Esposanan, Respetá Boso Esposo Profundamente

“Esposanan, sea sumiso na boso mes esposo.”—EFESIONAN 5:22.

1. Pakiko hopi bes ta difísil pa esposa respetá esposo?

DEN hopi pais, ora un pareha kasa, e brùit ta hasi un voto den kua e ta primintí ku lo e respetá su esposo profundamente. Sin embargo, e manera ku hopi esposo ta trata nan esposa ta yuda determiná si ta difísil òf nò pa e esposa kumpli ku e voto ei. Pero matrimonio tabatin un kuminsamentu maravioso. Dios a saka un repchi for di Adam, e promé hòmber, i a krea e muhé. Emoshoná, Adam a bisa: “Esaki ta awor wesu di mi wesunan, i karni di mi karni.”—Génesis 2:19-23.

2. Ki desaroyo tabatin relashoná ku hende muhé i matrimonio den tempu resien?

² Apesar di e bon kuminsamentu ei, un movementu ku yama emansipashon di hende muhé—un intento di hende muhé pa libra nan mes for di e dominio di hende hòmber—a kuminsá den prinsipio di añanan ’60 di siglo pasá na Merka. E tempu ei pa kada 1 esposa ku a bandoná su famia, 300 esposo a hasi meskos. Pero na kabamentu di añanan ’60 e proporshon a kambia di 1 esposa pa 100 esposo. Aworakí, aparentemente hende muhé ta papia palabra malu, ta bebe, huma i komportá nan mes inmoral ku hende hòmber. Pero hende muhé ta mas felis awor? Nò. Den algun pais, rònt di mitar di e hendenan ku ta kasa ku tempu ta divorsiá. E esfuerso ku algun hende muhé ta hasi pa mehorá e situashon di nan matrimonio a pone kosnan bira mihó òf pió?—2 Timoteo 3:1-5.

3. Kiko ta e problema básiko ku ta afektá matrimonio?

³ Kiko ta e problema básiko? Te na sierto grado, esei ta e problema ku a eksistí for di dia ku e angel rebelde, “e kolebra di antigwedat, kende ta wòrdu yamá Diabel i Satanas,” a sedusí Eva. (Revelashon 12:9; 1 Timoteo 2:13, 14) Satanas ta trose loke Dios ta siña hende. Por ehèmpel, relashoná ku matrimonio, Diabel a krea e impreshon ku e ta algu muchu estrikto i desagradabel. E mensahe ku e ta plama via medionan di komunikashon di e mundu aki—di kua e ta e gobernante—ta diseñá pa laga e instrukshonnan di Dios parse inhustu i antikuá. (2 Korintionan 4:3, 4) Pero si nos analisá ku un mente habrí loke Dios ta bisa relashoná ku e papel di hende muhé den matrimonio, nos lo mira kon sabí i práktiko e Palabra di Dios ta.

Un Palabra di Koutela pa Esnan Ku Ta Bai Kasa

4, 5. (a) Pakiko ta konsehabel pa un hende muhé ku ta pensa di kasa ta kouteloso? (b) Kiko un hende muhé mester hasi promé ku e aseptá un proposishon pa kasa?

⁴ Beibel ta duna un palabra di koutela. E ta bisa ku den e mundu aki goberná pa Diabel, asta e personanan ku tin un matrimonio eksitoso lo tin “tribulashon.” Pues ounke matrimonio ta un areglo divino, Beibel ta duna spièrtamentu na hende ku ta kasa. Relashoná ku un hende muhé kende su esposo a fayesé i ku p’esei ta liber pa bolbe kasa, un eskritor di Beibel a bisa bou di inspirashon: “E ta mas felis si e keda manera e ta.” Hesus tambe a rekomendá “esun ku por aseptá esaki” pa keda soltero. Sin embargo, ken ku ta disidí di kasa mester hasi esei “den Señor,” esta, ku un adoradó  di Dios ku ta dediká i batisá.—1 Korintionan 7:28, 36-40; Mateo 19:10-12.

