Yehova Ta un Dios Apresiativo

“Dios no ta inhustu pa lubidá boso trabou i e amor ku boso a mustra pa su nòmber.”—HEBREONAN 6:10.

1. Kon Yehova a mustra su apresio pa e moabita Ruth?

YEHOVA tin masha apresio pa e esfuersonan di hende ku sinseramente ta buska pa hasi su boluntat, i e ta rekompensá nan rikamente. (Hebreonan 11:6) E hòmber fiel Boaz tabata konosé e bunita faseta aki di e personalidat di Dios, pasobra el a bisa e moabita Ruth, kende amorosamente tabata kuida su suegra biuda: ‘Ku Yehova rekompensá bo obra, i ku bo pago sea kompletu for di Yehova.’ (Ruth 2:12) Dios a bendishoná Ruth? Definitivamente! Ruth su relato ta asta den Beibel! Es mas, Ruth a kasa ku Boaz i a bira antepasado di Rei David i di Hesukristu. (Ruth 4:13, 17; Mateo 1:5, 6, 16) Esei ta un di e tantísimo ehèmpelnan den Beibel ku ta demostrá e apresio ku Yehova tin pa su sirbidónan.

2, 3. (a) Kiko ta hasi Yehova su ekspreshonnan di apresio remarkabel? (b) Dikon Yehova por ekspresá berdadero apresio? Ilustrá esei.

² Yehova lo konsiderá su mes inhustu si e no mustra apresio. Hebreonan 6:10 ta bisa: “Dios no ta inhustu pa lubidá boso trabou i e amor ku boso a mustra pa su nòmber, dor ku boso a sirbi i ainda ta sirbi e santunan.” Loke ta hasi e deklarashon aki remarkabel ta ku Dios ta mustra apresio pa hende deboto apesar ku nan ta pekadó i no ta alkansá su gloria.—Romanonan 3:23.

³ Debí na nos imperfekshon, nos lo por sinti ku nos echonan di deboshon na Dios ta insignifikante i no ta meresé su bendishon. Sin embargo, Yehova ta komprondé nos motivashon i sirkunstansianan plenamente, i di bèrdat e ta balorá e sirbishi ku nos ta rindi di henter nos alma. (Mateo 22:37) Laga nos ilustrá esei: Un mama ta haña un regalo riba mesa, ta un kadena barata. Lo e por mira e regalo komo un kos ku no tin masha balor i bent’é un banda. Sin embargo, e karchi ku tin huntu ku e regalo ta bis’é ku e regalo ta di su yu muhé chikí, ku a usa tur su sèn di spar pa kumpra e kadena. Awor e mama ta mira e regalo otro. Podisé ku awa na wowo, e ta brasa su yu i ekspresá su apresio sinsero.

4, 5. Kon Hesus a imitá Yehova den mustra apresio?

⁴ Siendo ku Yehova ta plenamente konsiente di nos motivashon i limitashonnan, e ta apresiá ora nos ta dun’é lo mihó di nos, sea ku esei ta tiki òf hopi. Den esaki Hesus a reflehá su Tata perfektamente. Kòrda riba e relato bíbliko di e biuda ku a tira dos plaka. Segun Beibel, “[Hesus] a hisa kara i a mira e rikunan ta tira nan ofrendanan den e kaha di ofrenda.  I el a mira un biuda pober ta tira dos plaka di koper aden. I el a bisa: ‘Di bèrdat mi ta bisa boso, e biuda pober aki a tira mas tantu aden ku nan tur; pasobra nan tur a tira pa e ofrenda for di nan abundansia, ma el a tir’aden for di su pobresa tur loke ku e tabatin pa biba di dje.’”—Lukas 21:1-4.

⁵ Sí, komo ku Hesus tabata sa di e sirkunstansianan di e señora—ku e tabata biuda i pober—el a komprondé e berdadero balor di su ofrenda, i el a apresiá esei mashá. Meskos ta e kaso ku Yehova. (Juan 14:9) No ta un animashon pa sa ku sea kual sea bo sirkunstansia, bo por haña e aprobashon di nos Dios apresiativo i di su Yu?

