Samuel A Promové Adorashon Berdadero

PROFETA Samuel a reprendé su kompañeronan di kreensia ku a pidi pa un rei humano i el a urgi nan pa obedesé Dios. Pa konfirmá su outoridat komo profeta, el a pidi Yehova duna un señal den forma di un tempestat. Durante e periodo di aña ei, tempu di kosecha di trigu, kasi bo no tabata haña tempestat den Israel. Sin embargo, Dios a manda bos (strena) i áwaseru. Komo resultado, e pueblo a keda den gran temor di Yehova i di su representante, Samuel.—1 Samuel 12:11-19.

Profeta Samuel tabata un eskritor tambe. Su relatonan históriko a deskribí hopi suseso eksitante i ta abarká un periodo di 330 aña. Nan ta inkluí e hazañanan di e Huesnan di Israel. Por ehèmpel, e historia di bida real di Samson, e hòmber mas fuerte ku a yega di biba, tabata fuente di inspirashon pa hopi poesia i ópera i tambe produkshonnan teatral i pelíkula. (Huesnan, kapítulo 13-16) Samuel a skirbi tambe tokante Ruth ku su suegra, Noemí, dos muhé ku tabata biuda i pober. E relato verídiko aki ku un final felis, tambe ta masha emoshonante.—Ruth, kapítulo 1-4.

Ki lèsnan nos por siña for di e bukinan ku Samuel a skirbi i for di su bida? Kon el a promové adorashon berdadero?

Samuel Su Hubentut

Elkana, tata di Samuel, tabata un adoradó di Yehova i un esposo amoroso. Ana, kasá di Elkana, tabata un muhé spiritualmente fuerte. Ana tabata steril, i na e kas di Yehova na Silo, el a primintí solemnemente den un orashon ferviente: “O [Yehova] di ehérsitonan, si di bèrdat bo mira e aflikshon di bo sirbiente i kòrda riba mi i no lubidá riba bo sirbiente, ma duna bo sirbiente un yu hòmber, e ora ei lo mi dun’é na SEÑOR tur e dianan di su bida, i nunka nabaha lo no pasa riba su kabes.” (1 Samuel 1:1-11) Esaki a nifiká ku lo el a dediká e yu na e sirbishi di Yehova.

Ana a hasi orashon den silensio. E relato ta bisa ku “solamente su lepnan tabata move.” Sumo Saserdote Elí ekibokadamente a asumí ku Ana tabata burachi i a reprend’é. Sin embargo, respetuosamente Ana a splik’é su situashon, i Elí a bisa: “Bai na pas; i ku e Dios di Israel duna bo bo petishon ku bo a hasi na dje.” Yehova a skucha su petishon, pasobra e relato ta sigui bisa: “A sosodé ku na su debido tempu, despues ku Ana a konsebí, el a duna lus na un yu hòmber; i el a yam’é Samuel, bisando: ‘Pasobra mi a pidié na SEÑOR.’”—1 Samuel 1:12-20.

Samuel su mayornan a lant’é den ‘e disiplina i instrukshon di Yehova.’ (Efesionan 6:4) Asina ku Ana a kita Samuel for di pechu el a hib’é na e kas di Dios na Silo i a dun’é na Sumo Saserdote Elí. Bou di su kuido, e mucha ‘tabata sirbi Yehova.’ Ana a ekspresá su gran goso ku palabranan konmovedor di gradisimentu ku despues a keda registrá pa Samuel mes.—1 Samuel 2:1-11.

Si bo ta un mayor, bo ta animando bo yunan pa sigui un karera den e sirbishi di Yehova? E mihó manera ku un hende lo por usa su energia ta pa promové adorashon berdadero.

Samuel a adaptá su mes bon na e bida na e santuario. El “a sigui krese ku Yehova” i a bira “mas agradabel, tantu for di e punto di bista di Yehova komo di hende.” El a imitá e kualidatnan di Dios lokual ku a pone otro hende haña kariño p’e.—1 Samuel 2:21, 26, NW.

