sirbié, pero despues un òf mas di nan a bira lomba p’e. Kon bo por biba ku e gran desilushon ei? Kiko por yuda bo keda firme den bo sirbishi na Yehova?
Ora e Yunan di Yehova A Bira Rebelde
Un promé paso ta pa realisá ku Yehova sa eksaktamente kon bo ta sinti bo. Na Isaias 49:15, nos ta lesa: “Un muhé por lubidá su yu ku e ta kria na pechu, i no tene kompashon ku e yu di su mondongo? Esakinan por lubidá, ma ami sí lo no lubidá bo.” Sí, Yehova tin e mesun sintimentunan ku un tata òf mama tin. P’esei, imaginá bo kon kontentu lo e tabata ora tur su yunan angelikal tabata alab’é i sirbié. Ora Yehova a kontestá e patriarka Jòb “for di e warwarú,” el a rekordá e momentonan di goso ku el a pasa ku su famia uní di kriaturanan spiritual, bisando: “Na unda bo tabata tempu ku mi a pone fundeshi di mundu? . . . Tempu ku e streanan di mardugá tabata kanta huntu, i tur e yu hòmbernan di Dios tabata grita di alegria?”—Jòb 38:1, 4, 7.
Ku tempu, e Dios berdadero a mira un yu angelikal perfekto rebeldiá kontra dje i bira Satanas, ku ta nifiká “Resistidó.” Tambe Yehova a wak su promé yu hòmber Adam, i su esposa perfekto, Eva, djòin Satanas den e rebelion. (Génesis 3:1-6; Revelashon 12:9) Despues, otro yunan angelikal “a bandoná nan propio lugá di biba” i a rebeldiá kontra Dios.—Hudas 6.
E Skritura no ta bisa nos kon Yehova a sinti su mes ora algun di su yunan perfekto a lanta kontra dje. Sin embargo, Beibel ta bisa spesífikamente: “SEÑOR a mira ku maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so. I a duel SEÑOR ku el a traha hende riba tera i e tabata tristu den su kurason.” (Génesis 6:5, 6) E rebeldia di Yehova su pueblo skohí, Israel, tambe a “hasié tristu” i a kibra su kurason.—Salmo 78:40, 41.
Sin duda, Yehova ta komprondé pa mayornan ku ta sinti nan tristu i ku tin un kurason kibrá pa motibu di e komportashon di yunan rebelde. Den su Palabra, Beibel, el a duna konseho sano i animashon pa yuda e mayornan ei enfrentá nan situashon. Dios ta ekshortá nan pa tira nan ansiedat riba dje, pa humiá nan mes i pa resistí Satanas e Diabel. Laga nos mira kon aplikashon di e konseho aki por yuda bo keda firme ora bo yu bira rebelde.
Tira Bo Ansiedat Riba Yehova
Yehova sa ku masha poko kos ta kousa mayornan mas ansiedat ku e sintimentu ku nan yunan ta den peliger di kousa daño na nan mes òf ku otro hende por hasi nan daño. Apòstel Pedro ta identifiká un manera pa enfrentá esaki i otro preokupashonnan. El a skirbi: “Tira tur boso ansiedat riba [Yehova], pasobra e ta interesá den boso.” (1 Pedro 5:7, NW) Pakiko e invitashon i konsuelo aki ta di interes partikular pa mayornan ku tin un yu rebelde?
Tempu bo yu tabata yòn, bo tabata atento pa proteh’é kontra peliger, i probablemente el a sigui e guia amoroso ku bo a dun’é. Sin embargo, segun ku el a bira mas grandi, bo influensia riba dje lo a mengua, pero bo interes profundo pa proteh’é kontra daño sí no a bira ménos. De echo, kisas el a bira asta mas grandi.
Komo resultado di esei, ora bo yu bira rebelde i sufri daño spiritual, emoshonal òf físiko, bo por sinti ku ta abo ta esun kulpabel. Joy, menshoná anteriormente, a sinti su mes asina. El a bisa: “Mi tabatin e idea ku ta ami a frakasá, p’esei tur dia mi tabata repasá e susesonan di pasado den mi mente.” Spesialmente na e momentonan ei Yehova ke pa bo ‘tira tur bo ansiedat riba dje.’ Si bo hasi esei, lo e yuda bo. E salmista a bisa: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” (Salmo 55:22) Joy a eksperensiá e konsuelo ei. El a splika: “Mi a papia ku Yehova íntimamente tokante tur loke mi tabata sinti. Mi a deshogá mi mes kompletamente, i esei tabata e alivio di mas grandi ku mi a haña.”
