Pregunta di Lektor

Den ki sentido Salomon a haña solamente “un hòmber entre mil, ma entre tur esakinan [e] no a haña un muhé”?—Eklesiastés 7:28.

Pa por komprondé e palabranan inspirá aki korektamente, nos tin ku komprondé promé kon Dios ta mira hende muhé. Beibel ta referí na Ruth, suegra di e biuda Noemí, komo “un muhé ekselente.” (Ruth 3:11) Segun Proverbionan 31:10, un bon esposa “bal muchu mas ku rubí.” Kiko anto Rei Salomon di antiguo Israel tabata ke men ora el a bisa: “Mi a haña . . . un berdadero hòmber den mil, pero nunka un berdadero muhé”?—Moffatt.

E konteksto ta mustra ku den tempu di Salomon e moralidat di hende muhé lo mester tabata hopi abou. (Eklesiastés 7:26) Esaki kisas pa gran parti tabata debí na e influensia di muhénan stranhero ku a praktiká adorashon di Baal. Asta Rei Salomon a sukumbí pa e preshon di su tantísimo esposanan stranhero. Beibel ta bisa: “E tabatin sheteshen esposa, prensèsnan, i treshen konkubina, i su esposanan a hasi su kurason desviá” i el a bai adorá diosnan falsu. (1 Reinan 11:1-4) E moralidat di hende hòmber tambe tabata abou; pa haña un hòmber hustu den mil tabata difísil, kasi imposibel. Salomon a yega na e konklushon: “Esaki so mi a haña: Dios a traha hende rekto, ma nan a buska hopi plan di maldat.” (Eklesiastés 7:29) Esaki ta un konklushon tokante humanidat, refiriendo na hende komo e rasa humano, no na hende hòmber kompará ku hende muhé. Pues, nos mester mira e palabranan ku nos ta haña na Eklesiastés 7:28 komo un komentario riba e kondishon moral en general di e hendenan den tempu di Salomon.

Sin embargo, tin un otro posibel nifikashon di e versíkulo aki. Kisas tambe e ta profétiko, pasobra nunka un hende muhé no a duna Yehova obedensia perfekto. Pero tin ún hòmber ku sí a hasié, Hesukristu.—Romanonan 5:15-17.

[Plachi na página 31]

“Un hòmber entre mil”