Esaki sí no tabata e kaso ku e yunan di Elí—Ofni ku Finees—ku no tabata sirbi pa  nada i ku no a “rekonosé Yehova” [NW]. Nan a praktiká inmoralidat seksual i a tuma pa nan mes e mihó parti di e sakrifisionan ku hende tabata trese na e santuario. Dios a yega di manda un profeta kaba serka Elí pa anunsiá e kastigu ku e por a spera, lokual a inkluí e morto di su dos yunan. (1 Samuel 2:12, 15-17, 22-25, 27, 30-34) Yehova a usa Samuel pa entregá un mensahe mas di huisio.

Samuel Ta Fungi Komo Profeta

Dios a bisa Samuel pa bisa Elí: “Mi ta bai kastigá henter su famia pa semper, pa e maldat ku e sa di dje kaba: pasobra su yunan a maldishoná Dios pero e no a skual nan.” Esei no tabata un mensahe fásil pa duna, i Elí mes a insistí pa Samuel no skonde ni un solo palabra p’e. Asina Samuel a kont’é tur loke Yehova a bisa. Samuel tabatin hopi kurashi!—1 Samuel 3:10-18, BPK.

Segun ku Samuel a krese bira adulto, henter Israel a bin sa ku e tabata profeta di Dios. (1 Samuel 3:19, 20) E huisio ku Samuel a predisí a kuminsá ora ku Israel a sufri un derota aplastante na man di e filisteonan. Ofni ku Finees a muri den e bataya, i e filisteonan a kapturá e arka di aliansa di Yehova. Ora ku Elí a tende ku su yunan a muri i ku nan a kapturá e Arka, el a kai patras for di su stul, kibra su garganta i a muri.—1 Samuel 4:1-18.

Binti aña despues, Samuel a urgi e israelitanan pa bandoná adorashon falsu. Nan a reakshoná positivo dor di eliminá nan ídolonan, yuna i konfesá nan pikánan. Samuel a hasi orashon i a presentá un ofrenda kimá na nan fabor. Ku ki resultado? Ora e filisteonan a ataká, Dios a konfundí nan, i Israel su kontra-atake a aplastá e enemigu. Ku e bendishon di Yehova, e situashon di e israelitanan a mehorá konsiderablemente, i nan a rekuperá e teritorio ku e filisteonan a kita for di nan.—1 Samuel 7:3-14.

Samuel definitivamente a promové adorashon berdadero. Por ehèmpel, el a sòru pa un parti di e botin di bataya ser usá pa mantené e tabernakel. El a yuda organisá e selebrashonnan di Pasku hudiu i e sirbishi di e levitanan wardadó-di-porta. (1 Krónikanan 9:22; 26:27, 28; 2 Krónikanan 35:18) For di su kas na Rama, Samuel tabata hasi biahenan anual pa bai husga den vários stat. El a gana e reputashon di ta onesto i imparsial. Komo ku hende a respetá Samuel, e por a yuda nan spiritualmente. (1 Samuel 7:15-17; 9:6-14; 12:2-5) Samuel su onestidat i spiritualidat sin duda a motivá hopi hende pa sigui su ehèmpel. E proseder di Samuel tin mesun efekto riba bo?

Israel Ta Pidi pa un Rei

Den su behes, Samuel a nombra su yu hòmbernan, Joel i Abias, komo hues. Nan “no a kana den su pasonan, ma a desviá bai tras di ganashi desonesto i a tuma plaka pasá bou di mesa i a pèrvèrtí hustisia.” Nan kondukta a pone e ansianonan di Israel pidi pa un rei. (1 Samuel 8:1-5) Esaki tabata malu den bista di Samuel. Sin embargo, ora el a hasi orashon tokante e asuntu, Yehova a bis’é: “No ta abo nan a rechasá, sino ta ami nan a rechasá di ta rei riba nan.” (1 Samuel 8:6, 7) Dios a bisa Samuel kumpli ku e deseo di e pueblo i spièrta nan ku bou di un monarkia nan lo pèrdè sierto libertatnan. Ora ku e pueblo a insistí, Yehova a hasi areglo pa  Samuel ungi Saul komo rei.—1 Samuel 8:6-22; 9:15-17; 10:1.

