Pregunta di Lektor

Kiko ta “e guera di . . . Dios Todopoderoso” na Armagedón, i kiko lo ta su resultado?—Revelashon 16:14, 16.

Ku poko palabra, e guera di Armagedón ta e futuro bataya mundial den kua e Rei nombrá di Yehova, Hesukristu, lo destruí e enemigunan di Dios. Beibel ta splika ku e enemigunan aki, “e reinan di henter mundu,” ta ser mobilisá dor di “spiritunan [òf “ekspreshonnan inspirá,” NW] di demoñonan” i ta ser reuní “pa e guera di e gran dia di Dios Todopoderoso . . . na e lugá ku na lenga hebreo yama Armagedón.”—Revelashon 16:14, 16.

E lugá kaminda e partidonan den guera lo reuní no ta unu literal. E nòmber Armagedón ta nifiká “Seru di Meguido.” (Revelashon 16:16) Nunka tabatin un seru ku e nòmber ei. Ademas, “e reinan di tera i nan ehérsitonan” no por reuní literalmente na un solo lugá. (Revelashon 19:19) Mas bien, “e lugá” ta referí na e kondishon òf situashon den kua e gobernantenan polítiko di tera i nan apoyadónan ta ser guiá, esta, un situashon di oposishon kontra Yehova i “e ehérsitonan ku ta den shelu” bou di e komando militar di e “Rei di reinan i Señor di señornan,” Hesukristu.—Revelashon 19:14, 16.

Ta interesante pa nota ku e ekspreshon “Armagedón” tin konekshon ku Meguido, un stat di Israel di antigwedat. Meguido tabata situá stratégikamente ost di Seru di Karmelo i tabata dominá e prinsipal rutanan komersial i militar di e tempu ei. E tabata tambe e sitio di batayanan desisivo. Por ehèmpel, ta “banda di e awanan di Meguido” Hues Barak di Israel a derotá un poderoso ehérsito kananeo bou di mando di General Sísara. (Huesnan 4:12-24; 5:19, 20) Den e mesun bisindario ei Hues Gideon a kaba ku e madianitanan. (Huesnan 7:1-22) Dor di konektá Meguido ku e guera binidero, Beibel ta sigurá nos ku Dios, pa medio di su Yu, lo derotá tur ehérsito opositor kompletamente.

Kiko lo ta e resultado? E guera di Armagedón lo eliminá tur korupshon i maldat for di riba tera. Lo e habri kaminda pa e era di mas glorioso den henter historia humano. (Revelashon 21:1-4) Bou di supervishon amoroso di e Reino di Dios, tera lo ser transformá den un paradeis den kua hustisia lo biba pa semper.—Salmo 37:29.