Komo un mayor imperfekto, podisé bo a kometé foutnan tempu bo tabata lanta bo yu. Pero pakiko enfoká riba esakinan? Evidentemente, Yehova no ta hasié, pasobra e salmista inspirá a kanta: “Si Abo, SEÑOR, tuma inikidatnan na kuenta, o SEÑOR, ken lo por a keda para?” (Salmo 130:3) Asta si bo tabata un mayor ku no a hasi nada robes, tòg bo yu lo por a bira rebelde. Pues papia ku Yehova den orashon tokante bo sintimentunan, i lo e yuda bo trata ku e situashon. Sin embargo, pa abo mes sigui sirbi Yehova na un manera firme i pa bo evitá di bira víktima di Satanas, bo tin ku hasi asta mas ku esei.
Humiá Bo Mes
“Humiá boso mes . . . bou di e man poderoso di Dios,” Pedro a skirbi, “pa e por halsa boso na e tempu apropiá.” (1 Pedro 5:6) Pakiko bo mester ta humilde ora bo yu bira rebelde? Ademas di laga bo ku sintimentu di kulpa i doló, un yu rebelde por pone bo kara un poko na bèrgwensa. Kisas bo ta preokupá pasobra e akshonnan di bo yu a daña e reputashon di bo famia, foral si el a ser ekspulsá for di e kongregashon kristian. Sintimentu di kulpa kombiná ku humiashon por kita tur bo smak di asistí na reunionnan di kongregashon.
Ora di trata ku un situashon asina, bo tin ku ehersé sabiduria práktiko. Proverbionan 18:1 ta spièrta: “Esun ku isolá su mes ta buska su mes deseo; su furia ta lanta kontra tur sabiduria sano.” Dor di asistí na reunionnan kristian regularmente apesar di bo doló, lo bo por risibí hopi instrukshon i animashon. Joy a atmití: “Na prinsipio mi no tabatin gana di atendé ku ningun hende. Pero mi tabata rekordá mi mes riba e importansia di mi rutina spiritual. Ademas, si mi a keda kas, lo mi a keda pensa so riba mi problemanan. E reunionnan a yuda mi konsentrá riba kosnan spiritual edifikante. Mi ta masha gradisidu ku mi no a isolá mi mes i pèrdè e apoyo amoroso di mi rumannan.”—Hebreonan 10:24, 25.
Kòrda tambe ku kada miembro di un famia mester hiba su mes “karga” di responsabilidat. (Galationan 6:5) Yehova ta ferwagt di mayornan ku nan ta stima i disipliná nan yunan. E ta ferwagt di yunan tambe ku nan ta obedesé i onra nan mayornan. Si mayornan hasi nan bèst pa lanta nan yunan den “e disiplina i instrukshon di Señor,” e mayornan mes lo tin un bon reputashon dilanti Dios. (Efesionan 6:1-4) Si un yu rebeldiá kontra e disiplina amoroso di su mayornan, ta su propio reputashon e ta daña. Proverbionan 20:11 ta bisa: “Te asta un mucha ta konosí pa su echonan, si su kondukta ta puru i rekto.” E rebeldia di Satanas sigur no a daña Yehova su reputashon entre esnan ku ta na haltura di e echonan.
Resistí Diabel
Pedro a spièrta: “Sea sobrio, sea alerta. Boso atversario, e Diabel, ta kana rònt manera un leon ku ta gruña, buskando ken e por devorá.” (1 Pedro 5:8) Meskos ku un leon, hopi bes Diabel ta dirigí su atakenan kontra hóbennan i esnan sin eksperensia. Den tempunan antiguo, tabatin leon ta kana rònt den Israel i nan tabata un peliger pa animalnan doméstiko. Si un lamchi yòn a desviá for di e tou, lo e por a bira un proi fásil. Instinto di un karné hembra lo a pon’é riska su bida pa protehá su lamchi. Ma ni un karné adulto lo no por a resistí un leon. P’esei, tabatin mester di wardadónan balente pa protehá e tou.—1 Samuel 17:34, 35.
