Disfrutá di Nos Bunita Tera

ASTRÓNOMONAN a konstatá ku e hogar di humanidat ta djis un punta chikiritiku asina den e espasio inmenso di un universo sin límite. Ningun otro kaminda den e universo físiko nan a haña bida. Ta riba planeta Tera so tin e kondishonnan ideal pa bida.

Es mas, nos por disfrutá di bida riba e bunita planeta aki. Esta dushi ta pa sinti e kayente di solo riba un dia friu! Kua di nos no ta keda impreshoná ku un salida òf bahada di solo espektakular? Klaru ku nos solo ta hasi mas ku simplemente deleitá nos sentidonan. E ta sumamente importante pa nos eksistensia.

Durante míles di miónes di aña, e forsa di gravedat (zwaartekracht) di solo a tene e tera i otro planetanan den nan órbita stabil. Anto, manera muchanan ta siña na skol, henter e sistema solar ta move den un órbita rònt di e sentro di nos galaksia ku yama Via Láktea. Pero solo ta apénas un di e mas ku 100 mil mion streanan ku ta moviendo huntu den nos galaksia.

Forsa di gravedat ta tene e galaksia Via Láktea den un tròshi di mas o ménos 35 galaksia. Tin tròshinan mas grandi ku ta kontené míles di galaksia. Nos sistema solar probablemente lo no tabata asina stabil si e tabata forma parti di un tròshi mas grandi ku mas tantu galaksia. Pero, manera e situashon ta, masha tiki region di universo “ta asina apto pa e forma di bida kompleho manera di nos,” segun un deklarashon di Guillermo Gonzalez i Jay W. Richards den nan buki The Privileged Planet (E Planeta Privilegiá).

Akaso e eksistensia di bida riba e planeta aki ta produkto di puru kasualidat, e resultado aksidental di un parti di e “big bang,” e gran eksploshon ku a tuma lugá na komienso di universo? Òf bida riba e bunita planeta Tera aki tin un nifikashon mas grandi?

Hopi hende a yega na e konklushon ku nos hogar terenal tabata spesífikamente diseñá pa sostené bida. * Siglonan pasá, un profeta hebreo a hala atenshon na tera i shelu. El a skirbi: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta?” (Salmo 8:3, 4) E poëta aki tabata konvensí ku mester tin un Kreadó. Esei ta un konklushon rasonabel den e era sientífiko aki?

[Nota]

[Kuadro/Plachi na página 3]

“For di un distansia, Tera ta bria manera un hoya blou den e skuridat di espasio,” segun e buki The Illustrated Science Encyclopedia—Amazing Planet Earth.

[Rekonosementu]

Globo: U.S. Fish & Wildlife Service, Washington, D.C./NASA