Yuda Otro Hende Obedesé Loke Beibel Ta Siña

“E simia den bon tera ta esnan ku a tende e palabra ku un kurason onesto i bon, i ta retené esaki, i ta duna fruta ku perseveransia.”—LUKAS 8:15.

1, 2. (a) E buki Kiko Beibel Ta Siña Realmente? ta diseñá pa ki propósito? (b) Den añanan resien, kon Yehova a bendishoná e esfuersonan di su pueblo pa hasi disipel?

“E BUKI ta simplemente ekselente. Mi studiantenan gust’é sinfin. Ami tambe gust’é sinfin. E buki aki ta yuda bo kuminsá estudio di Beibel ku hende pará na nan porta.” Asina un Testigu di Yehova ku ta pionero regular a bisa di e buki Kiko Beibel Ta Siña Realmente? * Refiriendo na e mesun buki, un proklamadó di Reino di edat a bisa: “Mi tabatin e privilegio di yuda hopi hende siña konosé Yehova den e 50 añanan ku mi ta aktivo den e ministerio. Pero mi tin ku bisa ku e publikashon aki pa studia hende ta sobresaliente. E plachinan i ilustrashonnan refreskante ta duna bo un gran plaser.” Ta asina bo tambe ta sinti relashoná ku e buki Beibel Ta Siña? E buki aki pa studia Beibel ta diseñá pa yuda bo kumpli ku e mandamentu di Hesus: “Bai i hasi tur e nashonnan disipel di mi, . . . i siña nan pa kumpli ku tur loke mi a ordená boso.”—Mateo 28:19, 20.

² Yehova su kurason sin duda ta alegrá ora ku e ta mira alrededor di 6,6 mion di su Testigunan di buena gana ta obedesé e instrukshon di Hesus pa hasi disipel. (Proverbionan 27:11) Ta bisto ku Yehova ta bendishonando nan esfuerso. Por ehèmpel, durante e aña di sirbishi 2005 nan a prediká e bon nobo den 235 pais i nan a kondusí un promedio di mas ku 6.061.500 estudio di Beibel. Komo resultado, hopi hende ‘a tende e palabra di Dios i a asept’é, no komo palabra di hende, ma pa loke berdaderamente e ta, e palabra di Dios.’ (1 Tesalonisensenan 2:13) Durante e último dos añanan, mas ku mei mion disipel nobo a adaptá nan bida na e normanan di Yehova i a dediká nan mes na Dios.

3. Ki preguntanan relashoná ku uso di e buki Beibel Ta Siña nos lo analisá den e artíkulo aki?

³ Abo resientemente tabatin e goso di kondusí un estudio di Beibel ku un persona? Rònt mundu tin hende ainda ku “un kurason onesto i bon” kende ora nan tende e palabra di Dios lo “retené esaki, i ta duna fruta ku perseveransia.” (Lukas 8:11-15) Laga nos konsiderá kon bo por usa e buki Beibel Ta Siña den e trabou di hasi disipel. Nos konsiderashon lo analisá tres pregunta: (1) Kon bo por kuminsá un estudio di Beibel? (2) Ki métodonan di siña hende ta mas efektivo? (3) Kon bo por yuda  un persona bira no solamente un studiante, sino tambe un maestro di Dios su Palabra skirbí, Beibel?

Kon Bo Por Kuminsá un Estudio di Beibel

4. Dikon algun hende kisas ta vasilá pa studia Beibel, i kon lo bo por yuda nan vense nan vasilashon?

⁴ Si un hende pidi bo krusa un roi hanchu den un solo salto, probablemente lo bo nenga di hasié. Pero si tabatin vários piedra poné na un distansia for di otro di manera ku bo por a stap riba nan, probablemente lo bo ta mas inkliná na purba krus’é. Asina tambe, un persona ku tin hopi kos di hasi kisas ta vasilá pa studia Beibel. Podisé e doño di kas ta pensa ku lo tuma muchu tempu i esfuerso pa studia Beibel. Kon bo por yud’é vense su vasilashon? Pa medio di un seri di konsiderashon breve i informativo, lo bo por usa e buki Beibel Ta Siña pa dirigí e persona na un estudio regular di e Palabra di Dios. Si bo prepará bon, kada rebishita serka e persona lo bira manera un piedra pa stap ariba ku por yud’é yega na un amistat ku Yehova.