Yehova Ta Rekompensá un Etiopio Ku Tabatin Temor di Dios

6, 7. Dikon i den ki manera Yehova a demostrá su apresio na Ebed-melek?

⁶ Bes tras bes Beibel ta trese dilanti ku Yehova ta demostrá su apresio pa hende ku ta hasi su boluntat. Konsiderá por ehèmpel kon el a trata ku Ebed-melek, un etiopio temeroso di Dios ku a biba den tempu di Jeremias i ku tabata un sirbidó den e kas di e rei infiel Sedekias di Huda. Ebed-melek a haña sa ku e prensnan di Huda a akusá profeta Jeremias inhustamente di ta agitá e pueblo kontra e rei i nan a bent’é den un renbak pa lag’é muri di hamber ei den. (Jeremias 38:1-7) Ounke Ebed-melek tabata sa ku nan a odia Jeremias intensamente debí na e mensahe ku e tabata prediká, tòg Ebed-melek a riska su bida i a bai hasi un apelashon serka rei. Ku kurashi e etiopio a bisa: “Señor mi rei, e hendenan aki a aktua ku malisia den tur loke nan a hasi ku profeta Jeremias. Nan a tir’é den renbak; i e lo muri di hamber ei den.” Riba òrdu di rei, Ebed-melek a bai ku 30 hòmber i a reskatá e profeta di Dios.—Jeremias 38:8-13.

⁷ Yehova a mira ku Ebed-melek a aktua ku fe, i ku ta esei a yud’é superá kualke miedu  ku lo e por tabatin. P’esei Yehova a mustra su apresio i mediante Jeremias el a bisa Ebed-melek: “Mira, mi ta kla pa kumpli ku mi palabranan riba e stat aki, pa desaster i no pa prosperidat . . . Ma lo mi libra bo riba e dia ei, . . . i lo bo no wòrdu entregá den man di e hòmbernan di kendenan bo tin miedu. Pasobra lo mi reskatá bo sigur, . . . lo bo tin bo mes bida komo botin, pasobra bo a konfia den mi.” (Jeremias 39:16-18) Sí, Yehova a libra Ebed-melek, i tambe Jeremias, for di e prensnan malbado di Huda i despues for di e babilonionan ku a destruí Yerusalèm. Salmo 97:10 ta bisa: “[Yehova] ta preservá alma di su santunan; e ta libra nan for di man di e malbado.”

“Bo Tata, Ku Ta Mira den Skondí, Lo Rekompensá Bo”

8, 9. Manera Hesus a demostrá, ki klase di orashon Yehova ta apresiá?

⁸ Un otro evidensia ku ta mustra ku Yehova ta apresiá i duna balor na nos ekspreshonnan di deboshon na dje nos por mira den loke Beibel ta bisa tokante orashon. E hòmber sabí a remarká: “Orashon di e rektonan ta [Dios] su delisia.” (Proverbionan 15:8) Den tempu di Hesus, hopi lider religioso tabata hasi orashon públikamente, no debí na berdadero deboshon, sino pasobra nan kier a impreshoná hende. Hesus di: “Ya nan tin nan pago kaba.” Anto el a instruí su siguidónan: “Ma abo, ora bo ta hasi orashon, bai den bo kamber di mas paden, i ora bo a sera bo porta, hasi orashon na bo Tata ku ta den skondí; i bo Tata, ku ta mira den skondí, lo rekompensá bo.”—Mateo 6:5, 6.

