Edifikashon Spiritual na e “Kas di Piedra”

E nòmber di e pais afrikano aki ta nifiká “Kas di Piedra.” E ta un pais ku ta bon konosí pa e Waterval di Viktoria i pa e variedat di bida ku e tin den naturalesa. Sin embargo, e tin e edifisionan di piedra di mas grandi i mas bieu ku hende a traha zùit di Sahara. Tin un plateau di granit ta krusa nèt meimei di e pais. E klima ni muchu friu ni muchu kayente ku tin riba e plateau ei ta produsí un paisahe fértil i bèrdè. E pais aki ta Zimbabwe, e hogar di 12 mion hende.

DIKON e tin e nòmber Kas di Piedra? Na aña 1867 e eksploradó i yagdó, Adam Renders, a topa strukturanan grandi di piedra plamá riba un área di 720 hèktar. Renders tabata biahando tur rònt den e sabananan afrikano, kaminda kasnan por lo general tabata trahá di lodo ku bara i dak di yerba. Anto diripiente el a topa e ruinanan di piedra di un stat inmenso, ku awor tin e nòmber di Gran Zimbabwe.

E ruinanan aki ta situá djis zùit di e área konosí awe komo Masvingo. Algun di e murayanan ta mas ku nuebe meter haltu, i ta di piedra di granit poné riba otro sin semènt. Paden di e ruinanan tin un toren straño, forma di papurèshi, ku un haltura di 11 meter, trahá riba un base ku tin un diameter di seis meter. Te ainda nan no sa ta kiko tabata e propósito eksakto di e toren aki. E ruinanan ta data for di siglo 8 di nos era, pero tin evidensia ku e sitio tabata habitá pa sientos di aña promé ku esei.

 Na aña 1980, e pais aki konosí e tempu ei komo Rodesia a bira independiente di Gran Bretaña i a kambia su nòmber pa Zimbabwe. Su habitantenan ta konsistí di dos grupo étniko prinsipal, un ta shona, ku ta forma e parti mas grandi di e poblashon, i e otro ta ndebele. E hendenan ta hospitalario, lokual Testigunan di Yehova a ripará hopi bes den nan trabou di prediká e bon nobo di kas pa kas. Tin biaha ora un bishitante bati na porta e ta tende mesora e invitashon pa “Pasa paden” i “Por fabor, kai sinta,” asta promé ku e doñonan di kas sa ta ken e bishitante ta. Mayoria hende di Zimbabwe tin un rèspèt profundo pa Beibel i hopi biaha nan ta insistí pa nan yunan kai sinta i skucha kòmbersashonnan bíbliko.

Ofresiendo un Mensahe Edifikante di Konsuelo

Ora medionan di komunikashon ta papia di Zimbabwe, ku frekuensia e palabranan “AIDS” i “sekura” ta bin dilanti. E grado ku AIDS a plama tabatin un efekto serio riba poblashon i ekonomia di paisnan afrikano ku ta keda zùit di Sahara. Akinan, hopi biaha e motibu pakiko hende ta keda interná den hospital ta debí na HIV. E malesa ei a kaba ku e bida di famia di hopi hende.

Pa yuda hende na Zimbabwe, Testigunan di Yehova ta drùk bezig ta proklamá ku e mihó estilo di bida ta esun guiá pa e normanan di Dios deskribí den Beibel. Por ehèmpel, e Palabra di Dios ta siña nos ku ta solamente hende kasá ku otro tin mag di disfrutá di e regalo divino di intimidat seksual, ku homoseksualidat ta inaseptabel pa Dios i ku e lei di Yehova ta prohibí transfushon di sanger i uso di droga. (Echonan 15:28, 29; Romanonan 1:24-27; 1 Korintionan 7:2-5; 2 Korintionan 7:1) Ademas, e Testigunan ta publikando un mensahe di speransa bon fundá, enfatisando ku den futuro serkano e Reino di Dios lo eliminá tur malesa.—Isaias 33:24.

Perkurando Yudansa di Ousilio

Sekura tabatin un efekto devastador riba Zimbabwe durante e último dékada. Bestianan salbahe a muri di hamber i set. Sientos di míles di baka a muri. Kandela a destruí masha hopi hèktar di selva di palu pa usa den konstrukshon. Hopi mucha i hende di edat a muri di malnutrishon. Asta e awanan di e poderoso Riu Zambezi a baha na nivelnan ku a menasá e funshonamentu di plantanan di koriente hidroeléktriko.

