E Palabra di Yehova Ta Bibu

Puntonan Sobresaliente di e Buki di Isaias—II

ISAIAS ta ehersiendo su enkargo komo profeta fielmente. E deklarashonnan formal ku el a ekspresá kontra e reino di dies tribu di Israel a kumpli kaba. Awor e tin mas di bisa tokante e futuro di Yerusalèm.

E ta profetisá ku e stat di Yerusalèm lo ser destruí i su habitantenan lo ser hibá prezu. Pero e desolashon lo no ta permanente. Despues di un tempu, adorashon berdadero lo keda restorá. Esaki ta e mensahe básiko di Isaias 36:1–66:24. * Nos lo benefisiá di un konsiderashon di loke tin pará den e kapítulonan aki pasobra hopi di e profesianan den e sekshon aki tin nan kumplimentu prinsipal, òf final, den nos tempu òf lo kumpli den futuro serkano. E parti aki di e buki di Isaias ta kontené tambe profesianan emoshonante relashoná ku e Mesias.

“MIRA, E DIANAN TA BIN”

(Isaias 36:1–39:8)

Den e di 14 aña di e reinado di Rei Ezekias (aña 732 P.E.K.), e asirionan ta invadí Huda. Yehova ta primintí di defendé Yerusalèm. E menasa di ser invadí ta terminá ora ku un solo angel di Yehova ta mata 185.000 sòldá asirio.

Ezekias ta bira malu. Yehova ta kontestá su orashon i ta kur’é, dunand’e 15 aña mas di bida. Rei di Babilonia ta manda mensaheronan bin felisit’é, anto Ezekias imprudentemente ta mustra nan tur su tesoronan. Isaias ta entregá Yehova su mensahe na Ezekias, bisando: “Mira, e dianan ta bin ku tur loke tin den bo kas, i tur loke bo tatanan a akumulá te dia djawe, lo wòrdu hibá Babilonia.” (Isaias 39:5, 6) Un poko mas ku 100 aña despues, e profesia ei ta kumpli.

Kontesta Riba Pregunta Bíbliko:

38:8—Ta riba ki “trapi” Dios a laga e sombra bolbe bai patras? Komo ku pa siglo 8 promé ku nos era, hende tabata usa oloshi di solo tantu na Egipto komo na Babilonia, esaki por ta referí na e tretnan di un oloshi di solo ku e tata di Ezekias, Akaz, lo a optené. Òf lo e por ta referí tambe na un trapi paden di e palasio. Un pilá kantu di e trapi kisas gradualmente a tira sombra riba e tretnan, lokual por a sirbi komo un manera pa wak tempu.

Lès pa Nos:

36:2, 3, 22. Ounke Sebna a pèrdè su puesto komo mayordomo, e tabatin mag di sigui den servisio di rei komo sekretario di esun ku a tuma su lugá. (Isaias 22:15, 19) Si pa un  motibu òf otro nos ser kitá for di un puesto di responsabilidat den e organisashon di Yehova, nos tambe lo no tin ku sigui sirbi Dios den kualke kapasidat ku e ta permití?

37:1, 14, 15; 38:1, 2. Den tempu di angustia lo ta sabí di nos parti pa akudí na Yehova den orashon i pone nos pleno konfiansa den dje.

37:15-20; 38:2, 3. Ora ku Yerusalèm tabata bou di menasa di Asiria, Ezekias su preokupashon prinsipal tabata ku derota di Yerusalèm lo a trese reproche riba e nòmber di Yehova. Ora ku Ezekias a haña sa ku lo e muri di su malesa, su preokupashon a bai mas leu ku su interesnan personal. Loke mas a preokup’é tabata kiko e echo ku lo e muri sin un heredero lo a nifiká pa e liña di rei for di David. Tambe e tabata preokupá tokante ken lo a dirigí e lucha kontra e asirionan. Meskos ku Ezekias, nos ta konsiderá santifikashon di e nòmber di Yehova i kumplimentu di su propósito mas importante ku nos propio salbashon.

38:9-20. E kantika aki di Ezekias ta siña nos ku no tin nada mas importante den bida ku e oportunidat di alabá Yehova.

“LO BO WÒRDU KONSTRUÍ”

(Isaias 40:1–59:21)

Despues di a predisí e destrukshon di Yerusalèm i e koutiverio na Babilonia ku esei lo hiba na dje, Isaias ta profetisá tokante restorashon di adorashon berdadero. (Isaias 40:1, 2) Isaias 44:28 ta deklará tokante Yerusalèm: “Lo bo wòrdu konstruí.” Hende lo karga e imágennan di e diosnan di Babilonia bai kuné manera ekipahe. (Isaias 46:1) Babilonia lo ser destruí. Tur esaki ta kumpli dos siglo despues.