5. Dikon bo tin ku lesa e buki Beibel Ta Siña?

⁵ Sin embargo, promé ku bo por yuda un otro persona saka benefisio di e buki Beibel Ta Siña, abo mester ta bon familiarisá ku e buki. Bo a les’é di kaft pa kaft? Un pareha a bai fakansi ku e buki, i a kuminsá les’é miéntras ku nan tabata relahá kantu di laman. Ora ku un señora lokal ku tabata bende kos ku turista a aserká nan, el a tuma nota di e título Kiko Beibel Ta Siña Realmente? El a bisa e pareha ku apénas un par di ora promé, el a hasi orashon tokante netamente e pregunta ei, i a pidi Dios dun’é un kontesta. Gustosamente e pareha a duna e señora un ehemplar di e buki. Abo a traha tempu pa lesa e publikashon aki, por ta pa di dos biaha, miéntras ku kisas bo tabata warda pa un sita òf tabata tuma un pousa na trabou òf na skol? (Efesionan 5:15, 16) Si bo hasié, lo bo familiarisá bo mes ku e buki aki pa studia Beibel i a la bes bo ta krea oportunidat pa papia ku otro hende tokante su kontenido.

6, 7. Kon bo por usa e buki Beibel Ta Siña pa kuminsá estudio di Beibel?

⁶ Ora di ofresé e buki den e ministerio públiko, hasi bon uso di e plachinan, tekstonan bíbliko i preguntanan ku tin na página 4, 5 i 6. Por ehèmpel, lo bo por kuminsá un kòmbersashon ku e pregunta: “Ku tur e problemanan ku ta konfrontá humanidat awe, unda bo ta kere nos por haña un guia konfiabel?” Despues di skucha bon kiko e persona ta bisa, lesa 2 Timoteo 3:16 i 17, i splika ku Beibel ta ofresé un berdadero solushon pa e problemanan di humanidat. Anto hala atenshon di e doño di kas na página 4 i 5 i puntr’é: “Di e kondishonnan ilustrá riba e páginanan aki, kua ta preokupá bo mas tantu?” Ora e doño di kas indiká un di nan, lag’é tene e buki miéntras ku abo ta lesa e teksto bíbliko konektá ku esei for di bo Beibel. Despues lesa página 6 i puntra e doño di kas: “Riba kua di e seis  preguntanan menshoná na e parti abou di e página aki lo bo ke haña un kontesta?” Ora e persona skohe un di nan, mustr’é e kapítulo ku ta kontestá e pregunta ei, laga e buki kuné i hasi areglonan definitivo pa pasa bèk i konsiderá e pregunta ei.

⁷ E presentashon ku nos a kaba di deskribí aki lo por tuma mas o ménos sinku minüt. Sin embargo, den e par di minütnan ei bo a haña sa kiko ta preokupá e doño di kas, bo a lesa i apliká dos teksto bíbliko i a pone e base pa un rebishita. Bo kòmbersashon breve ku e doño di kas lo por ta e eksperensia mas animante i konsolador ku e tabatin den basta tempu. Komo resultado, asta un persona ku ta hopi okupá probablemente lo spera ansiosamente di por papia un par di minüt mas ku bo segun ku bo ta yud’é dal e siguiente stap pa subi “e kaminda ku ta hiba na bida.” (Mateo 7:14) Ku tempu, segun ku e interes di e doño di kas ta desaroyá, lo bo mester ekstendé e durashon di e estudio. Bo por proponé e persona pa kai sinta i amplia e tempu dediká na e estudio.

Métodonan di Siña Hende Ku Ta Mas Efektivo

8, 9. (a) Kon bo por prepará bo studiante di Beibel pa resistí e opstákulonan i pruebanan ku probablemente lo e konfrontá? (b) Unda nos por haña material ku ta resistí kandela pa edifiká fe fuerte?

⁸ Unabes un persona kuminsá obedesé loke Beibel ta siña, ta probabel ku lo e konfrontá opstákulonan ku ta stroba su progreso. Apòstel Pablo a bisa: “Tur hende ku ta deseá di hiba un bida santu den Kristu Hesus lo wòrdu persiguí.” (2 Timoteo 3:12) Pablo a kompará e pruebanan aki ku un kandela ku ta destruí material di konstrukshon di kalidat inferior pero ku ta laga materialnan manera oro, plata i piedra presioso sin ningun daño. (1 Korintionan 3:10-13; 1 Pedro 1:6, 7) Pa yuda bo studiante di Beibel desaroyá e kualidatnan nesesario p’e por resistí e pruebanan ku kisas lo e konfrontá, bo tin ku yud’é dor di traha ku material ku ta resistí kandela.

⁹ E salmista a kompará ‘e palabranan di Yehova’ ku “plata refiná den un fòrnu di klei, purifiká shete biaha.” (Salmo 12:6) Sí, Beibel ta kontené tur e materialnan presioso ku nos por usa pa edifiká fe fuerte. (Salmo 19:7-11; Proverbionan 2:1-6) Anto e buki Beibel Ta Siña ta mustra bo kon pa bo ta efektivo den usa e Skritura.