⁵ E motibu pakiko foral un hende muhé mester paga tinu ku ken e ta kasa ta pasobra Beibel ta bisa: “E muhé kasá, segun lei, ta mará na su esposo.” Ta solamente si e hòmber muri òf kometé inmoralidat i e pareha divorsiá pa e motibu ei, e ta “liber di [su] lei.” (Romanonan 7:2, 3) Tal bes e sintimentu di ‘amor a primera vista’ ta sufisiente pa un romanse plasentero, pero esei no ta un bon fundeshi pa un matrimonio felis. P’esei, un hende muhé soltero mester puntra su mes: ‘Mi ta dispuesto pa drenta den un areglo den kua mi ta kai bou di e lei di e hòmber aki?’ E tempu pa konsiderá e pregunta aki ta promé ku kasa, i no despues.

6. Ki desishon mayoria di hende muhé por tuma awe, i pakiko esei ta asina importante?

⁶ Awe, den hopi pais, un hende muhé por skohe pa sea aseptá òf rechasá un proposishon pa kasa. Pero kisas e kos di mas difísil pa un hende muhé ta p’e tuma un desishon sabí den e asuntu aki, ya ku su deseo di tin un relashon íntimo i di amor ku ta posibel den matrimonio por ta hopi fuerte. Un eskritor a remarká: “Mas deseo nos tin pa hasi algu—sea ta kasa òf subi un seru en partikular—mas chèns nos tin di asumí sierto kosnan sin hasi sigur di nan, i di presta atenshon solamente na e detayenan ku ta bisa nos loke nos tin gana di tende.” Un desishon irashonal di un hende ku ta subi seru por kost’é su bida; un eskoho imprudente di un partner matrimonial por ta mes desastroso.

7. Ki konseho sabí un konsehero a duna tokante buskamentu di un futuro kasá?

⁷ Un hende muhé mester pensa seriamente riba loke biba bou di e lei di un hòmber ku ta propon’é pa kasa kuné por ta enserá. Hopi aña pasá, un mucha muhé di India a rekonosé ku modestia: “Nos mayornan ta mas grandi i mas sabí ku nos, i nan no ta ser engañá mes fásil ku nos. . . . Ta masha fásil pa ami sí hasi un fout.” E yudansa ku mayornan i otro personanan por duna ta importante. Pa hopi aña kaba un konsehero sabí a konsehá hóbennan pa siña konosé e mayornan di nan futuro kasá i tambe pa opservá kon e ta trata su mayornan i otro miembronan di su famia.

Kon Hesus A Mustra Sumishon

8, 9. (a) Kon Hesus a konsiderá su sumishon na Dios? (b) Ki benefisio sumishon por trese kuné?

⁸ Apesar ku sumishon por ta un reto, hende muhé por mir’é komo un onor, meskos ku Hesus a mira esei. Ounke sumishon na Dios a enserá sufrimentu, inkluso morto riba un staka di tormento, el a haña goso kedando sumiso na Dios. (Lukas 22:41-44; Hebreonan 5:7, 8; 12:3) Hende muhé por wak riba Hesus komo nan ehèmpel, pasobra Beibel ta bisa: “Hòmber ta e kabes di e muhé, i Dios ta e  kabes di Kristu.” (1 Korintionan 11:3) Ta bon pa nota sí ku no ta solamente ora hende muhé kasa, hòmber ta bira nan kabes.

⁹ Beibel ta splika ku hende muhé, sea kasá òf soltero, mester someté nan na e hefatura di hòmbernan spiritualmente kompetente ku ta supervisá e kongregashon kristian. (1 Timoteo 2:12, 13; Hebreonan 13:17) Ora hende muhé sigui e instrukshon di Dios pa hasi esei, nan ta pone un ehèmpel pa e angelnan den e organisashon di Dios. (1 Korintionan 11:8-10) Ademas, hende muhé kasá di mas edat, pa medio di nan bon ehèmpel i sugerensianan práktiko, ta siña muhénan mas hóben pa keda “sumiso na nan mes esposo.”—Tito 2:3-5.