⁹ Klaru ku aki Hesus no a kondená orashon públiko, pasobra e mes a hasi orashon públikamente na sierto okashonnan. (Lukas 9:16) Loke Yehova ta apresiá profundamente ta ora nos ta hasi orashon na dje ku un kurason sinsero, sin intenshon di impreshoná otro hende. De echo, nos orashonnan privá ta un bon indikashon di e profundidat di nos amor pa Dios i di nos konfiansa den dje. P’esei no ta un sorpresa ku hopi biaha Hesus a buska lugánan privá pa hasi orashon. El a yega di hasi esaki “mainta trempan, ora tabata skur ainda.” Un otro biaha, “e so a subi bai riba seru pa hasi orashon.” Anto promé ku el a skohe su 12 apòstelnan, el a pasa henter anochi su so den orashon na Dios.—Marko 1:35; Mateo 14:23; Lukas 6:12, 13.

10. Di kiko nos por tin sigur ora nos orashonnan ta reflehá e deseo sinsero di agradá Dios?

¹⁰ Nos por imaginá ku Yehova lo a skucha masha atentamente na e ekspreshonnan sinsero di su Yu! De echo tabatin biaha ku Hesus a hasi orashon “ku gran sklamashon i lágrima . . . i el a wòrdu tendí pa motibu di su piedat.” (Hebreonan 5:7; Lukas 22:41-44) Ora ku nos orashonnan ta reflehá e mesun deseo sinsero ei di agradá Dios, nos por tin sigur ku nos Tata selestial ta skucha atentamente i ku apresio. Sí, Yehova ta “serka di tur esnan ku ta sklama na dje den bèrdat.”—Salmo 145:18.

11. Kiko Yehova ta pensa di loke nos ta hasi den privá?

¹¹ Si Yehova ta apresiá ora nos ta hasi orashon na dje den sekreto, kuantu mas lo e ta apresiá ora nos ta obedes’é den sekreto! Sí, Yehova sa kiko nos ta hasi den privá. (1 Pedro 3:12) De echo, si nos ta fiel i obedesidu ora nos ta nos so, esei ta un bon indikashon ku nos ta sirbi Yehova ‘ku henter nos kurason,’ un kurason ku tin motivashon puru i ku ta firme pa loke ta bon. (1 Krónikanan 28:9) Tal komportashon ta hasi Yehova su kurason hopi kontentu!—Proverbionan 27:11; 1 Juan 3:22.

12, 13. Kon nos por protehá nos mente i kurason i ser manera e disipel fiel Natanael?

¹² Pues anto, kristiannan fiel ta vigilá pa nan no kometé pikánan sekreto ku ta korumpí e mente i kurason, kosnan manera wakmentu di pornografia i violensia. Ounke tin piká ku nos por skonde pa hende, nos ta  realisá ku “tur kos ta habrí i bisto dilanti di wowo di Esun ku nos tin di haber kuné.” (Hebreonan 4:13; Lukas 8:17) Ora nos ta hasi esfuerso pa evitá e kosnan ku ta desagradá Yehova, nos ta mantené un konsenshi limpi i ta keda kontentu di sa ku nos tin e aprobashon di Dios. Sí, no tin duda ku Yehova realmente ta apresiá e persona “ku ta kana den rektitut i ta hasi hustisia, i ta papia bèrdat den su kurason.”—Salmo 15:1, 2.

¹³ Pero kon nos por protehá nos mente i kurason den un mundu saturá ku maldat? (Proverbionan 4:23; Efesionan 2:2) Fuera di probechá plenamente di tur provishon spiritual, esta, tur loke Yehova ta duna nos pa fortalesé nos fe, nos tin ku hasi tur nos esfuerso pa rechasá loke ta malu i hasi loke ta bon. Anto nos tin ku aktua lihé, pa mal deseonan no konsebí i duna lus na piká. (Santiago 1:14, 15) Imaginá bo kon felis lo bo ta si Hesus bisa di bo loke el a bisa di Natanael: “Ata un [hende] den kende no tin mentira!” (Juan 1:47) Natanael, yamá tambe Bartolomé, despues tabatin e privilegio di bira un di e 12 apòstelnan di Hesus.—Marko 3:16-19.