10. Kon bo por enfoká e studiante su atenshon riba Beibel?

¹⁰ Durante e estudio, enfoká e studiante su atenshon riba e tekstonan bíbliko ku tin den kada kapítulo ku boso ta konsiderá. Usa pregunta pa yuda e studiante komprondé tekstonan bíbliko klave i apliká nan personalmente. Tene kuidou pa bo no bis’é kiko e tin ku hasi. Mas bien, imitá e ehèmpel di Hesus. Ora un hòmber vèrsá den e Lei a hasié pregunta, Hesus a kontestá: “Kiko ta pará skirbí den Lei? Kiko bo ta lesa den dje?” E hòmber a kontestá for di e Skritura, i Hesus a yud’é mira kon pa apliká e prinsipio na su mes. Pa medio di un ilustrashon, Hesus a yuda e hòmber mira tambe kon e siñansa ei lo mester influensi’é. (Lukas 10:25-37) E buki Beibel Ta Siña tin hopi ilustrashon simpel ku bo por usa pa yuda un studiante apliká prinsipionan bíbliko na su mes.

11. Kuantu material bo mester kubri durante kada seshon di estudio?

¹¹ E buki Beibel Ta Siña ta usa un lenguahe simpel i direkto pa splika e Palabra di Dios, meskos ku Hesus a transmití ideanan kompliká pa medio di ekspreshonnan simpel. (Mateo 7:28, 29) Sigui e ehèmpel di Hesus. Transmití e informashon na un manera simpel, kla i eksakto. No pasa purá-purá dor di e material. Mas bien, laga e kapasidat di e studiante i su sirkunstansianan determiná kuantu paragraf lo bo konsiderá durante kada seshon di estudio. Hesus tabata konosé e limitashonnan di su disipelnan i no a karga nan ku mas informashon di loke nan tabatin mester na e tempu ei.—Juan 16:12.

12. Kon lo mester usa e apèndiks?

 ¹² E buki Beibel Ta Siña tin un apèndiks ku ta konsistí di 14 tópiko. Basá riba e nesesidat di e studiante, abo komo su instruktor lo mester por determiná kua ta e mihó manera pa usa e material aki. Por ehèmpel, si un studiante tin difikultat pa komprondé un tópiko òf tin pregunta riba asuntunan spesífiko pa motibu ku anteriormente e tabatin otro kreensia, kisas ta sufisiente pa mustr’é e sekshon apropiá di e apèndiks i lag’é konsiderá e tópiko riba su mes. Di otro banda, e nesesidatnan di e studiante kisas ta eksigí pa bo konsiderá e material huntu kuné. E apèndiks ta kontené tópikonan bíbliko esensial, manera “‘Alma’ i ‘Spiritu’—Kiko e Palabranan Aki Ta Nifiká Realmente?” i “Kon pa Identifiká ‘Babilonia e Grandi.’” Podisé lo bo ke trata e tópikonan aki huntu ku bo studiante. Ya ku den e apèndiks no tin pregunta pa trata e tópikonan ku ta ser konsiderá, lo bo mester ta bon na haltura di e informashon pa bo por formulá preguntanan signifikativo.

13. Ki papel orashon ta hunga den fortalesé fe?

¹³ Salmo 127:1 ta deklará: “Si [Yehova] no traha e kas, ta enbano esnan ku ta trah’é ta traha kansa kurpa.” P’esei, segun ku bo ta prepará pa kondusí un estudio di Beibel, pidi Yehova su yudansa den orashon. Laga e orashonnan ku bo ta hasi na komienso i na final di kada estudio reflehá bo relashon íntimo ku Yehova. Animá e studiante pa pidi Yehova den orashon pa dun’é sabiduria pa komprondé Su Palabra i e fortalesa pa apliká su konseho. (Santiago 1:5) Si e studiante hasi esei, lo e haña e fortalesa pa wanta prueba i lo sigui krese bira fuerte den fe.

Yuda Studiantenan di Beibel Bira Maestro

14. Ki progreso studiantenan di Beibel tin ku hasi?

¹⁴ Pa nos studiantenan di Beibel obedesé “tur loke” Hesus a ordená su disipelnan, nan tin ku progresá for di ta un studiante di e Palabra di Dios i bira siñadó òf maestro di e Palabra di Dios. (Mateo 28:19, 20; Echonan 1:6-8) Kiko bo por hasi pa yuda un studiante ku e tipo di progreso spiritual ei?

15. Dikon lo bo mester animá bo studiante di Beibel pa asistí na e reunionnan kristian?

¹⁵ For di e promé seshon di estudio, invitá e studiante pa asistí na e reunionnan di kongregashon huntu ku bo. Splik’é ku ta na e reunionnan abo ta haña bo entrenamentu komo maestro di e Palabra di Dios. Durante vários siman, tuma un par di minüt na final di kada estudio di Beibel pa deskribí e programa di instrukshon spiritual ku bo ta haña na e vários reunionnan i asambleanan. Papia ku entusiasmo tokante e benefisionan ku bo ta saka di e okashonnan aki. (Hebreonan 10:24, 25) Unabes e studiante kuminsá asistí na reunion ku regularidat, tin mas chèns ku lo e bira un maestro di e Palabra di Dios.