10. Kon Hesus a pone un ehèmpel den mustra sumishon?

¹⁰ Hesus tabata konsiente di e balor di sumishon apropiá. Na un okashon, el a manda apòstel Pedro paga belasting na outoridatnan humano pa nan dos. Asta el a duna Pedro e plaka di belasting pa hasi esei. Pedro a skirbi despues: “Someté boso mes pa kousa di Señor na tur institushon humano.” (1 Pedro 2:13; Mateo 17:24-27) Relashoná ku Hesus su ehèmpel sublime di sumishon, Beibel ta bisa: “[El] a bandoná su mes gloria, tumando forma di un sirbidó, siendo trahá den e semehansa di hende. I hañando su mes den kondishon di hende, el a humiá su mes dor di bira obedesidu te na morto.”—Filipensenan 2:5-8.

11. Dikon Pedro a animá esposanan pa ta sumiso asta na esposonan ku ta inkrédulo?

¹¹ Ora Pedro a animá kristiannan pa ta sumiso asta n’e outoridatnan kruel i inhustu di e mundu aki, el a splika: “Boso a wòrdu yamá pa e propósito aki, komo ku Kristu tambe a sufri pa boso, lagando un ehèmpel pa boso, pa boso sigui den su pasonan.” (1 Pedro 2:21) Despues ku Pedro a deskribí kuantu Hesus a sufri i kon el a perseverá den un forma sumiso, el a animá e esposanan ku tin esposo inkrédulo: “Na mes manera, boso, esposanan, sea sumiso na boso mes esposonan, pa si algun di nan ta desobedesidu na e palabra, nan por wòrdu ganá sin palabra pa medio di e kondukta di nan esposanan, ora nan opservá boso kondukta puru i respetuoso.”—1 Pedro 3:1, 2.

12. Ki benefisionan e sumishon di Hesus a trese kuné?

¹² Kisas hende ta mira sumishon apesar di bofon i insulto komo señal di debilidat. Pero Hesus sí no a mir’é asina. Pedro a skirbi di dje: “Ora ku el a wòrdu zundrá, e no a zundra bèk; ora ku el a sufri, e no a menasá.” (1 Pedro 2:23) Algun persona ku a mira Hesus sufri a bira kreyente, por lo ménos te na sierto grado, inkluso un ladron ku tabata kologá na un staka banda di dje i e ofisial di ehérsito ku a mira e ehekushon. (Mateo 27:38-44, 54; Marko 15:39; Lukas 23:39-43) Asina tambe, Pedro a indiká ku algun esposo inkrédulo—asta esnan ku ta trata nan kasá malu—por bira kristian despues ku nan opservá e kondukta sumiso di nan esposa. I nos tin evidensia ku esei ta sosodé awe.

Kon Esposanan Por ‘Gana’ Nan Esposo

13, 14. Kon sumishon na esposonan ku no tabata Testigu a resultá benefisioso?

¹³ Esposanan ku a bira kreyente a gana nan esposo pa medio di nan kondukta kristian. Na un kongreso di distrito resien di Testigunan di Yehova, un esposo a bisa di su esposa kristian: “Mi ta suponé ku mi a trat’é na un manera brutu. Tòg e tabatin hopi rèspèt pa mi. Nunka el a brongosá mi. E no a purba fòrsa mi pa aseptá su kreensianan. E tabata kuida mi ku amor. Ora e tabata bai un asamblea, e tabata traha duru pa prepará mi kuminda for di trempan i pa kaba ku su trabounan di kas. Su aktitut a kuminsá lanta mi interes den Beibel. I awor, ata mi akí!” Sí, den un sentido, e kondukta di su esposa a ‘gan’é sin palabra.’

