Fásil pa Lesa, Pero E Ta Eksakto?

NA SÈPTÈMBER 2005, Iglesia Anglikano a duna su respaldo kompletu na publikashon di The 100-Minute Bible. E vershon nobo aki, diseñá pa lesa den 100 minüt, ta resumí e Skritura Hebreo den 17 sekshon di un solo página i e Skritura Griego den 33 sekshon di un solo página, lagando afó, manera un analista ta bisa, tur e “partinan laf.” E ta fásil pa lesa, pero e ta eksakto?

Studiantenan serio di Beibel lo nota ku e ta omití e nòmber divino, Yehova. (Salmo 83:18) Ademas, nan lo ripará un kantidat di otro diskrepansia. Por ehèmpel, sekshon 1 ta bisa ku Dios a “krea shelu i tera den un periodo di seis dia.” Sin embargo, Génesis 1:1 ta bisa simplemente: “Na prinsipio Dios a krea e shelunan i tera.” Despues di esei, e relato original ta deskribí mas aktonan di kreashon ku tabatin di haber ku tera i ku a dura seis “dia” òf periodo di tempu. Anto Génesis 2:4 ta resumí henter e periodo di kreashon, yamand’e “e dia ku SEÑOR Dios a traha tera i shelu.”

Segun The 100-Minute Bible, e persona ku a ataká Jòb, un hòmber di integridat, tabata “un sirbidó di [Dios], Satanas, . . . kende su responsabilidat tabata pa fungi komo akusadó di humanidat.” Bo ta mira e diskrepansia aki? E palabra “Satanas” ta nifiká “Resistidó.” Satanas no ta un sirbidó di Dios; mas bien, e ta e enemigu prinsipal di Dios i esun ku di su mes boluntat a skohe pa akusá humanidat.—Revelashon 12:7-10.

Kiko di e Skritura Griego Kristian di The 100-Minute Bible? Den e komparashon di karné ku kabritu, e vershon nobo ta bisa ku Hesus ta faboresé esnan ku a yuda “kualke hende, pa insignifikante ku e por ta,” miéntras ku Hesus realmente a bisa ku e ta bendishoná esnan ku ta hasi bon na su siguidónan—su “rumannan.” (Mateo 25:40) E resúmen di Revelashon ta bisa ku “Roma, esta, e gran Babilonia, lo ser destruí kompletamente.” Pero studiantenan di Beibel sa ku e skritura original no ta duna ningun indikashon ku “e Gran Babilonia” ta referí na Roma.—Revelashon 17:15–18:24.

Pues, pa esnan ku ke konosé nos Kreadó i komprondé su propósito, no tin nada ku por supstituí Beibel kompletu. Ta bèrdat ku lo tuma nan mas ku 100 minüt pa lesa Beibel, pero esei ta trese bendishonnan riku. (Juan 17:3) Aseptá e reto aki i lo bo haña gran rekompensa.—2 Timoteo 3:16, 17.