Riba Shen Aña Pero ku un Propósito den Bida
Riba Shen Aña Pero ku un Propósito den Bida
ELIN ta un di e 60 habitantenan di Suesia ku resientemente tabata riba e lista di hende di 105 aña di edat òf mas. E tin 105 aña. Ounke e ta pasando tur su dianan den un kas di hende grandi, su salú ta permitié sigui sirbi komo un Testigu di Yehova aktivo, e bida ku el a skohe pa hiba mas ku 60 aña pasá.
Elin ta prediká na otro hende siguiendo e patronchi ku apòstel Pablo a pone tempu ku e tabata bou di aresto di kas. Pablo tabata prediká na tur hende ku a bishit’é. (Echonan 28:16, 30, 31) Asina tambe, Elin ta probechá di tur oportunidat pa papia ku trahadó di limpiesa, dentista, dòkter, pelukera, enfermera i otro personanan ku e topa den e kas, kompartiendo ku nan e bon nobo di Beibel. De bes en kuando, otro rumannan kristian di Elin su kongregashon asta ta invitá nan studiantenan di Beibel pa bishit’é pa asina nan por benefisiá di su konosementu i eksperensia.
Miembronan di Elin su kongregashon ta atmirá su spiritu alegre i kuriosidat. Un di nan a bisa: “E tin un abilidat fantástiko di keda bei ku e aktividatnan di kongregashon. E ta kòrda nòmber di tur e muchanan i di e rumannan ku resientemente a muda bin e kongregashon.” Elin ta bon konosí tambe pa su hospitalidat, su sentido di humor i punto di bista positivo tokante bida.
Kiko ta yuda Elin mantené su goso i keda enfoká riba su propósito den bida? E ta lesa un teksto di Beibel tur dia for di e foyeto Eksaminando e Skritura Diariamente, publiká dor di Testigunan di Yehova. Ku yudansa di un vergrootglas, tur dia e ta lesa tambe un parti di Beibel. Elin ta prepará pa e reunionnan semanal di Testigunan di Yehova, i ounke físikamente e no por asistí na esakinan, e ta skucha grabashon di e reunionnan aki. Ora nos lesa Beibel i e publikashonnan basá riba Beibel regularmente, i no laga di bai reunionnan kristian, esei por yuda nos hiba un bida di satisfakshon i ku un propósito, sin importá nos edat.—Salmo 1:2; Hebreonan 10:24, 25.