Historia di Bida

Dikon Mi Tin Goso den e Trabou di Hasi Disipel

Segun e relato di Pamela Moseley

Inglatera tabata den pleno guera na 1941 ora mi mama a bai ku mi Leicester na un kongreso di Testigu di Yehova. Nos a skucha Joseph Rutherford su diskurso spesial tokante mucha. Ora ami ku mi mama a batisá na e kongreso ei, mi a ripará ku e rumannan ku a yuda nos progresá spiritualmente tabata sumamente felis. E tempu ei mi no a realisá ainda kuantu goso e trabou di hasi disipel di Hesukristu ta trese kuné.

NOS progreso pa bira disipel a kuminsá e aña anterior. Ainda mi ta kòrda e dia teribel ei den sèptèmber 1939 ora Guera Mundial II a dal aden. Mi a mira lágrima kore na kara di mi mama kada biaha ku e tabata puntra su mes: “Pakiko no por tin pas na mundu?” Mi mayornan a sirbi komo militar den Guera Mundial I i a eksperensiá e horornan di guera. Mi mama a bai hasi e pastor anglikano na Bristol e pregunta. E pastor a djis bis’é: “Semper tabatin guera i semper lo tin guera.”

Sin embargo, poko tempu despues di esei un señora di edat a bishitá nos kas. E tabata un Testigu di Yehova i mi mama a hasié e mesun pregunta: “Pakiko no por tin pas na mundu?” E Testigu a splik’é ku guera ta parti di e señal ku nos ta bibando den e tempu di fin di e mundu violento aki. (Mateo 24:3-14) Djis despues su yu muhé a kuminsá studia Beibel ku nos. Nan dos tabata entre e personanan felis ku a presensiá nos boutismo. Ku tempu mi a bin haña sa dikon e trabou di hasi disipel ta hasi hende asina felis. Laga mi konta bo algun di e kosnan ku mi a siña durante e mas ku 65 añanan ku mi tin den e trabou di hasi disipel.

 Mi A Deskubrí e Goso di Siña Hende

Mi a kuminsá partisipá den e trabou di prediká e Reino na Bristol tempu mi tabatin 11 aña. Un ruman a duna mi un tokadisko i un karchi di testimonio i a bisa mi: “Awor bai na tur e kasnan na e banda ei di kaya.” Asina mi so a kuminsá prediká. Klaru ku mi tabata hopi nervioso. Mi tabata pasa un diskurso bíbliko grabá i despues mustra e doño di kas e karchi di testimonio ku a invitá hende pa aseptá literatura di Beibel.

Den e dékada di 1950 a kuminsá pone mas énfasis riba lesa for di Beibel durante nos bishitanan di kas pa kas. Na prinsipio, dor ku mi tabata tímido, no tabata fásil pa kòmbersá ku hende straño i splika nan teksto di Beibel. Pero ku tempu mi a bin haña konfiansa. E ora ei mi a ègt kuminsá disfrutá di e ministerio. Algun hende tabata mira nos komo simpel bendedó di buki, pero ora nos tabata lesa i splika nan tekstonan di Beibel, nan a rekonosé nos komo siñadó di e Palabra di Dios. Mi a gusta hasi e trabou aki asina tantu ku mi kier a partisipá mas den dje. Pues na sèptèmber 1955 mi a drenta e sirbishi di tempu kompletu komo pionero.

Perseveransia Ta Duna Resultado

Un di e promé lèsnan ku mi a siña tabata ku perseveransia amoroso por duna resultado. Na un okashon, mi a laga un Toren di Vigilansia serka un señora, Violet Morice. Dia mi a bai bèk serka dje, el a habri porta hanchu pa mi, krusa su brasanan i skucha ku atenshon segun ku mi tabata splik’é e tekstonan. Kada biaha ku mi a bai bèk serka dje, e tabata mustra hopi interes. Sin embargo, ora mi a ofresé un estudio regular di Beibel, el a bisa: “Nò. Dia e muchanan ta grandi, lo mi kuminsá.” Mi a keda hopi desapuntá. Beibel ta papia di “un tempu pa buska i un tempu pa stòp di buska.” (Eklesiastés 3:6) Mi a disidí di no entregá.

Un luna despues, mi a bai bèk serka Violet i a konsiderá algun teksto di Beibel mas kuné. No a tarda muchu ku el a kuminsá studia Beibel tur siman riba stupi di su kas. Por fin un dia el a bisa mi: “Mi ta kere ta mihó bo drenta, bo no ta haña?” Esta un dushi ruman den fe i bon amiga pa ami Violet a bira! Sí, Violet a batisá komo Testigu di Yehova.