 ¹⁴ Manera Pedro a enfatisá, loke ta duna resultado positivo hopi bes no ta loke un esposa ta bisa sino loke e ta hasi. Esaki tabata bisto den e kaso di un esposa ku a siña e bèrdatnan di Beibel i ku tabata desididu pa asistí na e reunionnan kristian. Su esposo a grit’é: “Agnes, si bo sali di e porta ei, bo no ta drenta bèk!” En bèrdat e no a sali di “e porta ei,” pero sí di un otro porta. E siguiente anochi ku Agnes mester a bai reunion e esposo a bolbe menas’é: “Ora bo bin bèk, bo no ta haña mi na kas.” Wèl, en bèrdat e no tabata t’ei—el a bai pa tres dia. Ora e hòmber a regresá kas, su esposa a puntr’é kariñosamente: “Bo ke kome algu?” Agnes no a desviá niun tiki for di su deboshon na Yehova. Ku tempu su esposo a aseptá un estudio di Beibel, a dediká su bida na Dios, i despues a sirbi komo un superintendente ku hopi responsabilidat.

15. Ki ‘adorno’ Beibel ta rekomendá pa esposanan kristian?

¹⁵ Apòstel Pedro a rekomendá algu ku e esposanan menshoná ariba a demostrá, esta, ‘adorno,’ pero no dor di duna atenshon eksagerá na “flègtmentu di kabei” ni “bistimentu di paña luhoso.” Mas bien, Pedro a bisa: “Laga [boso adorno] ta e persona skondí di e kurason, ku e kalidat inkoruptibel di un spiritu suave i ketu, lokual ta presioso den bista di Dios.” E spiritu aki ta ser reflehá den un tono di bos i un manera di trata ku ta atraktivo i no desafiante òf eksigente. Asina un esposa kristian ta mustra su rèspèt profundo pa su kasá.—1 Pedro 3:3, 4.

Ehèmpelnan pa Siña for di Dje

16. Den ki sentido Sara ta un bon ehèmpel pa esposanan kristian?

¹⁶ Pedro a skirbi: “Promé aya e muhénan santu tambe, kendenan tabata spera den Dios, tabata dòrna nan mes, siendo sumiso na nan mes esposo.” (1 Pedro 3:5) E personanan ei a realisá ku si nan a agradá Dios dor di obedesé su konseho, esei lo a resultá finalmente den felisidat den famia i e rekompensa di bida eterno. Pedro ta menshoná Sara, e bunita esposa di Abraham, bisando ku el a “obedesé Abraham i a yam’é señor.” Sara a apoyá su esposo temeroso di Dios, kende Dios a manda bai sirbi den un pais lehano. Sara a sakrifiká un bida kómodo i asta a pone su bida na peliger. (Génesis 12:1, 10-13) Pedro a rekomendá esposanan pa sigui Sara su ehèmpel di kurashi, bisando: “Boso a bira su yunan, si boso hasi loke ta korekto sin tene miedu di nada.”—1 Pedro 3:6.

17. Pakiko Pedro lo tabatin Abigail na mente komo un ehèmpel pa esposanan kristian?

¹⁷ Abigail tabata un otro muhé balente ku a “spera den Dios,” i kisas Pedro tabatin e  tambe na mente. E tabata ‘masha diskreto’ [NW], pero su esposo Nabal sí tabata “brutu i di mala fe.” Ora Nabal a nenga di yuda David i su hòmbernan, esakinan a prepará pa eliminá Nabal i henter su famia. Pero Abigail a tuma akshon i a skapa su famia. El a pone suministro di kuminda riba buriku i a bai topa David i su hòmbernan armá na kaminda. Ora Abigail a mira David, el a baha for di su buriku, a kai na su pia, i a rog’é pa e no aktua na un manera deskabeyá. David a keda profundamente konmoví. El a bisa: ‘Bendishoná sea Yehova e Dios di Israel, kende a manda bo e dia aki pa kontra ku mi, i bendishoná sea bo disernimentu.’—1 Samuel 25:2-33.