16, 17. Menshoná algun meta ku un studiante di Beibel por pone i alkansá.

¹⁶ Yuda e studiante di Beibel pone metanan ku e por alkansá. Por ehèmpel, anim’é pa kompartí loke e ta siñando ku un amigu òf famia. Sugerí tambe pa e pone e meta di lesa henter e Beibel. Si bo yud’é establesé i mantené un rutina regular di lesamentu di Beibel, e kustumber aki lo benefisi’é pa hopi tempu despues di su boutismo. Ademas, pakiko no  sugerí e studiante pa pone e meta di kòrda por lo ménos ún teksto bíbliko ku ta kontestá un pregunta klave di kada kapítulo di e buki Beibel Ta Siña? Hasiendo esei, lo e bira “un trahadó ku no tin motibu pa tin bèrgwensa, ku ta parti e palabra di bèrdat na un manera korekto.”—2 Timoteo 2:15.

¹⁷ En bes di siña un studiante pa djis ripití tekstonan bíbliko òf bisa nan nifikashon general, anim’é pa splika kon sierto versíkulonan bíbliko ta apliká na e tópiko bou di diskushon ora e ta kontestá personanan ku ta eksigí di dje p’e duna un motibu pa su fe. Algu ku por yuda ta seshonnan kòrtiku di práktika, kaminda abo ta hunga e papel di un famia òf kolega ku ta pidié splika su kreensianan. Segun ku e studiante ta kontestá, mustr’é kon pa hasi esei ku “un genio suave i rèspèt profundo.”—1 Pedro 3:15, NW.

18. Ora un studiante di Beibel ta kualifiká komo publikadó no-batisá, ki yudansa mas lo bo por dun’é?

¹⁸ Ku tempu, e studiante kisas ta kualifiká pa partisipá den sirbishi di vèlt. Enfatisá ku ta un privilegio di por partisipá den e trabou aki. (2 Korintionan 4:1, 7) Unabes e ansianonan a determiná ku e studiante ta kualifiká komo publikadó no-batisá, yud’é prepará un presentashon simpel anto kompañ’é den sirbishi di vèlt. Sigui traha huntu kuné regularmente den e vários aspektonan di e ministerio públiko, i siñ’é kon pa prepará i hasi rebishitanan efektivo. Bo propio bon ehèmpel lo ta un influensia positivo.—Lukas 6:40.

“Sigurá Salbashon, Tantu pa Bo Mes Komo pa Esnan Ku Ta Tende Bo”

19, 20. Ki meta nos mester tin, i dikon?

¹⁹ Un kos ta sigur, ta hopi trabou pa yuda un persona yega na un ‘konosementu eksakto di e bèrdat.’ (1 Timoteo 2:4) Sin embargo, ta masha poko kos den bida por para banda di e goso di yuda un hende obedesé loke Beibel ta siña. (1 Tesalonisensenan 2:19, 20) Sí, nos tin e gran privilegio di por ta “Dios su kolaboradónan” den e trabou mundial aki di siña hende!—1 Korintionan 3:9.

²⁰ Pa medio di Hesukristu i angelnan poderoso, Yehova pronto lo ehekutá huisio kontra esnan ‘ku no konosé Dios i esnan ku no ta obedesé e evangelio di nos Señor Hesus.’ (2 Tesalonisensenan 1:6-8) Tin bida den wega. Abo por pone komo meta pa kondusí por lo ménos ún estudio di Beibel for di e buki Kiko Beibel Ta Siña Realmente? Segun ku bo ta partisipá den e obra aki, bo tin e oportunidat di “sigurá salbashon, tantu pa bo mes komo pa esnan ku ta tende bo.” (1 Timoteo 4:16) Awor mas ku nunka, ta urgente pa nos yuda otro hende obedesé loke Beibel ta siña.

[Nota]

Kiko Bo A Siña?

• E buki Beibel Ta Siña ta diseñá pa ki propósito?

• Kon bo por kuminsá estudio di Beibel usando e buki Beibel Ta Siña?

• Kua métodonan di siñansa ta mas efektivo?

• Kon bo por yuda un studiante bira un maestro di e Palabra di Dios?

[Preguntanan di Estudio]

[Plachi na página 26]

Bo ta hasiendo bon uso di e buki aki?

[Plachi na página 27]

Un konsiderashon kòrtiku por habri un persona su apetit pa gana konosementu bíbliko

[Plachi na página 29]

Kiko bo por hasi pa dirigí e studiante su atenshon na Beibel?

[Plachi na página 30]

Yuda e studiante di Beibel progresá