Pa por trata ku tal devastashon, Testigunan di Yehova a establesé ocho komité di ousilio den vários parti di e pais. Superintendentenan biahero a bishitá e kongregashonnan pa evaluá nan nesesidat i a pasa e informashon aki pa e komité apropiá di ousilio. Un superintendente biahero a informá: “Durante e último sinku añanan, nos a distribuí mas di mil tonelada di maishi, dies tonelada di piská seku i e mesun kantidat di bonchi. Nos rumannan spiritual a prosesá dos tonelada di mufushwa [bèrdura seku]. Nos a distribuí tambe kantidatnan grandi di paña ku a ser duná i tambe fondonan nesesario.” Un otro superintendente biahero a remarká: “Ora mi reflekshoná riba e difikultatnan ku nos a konfrontá pa optené e pèrmitnan ku Zimbabwe i Suráfrika ta rekerí pa por drenta ku e suministronan aki i e skarsedat di kombustibel ku semper tin pa transportá e artíkulonan aki di alivio tan nesesario, mi por konkluí únikamente ku nos éksito ta komprobá un biaha mas e garantia ku Hesus a duna ku nos Tata selestial sa ku nos tin mester di tur e kosnan aki.”—Mateo 6:32.

 Kon superintendentenan biahero mes ta hasi ora ku nan ta traha den áreanan asotá pa sekura? Tin di nan ta biaha ku kuminda pa nan mes i pa e famianan kaminda nan ta keda. Un di nan a konta kon algun ruman muhé kristian un biaha tabata debatí si nan lo mester a stòp di prediká pa e dia ei pa nan bai para den fila pa haña e yudansa gubernamental ku nan a antisipá. Nan a disidí di konfia den Yehova dor di enfoká riba e aktividat di prediká i wak kon kos lo bai. E dia ei ningun yudansa gubernamental no a yega.

E siguiente dia tabatin un reunion kristian programá, i e ruman muhénan aki atrobe tabatin ku tuma un desishon. Kiko nan lo hasi? Bai reunion òf bai para warda yegada di e yudansa gubernamental? Poniendo e kos korekto na promé lugá, nan a asistí na e reunion na Salòn di Reino. (Mateo 6:33) Miéntras ku nan tabata kanta e kantika final, nan a tende un trùk kore yega. Yudansa a kore yega ei na porta di salòn mediante nan rumannan spiritual di e komité di ousilio! E goso i gratitut di e Testigunan fiel presente na e reunion ei tabata abrumador.

Amor Ta Edifiká

Aktonan di bondat demostrá na hende pafó di e kongregashon kristian a habri vários oportunidat pa duna un bon testimonio. Un superintendente biahero den e área di Masvingo, huntu ku algun Testigu lokal, tabata predikando e bon nobo. El a mira un mucha muhé drumí abou kantu di kaminda. E Testigunan a realisá ku e mucha tabata hopi malu, ya ku e no por a papia bon i su stèm tabata tembla. E mucha muhé su nòmber tabata Hamunyari, ku na idioma shona ta nifiká “Bo No Tin Bèrgwensa?” E rumannan a bin komprondé ku ta e miembronan di su iglesia ku tabata rumbo pa un sirbishi religioso den seru, a bai lag’é kantu di kaminda. E Testigunan amorosamente a yud’é i a hib’é na un pueblito den bisindario.

Den e pueblito ei tabatin algun hende ku konosé Hamunyari, i nan a pidi su famia pa bin busk’é. E habitantenan di e pueblito a bisa di e Testigunan: “Esaki ta e religion berdadero. Esaki ta e amor ku kristiannan mester mustra.” (Juan 13:35) Promé ku e rumannan a bai, nan a duna Hamunyari e tratado Lo Bo Kier Sa Mas Tocante Bijbel? *

E siguiente siman e superintendente biahero a sirbi e kongregashon den e área kaminda Hamunyari tabata biba. E ruman a bai informá si e mucha a yega kas bon. Henter e famia tabata masha kontentu di mira é i e rumannan lokal. E mayornan di e mucha a bisa: “Boso ta praktiká e religion berdadero. Boso a salba bida di nos yu muhé ku nan a laga kantu di kaminda p’e muri.” E mayornan a puntra e miembronan di e mucha su iglesia: “Boso no a kòrda kiko Hamunyari su nòmber ta nifiká? Boso no tabatin bèrgwensa di bai lag’é kantu di kaminda p’e muri?” E Testigunan tabatin un kòmbersashon bíbliko ku e famia di Hamunyari i a laga literatura bíbliko ku nan. E famia a invitá e rumannan pa bin bèk i kondusí un estudio di Beibel ku nan. Algun miembro di famia ku tabata kontra Testigunan di Yehova a kambia nan punto di bista. Un di nan, e sua di Hamunyari, tabata lider di un iglesia den e área. E tambe a aseptá un estudio di Beibel.