18. Si e atenshon romántiko di un otro hòmber ta un tentashon pa un esposa, riba ken su ehèmpel e por meditá i pakiko?

¹⁸ Un otro bunita ehèmpel pa esposanan ta esun di un mucha muhé sulamita ku a keda fiel n’e humilde wardadó di bestia ku ken e tabata komprometí pa kasa. Su amor p’e a keda fuerte apesar di e atenshon romántiko di un gobernante riku. Konmoví pa ekspresá su sintimentunan pa e wardadó hóben, el a bisa: “Pone mi manera un seyo riba bo kurason, manera un seyo riba bo brasa. Pasobra amor ta mes fuerte ku morto . . . Hopi awanan no por paga amor, ni riunan lo no pasa over di dje.” (Kantika di Salomon 8:6, 7) Ohalá tur hende muhé ku ta aseptá un proposishon pa kasa ta mes desididu pa keda fiel na nan esposo i respetá esaki profundamente.

Mas Konseho di Dios

19, 20. (a) Pa ki motibu esposanan mester ta sumiso na nan esposo? (b) Ki bunita ehèmpel esposanan ta haña den Beibel?

¹⁹ Finalmente, wak e konteksto di nos teksto prinsipal: “Esposanan, sea sumiso na boso mes esposo.” (Efesionan 5:22) Pakiko e sumishon ei ta nesesario? “Pasobra,” manera e siguiente versíkulo ta bisa, “e esposo ta kabes di e esposa, meskos ku Kristu tambe ta kabes di e iglesia,” òf kongregashon. P’esei, Beibel ta urgi esposanan: “Meskos ku e iglesia ta sumiso na Kristu, asina tambe e esposanan mester ta sumiso na nan esposo den tur kos.”—Efesionan 5:23, 24, 33.

²⁰ Pa esposanan obedesé e mandamentu aki, nan tin ku studia anto imitá e ehèmpel di Kristu su kongregashon di siguidónan ungí. Por fabor, lesa 2 Korintionan 11:23-28 i ripará kiko apòstel Pablo, miembro di e kongregashon, a pasa aden kedando fiel na su Kabes, Hesukristu. Meskos ku Pablo, esposanan i tambe e restu di e kongregashon tin ku keda lealmente sumiso na Hesus. Esposanan ta demostrá esaki mediante nan sumishon na nan esposo.

21. Kiko por sirbi komo estímulo pa esposanan keda sumiso na nan esposo?

²¹ Ounke hopi esposa awe no ta gusta ètòl e idea di sumishon, un hende muhé sabí lo konsiderá e bentahanan di esaki. Por ehèmpel, den e kaso di un esposo ku no ta Testigu, sumishon na dje komo kabes den tur kos—ku no ta violá Dios su lei- i prinsipionan—por wèl resultá den e rekompensa maravioso di por ‘salba su esposo.’ (1 Korintionan 7:13, 16) Ademas, e esposa por haña e satisfakshon di sa ku Yehova Dios ta aprobá su kondukta i lo bendishon’é rikamente pa e esfuerso ku e ta hasi pa imitá e ehèmpel di su Yu stimá.

Bo Ta Kòrda?

• Dikon por ta difísil pa un esposa respetá su esposo?

• Pakiko e asuntu di aseptá un proposishon pa kasa ta asina serio?

• Kon Hesus a sirbi komo un ehèmpel pa esposanan, i siguimentu di su ehèmpel por trese ki benefisio?

[Preguntanan di Estudio]

[Plachi na página 19]

Pakiko e asuntu di disidí pa aseptá un proposishon pa kasa ta asina serio?

[Plachi na página 21]

Kiko esposanan por siña for di e ehèmpel di personahenan bíbliko manera Abigail?