“Un Sumo Saserdote Miserikòrdioso i Fiel”

14. Kompará ku otro hende, kon Hesus a reakshoná riba e gesto di Maria?

¹⁴ Siendo ku Hesus ta “e imágen di e Dios invisibel,” Yehova, semper el a imitá su Tata perfektamente den mustra apresio na hende ku ta sirbi Dios motivá pa un kurason limpi. (Kolosensenan 1:15) Por ehèmpel, sinku dia promé ku Hesus a entregá su bida, e ku algun di su disipelnan tabata huéspet na kas di Simon di Betania. Durante e anochi, Maria, ruman muhé di Lázaro ku Marta, “a kohe un liber di perfume di nardo puru di hopi balor” (el a bal mas o ménos e salario di un aña di trabou), i a bash’é riba Hesus su kabes i pia. (Juan 12:3) Algun disipel a bisa: “Pakiko e dispidimentu aki?” Sin embargo, Hesus tabatin kompletamente un otro opinion di e gesto di Maria. El a konsider’é un akto di gran generosidat i nifikashon en bista di su morto i entiero inminente. P’esei, en bes di kritiká Maria, Hesus a onr’é. E di: “Unda ku e evangelio aki wòrdu prediká den henter mundu, loke ku e muhé aki a hasi tambe lo wòrdu kontá na su rekuerdo.”—Mateo 26:6-13.

15, 16. Kon nos ta benefisiá di e echo ku Hesus a biba i sirbi Dios riba tera komo hende?

¹⁵ Esta privilegiá nos ta ku nos tin un persona asina apresiativo manera Hesus komo nos Lider! De echo, Hesus su bida komo hende a prepar’é pa e trabou ku Yehova tabatin p’e hasi, esta, di sirbi komo Sumo Saserdote i Rei, na promé instante di e kongregashon di e ungínan i despues di mundu.—Kolosensenan 1:13; Hebreonan 7:26; Revelashon 11:15.

¹⁶ Promé ku Hesus a bin na tera e tabatin un interes profundo i un kariño spesial kaba pa humanidat. (Proverbionan 8:31) Despues ku el a biba komo hende, el a bin komprondé mas plenamente ainda e pruebanan ku nos ta eksperensiá den nos sirbishi na Dios. Apòstel Pablo a skirbi: “[Hesus] mester a wòrdu hasí igual ku su rumannan den tur kos, pa e por a bira un sumo saserdote miserikòrdioso i fiel . . . Pasobra komo ku e mes a wòrdu tentá den loke el a sufri, e por bin na yudansa di esnan ku ta wòrdu tentá.” Hesus “por kompadesé di nos debilidatnan,” pasobra el “a wòrdu tentá den tur kos meskos ku nos, ma tòg sin piká.”—Hebreonan 2:17, 18; 4:15, 16.

17, 18. (a) Kiko e kartanan na e shete kongregashonnan di Asia Menor ta revelá tokante e profundidat di Hesus su apresio? (b) E kristiannan ungí ei a ser prepará pa kumpli ku ki papel?

¹⁷ Despues ku Hesus a resusitá a bira bisto ku awor e tabata komprondé mas mihó ainda e pruebanan ku su siguidónan tabata pasa aden. Konsiderá su kartanan na e shete  kongregashonnan na Asia Menor ku apòstel Juan a skirbi. Na e kongregashon na Smirna, Hesus a bisa: “Mi konosé bo tribulashon i bo pobresa.” Bon mirá, Hesus tabata bisando akinan: ‘Mi ta komprondé boso problemanan bon-bon; mi sa kiko boso ta pasando aden.’ Anto komo ku e mes tambe a sufri te na morto, e por a bisa ku kompashon i ku siguransa: “Sea fiel te na morto i lo mi duna bo e korona di bida.”—Revelashon 2:8-10.