Edifikando Kasnan di Adorashon

Un poëta inspirá a skirbi hopi tempu pasá: “O Dios . . . mi alma tin set di bo . . . den un  tera seku i yen di set, kaminda no tin awa.” (Salmo 63:1) Esaki ta e kaso tambe ku hopi hende di Zimbabwe! Físikamente nan ta soportá sekura, pero spiritualmente nan tin set di Dios i di su bondat. Bo por mira esaki na e resultadonan di e ministerio kristian di Testigunan di Yehova. Na aña 1980, ora ku Zimbabwe a bira independiente, tabatin rònt di 10.000 Testigu ta sirbi den 476 kongregashon. Awor, un 27 aña despues, e kantidat di Testigu aktivo a bira tripel i e kantidat di kongregashon ta kasi dòbel.

Masha poko di e kongregashonnan aki tabatin nan mes lugá di adorashon. Na yanüari 2001, apénas 98 di e mas ku 800 kongregashonnan na Zimbabwe tabatin un kas di adorashon—un Salòn di Reino—pa reuní aden. Hopi di e kongregashonnan tabata tene nan reunionnan bou di palu òf den hùtnan modesto trahá di bara, ku muraya di lodo i dak di yerba.

Grásias na donashonnan generoso i trabou boluntario diligente di e hermandat mundial kristian, e Testigunan na Zimbabwe a kuminsá ku un programa ku ta hasi posibel pa mas kongregashon haña un Salòn di Reino modesto pero digno. Hopi Testigu djafó ku tin eksperensia den trabou di konstrukshon a regla nan asuntunan di tal manera ku nan por a bin Zimbabwe i traha huntu ku e boluntarionan lokal. Un di e Testigunan lokal a skirbi: “Sinseramente nos ke gradisí tur e rumannan di asina tantu pais ku a bin Zimbabwe pa yuda traha Salònnan di Reino bunita. I boso tur sobrá, nos ke gradisí pa boso kontribushon na e Fondo di Salòn di Reino ku ta hasi e trabou aki posibel.”

Den e parti ost di e pais, e rumannan a reuní durante 50 aña bou di un palu di baobab masha grandi. Ora a bisa e ansianonan kristian ku ta bai traha un berdadero kas di adorashon, por lo ménos un di nan no por a kontené su lágrimanan. Den un kongregashon bisiña, un ansiano di 91 aña a bisa: “Ta masha hopi tempu mi tin ta sklama na Yehova pa algu manera esaki sosodé!”

Hopi hende ta komentá riba e rapides ku kua ta konstruí e edifisionan bunita aki. Un opservadó a komentá: “Boso ta konstruí den dia, pero Dios mester ta konstruí anochi!” E union i felisidat di e trahadónan tambe ta ser opservá. Te ku awe, a kompletá mas ku 350 Salòn di Reino nobo den henter e pais. Esaki ta permití 534 kongregashon reuní den Salònnan di Reino sólido, trahá di blòki.

Edifikashon spiritual sumamente importante ta sigui tuma lugá na Zimbabwe. Segun ku nos ta reflekshoná riba loke a ser lográ, nos ta sinti nos konmoví pa duna tur krédito na Yehova, e Fuente di tal bendishon. En bèrdat, ‘si Yehova no traha e kas, ta enbano esnan ku ta trah’é ta traha kansa kurpa.’—Salmo 127:1.

[Nota]

[Mapanan na página 9]

(Pa e teksto den su formato kompleto, wak e publikashon)

ZIMBABWE

HARARE

Masvingo

Gran Zimbabwe

[Plachi na página 9]

Toren forma di papurèshi

[Plachi na página 12]

Salòn di Reino nobo, Kongregashon Concession

[Plachi na página 12]

Miembronan di Kongregashon Lyndale pará pafó di nan Salòn di Reino nobo

[Rekonosementu pa Potrèt na página 9]

Ruinanan ku trapi: ©Chris van der Merwe/​AAI Fotostock/​age fotostock; potrèt chikí di toren: ©Ingrid van den Berg/​AAI Fotostock/age fotostock