Yehova lo duna su sirbidó komo “un lus pa e nashonnan.” (Isaias 49:6) E “shelu” babilóniko, esta e grupo ku tabata na mando, lo “ser plamá den fragmento meskos ku huma,” i su súpditonan “lo muri manera sangura”; pero e ‘yu muhé katibu di Sion lo libra su mes for di e kadenanan ku tin rònt di su garganta.’ (Isaias 51:6, NW; 52:2) Yehova ta bisa na esnan ku bin serka dje i ku ta skucha: “Lo mi sera un aliansa eterno ku boso, segun e miserikòrdianan fiel mustrá na David.” (Isaias 55:3) Ora un hende ta biba na armonia ku e rekisitonan hustu di Dios, esei ta hib’é na haña ‘delisia den Yehova.’ (Isaias 58:14) Di otro banda, e erornan di e pueblo ta ‘kousa separashon entre nan i nan Dios.’—Isaias 59:2.

Kontesta Riba Pregunta Bíbliko:

40:27, 28—Dikon Israel a bisa: “Mi kaminda ta skondí pa SEÑOR, i mi Dios no ta hasi kaso di mi derecho”? Algun hudiu den Babilonia kisas a pensa ku Yehova no tabata mira e inhustisianan ku nan tabata sufri, ku eseinan tabata skondí p’e. P’esei nan a haña e rekordatorio ku Babilonia no tabata fuera di alkanse di e Kreadó di tera, kende no ta kansa ni fatigá.

43:18-21—Dikon Dios a bisa e eksiliadonan ku tabata biniendo kas bèk pa nan “no rekordá e kosnan di ántes”? Esaki no tabata den e sentido ku nan mester a lubidá Yehova su aktonan di liberashon di pasado. Mas bien, Yehova tabata ke pa nan alab’é a base di “algu nobo” ku nan mes lo a eksperensiá, manera por ehèmpel nan regreso sano i salvo na Yerusalèm, kisas via un ruta mas direkto atraves di desierto. “Un multitut grandi” ku lo sali for di “e gran tribulashon” tambe lo tin motibunan nobo i personal pa glorifiká Yehova.—Revelashon 7:9, 14.

49:6—Kon e Mesias ta “un lus pa e nashonnan,” apesar ku su ministerio terenal tabata limitá na e yunan di Israel? Esaki ta debí na loke a sosodé despues di e morto di Hesus. Beibel ta apliká Isaias 49:6 na su disipelnan. (Echonan 13:46, 47) Awe, kristiannan ungí, ku yudansa di un multitut grandi di adoradó, ta fungi komo “un lus pa e  nashonnan,” dunando iluminashon na hende “te na e finnan di tera.”—Mateo 24:14; 28:19, 20.

53:10, NW—Den ki sentido Yehova tabatin plaser den aplastá su Yu? Lo mester a duel Yehova, e Dios di kompashon i empatia, pa mira su Yu stimá sufri. Asina mes, E tabatin plaser den e manera di buena gana ku Hesus a obedes’é i den tur loke Hesus su sufrimentu i morto lo a logra.—Proverbionan 27:11; Isaias 63:9.

53:11—Kiko ta e konosementu pa medio di kua e Mesias “lo hustifiká hopi hende”? Esaki ta e konosementu ku Hesus a atkerí ora el a bin na tera, bira hende i sufri inhustamente te na morto. (Hebreonan 4:15) Asina el a perkurá un sakrifisio di reskate ku tabata nesesario pa yuda kristiannan ungí i e multitut grandi haña un posishon hustu dilanti di Dios.—Romanonan 5:19; Santiago 2:23, 25.

56:6—Ken ta “e stranheronan,” i den ki manera nan ta “tene firme na [Yehova su] aliansa”? “E stranheronan” ta e “otro karnénan” di Hesus. (Juan 10:16) Nan ta tene firmemente na e pakto òf aliansa nobo den e sentido ku nan ta obedesé e leinan relashoná ku e aliansa ei, ta koperá plenamente ku e areglonan hasí mediante dje, ta tuma di e mesun alimento spiritual ku kristiannan ungí i ta sostené e ungínan den e trabou di prediká e Reino i hasi disipel.

Lès pa Nos:

40:10-14, 26, 28. Yehova ta fuerte i suave, todopoderoso i di sabiduria infinito, i su komprondementu ta hopi mas grandi di loke nos por kapta.

40:17, 23; 41:29; 44:9; 59:4. Aliansanan polítiko i imágennan di diosnan falsu ta “nada,” nan ta insignifikante. Konfia den nan no tin ningun balor.

42:18, 19; 43:8. Si nos ta sera nos wowo pa Dios su Palabra skirbí i ta sera nos orea pa no tende su instrukshon duná mediante “e esklabo fiel i prudente,” nos ta bira siegu i surdu den sentido spiritual.—Mateo 24:45.

43:25. Yehova ta kita nos transgreshonnan pa su mes kousa. Santifikashon di e nòmber di Yehova ta e kos di mas importante. Nos liberashon for di sklabitut na piká i morto i nos hañamentu di bida eterno ta di segundo importansia.

44:8. Nos tin e sosten di Yehova. E ta stabil i firme manera un baranka. Nunka nos no mester tin miedu di duna testimonio tokante su Divinidat!—2 Samuel 22:31, 32.