¹⁸ E kartanan na e shete kongregashonnan ta yen di ekspreshon ku ta indiká ku Hesus tabata bon na haltura di e difikultatnan di su disipelnan i ku e tabatin berdadero apresio pa nan bida di integridat. (Revelashon 2:1–3:22) Kòrda ku e personanan ei ku Hesus a papia kuné tabata kristiannan ungí ku tabatin e speransa di goberná huntu kuné den shelu. Meskos ku nan Señor, nan tabata ser prepará pa e papel elevá di yuda ekstendé—ku gran kompashon—e benefisionan di Kristu su sakrifisio di reskate na humanidat ku ta sufriendo.—Revelashon 5:9, 10; 22:1-5.

19, 20. Kon esnan ku ta forma e “multitut grandi” ta demostrá nan apresio na Yehova i su Yu?

¹⁹ Klaru ku Hesus su amor pa su siguidónan ungí ta ser ekstendé tambe na su “otro karnénan” fiel, di kua miónes ta forma awor e “multitut grandi . . . di tur nashon” ku lo sobrebibí e binidero “gran tribulashon.” (Juan 10:16; Revelashon 7:9, 14) E hendenan aki ta basha bin na e banda di Hesus pasobra nan ta apresiá su sakrifisio di reskate i debí na nan speransa di bida eterno. Kon nan ta demostrá nan apresio? Nan ta hasi esei dor di “sirbi [Dios] di dia i anochi.”—Revelashon 7:15-17.

²⁰ E rapòrt mundial di e aña di sirbishi 2006, presentá na página 27 pa 30, ta mustra bon kla ku e ministernan fiel aki di bèrdat ta rindiendo Yehova ‘sirbishi sagrado di dia i anochi.’ De echo, durante esun aña ei nan huntu ku e kuerpo relativamente chikí di e restu di kristiannan ungí a dediká un total di 1.333.966.199 ora na e ministerio públiko. Esei ta ekivalente na hopi mas ku 150.000 aña!

Sigui Demostrá Apresio!

21, 22. (a) Dikon kristiannan mester tene hopi kuidou awe den e asuntu di demostrá apresio? (b) Kiko nos lo konsiderá den e siguiente artíkulo?

²¹ Yehova ku su Yu a demostrá den nan trato ku hende imperfekto un apresio profundo ku ta realmente abrumador. Pero lamentablemente, mayoria di hende no ta pensa mashá riba Dios, i ta enfoká mas bien riba nan propio interesnan. Ora Pablo tabata duna un deskripshon di e hendenan bibando den “e último dianan,” el a skirbi: “Hende lo stima nan mes mas ku tur kos. Nan lo ta golos pa plaka . . . i nan lo ta malagradesidu.” (2 Timoteo 3:1-5, BPK) Ki un kontraste e hendenan ei ta ku kristiannan berdadero, kende pa medio di orashon sinsero, obedensia di buena gana i sirbishi di henter alma ta demostrá nan apresio pa tur loke Dios a hasi pa nan!—Salmo 62:8; Marko 12:30; 1 Juan 5:3.

²² Den e siguiente artíkulo, nos lo repasá algun di e tantísimo provishonnan spiritual ku Yehova amorosamente a ekstendé na nos. Segun ku nos ta reflekshoná riba e ‘bon regalonan’ aki, laga nos apresio sigui krese mas ainda.—Santiago 1:17.

Kon Lo Bo Kontestá?

• Kon Yehova a demostrá ku e ta un Dios apresiativo?

• Kon nos por hasi Yehova su kurason kontentu ora nos ta nos so?

• Den ki maneranan Hesus a demostrá apresio?

• Kon e echo ku Hesus a biba komo hende a yud’é ser un gobernante kompasivo i apresiativo?

[Preguntanan di Estudio]

[Plachi na página 17]

Meskos ku un mayor ta apresiá mashá e ekspreshon simpel di su yu, Yehova tambe ta apresiá mashá ora nos ta dun’é lo mihó