Samuel a apoyá e areglo aki apesar ku e tabatin su dudanan. Despues ku e israelitanan a logra un viktoria riba e amonitanan, el a reuní e pueblo na Gilgal pa konfirmá Saul su nombramentu komo rei. (1 Samuel 10:17-24; 11:11-15) Samuel a repasá e historia di Israel i a konsehá e rei i e pueblo pa obedesé Yehova. Dios a kontestá e orashon di Samuel ku e áwaseru i bos inusual pa e temporada ei, menshoná den e introdukshon. E tempestat ei a pone e pueblo atmití nan eror di rechasá Yehova. Ora nan a pidi Samuel hasi orashon pa nan, el a kontestá: “Pa loke t’ami, leu sea di mi di peka kontra SEÑOR dor di stòp di hasi orashon pa boso; ma lo mi instruí boso den e kaminda bon i rekto.” Ki un gran ehèmpel di amor leal pa Yehova i pa su pueblo! (1 Samuel 12:6-24) Abo tambe ta mesun dispuesto pa apoyá areglonan teokrátiko i hasi orashon na fabor di rumannan den fe?

E Promé Dos Reinan Humano di Israel

Saul tabata un hòmber modesto aprobá pa Dios. (1 Samuel 9:21; 11:6) Pero ku tempu, el a stòp di sigui e instrukshonnan di Dios. Por ehèmpel, Samuel a reprendé Saul pasobra e no a tene pasenshi i warda, manera Samuel a mand’é, sino mas bien a bai ofresé un sakrifisio. (1 Samuel 13:10-14) Ora ku Saul a desobedesé i a spar e bida di Rei Agag di Amalek, Samuel a bisa Saul: “Awe SEÑOR a sker e reinado di Israel kit’é for di bo, i a duna esaki na bo próhimo, kende ta mihó ku bo.” Samuel mes a mata Agag i a yora Saul, siendo di luto p’e.—1 Samuel 15:1-35.

Ku tempu Yehova a bisa Samuel: “Te ki dia bo ta keda yora Saul, siendo ku mi a rechas’é komo rei riba Israel?” Anto e ora ei Yehova a manda Samuel bai Bètlehèm i ungi un yu hòmber di Isaí komo rei. Un pa un Samuel a evaluá e yu hòmbernan di Isaí te ora ku Yehova a duna Su aprobashon pa ungi David, esun di mas yòn. E dia ei Samuel a siña un lès importante: “Dios no ta mira manera hende ta mira, pasobra hende ta wak aparensia di pafó, ma SEÑOR ta wak kurason.”—1 Samuel 16:1-13.

Siendo ku e desobedensia di Saul a duel Samuel, lo e mester tabata hopi mas tristu ora Saul a desaroyá un odio asesino pa David! Apesar di e pruebanan ei Samuel a keda aktivo den su behes i a hasi loke e tabata por den e sirbishi di Yehova.—1 Samuel 19:18-20.

Loke Samuel A Laga Atras

Ora Samuel a muri, Israel a yora e profeta humilde i ku kurashi aki, kende a influensiá e bida di hopi hende. (1 Samuel 25:1) Samuel tabata imperfekto, i tabatin biaha ku el a husga kosnan robes. Sin embargo, apesar di Samuel su limitashonnan, el a duna Yehova deboshon eksklusivo i a traha inkansablemente pa yuda otro hende hasi meskos.

Hopi kos a kambia kompará ku e tempu di Samuel, pero e registro di su bida ta kontené lèsnan balioso pa nos. Mas ku tur kos, Samuel a praktiká i promové e adorashon berdadero di Yehova. Esei ta loke abo ta hasiendo?

[Kuadro na página 16]

REFLEKSHONÁ RIBA E BIDA DI SAMUEL

• Meskos ku e mayornan di Samuel a siñ’é e palabra di Dios, lanta bo yunan den ‘e disiplina i instrukshon di Yehova.’—Efesionan 6:4.

• Animá bo yunan pa nan ta manera Samuel hasiendo e sirbishi di Yehova nan karera.

• Samuel a imitá e kualidatnan di Dios lokual a pone otro hende haña kariño p’e, i asina el a pone un bon ehèmpel pa nos.

• Samuel a hasi tur loke e tabata por pa promové adorashon berdadero, i nos lo mester hasi meskos.

[Plachi na página 15]

Samuel a promové adorashon berdadero i di buena gana a duna yudansa spiritual