44:18-20. Idolatria ta indikashon di un kurason korumpí. Nada lo mester okupá e lugá di Yehova den nos kurason.

46:10, 11. Un prueba apsoluto di Yehova su Divinidat ta ku e tin e kapasidat di ‘establesé su propósito,’ es desir, di kumpli kuné.

48:17, 18; 57:19-21. Si nos ta akudí na Yehova pa salbashon, ta hala serka dje i ta presta atenshon na su mandamentunan, nos pas lo ta mes abundante ku e awanan di un riu ku ta kore i nos echonan di hustisia lo ta mes abundante ku e olanan di laman. Hende ku no ta presta atenshon na e Palabra di Dios ta manera “laman brutu.” Nan no tin pas.

52:5, 6. E babilonionan ekibokadamente a konkluí ku e Dios berdadero tabata suak. Nan no a rekonosé ku Israel tabata den koutiverio pasobra Yehova tabata mal kontentu ku su pueblo. Ora otro hende ta konfrontá kalamidat, lo ta sabí di nos parti pa nos no saka konklushonnan purá relashoná ku kiko lo ta e kousa.

52:7-9; 55:12, 13. Nos tin por lo ménos tres motibu pa partisipá ku goso den e trabou di prediká e Reino i hasi disipel. Nos pianan ta bunita pa hende humilde ku tin hamber spiritual. Nos ta mira Yehova ‘ku nos mes wowo,’ es desir, nos tin un relashon íntimo  kuné. Ademas, nos ta disfrutá di prosperidat spiritual.

52:11, 12. Pa nos ta kualifiká pa karga ‘e artíkulonan-di-uso di Yehova’—su provishonnan pa sirbishi sagrado—nos mester ta limpi den sentido moral i spiritual.

58:1-14. Desplegá deboshon i hustisia na un manera hipókrita ta enbano. Adoradónan berdadero mester abundá ku ekspreshonnan sinsero di deboshon na Dios i echonan di amor fraternal.—Juan 13:35; 2 Pedro 3:11.

59:15b-19. Yehova ta opservá asuntunan humano i ta intervení na su debido tempu.

LO E “TA UN KORONA DI BUNITESA”

(Isaias 60:1–66:24)

Señalando na e restorashon di adorashon berdadero den tempu antiguo i tambe den nos tempu, Isaias 60:1 ta deklará: “Lanta, bria pasobra bo lus a yega, i e gloria di SEÑOR ta bria riba bo.” Sion lo ta ‘un korona di bunitesa den e man di Yehova.’—Isaias 62:3.

Isaias ta hasi orashon na Yehova na fabor di su paisanonan ku lo arepentí durante nan eksilio na Babilonia. (Isaias 63:15–64:12) Despues di mustra e kontraste entre sirbidónan berdadero ku esnan falsu, e profeta ta deklará kon Yehova lo bendishoná esnan ku ta sirbié.—Isaias 65:1–66:24.

Kontesta Riba Pregunta Bíbliko:

61:8, 9—Kiko ta e “aliansa eterno,” i ken ta e “yunan”? Esaki ta e aliansa nobo ku Yehova a sera ku kristiannan ungí. E “yunan” ta e “otro karnénan,” esta, e miónes di hendenan ku ta reakshoná faborablemente riba nan mensahe.—Juan 10:16.

63:5—Kon Dios su furia a sosten’é? Dios su furia ta un emoshon kontrolá, su indignashon hustu. E furia aki ta sosten’é i motiv’é pa ehekutá su huisionan hustu.

Lès pa Nos:

64:6. Hende imperfekto no por salba nan mes. Pa loke ta hasimentu di ekspiashon pa piká, nan aktonan hustu no ta bal mas ku paña sushi.—Romanonan 3:23, 24.

65:13, 14. Yehova ta bendishoná su sirbidónan fiel, satisfasiendo nan nesesidatnan spiritual na abundansia.

66:3-5. Yehova ta odia hipokresia.

“Sea Kontentu”

Esta un gran konsuelo e profesianan di restorashon di adorashon berdadero lo mester tabata pa e hudiunan fiel ku a biba komo eksiliado na Babilonia! Yehova a bisa nan: “Sea kontentu i regosihá pa semper den loke mi ta krea; pasobra mira, mi ta krea Yerusalèm pa goso, i su pueblo pa alegria.”—Isaias 65:18.

Nos tambe ta bibando den un tempu ku skuridat ta tapa e tera i e nashonnan ta den skuridat profundo. (Isaias 60:2) Nos ta konfrontá “tempunan trabahoso.” (2 Timoteo 3:1) Pues, Yehova su mensahe di salbashon ku tin den e buki bíbliko di Isaias ta di gran animashon pa nos.—Hebreonan 4:12.

[Nota]

[Plachi na página 8]

Bo sa kua ta e motibu prinsipal pakiko Ezekias a pidi Dios salb’é di e asirionan?

[Plachi na página 11]

“Ki bunita riba e serunan ta e pianan di esun ku ta trese bon nobo!”