Un dia Violet a haña e sorpresa di su bida ora el a haña sa ku su kasá a bende nan kas sin bis’é nada anto bai lag’é. Afortunadamente, ku yudansa di un amigu Testigu el a haña un otro kas e mesun atardi ei. Komo muestra di su gratitut na Yehova, el a disidí di dediká e restu di su bida na e trabou di pionero. Ora mi a mira kuantu selo pa adorashon berdadero Yehova su spiritu a dun’é, mi a realisá pakiko e trabou di hasi disipel ta duna hende asina tantu goso. Sí, esaki lo a bira mi karera!

Na 1957, nan a asigná ami ku Mary Robinson pa traha komo pionero den e área industrial di Rutherglen na Glasgow, Eskosia. Nos tabata prediká den neblina, bientu, áwaseru i sneu, pero tabata bale la pena. Un dia mi a topa Jessie. Mi tabata gusta studia Beibel kuné. Su esposo, Wally, tabata un komunista, i na promé instante el a evitá mi. Ora Wally a studia Beibel i a realisá ku ta e Reino di Dios so por perkurá pa kondishonnan ideal entre hende, el a keda hopi enkantá. Ku tempu, tur dos a bira hasidó di disipel.

E Promé Reakshon Por Gaña Bo

Despues nos a risibí un otro asignashon pa bai e stat di Paisley, Eskosia. Un dia ku mi tabata prediká ayanan,  un señora a dal porta sera den mi kara. Pero djis despues el a bin buska mi pa pidi mi despensa. Ora mi a bai bèk e siguiente siman, el a bisa mi: “Mi a sinti komo si fuera ta den kara di Dios mi a dal e porta sera. Mi no por a keda sin bai buska bo.” E tabata yama Pearl. El a bisa mi ku e tabata asina desilushoná ku su amigu- i famianan ku el a pidi Dios den orashon p’e haña un berdadero amiga. E di: “Anto abo a presentá na porta. Awor mi ta realisá ku ta abo mester ta e berdadero amiga ei.”

No tabata fásil pa mi bira amiga di Pearl. E tabata biba te ariba di un seru steil, i mi tabatin ku subié na pia. Dia mi a bai busk’é na kas pa e asistí na su promé reunion, bientu i áwaseru kasi a tumba mi. Mi paraplü a habri for di otro i mi a tir’é afó. Apénas seis luna despues ku Pearl a dal porta sera den mi kara, el a simbolisá su dedikashon na Dios mediante boutismo bou di awa.

Djis despues, su esposo a disidí di studia Beibel, i den poko tempu el a kompañá mi den e sirbishi di kas pa kas. Awa tabata kai manera kustumber. E di: “No wòri. Ta den e tipo di wer aki mi sa para oranan largu wak futbòl. Pues mi mester por para den áwaseru pa Yehova.” Semper mi a atmirá e determinashon di e eskosesnan.

Ora mi a bai bèk despues di vários dékada i mira ku mayoria di e personanan ku mi a studia kuné ta perseverando ainda den fe, mi a haña un gran satisfakshon! Esei ta e goso di hasi disipel. (1 Tesalonisensenan 2:17-20) Na 1966, despues ku mi a traha komo pionero mas ku ocho aña na Eskosia, mi a haña invitashon pa bai e Skol Bíbliko di Galaad di Watchtower pa haña entrenamentu komo misionero.

Den un Kampo Stranhero

Mi a wòrdu asigná na Bolivia, na e stat tropikal Santa Cruz, kaminda tabatin un kongregashon di mas o ménos 50 publikadó. E stat a pone mi kòrda riba e Wild West ku bo ta mira den pelíkulanan di Hollywood. Mirando bèk, mi ta kere ku mi tabata un misionero basta gewon. Nunka mi a yega di haña mi ku krokodel ku ta ataká ni ku grupo di hende violento. Tampoko mi a yega di pèrdè den desierto òf noufragá riba laman ganchu. Pero, pa mi, e trabou di hasi disipel tabata e kos di mas eksitante.

