Ta Otro Hende So Mester Papia Bèrdat?

“MI TA odia mentira, i mi ta haña masha rabia ora hende gaña mi!” un mucha muhé di 16 aña a deklará. Mayoria di nos ta sinti meskos. Nos ke sinti ku e informashon ku otronan ta duna nos—sea verbalmente òf por eskrito—ta verídiko. Pero nos mes ta papia bèrdat ora nos ta duna otro hende informashon?

Den un enkuesta ku nan a hasi na Alemania, e gran mayoria di e personanan ku a reakshoná tabata pensa ku “mentiranan chikitu pa protehá bo mes òf pa protehá otro hende ta aseptabel, sí, asta nesesario pa bo por keda bon ku otro hende.” I un periodista a skirbi: “E meta pa semper papia solamente bèrdat ta unu noble, pero laf.”

Akaso nos ta gusta pa otro hende papia bèrdat, miéntras ku nos mes ta haña ku de bes en kuando nos sí tin motibu válido pa no papia bèrdat? Ta importá si nos ta papia bèrdat òf nò? Kiko ta e konsekuensianan si un persona no ta papia bèrdat?

Daño Ku Mentira Ta Kousa

Pensa riba e daño ku mentira por hasi. Mentira ta lanta deskonfiansa entre parehanan kasá i entre miembronan di famia. Redu sin base por daña un persona su reputashon. Ladronisia ku empleadonan ta kometé ta oumentá gastunan di un empresa i ta pone ku e produktonan ta bira mas karu. Datonan froudulento riba formularionan di belasting ta stroba gobièrnu di haña entradanan ku ta nesesario pa perkurá servisio públiko. Investigadónan ku ta trose e bèrdat ta ruiná nan kareranan prometedor i ta daña reputashon di institutonan respetá. Proyektonan desonesto pa bira riku lihé ta ranka plaka ku invershonistanan inosente a spar henter nan bida òf ta hasi pió ku esei. Pues, no ta nada straño ku Beibel ta bisa nos ku entre e kosnan ku Yehova Dios ta odia tin “un lenga mentiroso” i “un testigu falsu ku ta papia mentira”!—Proverbionan 6:16-19.

Gañamentu na gran eskala por perhudiká tantu hende individual komo un komunidat kompletu. Kasi tur hende ta di akuerdo ku esei. Pero, siendo ku esei ta asina, dikon hende ta gaña deliberadamente? I ta tur loke no ta bèrdat ta mentira? E siguiente artíkulo lo kontestá e preguntanan aki i tambe otronan.

[Plachi na página 3]

Mentira ta lanta deskonfiansa entre parehanan kasá