Pa Yehova protehá su karnénan figurativo kontra e “leon ku ta gruña,” el a sòru pa por tin wardadónan spiritual pa kuida e tou bou di e “wardadó prinsipal,” Hesukristu. (1 Pedro 5:4) Pedro ta duna e hòmbernan nombrá ei e ekshortashon aki: “Pastoriá e tou di Dios meimei di boso, hasiendo e trabou di kuidadó, no fòrsá, ma boluntariamente, segun e boluntat di Dios; i no pa ganashi desonesto, sino ku hopi afan.” (1 Pedro 5:1, 2) Ku boso koperashon komo mayornan, e wardadónan aki lo por yuda un hóben korigí su kaminda spiritualmente.
Ora wardadónan kristian mester konsehá bo yu rebelde, bo por sinti bo inkliná pa proteh’é kontra e disiplina. Sin embargo, ku e proseder ei lo bo ta kometiendo un ekibokashon serio. Pedro a deklará: “Resistí [e Diabel],” no e wardadónan spiritual.—1 Pedro 5:9.
Ora Disiplina Ta Severo
Si bo yu ta un kristian batisá i e no repentí, e por risibí e forma di disiplina di mas severo, ku ta ekspulshon for di e kongregashon. E grado di kontakto ku lo bo tin kuné e ora ei ta dependé di su edat i otro sirkunstansianan.
Si e mucha ta menor di edat i ta biba na kas, di mes lo bo sigui perkurá pa su nesesidatnan físiko. Tambe bo tin ku disiplin’é i siñ’é e normanan di moralidat; ta abo tin e responsabilidat pa perkurá esakinan. (Proverbionan 1:8-18; 6:20-22; 29:17) Lo bo ke kondusí un estudio di Beibel kuné, i lag’é partisipá direktamente. Bo por hala su atenshon riba vários teksto di Beibel i na e publikashonnan ku “e esklabo fiel i prudente” ta perkurá. (Mateo 24:45) Ademas, bo por bai e reunionnan kristian ku bo yu i lag’é sinta banda di bo. Bo por hasi tur e kosnan aki ku e speransa ku lo e tuma konseho bíbliko na pechu.
E situashon lo ta poko diferente si e yu ekspulsá no ta menor di edat i ta biba otro kaminda. Apòstel Pablo a spièrta e kristiannan den e stat antiguo di Korinto: “No asosiá ku ningun hende ku ta ruman pa nòmber, si e ta un hende inmoral, òf golos pa plaka, òf un adoradó di dios falsu, òf un blasfemadó, òf un buraché, òf un estafadó—pa ni kome mes huntu ku un hende asina.” (1 Korintionan 5:11) Ounke ora di atendé asuntunan di famia mester mantené sierto kontakto ku e yu ekspulsá, un mayor kristian mester hasi esfuerso pa evitá asosiashon innesesario.
Ora wardadónan kristian disipliná un yu ku a kometé un malecho, lo no ta sabí pa purba rechasá òf minimisá nan akshon basá riba Beibel. Si bo tuma parti pa bo yu, bo no ta dunand’e ningun protekshon kontra Diabel. En realidat, lo bo ta poniendo bo propio salú spiritual na peliger. Di otro banda, dor di apoyá e esfuersonan di e wardadónan, lo bo keda ‘firme den fe’ i perkurá e mihó yudansa pa bo yu.—1 Pedro 5:9.
Yehova Lo Sostené Bo
Si bo yu bira rebelde, kòrda ku bo no ta e úniko mayor ku ta pasa den algu asina. Otro mayornan kristian tabatin eksperensianan similar. Sea kual sea e pruebanan ku nos ta pasa aden, Yehova por sostené nos.—Salmo 68:19.
Konfia riba Yehova den orashon. Asosiá regularmente ku e kongregashon kristian. Apoyá e disiplina ku wardadónan nombrá ta duna. Hasiendo esei, lo bo por keda firme. I bo bon ehèmpel por yuda bo yu respondé na e invitashon amoroso di Yehova pa bolbe bèk na dje.—Malakias 3:6, 7.
[Plachinan na página 18]
Saka fortalesa for di orashon i e kongregashon kristian