Un di e promé hende muhénan ku mi a studia Beibel kuné na Santa Cruz tabata Antonia. No tabata fásil pa siña hende Beibel na spañó. Un biaha, e yu hòmber chikitu di Antonia a puntra: “Mami, ta pa malu e ta hasi fout pa pone nos hari?” Ku tempu tantu Antonia komo su yu muhé Yolanda a bira disipel di Hesus. Yolanda tabatin un amigu, un studiante di lei, kariñosamente yamá Dito, ku tambe a kuminsá studia Beibel i asistí na nos reunionnan. Den mi esfuersonan pa yud’é, mi a haña sa algu mas den e trabou di siña hende e bèrdat di Beibel: Tin biaha hende tin mester di un push suave.

Ora Dito a kuminsá falta su estudionan, mi a bis’é: “Dito, Yehova no ta obligá bo apoyá su Reino. Bo tin ku skohe pa hasi esei.” Ora el a kontestá ku e kier a sirbi Dios, mi a bis’é: “Bo tin potrèt di un lider revolushonario aki den. Bo ta kere ku un bishitante ku mira nan ta saka afó ku bo a skohe pa apoyá e Reino di Dios?” Esei tabata e push suave ku e tabatin mester.

Dos siman despues a kuminsá un revolushon i a start un tiroteo entre studiantenan di universidat i polis. “Ban for djaki!” Dito a grita su amigu. “Nò! Esaki ta e gran dia ku nos tabata spera,” su kompañero a kontestá, miéntras ku el a kohe su rifel i kore subi riba dak di e universidat. E tabata un di e ocho amigunan di Dito ku a muri riba e dia ei. Bo por imaginá bo ki felis mi ta di por mira e hòmber aki, Dito, kende tambe por a pèrdè su bida si e no a disidí di bira un kristian berdadero?

Mi A Mira Yehova Su Spiritu den Akshon

Un dia mi tabata pasando un kas forbei, pensando ku nos a yama na e kas ei kaba, anto e señora di e kas a yama mi. Su nòmber ta Ignacia. E tabata sa di Testigunan di Yehova, pero oposishon severo di parti di su kasá—un  ofisial di polis kurpa grandi ku yama Adalberto—a strob’é di progresá spiritualmente. Hopi siñansa básiko di Beibel tabatin Ignacia konfundí, p’esei mi a kuminsá studia Beibel kuné. Ounke Adalberto tabata determiná pa para e estudio di Beibel aki, mi a logra papia kuné pa basta tempu tokante otro tópikonan. Esei a habri kaminda pa nos bira amigu.

Imaginá e goso ku mi a sinti di por a mira Ignacia bira un miembro stimá di e kongregashon, yudando hopi ruman den sentido spiritual i físiko ku tabatin mester di konsuelo. Ku tempu, su esposo i tres di su yunan tambe a bira Testigu. De echo, ora Adalberto a komprondé finalmente e nifikashon di e bon nobo, el a bai bèk n’e warda di polis i a papia ku asina tantu entusiasmo ku el a logra sera 200 abonamènt riba E Toren di Vigilansia i Spièrta! ku e polisnan.

Yehova Ta Pon’é Krese

Despues ku mi a sirbi seis aña na Santa Cruz, mi a ser asigná na La Paz, kapital di Bolivia, kaminda mi a traha e siguiente 25 añanan. Na kuminsamentu di e dékada di 1970 e sukursal di Testigunan di Yehova na La Paz tabatin apénas 12 miembro. En bista ku e trabou di prediká a ekspandé, lokual a rekerí fasilidatnan mas grandi, a konstruí un edifisio nobo pa e sukursal den e stat Santa Cruz ku tabata kresiendo rápidamente. Na 1998 a bolbe trasladá e sukursal aya, i mi a haña e invitashon pa bira miembro di personal di e sukursal, ku awor tabata konsistí di mas ku 50 miembro.

E solo kongregashon ku tabatin na Santa Cruz na 1966 a bira mas ku 50 kongregashon. E 640 Testigunan ku tabatin den henter Bolivia e tempu ei a bira kasi 18.000 awe.

Mi ta masha felis ku mi asignashon na Bolivia tabata produktivo. Pero e fieldat di mi rumannan kristian rònt mundu semper a animá mi. Nos tur ta kontentu di por mira Yehova su bendishon riba e aktividat di prediká e Reino. Sin duda ta un goso di por kontribuí na e trabou di hasi disipel.—Mateo 28:19, 20.

[Plachi na página 13]

Komo pionero na Eskosia

[Plachinan na página 15]

Sirbiendo na e sukursal di Bolivia; (potrèt chikitu) na e graduashon di e di 42 klas di Galaad